Kaala 23

Kasinteŋ ne waa aa wera

1Korowii berɔ ŋɔ Mosis be ŋɔ, “He bɛ waa haa wola a bini jemɛ kɛrɛdɛ kpɔ dɛɛ ɡaaɡe. He bɛ dansewea di cha nɛnchɔɡe. 2He bɛ nɛndamanta nɛɛ teŋɛ dɛ́ ɡee ɛ wechɔɡa. He dɛ di waane danseɛ kɔɔto aa, he bɛ nɛndamanta nɛɛ teŋɛ dɛ́ berɛ waa la sie. 3He bɛ nomɛl nyae waa koh dɛ́ sune o nɛɛ kɔɔto.#Lew 19:15

4He na he dɔm nao kɛɛ keeɡo o yeŋe jo dɛɛ kaa laa, hé takapɔ dɛ́ lawɔ ba tɛo. 5He na he dɔŋ waa haeh keeɡo o chole bone ɛɡɛ o nɛ aa, he bɛ on ɡarɛ ta kaa. He takapɔ kɛŋɔ hɛɛ chao.

6He bɛ nɛn nyae waa koh dɛ́ pao bolchɔɡe kɔɔto. 7He bɛ nyosone teŋe dawɛ nɛn nɛ. He bɛ nɛn waa wola waane bini jemɛ, kɛɛ nɛn o wa aa dɔ kasinteŋ bolchɔɡe pa dɛ́ kpoo. Maa nomɛlbwa waa di bolchɔɡe la bwaraa kpɔ kɛo.

8He bɛ nɛn sen dɛɛ yawɛ, nɛn sen yawa dɛ tɔ nɛra baa dɛ bol waa la sie, dɛɛ ɡole nɛn o wa aa toɡra waa sie.

9He bɛ nɛŋhɔɔhra hɔhɔrɔwa dɛɛ ɛ. He ɡbabir jemɛ ɡɛ hɔɔh wa aa doa, dɛkalkɛ dɛ ɡɛɛ he faa ɛ nɛŋhɔɔhra Ijipt harɛ ta.

Ona Tɔpere Mmarare

10Bene anumɛlee chɛ kɛ hé parɛ dɛ́ kpɔ he kooni kondikwa,#Lew 25:1-7 11kɛ bennuanɛ ta te, hé ɡel harɛ la chɔ, he bɛ on parɛ. Anee dɛ́ ɡel nyaara baa lɔ he bini la ɡe dɔ anɔ la aa lee bela la di, ásɛ kpɔɡ bini ola ɡe dɔ a kar dɛ́ di. Hé ɛ ɡɛ tenten he daa kooni nɔna ne ɔleve daa nɔna bwa ta.

12Tɔpera anumɛlee hé dɔ kɛ he ɛ toma, kɛ tɔpenuanɛ wee ta te, he bɛ toma bɛlbwa ɛ, ásɛ he nabala ne keeɡore ne nɛndɔɔla baa lol ba he deremi dɛ nɛŋhɔɔhra ɡe won dɔ bɔr onɛ.#Lew 23:3; Mak 2:27

13Hé do sie dɛ́ ɛ wobɛlbwa maa bol he be nɔ. He bɛ voɡare dɛɛ tomɛ. He bɛ ɡel ba no a sɔna kwaraa he nyoo.

Benanyoa Tɔpejena atoro ane wa

14Hé di tɔpejena atoro benanyoa bɛlbwa n sɔn ta.

15Hé di Paanoo Iisi Aa Wola Toole A Ta Tɔpejen la. Tɔpera anuanɛɛ chɛ kɛŋɔ hé di paanoo iisi aa wola toole a ta ɡɛ maa do heyaa la. Hé di tɔpejen nɔ tɔpera maa lea cheɡ tɛ heyaa ta Abib korobie la ta, dɛkalkɛ ɡɛ korobie la taa he le Ijipt harɛ ta.

Bɛlbwa bɛ nɔŋɡbala kpɔ ba n sie.#Kaa 12:14-20; Kur 28:16-25; Mma 16:1-8

16Hé di Koo Kondikwaa Koma Tɔpejen la he koo kondikonloɡla ne.#Lew 23:9-14; Mma 16:9-12

Hé di Koo Kondikwaa Nyoa Boara Tɔpejen la, benanyoa la aa ba kaa o jaɡa he yon boa he kooni kondikwaa bwa nyoa ba cheɡ dem la ta.#Lew 23:33-43

17Kera atoroo chɛ kɛ baa bɛlbwa ba men Nemenɛ Korowii sie benanyoa bɛlbwa ɡɛ tɔpejena nɔ ta, dɛ́ ba tom mɛ.

