Mumpar 46

Jekɔb Ijipt harɛ ta kaala wa

1Jekɔb kpɔ kwaa waa dɔa bwa, dɛ chiɡ ŋwɛnɛ ta, dɛ ba tel Beɛseeba. O kpoo kwaa ɛ saraha tɛ Korowii o mɛɛ Aesek aa tomɔ la bela. 2Korowii kpɔ o te baɡlo bela deera ta jwaana dɛ yerɔ ŋɔ, “Jekɔb.”

Asɛ o sɛh dɛ ŋɔ, “Menee la.” 3Belaa Korowii ŋɔ o be ŋɔ, “Menee Korowii he mɛɛwa aa tom mɛ la. Bɛ ɔmɛ kɛŋɔ he dɛ kaa Ijipt harɛ ta. Mɛɛ ɡeloo he mun ya bela taeh. 4Mɛɛ teŋɛ he nɛɛ kaa bela, ásɛ dɛ berɛ ba he naanar ne a ɡɛ Keenan harɛ nɔ ta. He dɛ ba sewaa, Josef ɛɛ lawɛɛ he sewɛ.”

5Belaa o le Beɛseeba asɛ o bii la kpɔ o ne ba ɡe bii ne haahna do kon waa do kɛŋɔ torɔɡo ba vɔwɛ pɛl jaɡre Ijipt kooro aa kpɔa tom ba ŋɔ bá kpɔ ba kpɔɔ ba la bini. 6Ba kpɔ ba kondɛɛra ne kwaa baa dɔa Keenan harɛ bwa ba Ijipt. Jekɔb kpɔ o naanar bwa ja kaa, 7o bibaala ne o bihaahna ne o naanar baa ɛ bibaala ne bihaahna bwa.

8Jekɔb bibaala baa ja o nɛɛ dɛ la Ijipt harɛ ta laanee nɔ,#Kaa 1:1-4

Rubinii ɛ o binomoa.

9Rubin bibaalaa nɔ,

Hanɔk ne Palu ne Hɛsrɔn

dɛ Kaami.

10Simeon bibaalaa nɔ,

Jɛmoɛl ne Jamin ne Ohad

ne Jakin ne Soha dɛ Swaul.

Swaul nɔ nyaa ɛ Keenan te la.

11Lewi ɡe bibaalaa nɔ,

Gɛsɔn ne Kohat dɛ Merari.

12Juda ɡe bibaalaa nɔ,

Ɛr ne Onan ne Seela

ne Pɛrɛs dɛ Sɛra. Kɛ Ɛr

ne Onan te sewɛ Keenan harɛ ta.

Pɛrɛs bibaalaa nɔ,

Hɛsrɔn ne Hamul.

13Isaaka ɡe bibaala nɔ,

Tola ne Pua ne Jasub

dɛ Simron.

14Sebulon ɡe bibaalaa nɔ,

Sered ne Ɛlɔn dɛ Jaleel.

15A ɡɛ bibaala nɔɔ Lea lolɛ tɛ Jekɔb ɡɛ saŋ baa soɡe Mɛsopoteemea harɛ ta Daena waa ɛ o bihaah la habɔɔ. Dɛ o bihaahna ne bibaala dɛ naanar o ne Lea aa dɔa la bwa lɔ fifraatoro dɛ batoro.

16Gad ɡe bibaalaa nɔ,

Sefon ne Haɡi ne Suni

ne Ɛsbɔn ne Ɛre ne Arodi

dɛ Areli.

17Aasa ɡe bibaalaa nɔ,

Imna ne Isva ne Isvi dɛ Bɛrea.

Sera ɡee jaa dɛ ɛ bihaah.

Bɛrea ɡe bibaalaa nɔ,

Heba ne Malkeɛl.

18A ɡɛ bibaala fi dɛ banumɛl nɔɔ Silpa waa ɛ Lea tolo la lolɛ ba ɛ o ne Jekɔb naanar. Onee Laban lawɛ tɛ o bihaah Lea tolo la.

19Jekɔb haah Rakɛl

ɡe bibaalaa nɔ,

Josef ne Bɛnjamen.

20Josef aa lɔ Ijipt la,

o lolɛ bibaala banɛ.

Banee Manasɛ ne Efrem.

Haah o ne waa lol ba la

sɔne Asenat waa ɛ

sɔfo Pɔtefɛra bihaah,

dɛ o soɡe On.

O sɔn bɛl ɡee Hɛleopɔles.#Mum 41:50-52

21Bɛnjamen ɡe bibaalaa nɔ,

Bɛla ne Bɛka ne Asbɛl

ne Gɛra ne Naaman

ne Ehi ne Rɔs ne Mupim

ne Hupim dɛ Aad.

22A ɡɛ bii nɔɔ Rakɛl ne Jekɔb lolɛ. Ba lɔ fi dɛ banaarɛ.

23Dan ɡe bibaalee nɔ,

Husim.

24Naftale ɡe bibaalaa nɔ,

Jaseel ne Guni ne Jesa

dɛ Silem.

25A ɡɛ bibaala banuanɛ nɔɔ Bilha waa ɛ tolo Laban aa lawa tɛ o bihaah Rakɛl la lolɛ, ba ɛ Jekɔb bibaala ne naanar.

26Jekɔb naanar baa teŋɛ o nɛɛ dɛ la Ijipt la lɔ fifraanumɛl dɛ banumɛl. O bibaala haahna te ta jae. 27Josef lolɛ bibaala banɛ Ijipt. Anomanta, dɛ ba jao waa, dɛ Jekɔb ne o bii dɛ o naanar baa la Ijipt la lɔ fifraanuanɛ.

28Baa dɛ tel Ijipt la, Jekɔb tomɛ Juda ŋɔ ó la ka ŋɔ Josef be ŋɔ ó ba tɔ o sie dɛ́ kaa o ne Gosen harɛ. Baa tel bela la, 29Josef jo o kon waa do kɛŋɔ torɔɡo la bɛl bini, asɛ dɛ ka cheme o mɛɛ. Baa chema la, Josef ɡbaaro pɛl o te dɛ wi taeh.

30Belaa Jekɔb ŋɔ Josef be ŋɔ, “Taraken maa nae dɛ jemɛ kɛŋɔ he ta soɡe le nɔ, mɛɛ won sewɛ name.”

31Asɛ Josef ŋɔ o dɔɔranar ne o mɛɛ lolanar baa kaa la be ŋɔ, “A chɛ kɛ ń la ka ŋɔ kooro be ŋɔ n dɔɔranar ne n mɛɛ lolanar bwa baa soɡe Keenan harɛ ta la ba n be. 32Mɛɛ ŋɔ o bee ŋɔ he ɛ peteɡra dɛɛ nyiŋi kondɛɛra ta, anomanta, he ba he kondɛɛra ne he kwaa haa dɔa bwa ne. 33Dɛ Kooro baa yerɛ heya dɛ bɔɔ toma haa dɛ ɛ wa aa, 34hé nyiŋi kɛrɛdɛ dɛ́ ŋɔ o be ŋɔ haa ira bwa, kondɛɛra ta nyiŋa toma ɡboo hɛɛ ɛ ɡɛ ya naawa aa ɛa wubwa la. O no ɡɛ naa, wɛɛ ɡeloo he so Gosen harɛ bonɔ.” Dɛ Ijipt tena kii peteɡra, a waa Josef ŋɔ ba ŋɔ ɡɛ la.

Currently Selected:

Mumpar 46: mzw

Highlight

Copy