Ɛsekeɛl 24
24
Vii baa kpɔa dɛɛ daa kwaa wa
1Baa lawɛ yaa laa ta kaa Babelɔn bene anuanaarɛ, korobie fi tɔpera fi ta habɔɔ la, Korowii bol waa men Ɛsekeɛl be ŋɔ, 2“Nɛwɛnyini bie, bɔ fini tɔpere nɔ deeti bil, dɛkalkɛŋɔ Babelɔn kooro kpɔ o laa tena dɛɛ ba ba tɔ Jerusalam tena do fini. 3Kpɔ sɛɡla bol waa chaɡle Israel deŋnekpeɡ tena la be ŋɔ, men Nemenɛ Korowii ŋɔ,
‘Hé ɛ nee do vii bini,
dɛ́ kpɔ chɔŋɛ nii ta.
4Lawɛ pee waa wera
dɛ́ chɛwɛ o ola do o bini,
hé pa andɛɛɡa la,
a vaama ne a hwie.
Kpɔ hoɡa bɔra aa wera ɡe ja
a ta.
5Kpɔ pee ola la bela
aa wera kɛrɛdɛ.
Mar nii dɛ́ pa ola la do vii
la bini,
dɛ́ kpɔa chɔŋɛ nii ta.’
6Nemenɛ Korowii ŋɔ,
‘Bwɛjen Jerusalam nɛŋkpoa
aa lɔ o ta kohona la
bwɛɛlɛ.
O do kɛŋɔ vii o bini
aa deera ken,
o doŋa la aa wola le.
Tɔɔ ola baa chɛwa do o
bini la beŋkpoŋa beŋkpoŋa
le ó chɔ pɛɛ.
7Ba kpoo nɛra bwɛjen la ta,
ba chale chɔ bwea ta,
harɛpɛɛ ta laa a chɔ,
ásɛ teera tɔ a ta.
8N ɡelɔ chale la chɔ ɡɛ
ba ta a ta tɔe,
ásɛ n naa n baah di
kohona,
dɛ́ yoo ba bɔ kem.’
9Anomanta, Nemenɛ Korowii ŋɔ,
‘Bwɛjen nɛŋkpoa
aa lɔ o ta la bwɛɛlɛ.
N ɡe ɛɛ pa damaraa bil
a daŋɛ.
10Hé pa daa ba ja kohona
ásɛ dɛ huuh nii do a ta.
Hé daa ola la kɛrɛdɛ,
dɛ́ do kwaa a ta a do som,
hé fuh hoɡa la.
11Hé kpɔ buni vii ɡbo
chɔŋɛ ninhɔla ta,
dɛ́ ka tel kɛŋɔ
waa bea dɛ swɛɛ,
ásɛ doŋa bɛlbwa aa lɔ
o bini la fuh,
ó berɛ do wer kohona.
12N ɛ wobɛlbwa dɛ ba kahonɛ,
doŋa aa wara
dɛ do o bini la ta wone le.
Hale nii la ta wone le a ne.
13Jerusalam tena, he wedoŋa la ɡelɔ he kah doŋa. N takapɔ kɛŋɔ ń laa he doŋa bwa kpɔ he nɛ, kɛ n ta wone. Aa won le he nɛ, nemenɛ haa na n bandia kohona la bwa mɔɔ.
14Men Nemenɛ Korowii bola. Saŋ telo kɛŋɔ ń ɛ waa maa ɛ name. Maa sie laa kpɔ he wechɔɡa ta, maa he sum ɡee na. Hɛɛ dɔ deŋnetɛraa, waa haa ɛa la wa. Men Nemenɛ Korowiirii bola.’ ”
Ɛsekeɛl haah seo
15Korowii berɔ bol waa n be. 16O ŋɔ, “Nɛwɛnyini bie, n dɛ ba nɔn uma lɔ nɛn haa dɛ nyinu kohona la dɛ́ kpoo. Bɛ waane bol kɛɛ dɛ́ wi. 17Wi dɛɛ do he bini. Bɛ wi tɛ lale la, bɛ nakpapɛɛ valɛ, bɛ yal waa vɔwɛ he nyu ta laa kpɔ á baɡle kɛ he dɛ ɛ lwe. Bɛ kon kpɔ tɔ he nyoa, bɛ kondikwaa nɛra baa dɛ ɛ lwe aa dɛ di la ane di.”
18Men Ɛsekeɛl, n bol waa nɛra la be chɔɔbɔr, asɛ jɔmɔra la n haah sewɛ. Tɔɔ aa pera chɔɔ la, n ɛ ɡɛ Korowii aa do mɛ la.
19Belaa nɛra la bɔɔ mɛ ŋɔ, “Haa won baɡle yaa a ɡɛ waa nɔ mun aa?”
20Asɛ n ŋɔ ba be ŋɔ, “Nemenɛ Korowii ŋɔ ń bol he Israel tena be kɛŋɔ, 21o dɛ ba o Dea haa dɛ ɛ mbarafo dɛɛ maŋkura he te o waa la chɔɡa. O wer he sie ta hɛɛ nyinu. Wɛɛ ɡeloo ba kpoo he bibaala ne bihaahna haa ɡel ba habɔɔ Jerusalam la laa ta. 22Hé ɛ ɡɛ maa ɛa nɔ. Haa kwaa kpɔ tɔ he nyoo, haa kondikwaa nɛra baa lɔ lwe ta aa dɛ di la ɡee di. 23Hɛ́ ɡel yapondɛɛɡa la vɔwɛ he nyuune, hé do naŋɡaware, dɛ bɛ wi, hɛɛ ɡwaŋɔɔ he wechɔɡa nɔ wa, bɛlbwa sɔh dɛɛ wi. 24Hé nyiŋi men Ɛsekeɛl dɛ́ kpɔ hweli wa, dɛ́ ɛ ɡɛ maa ɛa la. Anee dɛ́ ɡel he jemɛ kɛ onee Nemenɛ Korowii.”
25Korowii ŋɔ, “Nɛwɛnyini bie, mɛɛ chɔɡ n Dea baa dɛ ɛ mbarafo o waa o do wer ba siwi ta, ba sie ɛɛ lɛ o ta laanee. Mɛɛ lawɛ ba bibaala ne ba bihaahna bwa ɡee ja. 26Awola tɔpere maa ɛ ɡɛ waa nɔ la, nɛn waa wona le a nyoa la ɛɛ bao, dɛ́ ba bol a waa baɡle.#Ɛse 33:21-22 27Awola tɔpere la, mɛɛ ɡeloo he berɛ won waa bola, ásɛ he ne naate bol wa. Gɛɛ aa ba ɛɛ ba nyiŋi dɛ́ kpɔ hweli waa dɛ́ jemɛ kɛŋɔ menee Korowii.”
Currently Selected:
Ɛsekeɛl 24: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
