Kaala 29

Sɔfore lee cheɡ bá do ɡoroŋ

1Korowii berɔ ŋɔ Mosis be ŋɔ, “Kenii hɛɛ ba ɛɛ dɛ́ le Arɔn ne o bibaala cheɡ bá do ɡoroŋ, ásɛ dɛɛ ɛ n toma kɛŋɔ sɔfore. Lawɛ nabale ne pebala anɛ aa wola kirihiah bɛlbwa dii, 2kpɔ mea aa kpera kɛrɛdɛ iisi aa wola toole a ta ɛ paanoo, ne anɔ la baa do noo a ta dɛ anɔ la aa do kɛ biskeeti ken mɔɔ dɛ do noo a ta. 3Kpɔa do wɛɡrɛ bini dɛ́ lawɛ kondɛɛre la ja dɛ́ kpɔ ba ɛ saraha tɛ mɛ.

4Ásɛ dɛ kpɔ Arɔn ne o bibaala la ba n Dea Cheremibɔr doonyoa bela dɛ́ sɔ ba ne. 5Do Arɔn o sɔfore laala la. Batakaare waa doo mun ta ne batakaarejaŋ, ne batakaarebora efɔd la ne kon waa dawɛ o bambile ta. Ásɛ dɛ kpɔ kiriso baa sɔh kwaa do o ta kɛrɛdɛ la vɔwɛ batakaarebora la ta. 6Kpɔ ɡbɛrɛjen la piu, ásɛ dɛ kpɔ suuɡaswɛm kon waa do ɡoroŋ la vɔwɛ o ta. 7Ásɛ dɛ fuɡe noo baa kpɔa dɛɛ do ba sɔfore ta la ane do o nyu ta. 8Do o bibaala la batakaarejaŋ la dɔŋa, 9dɛ́ pi ba ɡbɛrɛre. Ásɛ dɛ kpɔ kirisore vɔwɛ Arɔn ne o bibaala la. Ba ne ba naanar ɛɛ ɛ sɔfore, dɛɛ tom mɛ saŋ bɛlbwa dɛɛ la. Gɛɛ hɛɛ ba ɛɛ dɛ́ le Arɔn ne o bibaala dɛ́ kpɔ ba toma do ba nɔn ta.

10Lawɛ nabale la ba n Dea Cheremibɔr la doonyoa bela, ásɛ Arɔn ne o bibaala kpɔ nɔɔra dawɛ o nyu ta. 11Teŋe o baŋa men Korowii sie n Dea Cheremibɔr doonyoa bɔr bela. 12Ásɛ dɛ kpɔ noni ɛ nao la chal la ane ɛ kwaa aa paaɡe saraha kon la loŋkoni ta la ta, dɛ́ fuɡe a kar ta saraha kon la mun ta. 13Laa o noyal bwa ne o pwɛ bela waa wera, ne o kporombie anɛ la dɛ a noorare bwa kpɔ, dɛ́ fuah saraha kon la ta. 14Nao la te bwa la, fuh o ol ne o tɔn ne o tea bini kwaa bwa bela baa soɡa la dahara.#Hib 13:11-12 O ɛ wechɔɡa kpɔe dɛ́ kɛ saraha kon.

15Lawɛ pebal la beŋkpoŋ ba, ásɛ Arɔn ne o bibaala kpɔ nɔɔra dawɛ o nyu ta. 16Teŋe o baŋa ásɛ dɛ ɛ o chal la ta saraha kon la baŋne bwa ta. 17Mɔne a bini dɛ́ yaɡle o tea bini kwaa ne o nakpale, dɛ́ kpɔa ja o nyu ne anɔ la aa kaa la bwa ta. 18Ásɛ dɛ fuh o bwa saraha kon la ta. A ɛ saraha kon baa dɛ fuh o bwa o sɔɔh ɛɛ do som n be.#Ɛfe 5:2

