Ɛsekeɛl 22

Jerusalam tena wechɔɡa wa

1Korowii bol waa men Ɛsekeɛl be ŋɔ, 2“Nɛwɛnyini bie, hɛɛ bol Jerusalam nɛŋkpoa nɛra aa suu nɔ waa yaa? Bol o nɛra we-ɛɛla maa kia la waa ba be. 3Ŋɔ ba be ŋɔ, nɛra baa kpoora dɛ teŋɛ voɡa ta, dɛ kpɔ doŋa kah ba te nomanta, ba deŋnetɛra tɔpere dɛ ba. 4Jerusalam tena di bolchɔɡe ba nɛra baa kpoora la wa, dɛ kah doŋa voɡa baa ɛa la wa. Anomanta, ba deŋnetɛra tɔpere telo. A waa n ɡel harɛre ta nɛra ɛɛ mam ba dɛ bwa ɛɛ nyiŋ ba dɛɛ vah la. 5Harɛre aa bɛna ne anɔ la aa lɔ bojaŋa bwa nɛra dɛ mam ba, ba wesaɡasaɡare la wa.

6Na ɡɛ Israel koranar aa cheɡɛ ba ɡbaɡba kpeɡri ta dɛɛ kpoo nɛra! 7Nomɛlbwa toole bwɛjen la ta dɛɛ duu o nya ne o mɛɛ. Ba dɛ faah nɛŋhɔɔhra, baa luhaahna ne bilalbii ɡe waa lii. 8Ba siwii aa n kwaa aa do ɡoroŋ la su, dɛɛ chɔɡ n Ona Tɔpera. 9Ba bini bane teŋe nyosone dɛ ɡel baa kpoo ba bala, bane ɡe ɛɛ di voɡa kwaa deŋɡarere ta, bane ɛɛ bɔ jwamane. 10Ba bini bane ɡe lawɛ ba mɛɛnanar haahna dɛɛ chɔ. Bane ɡe ɡuɡri haahna ba bwara aa chɔɡa ba ne baa chɔ. 11Bane dɛ bɔ jwamane, bane ɡe lawɛ ba bii haahna, kɛɛ ba nimambii ba ne baa pɛ nya ɡbo, kɛɛ mɛɛ dɛɛ chɔ. 12Ba dɛ yawɛ ba bini bane sen baa kpoo nɛra. Bane ɡe dɛ́ kemɛ ba bala Israel tena suuɡa, dɛ́ chɔŋɛ a nee dɛ́ che a ta ɛ dɔɔhna. Ba soh n waa la kwara. Men Nemenɛ Korowiirii bola.

13Mɛɛ lɔ kpaŋa bandia nee dɛ kooɡa ta ba nɛ, ŋwɛɛ ne nɛŋkpoa la wa. 14Baa wono che n deŋnetɛra nyoa dɛ ta dɔ bokpeɡa awola maa ba tɛr ba deŋne la kɛɛ? N bol wa aa, n dɛ teŋɛ a ta. Men Nemenɛ Korowiirii bola. 15Mɛɛ lɔ baa peɡre harɛre ne bwɛɛre ta, ásɛ dɛ ɡel ba wechɔɡa bwa ba a jaɡa. 16Gɛɛ dɛ ɡel harɛre ne bwɛɛre baa kaa a ta nɛra ɛɛ nyiŋi ba nyubaahna, ba siwi aa ban tɔɡɛ, ásɛ ba jemɛ kɛŋɔ menee Korowii.”

17Anee Korowii berɛ ŋɔ n be ŋɔ, 18“Nɛwɛnyini bie, Israel tena waa ta tɔnɔ bɛlbwa dɔe dɛ tɛ mɛ kɛŋɔ ba yon kpɔ suuɡapoŋ do nii ta, dɛ mwɛɛlo asɛ ayaawa ne buni, dɛ kpana yon le a ta kɛ doŋa aa wola tɔnɔ dɔe la. Gɛɛ Israel tena ɛ doŋa tɛ mɛ. 19Anomanta, men Nemenɛ Korowii ŋɔ, ‘Haa wola tɔnɔ bɛlbwa dɔe tɛ mɛ nomanta, Jerusalamee mɛɛ ba he nyoa boara. 20Gɛ ba yon mwɛɛ suuɡapoŋa ne ayaawa, ne buni dɛ kpana la, ɡɛɛ n banfuih ɛɛ ba heyaa mwɛɛla bwɛjen la bini. 21Kpela, Jerusalamee mɛɛ ba he nyoa boara, dɛ́ mar nii do he lɔɡa n bandia ne, dɛ́ mwɛɛ heya. 22Gɛ baa dɛ mwɛɛ suuɡapoŋ nii ta la, ɡɛɛ mɛɛ ba heyaa mwɛɛla Jerusalam, ásɛ he jemɛ kɛŋɔ men Korowii, n kpɔ n bandia kohona ba he nɛ.’ ”

23Korowii berɔ bol waa n be ja. 24O ŋɔ, “Nɛwɛnyini bie, bol Israel tena be ŋɔ ba wechɔɡa ɡelɔ harɛ la kah doŋa, anomanta, n baah diu mɛɛ ba ba deŋne tɛra. 25Ba koranar do kɛŋɔ nyujentena yon lawɛ ola dɛɛ kaa dɛɛ kɔɡre la. Ba dɛ kpoo nɛra, dɛ pa ba suuɡare ne ba kondɔɔh bwa, a che a ta luhaahna warɛ o ta. 26Sɔfore ɡe vɛh me Mmarare ta teŋa. Baa waa aa do ɡoroŋ, ne anɔ la aa wola ɡoroŋ bini peɡri. Baa waa aa wera, ne anɔ la aa wola were ɡe baɡle, dɛ ɡel n Ona Tɔpera ɡe dii, a che a ta Israel tena vɛɛh mɛ. 27Israel nomonome do kɛŋɔ ɡboli dɛɛ peeɡe ola aa kpoora la. Nɛŋkpoa taa ba che dɛɛ nyin kondɔɔh. 28Ba keamechɔɡa laa sie kpɔ ɡɛ wechɔɡa nɔ ta, kɛŋɔ baa kpɔ fula lɔ dekɔɔh danjwɛ ta, dɛ tɔ o peɡra ta ken. Ba won nyosone teŋa ŋɔ ba na waane wepila ta, dɛɛ baɡle ŋɔ waane ɛɛ bao, dɛɛ neɡre nɛra ŋɔ men Nemenɛ Korowii bee a le, dɛ n laa bol wobɛlbwa. 29Harɛ la ta, nɛra ɛɡre nɛra dɛɛ lɛ ba kwa, dɛɛ faah nɛŋhɔɔhra ne nyaara, baa waa bolɛ dɛɛ tɛɛ ba aŋwɛnɛ ta.

30N nyiŋo kɛŋɔ mɛɛ na nomɛl ba binii ó ba ma Jerusalam danjwɛɛ la bela waa kua la, dɛ́ che ba naa ta, dɛ́ lɛ bwɛɛ la ta, ásɛ n fee ɡel o chɔɡa, kɛ n ta nomɛlbwa nae.#Jer 5:1 31Mɛɛ kpɔ n banfuih ba ta ba nɛɛ kohona, dɛ́ chɔɡ ba, ba waa baa ɛa la wa. Men Nemenɛ Korowiirii bola.”

Currently Selected:

Ɛsekeɛl 22: mzw

Highlight

Copy

Compare