Kaala 5

Mosis ne Arɔn Ijipt kooro be laŋa

1A habɔɔ la, Mosis ne Arɔn la kooro la be dɛ ka ŋɔ o be ŋɔ, “Korowii Israel tena aa dɛ tomɔ la ŋɔ, ‘Tɛ n nɛra ŋwɛnɛ ba kaa, ásɛ dɛ ka di Tɔpejen tɛ mɛ pua hɛŋle ɡbo harɛ la ta.’ ”

2Anee kooro la ŋɔ, “Umee Korowii n duuru, dɛ́ tɛ Israel tena ŋwɛnɛ ba kaalɔ? Maa Korowii bɛlbwa jemɛ, anomanta, maa ban ŋwɛnɛɛ tɛ ba kaa.”

3Asɛ Mosis ne Arɔn chaŋe ŋɔ, “Korowii Hibru tena aa dɛ tomɛ la ba ya be, anomanta, tɛ yaa ŋwɛnɛ ya ka ɡaaɡe tɔpera atoro pua hɛŋle ɡbo harɛ ta, dɛ́ ka kpoo kwaa ɛ saraha tɛ Korowii yaa dɛ tomɔ. Dɛ ɡɛ laa, wɛɛ kpɔ laa kɛɛ weechɔɡaa ba kpoo yaa.”

4Belaa Ijipt kooro ŋɔ Mosis ne Arɔn be ŋɔ, “Ɛrɛɛ hɛɛ nyin he kpɔ ba kaa, ásɛ ba ɡel toma baa dɛ ɛ nɔɔ? Ba berɛ ba kaa ba toma ta! 5A ɡɛ nɛra nɔ warɔ ɡwaa Ijipt tena harɛ nɔ ta, asɛ he berɛ dɛɛ nyin ba ɡel toma ɛɛ la!”

6Awola tɔpere la tenten la, kooro do Ijipt tena baa dɛ nyiŋi Hibru tena baa ɛ yoma dɛ chɔ ba bala nyoa la be ŋɔ, 7“He bɛ kpɔɡhola nɛra la aa kpɔa dɛɛ teŋe berekese la tɛ kpa. Hé ɡel ba ɡbabir kaa nyin ba kpɔɡa, 8kɛ dɛ ta ɛɛ teŋe ɡɛ tenten baa dɛ teŋe wubwa la. He bɛ ane laa kpɔ a ta. Ba ɛ nɛra ba sie aa dɛ hwah toma ɛɛ, a waa baa wi ŋɔ, ń ɡel ba la ka kpoo kwaa ɛ saraha tɛ Korowii baa dɛ tomɔ la. 9Hé tɛɛ ba tomkpeɡa aa ɡwaa wubwa kwaa la, ásɛ ba bɛ bɔr dɔ dɛɛ no nyosonteŋna wobol.”

10Belaa Ijipt tena baa dɛ nyiŋi tom-ɛɛra la nɛ, ne Hibru tena baa chɔ ba bala nyoa la le dɛ ka ŋɔ nɛra la be kɛŋɔ kooro ŋɔ, “Maa heyaa kpɔɡholee tɛ kpa. 11Hé ɡbabir ka ɡaaɡe nyin he kpɔɡa. Kɛ ɡɛ tenten maa maɡa tɛ heyaa wubwa laanee hɛɛ ba ɛɛ.” 12Asɛ ba lɔ jo Ijipt harɛ ta bwa dɛ ka nyin kpɔɡa la. 13Dɛ Ijipt tena baa dɛ nyiŋi tom-ɛɛra la nɛɛ la teŋɔ dɛɛ do ba ŋɔ, “Hé do sie dɛ́ ɛ toma ɡɛ wubwa yaa dɛ tɛ heyaa kpɔɡa hɛɛ ɛ tɔpere bɛlbwa la.” 14Asɛ Ijipt nomonome la lɔɔ Hibru tena baa ɡela ba chɔ ba bala la nyoa la. Dɛ bɔɔ ba ŋɔ, “Ɛrɛɛ he ta wone ɛ toma ɡɛ he fa aa dɛ ɛ wubwa la nɔɔ?”

15Anee Israel tena baa ɡela ba chɔ ba bala nyoa la la Ijipt kooro be dɛ ka ŋɔ, “N naa kooro, ɛrɛɛ he ɛ yaa ɡɛ nɔɔ? 16Ba ta yaa kpɔɡa bɛlbwa tɛɛ, kɛ dɛ ɡe teŋɛ dɛɛ ŋɔ ya teŋe berekese ɡɛ baa maɡa tɛ yaa wubwa la, dɛɛ lɔɔ yaa kɛ dɛ he ɡbabir nɛra la bee a le.”

17Anee Ijipt kooro la ŋɔ, “Bɔhwaahra bane le! A waa laa hɛɛ bol ŋɔ, n ɡel hé la ka kpoo kwaa ɛ saraha tɛ Korowii haa dɛ tomɔ nɔ naa? 18Hé berɛ kaa toma ta. Nomɛlbwa aa heya kpɔɡa tɛɛ ba, kɛ he ɡee teŋe berekese laanee kɛ wubwa la.”

19Hibru tena baa chɔ ba bala nyoa la aa noa kɛŋɔ baa dɛɛ teŋe berekese ɡɛ tɔpere bɛlbwa baa maɡa tɛɛ ba wubwa la, belaa ba na kɛŋɔ taraken te waa puu ba. 20Baa le Ijipt kooro be dɛɛ kaa la, ba kaa pu Mosis ne Arɔn dɛ ba cheɡɔ dɛɛ kpaa ba. 21Asɛ ba ŋɔ Mosis wa be ŋɔ, “Korowiirii dɛ tɛr he deŋne kɛŋɔ haa ɡela kooro ne o nomonome hah yaa la. A deno do kɛŋɔ haa kpɔ keri do ba nɔɔra ta ŋɔ bá kpoo yaa ken.”

Mosis naɡre Korowii wa

22Belaa Mosis berɛ ka bɔɔ Korowii ŋɔ, “N Naa Korowii, ɛrɛɛ hɛɛ do he ɡbabir nɛra hɔhɔrɔwa ta ken? Anɔ waa he tom mɛ ba be kɛɛ? 23Le a ɡɛ saŋ maa cheɡɛ he sɔn ta dɛ ka bol waa la Ijipt kooro be la, teŋaa ba teŋɛ dɛɛ na wahala, asɛ he ɡe den vɛh ba lɛɛ kwara.”

Currently Selected:

Kaala 5: mzw

Highlight

Copy