Daneɛl 12
12
Waa bwa jaɡa saŋ
1Nyundua torome waa do laalapoŋa la ŋɔ, “A ɡɛ saŋ la, nyundua toroma nomoa Maekel waa dɛ daah he nɛra la ɛɛ leo ba. Gɛ saŋ ɛɛ ɛ wahala saŋee, le harɛ nɔ mumpar ba le fini a dɔŋa ta balɛ bwa. Gɛ saŋ la, he harɛ ta nɛra baa chwerɛ ba sɔna do Korowii tɔn bini la, ɛɛ dɔ lɛɛlee.#Jer 30:7; Mat 24:21; Mak 13:19 2Nɛra ɡalɡa baa serewa ɛɛ berɔ ir, ásɛ bane kaa mkpa aa wola jaɡa dɔe bwa ta, bane ɡe kaa weweele aa wola jaɡa dɔe bwa ne sihiih ta. 3Nomonome baa ɛ wejerema la ɛɛ chaahnoo kɛŋɔ nyundua, ásɛ banɔ la baa baɡle nɛra bane waa a che a ta ba waa toɡre la, baa doo kɛŋɔ weweela dɛɛ chaah saŋ bɛlbwa.”#Sɛɡ 4:18 4Ate, nyundua torome la ŋɔ n be ŋɔ, “Daneɛl, laa tɔn la tɔ dɛ́ kpɔ kwaa marɛ o nyoa ka tel waa bwa jaɡa saŋ. Nɛra ɛɛ warɔɔ dɛ́ la dɛɛ ba, dɛɛ nyin Korowii waa la dɛ́ jemɛ, ásɛ wejema warɛ taeh.”
5Asɛ men Daneɛl nyiŋi dɛ na baala banɛ ba che nee bɛl nyoa, bɛl lɔ o baŋ le, bɛl ɡe do o baŋ bonɔ. 6Ate, bɛl pɛɛ nyundua torome waa do laalapoŋa la, dɛ o cheɡɛ nee la nyunduabɔr dɛ ŋɔ, “Dɛ́ ka tel saŋ besoo ɡɛ nyokpowaa nɔ ɛɛ ba ɛɛ yɔ?”
7Nyundua torome la ir nɔɔra anɛ bwa nyundua, asɛ n no ɡɛ waa ŋwɛɛ Korowii Waa Lole Saŋ Bɛlbwa sɔn ta ŋɔ, “Aa ɛ bene atoro ne faah. Gɛ saŋ nɛra baa teŋɛ Korowii nɛɛ bonyɛɡa aa ba a jaɡa la, dɛ waa nɔ bwa ɡe chiɡo.”
8N no waa waa bola, kɛ n ta a mun noɛ. Anomanta, n bɔɔrɔ ŋɔ, “N dɔɔ, ɛrɛɛ waa nɔ ɛɛ ba chiɡa ka tonɛ ɔ?”
9O ŋɔ, “Daneɛl, kaa taraken, dɛkalkɛ a ɡɛ waa nɔ ɛ waa aa chɛ kɛ ba laa tɔ, dɛ marɛ o nyoa ka tel waa bwa jaɡa saŋ. 10Baa laa doŋaa kpɔ nɛra ɡalɡa nɛɛ bá waa toɡre wechɔɡa aa ba nɛɛ do, kɛ nyubinikpeɡ tena ɛɛ teŋɔɔ dɛɛ ɛ nyubinikpeɡ. Nyubinikpeɡ te bɛlbwa aa a munii no, kɛ wejerema te ɛɛ no a munii.
11Le ɡɛ saŋ baa ɡel tɔpere bɛlbwa sarahare ɛɛ, dɛ́ kpɔ konchɔɡechɔɡe waa dɛ paɡre bwɛɛ la pa la ɛɛ ɛ tɔpera kaɡboŋ lafraanɛ fifraanuanaarɛɛ. 12Nɛra baa so kasinteŋ ne, dɛ́ kpa ka tel tɔpera kaɡboŋ lafraatoro fifraatoro dɛ anue aa ba kaa la, ba na som.
13Kɛ hen Daneɛl, he te kaa, di kasinteŋ ka tel waa bwa jaɡa saŋ. Hɛɛ sewɔɔ kɛ hɛɛ iruu, dɛ́ dɔ he kembɔr waa bwa jaɡa saŋ.”
Currently Selected:
Daneɛl 12: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
