Hibru 10
10
Yeesu kpɔ o te ɛ saraha kerabeŋkpoŋ tɛ yaa
1Tɔe Mosis Mmara la tɔ wedɛɛɡa a fa aa lɔ sie dɛɛ ba bala la sie dɛ che tɛa. A fa ta wedɛɛɡa la tenten ɛɛ kɛŋɔ nɛn lileo aa wola o ɡbaɡba ɛɛ la. Anomanta, saraha Mmara la aa ɡela baa ɛ bena bɛlbwa la aa won ɡel nɛra baa dɛ ba a ne la ɛ nɛndɛɛɡa ka tonɛ. 2Dɛ saraha la fe wono ɡel ba le ba wechɔɡa ta kwaraa naa, ba fe ta a ɛɛ ɡelaa? Dɛ a fe wono dɛɛ fee ba wechɔɡa ba nɛ aa, ba liire fe aa ban ha a waa we ba nɛɛ kpa. 3Saraha laanee dɛɛ lii ba bena bɛlbwa kɛŋɔ wechɔɡ-ɛɛraa ban, 4dɛkalkɛŋɔ nae ne boohna chale aa won fee wechɔɡa nɛra nɛɛ bwa.
5A waa Yeesu aa dɛ ba harɛ ta bala la, o ŋɔ Korowii be ŋɔ,
“Konaatena ne koŋkwaa baa kpɔa
ɛ saraha dɛɛ tɛɛ la, he sie aa a ta lɛ.
Kɛ he ɛ bwadabii bɛl tɛ mɛ.#Yel 40:6-8
6He siwi aa konaatena baa dɛ fuah ambire
dɛɛ tɛɛ ne saraha baa ɛa dɛ kpɔ dɛɛ soŋe
nɛra wechɔɡa la su.
7Belaa n ŋɔ, ‘N Naa Korowii, menee la.
N balɔ dɛ́ ba ɛ he tetoowaa ɡɛ baa
chwerɛ n waa Mmara tɔn la bini la.’ ”
8Anɔ la aa tɔ sie la, o baɡlɔ kɛŋɔ konaatena ne koŋkwaare baa kpɔa ɛ saraha dɛɛ tɛ Korowii la ta o sie lɛɛ. O siwi ta konaatena baa fuah dɛ ɛ saraha dɛɛ tɛo, ne saraha baa ɛa dɛ kpɔ dɛɛ soŋe wechɔɡa la sui, kɛ dɛ Mosis Mmara ɡe fe baɡle a bwa. 9Belaa o ŋɔ, “N Naa Korowii, menee la, n balɔ dɛ́ ba ɛ he tetoowa.” A baɡlɔ kɛŋɔ Korowii teŋe sarahabena la bwa ta, dɛ kpɔ Yeesu Kristo saraha la chiɡ a naa ta. 10Yeesu Kristo aa ɛ Korowii tetoowaa dɛ kpɔ o bwadabii ɛ saraha kerabeŋkpoŋ a den tonɛ la nomanta, o laa ya bwa wechɔɡa kpɔ ya nɛ, dɛ ɡel ya ɛ Korowii nɛra.
11Juu tena sɔfore te la, tɔpere bwaa ba che ba sɔfore toma ta dɛ teŋɛ dɛɛ ɛ saraha siwibeŋkpoŋ. Kɛ a ɡɛ saraha nɔ aa won laa nɛn wechɔɡa kpɔ o nɛɛ bwa.#Kaa 29:36 12Kerabeŋkpoŋ ɡboo Yeesu Kristo te ɛ nɛwɛnyini wechɔɡa saraha, a den maɡre, aa wola hiaih kɛŋɔ o ɛ bɛl kpa, dɛ ka so nomombɔr Korowii diɡ ta. 13Belaa o do dɛɛ kpa ka tel kɛŋɔ Korowii aa ba o dɔma ne harɛ ásɛ o tiɡri ba nɛ. 14Saraha beŋkpoŋ waa ɛa dɛ fee wechɔɡa nɛra nɛɛ la ɡboo ɡela ba do kaih saŋ bɛlbwa dɛɛ la.
15Korowii Domadɛɛɡe ɡba di danseɛ baɡle yaa. O tɔ sie ŋɔ,
16“N Naa Korowii bolɔ ŋɔ,
‘Fɔo n ne baa fɔwɛ tɔpera aa lɔ sie la ta laanee nɔ.