18He bɛ komɛlbwa baa kpo ɛ saraha chal kpɔ ja komɛlbwa iisi aa lɔ o ta tɛ mɛ.

Ola baa kpoora n tɔpejena ta noorare ta chɛ kɛŋɔ hé cheɡa tɔɔ per a ta.

19Hé kpɔ he koo kondikonloɡla ba men Korowii haa dɛ tom mɛ la Dea.#Lew 23:10

He bɛ bombie daa o nya elnee ne.

Nyobaɡa ne webaɡla ane wa

20Hɛ́ɛ no, n dɛ tomɛ n nyundua torome ó tɔ he sie dɛɛ nyiŋi he nɛ, dɛ́ ba he ne bela maa kwaara tɛ heya. 21Hé cheɡ deŋne dɛɛ no wobɛlbwa waa bol he be. He bɛ lwɛmkpeɡ ɛ, he ɛ lwɛmkpeɡ aa, waa he bwaraa kpɔ kɛ heya, dɛkalkɛŋɔ onee chiɡ n naa ta. 22Dɛ he cheɡ deŋne o be kɛrɛdɛ dɛɛ ɛ anɔ la maa bola bwa naa, mɛɛ hah he dɔmaa, n ne baa jo ŋwɛnɛ bɛlbwa ta. 23N nyundua torome ɛɛ tɔ he siee,#Jos 5:13-14 dɛ́ ba he ne Amɔre ne Hiti, ne Pɛrɛs ne Keenan ne Hivi, dɛ Jebus tena harɛ ta. Mɛɛ kpo ba bwaa harɛ la ta. 24He bɛ ba voɡare dɛɛ tomɛ a ba ɛ kɛŋɔ hɛɛ dɛɛ teŋɛ ba we-ɛɛla taa. Hé paɡre a ne ba bwea baa paaɡa dɛɛ duura la bwa burbur ken.

25Dɛ hɛɛ teŋɔ dɛɛ tomɛ men Korowii haa dɛ tom mɛ nɔɔ yaa, mɛɛ swee heyaa andɛɛɡaa he kondikwa ne he neerare dɛ weela bwa ta. 26Ásɛ nomɛlbwa aa har ta kɛɛ dɛ ɛ hambara he harɛ la ta. Mɛɛ tɛ heyaa mkpajaŋ tentenee.

27Mɛɛ ɡeloo ɔmee kohona chole he dɔma nɛ,#Jos 2:9 ásɛ harɛ bɛlbwa ta tena haa ka chem ba bwa wili. Mɛɛ ɡeloo he dɔma bwa berɛ habɔɔ, dɛ́ chwa kaa. 28Mɛɛ ɡeloo jeŋibotoola tɔ he sie, dɛ́ doŋi Hivi ne Keenan dɛ Hiti tena le he ŋwɛnɛre ta. 29Benanyoa beŋkpoŋ ɡbo ta laa mɛɛ ba ba doŋa, dɛkalkɛ a ba ɡɛ naa, harɛ la dɛ ba pɛɛ chɔe, ásɛ kpɔɡ bini olchɔɡa warɛ he nɛ. 30Tama tamaa mɛɛ ba ba doŋa le he sie ka tel kɛŋɔ haa ba warɛ kohona, dɛ́ won kpɔ harɛ la. 31Mɛɛ ɡeloo he jwɛh le Mposwɛm la ta ka le Mɛdetereenea Mpo ta, dɛ́ kpɔ ka le pua hɛŋle ɡbo harɛ ta, dɛ́ kaa Yufretis Moo la ta. Mɛɛ kpɔ nɛra baa soɡe harɛ la ta bela laanee do he nɔn ta, ásɛ he doŋ ba le he sie.

32Hé ne ban, kɛɛ ba voɡa bɛ fɔo bɛlbwa fɔwɛ. 33He bɛ ɡel ba so he harɛ la ta, ásɛ a che ba nɛɛ he ba ɛɛ mɛ wechɔɡa, dɛkalkɛ ba voɡare toma la ɛɛ lawɛ heyaa kɛŋɔ baa harɛ heyaa bela ken.”

Currently Selected:

Kaala 23: mzw

Highlight

Copy