Daneɛl 6
6
Ba lawɛ Daneɛl do nyujentena bɔɔ bini
1Kooro Dareɔs aa baa di kora la, o liiro ŋɔ ó le nomonome lafa fifraanɛ bá chɔ harɛ bamperi nyoo, dɛɛ nyiŋi a ta, o harɛ la bwa ta, 2o le nomonjena batoro ɡe ba chɔ ba nyoa, dɛ́ nyiŋi na kɛŋɔ nomonome la dɛ ɛ wobɛlbwa aŋwɛnɛ ta, ásɛ wobɛlbwa won kaa ɡɛ kooro aa dɛ nyin. Daneɛl ne nɛra banɛ banee o le. 3Daneɛl baɡlɔ kɛ o won toma ɛɛ dɛɛ ɡwaa o bala la, ne nɛra baa lee ba baa nyiŋi harɛ la bamperi ta la, asɛ o toma su kooro la siwi. A ɡɛ nomanta, kooro la liiro kɛŋɔ ó den kpɔ harɛ la waa bwa do o nɔn ta wɛɛ nyiŋi o ta. 4Anee o bala nomonjena la ne nomonome baa lee ba baa nyiŋi harɛ la bamperi la, ɛɛ nyin Daneɛl bwara wechɔɡa dɛ́ le kora la be pera, kɛ ba ta wone. Ba ta o bwara wechɔɡe bɛlbwa nae, dɛkalkɛ o waa wer dɛ dɔ kasinteŋ. 5Anee nomonome ne nomonjena la ŋɔ, “Yaa Daneɛl nɔ wechɔɡe bɛlbwaa dɔ, atane Korowii waa dɛ tomɔ la waa ta.”
6Ate, ba bwa la Kooro Dareɔs be dɛ ka ŋɔ, “N naa kooro, Kórowii tɛɛ mkpajaŋ saŋ bɛlbwa dɛɛ la! 7Ya nomonome bwa yaa dɛ nyiŋi Babelɔn harɛ nɔ ta, nomonome baa dɛ nyiŋi nɛra nɛ, ne nomonome baa chɔ harɛre nyoo, ne laa sitɔɔla dɛ nomonome baa jaa, sɛoh kɛŋɔ hen n naa kooro do mmara, dɛ nyiŋi na kɛŋɔ wɛɛ ɛ tomaa. Gel bɛlbwa jemɛ kɛŋɔ nomɛlbwa ta ŋwɛnɛ dɔe kɛŋɔ, ó ɡuŋi voɡ kɛɛ nɛn tɔpera fifraatoro nɔ baah ta, atane he ɡbo. Nomɛlbwa waa vɛh ɡɛ mmara nɔ la, bá lawɔ ka do nyujentena bɔɔ bini. 8N naa kooro, do ɡɛ mmara la dɛ́ ɡel ba chwerɔ, ásɛ he kpɔ nɔn ɛɡɛ o ta, ásɛ nomɛlbwa bɛ won berɔ ɡɛ baa wola won Midia ne Pɛɛsea tena mmara berɛ la.”#6:8 Midia ne Pɛɛsea tena mmarare la, kooro dɔɔ kpɔ nɔn ɛɡɛ aa, nomɛlbwa aa won bera kpa.#Ɛst 1:19 9Anomanta, Kooro Dareɔs ɡelɔ ba chwerɛ mmara la.
10Daneɛl aa noa kɛ ba chwerɛ mmara la la, o la dem dɛ teeh kaa o abrɔsane doa dea bini. Dɛ dea la tokorore pilo dɛ chaɡɛ Jerusalam. O dɛ ɡuŋi dɛɛ soŋe Korowii keraatoro tɔpere bɛlbwa, dɛɛ kpɛɛro. Dɛ ɡɛɛ wɛɛ ɛ wubwa.#Yel 95:6 11Belaa nɛra baa la kooro be o do mmara la pɛ, dɛ la ka na kɛŋɔ Daneɛl ɡuŋo dɛɛ soŋe Korowii kɛŋɔ ó chao. 12Anomanta, ba la Kooro Dareɔs be dɛ ka ŋɔ, “He ta mmara doe ŋɔ tɔpera fifraatoro aa lɔ ya sie nɔ ta, nomɛlbwa waa ɡuŋi voɡ kɛɛ nɛn, dɛ he kooro laa o ba ɡuŋi dɛ́ soŋe la, bá lawɔ ka do nyujentena bɔɔ bini naa?”
Ate, kooro chaŋe ŋɔ, “Mmara la ta chɔ le dɛ che kiŋkiŋ ɡɛ Midia ne Pɛɛsea tena mmara baa wola won berɔ la.”