Mɛɛ kpɔ me Mmaraa do ba bambile bini,
dɛ́ chwerɔ do ba nyuune bini.’ ”
17O berɔ ŋɔ,
“Maa ba wechɔɡa waa lii kpa bwa.”#Jer 31:34
18Anomanta, dɛ Korowii dɔɔ kpɔ ya wechɔɡa kɛ yaa aa, a ta berɛ hiah kɛŋɔ ba ɛ saraha, dɛ́ kpɔ soŋe ya wechɔɡa kpa.
19Yabala, Yeesu seo la nomanta yaa wonoo jo Boɡoroŋ Tenten la, yaa wola ɔmɛ. 20Yeesu pili ŋwɛnɛfale mkpa aa lɔ o ta tɛ yaa, asɛ ya won jo Korowii Boɡoroŋ la ta. O bwadabii ɛo kɛŋɔ pateesanjen o fa aa tɔ Korowii Boɡoroŋ Tenten la ŋwɛnɛ la. Waa sewa la, ŋwɛnɛ pilo tɛ yaa. 21Ya dɔ Sɔfonomonjen wɛɛ nyiŋi Korowii bii. 22Anomanta, Korowii aa sɔ ya wechɔɡa ta waa wola ɡelɛ ya liire ɛɛ ɛ yaa kɛŋɔ ya ɛ wechɔɡa kpa, dɛ kpɔ o nedɛɛɡa sɔ ya bwadabii nɔ, hé ɡel ya kpɔ tepoŋ ne yarada ba o be, ya bɛ tɔŋle tama bɛlbwa,#Ɛse 36:25 23dɛ́ lawɛ hwɛɡa yaa dɔa la bini kpoŋe kiŋkiŋ, dɛ́ bol baɡle nɛra yaa wola ɔmɛ tama bɛlbwa, dɛkalkɛŋɔ naate waa baɡɛ yaa nyoa la waa dɔ kasinteŋ. 24Hé ɡel ya lii ɡɛ yaa ɛ, dɛ́ won dɛɛ do dɔŋa ɡbemba, ne dɔŋa nyina ne wedɛɛɡa ɛɛ ta, 25ásɛ dɛ bɛ chema yaa dɛ cheme saŋ bɛlbwa la ɡel, kɛŋɔ bane aa ɡela la. Waa bwa jaɡa tɔpere la dɛ tel, anomanta, hɛ́ɛ do dɔŋa ɡbemba.
26Korowii aa pili ya sie ya jemɛ o kasinteŋ nɔ, dɛ ya ta saahnɔ do wechɔɡa ta dɛɛ ɛ aa, saraha bɛlbwa toole bobɛlbwa dɛ fee ya wechɔɡa ya nɛɛ kpa. 27Ɔmee taa yaa ba soɡa dɛɛ kpa Korowii Tɔpere waa dɛ ba nɛra waa bola dɛ́ pa bole, dɛ do banɔ la baa cheɡɛ o nɛɛ wechɔɡa nii aa dɛ lawɛ kohona la ta. 28Nɛn koni Mosis Mmara, asɛ nɛra banɛ ne batoro di danseɛ tiao o waa waa ɛa la ta naa, baa o nɛɛ sune, kpoe baa kpoo. 29Aah dɛ ɛrɛɛ a chɛ kɛ ba ɛ nɛn waa nyiŋi Korowii Bie la dɛɛ vaɔh? Dɛ nɛn nyiŋi fɔo la Korowii aa cheɡɛ o Bie seo ta dɛ fɔwɛ la, dɛ fee o wechɔɡa o nɛɛ la pɛɛ aa, kembɔr besoo chɛ kɛ bá tɛo wɔ? A ɡɛ nɛn la ɛ Korowii Domadɛɛɡe la waa sune o nɛɛ la nɛnhɛla. Korowii ŋɔ ó bɔɔ kem aa, o wenaale aa kanee do aa? 30Naate waa ŋɔa ŋɔ, “Menee dɔ wechɔɡa kem bɔe, menee dɛ́ bɔ nɛra ba wechɔɡa kem” la, ya jemɛ o nɛnsoo. Dɛ berɛ ŋɔ, “N Naa Korowii ɛɛ bol o nɛra waa dɛ́ pa bole.” 31Wobɛlbwa toole dɛ do ɔma, kɛŋɔ haa ɛ wechɔɡ-ɛɛ dɛ jo Korowii waa lole saŋ bɛlbwa la nɔn ta.
