Ɛsekeɛl 28
28
Korowii bol Taaya kooro chɔɡa wa
1Korowii bol waa men Ɛsekeɛl be ŋɔ, 2“Nɛwɛnyini bie, bol Taaya kooro be ŋɔ men Nemenɛ Korowii ŋɔ,
‘He dɛ ɡɔɔ he te
dɛ ŋɔ he ɛ voɡ,
he dɛ so voɡ kara ta
mpo bare cheme.
Kɛ nɛwɛnyinii hen, he ta voɡ ɛɛ,
he dɛ lii kɛ he ne voɡ
wejema kɛrɛdɛ.
3He wejema ɡwaa Danɛl aa?
Wobɛlbwa toole he nɛɛ
dɛ sɔh aa?
4He cheɡɛ he wejema ta
dɛ dɔ kondɔɔh,
suuɡaswɛm ne suuɡapoŋa
bwa su he be.
5He cheɡɛ he bona dii wejema
kohona ta,
dɛ dɔ kondɔɔh kohona.
He kondɔɔh nomanta,
he nyu bini dɛ do he som.
6Anomanta, he dɛ lii
he te wejereme kɛŋɔ voɡ.
7Mɛɛ ɡeloo nɛŋhɔɔhra
baa ɛ harɛre nɛra
ba nyu bini aa kpeɡa ɡwaa
harɛre bwa nɛra ba yoi.
Baa pamɛ ba kerii,
dɛ́ chɔɡ kwaa haa cheɡɛ
he wejema ta dɔ
dɛ do wer la.
8Baa kpoe dɛ́ kpɔe ta mpo ta
kɛŋɔ baa huɡe la ken.
9Hɛɛ won ŋɔ he ɛ voɡ
nɛra baa dɛ ba ba kpoe
la be naa?
Nɛwɛnyinii hen, he ta voɡ ɛɛ
nɛra baa kpoe la nɔn ta.
10Hɛɛ sewɔɔ kɛŋɔ nyoate ken,
nɛŋhɔɔhra baa wola
men tomɛ nɔɔra taa
hɛɛ ba sewa.
Men Nemenɛ Korowiirii bola.’ ”
11Korowii bol waa n be ja ŋɔ, 12“Nɛwɛnyini bie, taa Taaya kooro wiile, waa aa dɛ ba o nɛɛ bala la wa, dɛ́ ŋɔ men Nemenɛ Korowii ŋɔ,
‘Henee wera nɛra bwa bini
ka tonɛ bá hweli,
he dɔ wejema kohona
dɛ do wer ka tonɛ.
13Dɛ he fa lɔ Eden
bodɛɛɡe men Korowii
aa du daa la,
dɛɛ do kwaa aa wera kɛŋɔ,
bwedɛɛɡa bwa soo siwi
baa dɛ yera rubi, ne topas,
ne emirad, ne kresolet,
ne onis, ne jasepa,
ne safaaya, ne tɛɛkoes
dɛ bɛrel.
Awola baa tae laanee
ba ɛ ɡɛ kwaa nɔ
ne suuɡaswɛm kwaa tɛɛ.
14N le Kerob cheɡ wɛɛ daahne.
Dɛ he soɡe n bwejen
waa do ɡoroŋ la ta,
dɛɛ valɛ bwedɛɛɡa aa dɛ
nyɛɡle baah ta.
15He waa fa toole n waa bini
le awola maa tae
mɔɔ he baa ɛ wechɔɡa.
16He sie fa beɡrɔ hɛɛ di bona,
a che a ta he ɛ naɡrenyini,
dɛ ɛ wechɔɡa.
Asɛ n doŋi le n bwejen
waa do ɡoroŋ la ta,
dɛ ɡel Kerob la waa
dɛ daahne la le
he ne bwea aa dɛ nyɛɡle
la baah ta.
17He wer haa doa la
ɡelɔ he ɛ mbarafo,
dɛ chɔɡ he wejema,
he nyanyini la wa.
Anomanta,
n taɡɛ ta harɛ a wa,
ásɛ koranar na a ja ba.
18He wechɔɡa ne kasinteŋ
bɛ dii he bona dii ta
ɡelɔ he kpɔ doŋa kah
deene haa dɛ tomɛ a bini.
A waa n ɡel nii ba le bwɛjen
la ta, dɛ fuh o bwa dɛɛboo.
Nomɛlbwa na ɡɛ bwɛjen la
aa fuah dɛ berɛ tɔɔ.
19Harɛre nɛra baa jemɛ bwa
bwara yɔr he wa,
he chɔɡɔ aa wola were
kwara, baa hen na kpa.’ ”
Korowii bol bwɛjen Sidon tena chɔɡa wa
20Korowii bol waa men Ɛsekeɛl be ŋɔ, 21“Nɛwɛnyini bie, eɡle sie ta bwɛjen Sidon dɛ́ bol waa aa dɛ ba o ta bala, ŋɔ 22men Nemenɛ Korowii ŋɔ,
‘Bwɛjen Sidon, n ne he dɔɔ.
He nɛɛ mɛɛ ba cheɡa dɔ
jirima.
He nɛra ɛɛ jemɔɔ kɛŋɔ
menee Korowii
ɡɛ saŋ maa ba tɛr
ba deŋne,
dɛ́ baɡle kɛŋɔ n do ɡoroŋ la.
23Mɛɛ kpɔ weechɔɡaa ba ta
he nɛɛ dɛ́ ɡel chal ɛɛ palɛ
he fɔɡbaahna.
Nɛra ɛɛ serewoo chɔ
bobɛlbwa,
keri nee baa ba ba kpoora,
ásɛ he jemɛ kɛŋɔ
menee Korowii.
24Bwɛɛre aa bar Israel cheme, ba ne baa wola somɛ, baa lii ba ne wechɔɡa, dɛ do kɛ jabalnadaŋɛre ne sɔɔhne tɛɛ ba la aa lee do kpa. Baa jemɔɔ kɛŋɔ menee Nemenɛ Korowii.’ ”
25Nemenɛ Korowii ŋɔ, “N baa boa Israel tena maa lɔ ba peɡre harɛre ta bwa nyoa tonaa, harɛre nɛra bwa ɛɛ jemɔɔ kɛŋɔ n do ɡoroŋ. Israel tena ɛɛ so ba ɡbaɡba harɛ maa kpɔa tɛ n bonɔɔ Jekɔb la taa. 26Baa so deŋnesɔɔhna taa, dɛ́ do deene, dɛ́ parɛ daa kooni. Mɛɛ tɛr nɛra baa ɛɛ ba hɔhɔrɔwa la deŋnee, ásɛ Israel tena dɔ ba te. Ásɛ ba jemɛ kɛŋɔ menee Korowii baa dɛ tom mɛ la.”
Currently Selected:
Ɛsekeɛl 28: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
