Hosia 14
14
Hosia soŋe Israel tena ŋɔ bá berɛ ba Korowii be
1Israel tena, hé berɛ ba
Korowii haa dɛ tomɔ be.
He wechɔɡa ɡelɔ he
choɡli!#Ɛse 18:30
2Hé ɡel ɡɛ waa nɔ ɛ he
wesoŋa, dɛ́ berɛ ba
Korowii be.
Hé soŋo ŋɔ,
“Kpɔ ya wechɔɡa bwa
kɛ yaa,
dɛ́ sune ya nɛɛ dɛ́ lɛ yaa,
ásɛ ya kpɛɛre,
ɡɛ yaa baɡɛ nyoa la.
3Asiiria tena aa won lɛ yaa,
ya jaɡre yaa dɛ la ane
laa la aa won lɛ yaa.
Yaa berɛ yerɛ kwaa
ya ɡbabir aa kpɔ nɔɔra ɛ la,
ya voɡa kpa,
dɛkalkɛ hen Korowiirii dɔ
tedoma tɛ bilalbii.”
4Korowii ŋɔ, “Mɛɛ berɔ
lawɛ n nɛra ba n be,
dɛ́ nyin ba waa n bambile
bwa ne,
dɛkalkɛ n bandia toole
ba nɛɛ kpa.
5Mɛɛ ɛo kɛŋɔ bwaala waa nɛ
harɛ waa hola ta,
dɛ́ tɛ Israel tena,
ásɛ ba do
kɛŋɔ kpɔɡa fee ken.
Dɛ so kɛŋɔ daa lune
aa kaa harɛ bini ken,
kɛŋɔ peleme daa aa lɔ
Lɛbanɔn harɛ ta ken.
6Baa kpeɡuu dɛ́ so le,
ásɛ dɛ do wer
kɛŋɔ ɔleve daa ken.
Ba sɔɔh ɛɛ do somee kɛŋɔ
Lɛbanɔn peleme daa ken.
7Baa berɔ so
ásɛ n kpɔ nɔn tɔ ba nɛ.
Israel tena ɛɛ parɛ mea,
ásɛ ba wobɛlbwa do wer
kɛŋɔ ɡrepo daa
aa dɛ nɔnɛ kohona la.
Ba sɔn ɛɛ leo
kɛŋɔ Lɛbanɔn harɛ ta
sen ken.
8Israel tena
aa voɡaa tomɛ kpa.
Mɛɛ no ba wesoŋaa
ásɛ dɛ nyiŋi ba nɛ.
N do kɛŋɔ daa waa wola
chure ken,
n chunchule ɛɛ tɔ ba nɛɛ,
ba wer doe bwa le n be.”
9Umee wejereme ɔ?
Naate ɛɛ jemɛ waa nɔɔ.
Umee dɛɛ pese waɔ?
Naate ɛɛ no a munii.
Korowii ŋwɛnɛre toɡrɔ,
nɛra ba wa aa toɡra
dɛ teŋɛ a ta,
kɛ deŋnekpeɡ tena
dɛ lɔ naa a ta.
Currently Selected:
Hosia 14: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