32Hé lii ɡɛ he fa aa doa ɡɛ saŋ Korowii waa la aa chaah he sie la. He na wahala ɡa, kɛ he ta habɔɔ leɛ. 33Ba chɛɡre heyaa dɛ ɛ heyaa hɔhɔrɔwa nɛra baah ane ta. Dɛ he dɛ cha nɛra baa dɛ ɛɛ ba hɔhɔrɔwa ane ta. 34He na nɛra baa do ba dea la sum, dɛ cha ba ba wahala nae ta. Ba lɛ he kwaa haa dɔa bwa, kɛ he sie ta kie. He sie lɛo, dɛkalkɛŋɔ he jemɔ kɛ he dɔ komɛl waa wola jaɡa dɔe dɛ ɡwaa anɔ la haa paŋa la.
35Anomanta, he bɛ ɡel he bambile chɔɡ he yaradae haa dɛ yarada Korowii Bie la. A dɔ kembɔr kohona. 36A hiaoh kɛŋɔ he lawɛ bambile dɛ́ won ɛ ɡɛ Korowii aa dɛ nyin, ásɛ dɛ won dɔ kwaa waa baɡɛ heyaa nyoa la. 37Anee Korowii Tɔn baɡle la.
“A ka tamaa ken ásɛ naate
waa dɛ ba bala la ba.
Waa biɡra ba.#Hab 2:3-4
38Nɛn o wa aa toɡra dɛ su n siwi la te la,
wɛɛ yarada mɛɛ dɛ́ dɔ mkpa.
Kɛ dɛ o le habɔɔ te naa, n sie aa o nɛɛ lɛɛ ba.”
39Ya ta nɛra baa dɛ le habɔɔ dɛɛ nyoɡre la ɛɛ. Nɛra baa dɛ yarada dɛɛ dɔ mkpa laanee yan.
Currently Selected:
Hibru 10: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
Hibru 10
10
Yeesu kpɔ o te ɛ saraha kerabeŋkpoŋ tɛ yaa
1Tɔe Mosis Mmara la tɔ wedɛɛɡa a fa aa lɔ sie dɛɛ ba bala la sie dɛ che tɛa. A fa ta wedɛɛɡa la tenten ɛɛ kɛŋɔ nɛn lileo aa wola o ɡbaɡba ɛɛ la. Anomanta, saraha Mmara la aa ɡela baa ɛ bena bɛlbwa la aa won ɡel nɛra baa dɛ ba a ne la ɛ nɛndɛɛɡa ka tonɛ. 2Dɛ saraha la fe wono ɡel ba le ba wechɔɡa ta kwaraa naa, ba fe ta a ɛɛ ɡelaa? Dɛ a fe wono dɛɛ fee ba wechɔɡa ba nɛ aa, ba liire fe aa ban ha a waa we ba nɛɛ kpa. 3Saraha laanee dɛɛ lii ba bena bɛlbwa kɛŋɔ wechɔɡ-ɛɛraa ban, 4dɛkalkɛŋɔ nae ne boohna chale aa won fee wechɔɡa nɛra nɛɛ bwa.
5A waa Yeesu aa dɛ ba harɛ ta bala la, o ŋɔ Korowii be ŋɔ,
“Konaatena ne koŋkwaa baa kpɔa
ɛ saraha dɛɛ tɛɛ la, he sie aa a ta lɛ.
Kɛ he ɛ bwadabii bɛl tɛ mɛ.#Yel 40:6-8
6He siwi aa konaatena baa dɛ fuah ambire
dɛɛ tɛɛ ne saraha baa ɛa dɛ kpɔ dɛɛ soŋe
nɛra wechɔɡa la su.
7Belaa n ŋɔ, ‘N Naa Korowii, menee la.