19Berɛ kpɔ penɛɛte la ɡe ba, ásɛ Arɔn ne o bibaala kpɔ nɔɔra dawɛ o nyu ta. 20Teŋe o baŋa dɛ ɛ o chal la ane leɡe Arɔn ne o bibaala diɡ deŋna nyoo, ne ba diɡ nonibala dɛ ba diɡ nanibala ta. Ásɛ dɛ ɛ chal la ta saraha kon la baŋne la bwa ta. 21Berɛ kpɔ chal la aa lɔ saraha kon la ta la ane, ásɛ dɛ fuɡe noo baa kpɔa dɛɛ do ba sɔfore ta la ane do Arɔn nyu ne o laala ta, dɛ́ berɛ do ane o bibaala la ɡe nyuune ta, dɛ́ ɛ merɛ ba ɡe laala ta. Gɛɛ dɛ ɡel o ne o bibaala la ne ba laala bwa do ɡoroŋ.

22Kpɔ pee la no ne anɔ la aa lɔ o muŋɡo ta bwa, ne o noyal ne o pwɛ bela waa wera, ne o kporombie anɛ ne noorare aa ja a ta bwa dɛ o nadiɡ hwi.#29:22 Gɛ pee nɔɔ ba kpɔ ɛ we-ɛɛla dɛɛ do nɛn sɔfore toma ta. 23Kpɔ paanoo beŋkpoŋ le wɛɡrɛ baa do paanoo baa wola iisi a ta doe dɛ che men Korowii sie la bini ne paanoo baa do noo a ta mɔɔ dɛ wɔɔra ne biskeeti. 24Kpɔa do Arɔn ne o bibaala nɔɔra ta, ásɛ ba ɡɔɔra nyundua dɛ́ viiɡa men Korowii sie. 25Berɛ lɛ saraha kwaa la ba be, ásɛ dɛ kpɔ ja anɔ la baa fuah la ta, dɛ́ fuah saraha kon la ta. A ɛ saraha baa fuh a bwa a sɔɔh ɛɛ do som n be. 26Haa kpɔ pebal la bambile dɛ kpɔ ɛ we-ɛɛle ba do Arɔn sɔfore toma ta tonɛ la, ɡɔɔro nyundua dɛ́ viiɡu men Korowii sie, ásɛ o berɛ he dibɔr.

27Ɛ pebal ola la peri baa ɛ ane we-ɛɛle dɛ do Arɔn ne o bibaala sɔfore ta la a do ɡoroŋ. O bambile baa ɡɔɔro nyundua dɛ viiɡu men Korowii sie la ne o hwii baa kpɔa ba la. 28Anee ɛ dibɔra aa chɛ kɛŋɔ saŋ bɛlbwa Israel tena kpɔ baa tɛ Arɔn ne o bibaala. A ɛ bɔra aa chɛ kɛŋɔ bá kpɔ ba tɛ men Korowii dɛ le deŋnesɔɔhna saraha kwaa ta.

29Dɛ Arɔn baa sewaa, o naanar la bɛlbwa waa ba chiɡ o naa ta la, wɛɛ won do laala aa do ɡoroŋ la bá ɛo we-ɛɛla dɛ́ doo sɔfore toma ta. 30O bibaa bɛlbwa waa ba chiɡ o naa ta dɛ ɛ sɔfo la chɛ kɛ ó do laala la tɔpera anuanɛ mɔɔ bá ɛo we-ɛɛla o won jo n Dea Cheremibɔr la bini ka ɛ toma Boɡoroŋ bela.