13Asɛ ba ŋɔ kooro be ŋɔ, “Daneɛl waa ja nɛra baa laɡ ba le Juda harɛ bojaŋ ba la aa hen duu, waa mmara haa doa la ɡe ta teŋɛ. O ta dɛ soŋe Korowii tɔpere bɛlbwa keraatoro.” 14Kooro la aa no ɡɛ la, a we o nɛɛ kohona. Dɛ o siwi beɡrɔ wɛɛ nyin ŋwɛnɛ waa che o ta dɛ́ lɛ Daneɛl ta. O lii a waa ka tel kɛŋɔ wee aa joa.
15Asɛ nɛra la berɛ pɛ dɛ la kooro be dɛ ka ŋɔ, “N naa kooro, lii kɛŋɔ Midia ne Pɛɛsea tena mmara bini la, dɛ kooro do mmara aa, baa won on berɛ.”#Ɛst 8:8
16Ate, Kooro Dareɔs ɡel ba lawɛ Daneɛl ba, dɛ kpɔɔ ka ta nyujentena be a bɔɔ bini. Kooro la ŋɔ Daneɛl be ŋɔ, “Kórowii haa dɛ tomɔ tɔpere bɛlbwa la lɛɛ.”
17Ba kpɔ bwe bɛl ba tɔ bɔɔ la nyoa, asɛ kooro la kpɔ o noniseɡ ne o nomonjena la noniseɡa ka pɛl bwe la ta, ɡɛ aa ɛ nomɛlbwa bɛ won ka lɛ Daneɛl ta. 18Kooro la berɔ kaa o dem, o ta wone di kondikwaa jwaana la bwa, o sie ta lɛɛ kɛŋɔ ba ɛ silɛɛ waane bɛlbwa o dem ɡe. O ta wone chɔ dom.
19Tɔ aa pera chɔmbibi la, kooro la iro dɛ ɛ warane la nyujentena bɔɔ la ta. 20Waa dɛ bɛne bɔɔ la la, o bambile chɔɡɔ o kpɔ takpeɡ dɛ yerɛ Daneɛl ŋɔ, “Daneɛl, Korowii waa lole saŋ bɛlbwa la bonɔɔ, Korowii haa dɛ tomɔ kasinteŋ ne tɔpere bɛlbwa la wono ba lɛɛ le nyujentena la be naa?”
21Anee Daneɛl ŋɔ, “N naa kooro, Kórowii tɛɛ mkpajaŋ saŋ bɛlbwa dɛɛ la. 22Korowii maa dɛ tomɔ la ɡelɔ o torome ba dɛ ba tɔ nyujentena la nyoo. A ta wone do mɛ bol, dɛkalkɛ Korowii nao kɛŋɔ n di bole, asɛ hen n naa kooro ɡe, n ta hen wechɔɡa bɛlbwa ɛɛ.”
23Kooro sie lɛo kohona, o ŋɔ bá ka lawɛ Daneɛl le bɔɔ la bini. Asɛ ba la ka lawɔ le bɔɔ la bini, dɛ komɛlbwa ta o bobɛlbwa ɛɛ, dɛkalkɛ o yarada Korowii waa dɛ tomɔ.
24Ate, Kooro Dareɔs ɡel ba ka kpɔ nɛra baa haŋɛ Daneɛl nyoa la ba tɛo, asɛ o ɡel ba kpɔ ba ne ba haahna, ne bii bwa ka do nyujentena bɔɔ la bini. Baa wola bɔɔ la mun ta tele mɔɔ kwara la, dɛ nyujentena la toɡri ba bini, dɛ paɡre ba hoɡa bwa.
25Asɛ Kooro Dareɔs chwerɛ tɔne ka tɛ wobol te bɛlbwa nɛra baa lɔ harɛre ne o harɛ ta bwa. O ŋɔ,
“N dɛ na he bwa!
26N do mmara harɛ maa dɛ di kora o ta la kɛŋɔ, nomɛlbwa ɛɛ ɔmɛ dɛɛ duu Korowii Daneɛl aa dɛ tomɔ la.
O ɛ Korowii
waa lole saŋ bɛlbwa,
o lole saŋ bɛlbwa dɛɛ la.
O kora aa ɡu bwa,
o kpeɡri
waa dɔa ta jaɡa dɔe.
27Onee dɛɛ lɛ nɛn
dɛ ɡel o dɔ o nyu dɛɛ di,
dɛɛ ɛ nyokpowa,
o we-ɛɛla ɡe do kan
nyundua ne harɛ bwa.
Onee lɛ Daneɛl nyujentena
nɔn ta aa wola on kpoe.”
28Daneɛl wobɛlbwa wer tɛo ɡɛ saŋ Koojen Dareɔs aa soɡe kora ta, ne ɡɛ saŋ Pɛɛsea Kooro Saeros#2We 36:22 aa di kora.
Currently Selected:
Daneɛl 6: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
