Emɔs 9
9
Israel harɛ chɔɡa wa
1N na Korowii kɛŋɔ waa cheɡɛ kon baa dɛ ɛ saraha o ta la jwɛh, dɛ ŋɔ,
“Kpɔ kon lɔ pilare la doa
ásɛ Dea la doonyoa
danjwɛɛre yiiɡi.
Ásɛ a peri kuuɡi le nyundua
ba le nɛra la nɛɛ ba serewe.
Ba bini banɔ la baa ka la,
mɛɛ kpoo ba laa taa.
Ba bɛlbwa aa won le,
beŋkpoŋ ɡba aa bɔree
dɔ chwa.
2Hale ba kwi bɔɔ ka le
lalabwɛɛ kwaraa naa,
mɛɛ ta nɔnee laɡ ba.
Ba teehnɔ ir kaa nyundua
ɡe kwaraa naa,
mɛɛ le ba ne belaa ba harɛ.
3Ba chwao ka sɔh
Kaamɛl Bwejen doa aa,
mɛɛ nyin ba bɔree,
dɛ́ laɡ ba.
Ba chwao le n sie ka sɔh
mpo bini naa,
mɛɛ ɡeloo mpo bini
oljen laɡ ba chwe.
4A lole
kɛŋɔ ba dɔma laɡ ba laa ta
kaa bojaŋ harɛfale ta,
mɛɛ ɡeloo
bá kpoo ba laa ta.
N siwi swɛɛ ba nɛ,
ba wedɛɛɡa te waa laa,
ba kpoora waa.”
5Korowii,
onee Koranar Bwa Kooro,
onee kpɔ nɔn leɡe
harɛ wɛɛ mwɛɛ,
asɛ nɛra baa lɔ o ta bwa
ɛɛ wi.
Harɛ la bwa ɛɛ beɡre kɛŋɔ
Nael Moo yon su,
dɛ́ berɛ hweeh ka chɔ
o buɡ ta la.
6Korowii ma o dobɔr
o do nyundua,
dɛ ta nyundua o bɔle harɛ
bwa ta,
dɛ ɡel mpo
ba bɔle harɛ nɔ ta bwa.
O sɔne Korowii.
7Korowii ŋɔ, “Israel tena,
n dɛ nyin he waa kɛŋɔ
maa dɛ nyin Itiopia tena
waa la.
Gɛ maa lawɛ he Israel tena
le Ijipt harɛ ta la,
ɡɛɛ n lawɛ Filisti tena le
ekwi harɛ Kret ta,
dɛ lawɛ Siiria tena le Kir.
Men Korowiirii bola.
8Men Nemenɛ Korowii,
n dɛ nyiŋi Israel harɛ
wechɔɡa aa suu nɔ.
Mɛɛ chɔɡoo le harɛ nɔ ta,
kɛ maa Jekɔb naanaree
chɔɡ kwaraa.
9Mɛɛ bol waa
ásɛ dɛ yiiɡi Israel tena
harɛre nɛra bwa bini,
kɛŋɔ baa dɛ ɡboo boyu
beŋkpoŋ ɡba aa wola
harɛ le la.
10Wechɔɡ-ɛɛra
baa lɔ n nɛra bini bwa,
baa kpoo ba laa taa.
Banee dɛɛ bol ŋɔ,
‘Korowii aa ɡel
wechɔɡa bɛlbwa ba ya nɛ.’ ”
Israel kwaara dɛ́ vɔrɔwe wa
11Korowii ŋɔ, “Tɔpere bɛl
dɛ ba ásɛ n berɛ kwaa cheɡ
Kooro Devid kora
waa ɡua la.
Mɛɛ kwaaroo vɔrɔwe bɔra
aa paɡra ne dimɡbeeni bwa,
dɛ́ kwaa maa a do ɡɛ
a fa aa doa wubwa la,#Weɛ 15:16-17
12Israel tena ɛɛ ka yo nɛra
baa ka Edom harɛ taa,
dɛ́ pɔ ba nɛ,
ásɛ harɛre ta nɛra
ba fa aa ɛ n nɛra la
jemɛ kɛ menee ɡela
a ba ɡɛ.
Men Korowiirii bola.”
13Korowii ŋɔ, “Tɔpera la dɛ ba,
ásɛ nɛn waa dɛ parɛ tɔ nɛn
waa dɛ komɛ sie,
onɔ la waa dɛ du ɡe tɔ nɛn
waa dɛ tiɡri
ɡrepo nɔna sie.
Senfala ɛɛ koruu le
bwejena dor
dɛ́ palɛ kpɔ deŋɡarere ta.
14Mɛɛ berɔ ba n nɛra Israel
tena baa laɡ ba laa ta kaa
bojaŋ harɛfale ta la nee,
bá ba kwaa vɔrɔwe
dimɡbeeni dɛ́ so a bini.
Baa parɛ daa koonii,
dɛ́ nyɔ a sen,
dɛ́ parɛ bodɛɛɡa,
dɛ́ di kondikwa
baa parɛ la.
15Mɛɛ lawɛ Israel tenaa ba
so ba ɡbaɡba harɛ ta,
nomɛlbwa aa wola won
ba doŋ ba le harɛ maa
kpɔa
tɛɛ ba la ta.
Men Korowii haa dɛ tom mɛ laanee bola.”
Currently Selected:
Emɔs 9: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