N balɔ dɛ́ ba ɛ he tetoowaa ɡɛ baa
chwerɛ n waa Mmara tɔn la bini la.’ ”
8Anɔ la aa tɔ sie la, o baɡlɔ kɛŋɔ konaatena ne koŋkwaare baa kpɔa ɛ saraha dɛɛ tɛ Korowii la ta o sie lɛɛ. O siwi ta konaatena baa fuah dɛ ɛ saraha dɛɛ tɛo, ne saraha baa ɛa dɛ kpɔ dɛɛ soŋe wechɔɡa la sui, kɛ dɛ Mosis Mmara ɡe fe baɡle a bwa. 9Belaa o ŋɔ, “N Naa Korowii, menee la, n balɔ dɛ́ ba ɛ he tetoowa.” A baɡlɔ kɛŋɔ Korowii teŋe sarahabena la bwa ta, dɛ kpɔ Yeesu Kristo saraha la chiɡ a naa ta. 10Yeesu Kristo aa ɛ Korowii tetoowaa dɛ kpɔ o bwadabii ɛ saraha kerabeŋkpoŋ a den tonɛ la nomanta, o laa ya bwa wechɔɡa kpɔ ya nɛ, dɛ ɡel ya ɛ Korowii nɛra.
11Juu tena sɔfore te la, tɔpere bwaa ba che ba sɔfore toma ta dɛ teŋɛ dɛɛ ɛ saraha siwibeŋkpoŋ. Kɛ a ɡɛ saraha nɔ aa won laa nɛn wechɔɡa kpɔ o nɛɛ bwa.#Kaa 29:36 12Kerabeŋkpoŋ ɡboo Yeesu Kristo te ɛ nɛwɛnyini wechɔɡa saraha, a den maɡre, aa wola hiaih kɛŋɔ o ɛ bɛl kpa, dɛ ka so nomombɔr Korowii diɡ ta. 13Belaa o do dɛɛ kpa ka tel kɛŋɔ Korowii aa ba o dɔma ne harɛ ásɛ o tiɡri ba nɛ. 14Saraha beŋkpoŋ waa ɛa dɛ fee wechɔɡa nɛra nɛɛ la ɡboo ɡela ba do kaih saŋ bɛlbwa dɛɛ la.
15Korowii Domadɛɛɡe ɡba di danseɛ baɡle yaa. O tɔ sie ŋɔ,
16“N Naa Korowii bolɔ ŋɔ,
‘Fɔo n ne baa fɔwɛ tɔpera aa lɔ sie la ta laanee nɔ.
Mɛɛ kpɔ me Mmaraa do ba bambile bini,
dɛ́ chwerɔ do ba nyuune bini.’ ”
17O berɔ ŋɔ,
“Maa ba wechɔɡa waa lii kpa bwa.”#Jer 31:34
18Anomanta, dɛ Korowii dɔɔ kpɔ ya wechɔɡa kɛ yaa aa, a ta berɛ hiah kɛŋɔ ba ɛ saraha, dɛ́ kpɔ soŋe ya wechɔɡa kpa.
19Yabala, Yeesu seo la nomanta yaa wonoo jo Boɡoroŋ Tenten la, yaa wola ɔmɛ. 20Yeesu pili ŋwɛnɛfale mkpa aa lɔ o ta tɛ yaa, asɛ ya won jo Korowii Boɡoroŋ la ta. O bwadabii ɛo kɛŋɔ pateesanjen o fa aa tɔ Korowii Boɡoroŋ Tenten la ŋwɛnɛ la. Waa sewa la, ŋwɛnɛ pilo tɛ yaa. 21Ya dɔ Sɔfonomonjen wɛɛ nyiŋi Korowii bii. 22Anomanta, Korowii aa sɔ ya wechɔɡa ta waa wola ɡelɛ ya liire ɛɛ ɛ yaa kɛŋɔ ya ɛ wechɔɡa kpa, dɛ kpɔ o nedɛɛɡa sɔ ya bwadabii nɔ, hé ɡel ya kpɔ tepoŋ ne yarada ba o be, ya bɛ tɔŋle tama bɛlbwa,#Ɛse 36:25 23dɛ́ lawɛ hwɛɡa yaa dɔa la bini kpoŋe kiŋkiŋ, dɛ́ bol baɡle nɛra yaa wola ɔmɛ tama bɛlbwa, dɛkalkɛŋɔ naate waa baɡɛ yaa nyoa la waa dɔ kasinteŋ. 24Hé ɡel ya lii ɡɛ yaa ɛ, dɛ́ won dɛɛ do dɔŋa ɡbemba, ne dɔŋa nyina ne wedɛɛɡa ɛɛ ta, 25ásɛ dɛ bɛ chema yaa dɛ cheme saŋ bɛlbwa la ɡel, kɛŋɔ bane aa ɡela la. Waa bwa jaɡa tɔpere la dɛ tel, anomanta, hɛ́ɛ do dɔŋa ɡbemba.