31Kpɔ pebal la baa kpɔ doo sɔfore toma ta la, dɛ́ daalo bɔr waa do ɡoroŋ. 32N Dea Cheremibɔr doonyoa belaa chɛ kɛŋɔ Arɔn ne o bibaala la chwe pee la ol la ne paanoo aa lɔ wɛɡrɛ bini la. 33Bá di ɡɛ saraha kwaa baa kpɔa ɛ we-ɛɛla dɛ soŋe ba wechɔɡa dɛ lee ba cheɡ ba ɛ sɔfore dɛ do ɡoroŋ la. A ta chɛ kɛŋɔ nɛmpɛɛ bɛlbwa dia, dɛkalkɛ a do ɡoroŋ. 34Dɛ ol la kɛɛ paanoo baa kpɔa ɛ we-ɛɛla nɔ ane kao tɔɔ per a ta naa, a ta chɛ kɛ bɛlbwa dia, hé fuah dɛkalkɛ a do ɡoroŋ.

35Hé ɛ wobɛlbwa maa do heyaa nɔ tɛ Arɔn ne o bibaala la, dɛ́ kpɔ tɔpera anuanɛ ɛ we-ɛɛla do ba sɔfore toma ta. 36Teŋe nabal baŋa ɛ wechɔɡa kpɔe dɛ kɛ saraha tɔpere bɛlbwa tɔpera anuanɛ, dɛ́ kpɔ soŋe he wechɔɡa.#Hib 10:11-12 Ɛ ɡɛ dɛ laa doŋa bɛlbwa kpɔ saraha kon la ta, ásɛ dɛ ɛ ɔleve noo la ane do o ta o do ɡoroŋ. 37Tɔpera anuanɛɛ he kpɔ laa doŋa kpɔ saraha kon la ta ó do ɡoroŋ. Gɛɛ hɛɛ ba ɛɛ ó won do ɡoroŋ kɛrɛdɛ, ásɛ komɛlbwa waa leɡo la ɡe do ɡoroŋ.

Tɔpere bɛlbwa sarahare

38Kwaa haa lawɛ ba saraha kon la ta ba ɛ saraha tɛ mɛ tɔpere bɛlbwa laanee pebiiri anɛ, a bɛlbwa aa di benanyoa. 39Lawɛ beŋkpoŋ ɛ saraha tɛ mɛ chɔɔ, ásɛ wee aa baa jo la, he kpɔ bɛl la ɡe ɛ tɛ mɛ. 40Pebie waa tɔ sie he kpɔ ɛ saraha la, kpɔ mea aa kpera kɛrɛdɛ kuruwa beŋkpoŋ, ne ɔleve no pɛrɛntoa beŋkpoŋ ne fah, ásɛ sen ɡe pɛrɛntoa beŋkpoŋ ne fah, dɛ́ fuɡe ɛ sen saraha. 41Teŋe penɛɛte la ɡe baŋa ɛ saraha wee aa baa jo la, dɛ́ kpɔ mea saraha ne sen saraha dɛ ɔleve noo ja o ta ɡɛ tenten fuh ɛ saraha tɛ mɛ. A ɛ saraha baa fuh a bwa a sɔɔh ɛɛ do som n be.

42Gɛɛ dɛ chɔ le tɛ naanar baa ka ba la baa fuh a ɡɛ saraha kwaa nɔ tɔperee bwa n Dea Cheremibɔr doonyoa bela men Korowii sie. Belaa mɛɛ ba heyaa chema, dɛ́ bol waa he be. 43Bela tentenee mɛɛ ba n cheme Israel tena, ásɛ n jirima tɔ bela bwa, dɛ́ ɡel o do ɡoroŋ.

44Gɛɛ mɛɛ ba ɛɛ n Dea Cheremibɔr la ne saraha kon la do ɡoroŋ, dɛ́ ɛ Arɔn ne o bibaala ɡe ba do ɡoroŋ dɛ́ ɛ sɔfore dɛ́ɛ tom mɛ. 45Mɛɛ do he Israel tena binii, ásɛ dɛ ɛ Korowii haa dɛ tom mɛ. 46Baa jemɔɔ kɛŋɔ menee Korowii baa dɛ tom mɛ, n kpɔ ba le Ijipt harɛ n ne ba so. Menee Korowii baa dɛ tom mɛ la.”

Currently Selected:

Kaala 29: mzw

Highlight

Copy