Ɛsekeɛl 6

Korowii bol Israel harɛ bwejena chɔɡa wa

1Korowii berɔ bol waa men Ɛsekeɛl be ŋɔ, 2“Nɛwɛnyini bie, kpɔ sie pa Israel bwejena la ta, dɛ́ ka bol chɔɡa men Korowii aa dɛ ba a chɔɡa dɛ́ ŋɔ, 3‘He bwejena ne deŋɡarere, hé no Nemenɛ Korowii wa. O ŋɔ o dɛ ba laa ne dɛ́ ba chɔɡ bwejena ne deŋɡarere, ne bwea ŋwɛnɛre aa chɔ a baahna, ne fɛlembɔjena voɡare aa lɔ a ta nɛra ɛɛ toma la bwa. 4Wɛɛ paɡre kwaa haa dɛ ɛ saraha a ta ne kwaa haa dɛ fuh daawiile a ta bwaa, ásɛ dɛ kpoo nɛra la ba voɡare la sie. 5Wɛɛ pa Israel tena baa serewa la lalaa bil ba voɡare sie, dɛ́ berɛ pa ba hoɡa bar kwaa baa dɛ ɛ saraha a ta la. 6Israel tena bwɛjena ne bela baa soɡa bwa dɛ́ ba chɔɡa. Kwaa baa dɛ ɛ saraha a ta, ne ba voɡare bwa ɛɛ paɡro burbur ken ja bɔra baa dɛ fuh daawiile ta, ásɛ kwaa baa ɛa bwa aa lee do kpa. 7Nɛra ɛɛ serewoo chɔ bobɛlbwa, ásɛ banɔ la baa ka la jemɛ kɛŋɔ onee Korowii.

8Wɛɛ ɡeloo he bini bane dɔ he nyu, bá lawɛ heyaa peɡre kaa harɛre ta. 9Banɔ la baa laɡ ba kaa harɛfala ta la, belaa baa ba liira kɛŋɔ ba fa ɛo wechɔɡa, dɛ vɛh o waa ta teŋa, dɛ kaa tomɛ voɡa. Ásɛ a we ba nɛ, wechɔɡa ne waa Korowii aa kia ba ɛ la wa. 10Anee dɛ́ ɡel ba jemɛ kɛŋɔ onee Korowii, kaeh waa kah ba la, aahra laa o aah ba pɛɛpɛɛ.’ ”

11Kenii Nemenɛ Korowii ŋɔ, “Ɛsekeɛl, lɔ kpaŋa dɛ́ ɡɔɔ nakpale lɔ harɛ, dɛ́ wi lokua ne, Israel tena kii waa baa ɛa la wa. Baa serewe laa ne lɔr dɛ weechɔɡa taa. 12Banɔ la baa lɔ bojaŋa la, weechɔɡaa dɛ́ kpoo ba, ásɛ banɔ la baa bɛna la serewe laa ta. Banɔ la baa kaa la, lɔr ɛɛ kpo ba ɡee ba serewe. Gɛɛ mɛɛ ba ɡela ba na n bandia kohona. 13Nɛra ɛɛ serewoo chɔ bobɛlbwa, ba voɡare ne kwaa baa dɛ ɛ saraha a ta bwa, ne deŋɡarere ta ne bwejena dor ne dajena mune, dɛ bela baa fuh daawiile a sɔɔh aa soma dɛɛ tɛ ba voɡare bwa. 14Kpelaa, mɛɛ tɛr n nɔnee pa ba nɛ, dɛ́ chɔɡ ba harɛ. Mɛɛ ɡeloo ó chɔ pɛɛ le pua hɛŋle ɡbo harɛ la ta kaa bwɛɛ bɛl baa dɛ yerɔ Dibla, ne bobɛlbwa baa soɡa. Ásɛ ba jemɛ kɛ menee Korowii.”

Currently Selected:

Ɛsekeɛl 6: mzw

Highlight

Copy

Compare