26Korowii aa pili ya sie ya jemɛ o kasinteŋ nɔ, dɛ ya ta saahnɔ do wechɔɡa ta dɛɛ ɛ aa, saraha bɛlbwa toole bobɛlbwa dɛ fee ya wechɔɡa ya nɛɛ kpa. 27Ɔmee taa yaa ba soɡa dɛɛ kpa Korowii Tɔpere waa dɛ ba nɛra waa bola dɛ́ pa bole, dɛ do banɔ la baa cheɡɛ o nɛɛ wechɔɡa nii aa dɛ lawɛ kohona la ta. 28Nɛn koni Mosis Mmara, asɛ nɛra banɛ ne batoro di danseɛ tiao o waa waa ɛa la ta naa, baa o nɛɛ sune, kpoe baa kpoo. 29Aah dɛ ɛrɛɛ a chɛ kɛ ba ɛ nɛn waa nyiŋi Korowii Bie la dɛɛ vaɔh? Dɛ nɛn nyiŋi fɔo la Korowii aa cheɡɛ o Bie seo ta dɛ fɔwɛ la, dɛ fee o wechɔɡa o nɛɛ la pɛɛ aa, kembɔr besoo chɛ kɛ bá tɛo wɔ? A ɡɛ nɛn la ɛ Korowii Domadɛɛɡe la waa sune o nɛɛ la nɛnhɛla. Korowii ŋɔ ó bɔɔ kem aa, o wenaale aa kanee do aa? 30Naate waa ŋɔa ŋɔ, “Menee dɔ wechɔɡa kem bɔe, menee dɛ́ bɔ nɛra ba wechɔɡa kem” la, ya jemɛ o nɛnsoo. Dɛ berɛ ŋɔ, “N Naa Korowii ɛɛ bol o nɛra waa dɛ́ pa bole.” 31Wobɛlbwa toole dɛ do ɔma, kɛŋɔ haa ɛ wechɔɡ-ɛɛ dɛ jo Korowii waa lole saŋ bɛlbwa la nɔn ta.
32Hé lii ɡɛ he fa aa doa ɡɛ saŋ Korowii waa la aa chaah he sie la. He na wahala ɡa, kɛ he ta habɔɔ leɛ. 33Ba chɛɡre heyaa dɛ ɛ heyaa hɔhɔrɔwa nɛra baah ane ta. Dɛ he dɛ cha nɛra baa dɛ ɛɛ ba hɔhɔrɔwa ane ta. 34He na nɛra baa do ba dea la sum, dɛ cha ba ba wahala nae ta. Ba lɛ he kwaa haa dɔa bwa, kɛ he sie ta kie. He sie lɛo, dɛkalkɛŋɔ he jemɔ kɛ he dɔ komɛl waa wola jaɡa dɔe dɛ ɡwaa anɔ la haa paŋa la.
35Anomanta, he bɛ ɡel he bambile chɔɡ he yaradae haa dɛ yarada Korowii Bie la. A dɔ kembɔr kohona. 36A hiaoh kɛŋɔ he lawɛ bambile dɛ́ won ɛ ɡɛ Korowii aa dɛ nyin, ásɛ dɛ won dɔ kwaa waa baɡɛ heyaa nyoa la. 37Anee Korowii Tɔn baɡle la.
“A ka tamaa ken ásɛ naate
waa dɛ ba bala la ba.
Waa biɡra ba.#Hab 2:3-4
38Nɛn o wa aa toɡra dɛ su n siwi la te la,
wɛɛ yarada mɛɛ dɛ́ dɔ mkpa.
Kɛ dɛ o le habɔɔ te naa, n sie aa o nɛɛ lɛɛ ba.”
39Ya ta nɛra baa dɛ le habɔɔ dɛɛ nyoɡre la ɛɛ. Nɛra baa dɛ yarada dɛɛ dɔ mkpa laanee yan.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.