We-ɛɛla 26

Pɔɔl bol o waa baɡle Kooro Aɡrepa

1Anee Kooro Aɡrepa ŋɔ Pɔɔl be ŋɔ, “N tɛɛ ŋwɛnɛ, ir dɛ́ bol he kon.” Waa ŋɔ ɡɛ la, Pɔɔl ir nɔn dɛ baɡle kɛŋɔ o dɛ ba o kon bola bá no, dɛ ŋɔ, 2“Kooro Aɡrepa, n sie lɛo kohona kɛ maa dɛ ba n kon bola he siwi ta, dɛ́ baɡle waa bwa Juu tena aa kpɔa dɛɛ daɡ mɛ nɔ. 3N sie lɛo kohona, dɛkalkɛ he jemɛ ya Juu tena nawee waa bwa. Anomanta, n poori, lawɛ bambile dɛ́ no n kon.

4Juu tena bwa jemɛ ɡɛ maa doa n bechale saŋ bwa ba le fini. Gɛ saŋ maa lɔ n bwɛɛ ne Jerusalam la, waa n fa aa dɛ ɛ bwa, ba jemɛ a bwa. 5Dɛ ba sɛoh ŋɔ bá bol kasinteŋ aa, ba fe ɛɛ wonoo di danseɛ kɛŋɔ, ya Juu tena Korowii toma ŋwɛnɛ o ta teŋa aa kpeɡa kohona, baa yerɛ o nɛra Farisii tena la, o taa n ɡe ɛɛ teŋɛ. 6Korowii baɡɛ ya naawa nyoa bɛl. N dɛ hwɛɡɛ ɡɛ nyobaɡa la ta. Gɛ hwɛɡa nɔ waa ba koh laɡ mɛ asɛ n che he sie hɛɛ ba n waa bola la. 7Ya Juu tena deene fi dɛ anɛ tena la bwaa dɛɛ yarada Korowii kɛŋɔ wɛɛ ɛ ɡɛ waa baɡɛ yaa nyoa laanee, dɛ koh a waa dɛɛ tomɔ sibeɡra ne chɔɔ ne jwaana bwa. N Naa kooro, webeŋkpoŋ nɔ ya bwa aa dɛ hwɛɡɛ o ta nɔ, onee ba kpɔ dawɛ n nɛɛ ŋɔ n ɛ wechɔɡa la. Na nɔ! 8Ya waa yaa dɛ hwɛɡɛ a ta laanee kɛŋɔ Korowii ɛɛ ir yaa seo taa. Bɔkwaa ɛa he nɛra haa lɔ bonɔ nɔ aa wola won yarada kɛŋɔ Korowii won nɛra seo ta ira ɔɔ?

9N ɡba fa hah Yeesu waa le Nasarɛt la waa la. N fa liiro kɛŋɔ ŋwɛnɛ bɛlbwa maa dɔa la, a chɛ kɛ n kpɔ o ta dɛ́ chɔɡ o waa la.#Weɛ 8:3 10Maa lɔ Jerusalam la, dɛ ɡɛ toma nɔɔ mɛɛ ɛ. N soŋe Sɔfonomonome ba tɛ mɛ kpeɡri, asɛ n larawe Korowii nɛra ba wa aa toɡra do deene pirim. Gɛ saŋ la, dɛ ba bol ba waa dɛ pa ba bolchɔɡe ŋɔ bá kpoo ba aa, ɡɛɛ n ɡe sɛh teŋɛ ba kpoora la ta. 11Dɛ n dɛ la cheremi deene bini saŋ bɛlbwa dɛ kaa ɛɛ ba hɔhɔrɔwa taeh, dɛ fe ɛɛ nyin kɛŋɔ ba bol Korowii nɛnhɛlwaa ásɛ n laɡ ba. Ba waa aa dɛ di n baah kohona nomanta, n ti ba dɛɛ la bwɛɛre aa wola Juu tena bwɛɛre ɛɛ kwaraa ta, dɛ kaa ɛɛ ba hɔhɔrɔwa.

12Gɛ ŋwɛnɛ nɔ bɛlee n soŋe Sɔfonomonome be, asɛ ba tɛ mɛ kpeɡri ŋɔ ń la Damaskɔs.#Weɛ 9:1-19; 22:6-16 13N Naa kooro, yaa lɔ ŋwɛnɛ ta dɛɛ kaa la, ɡɛ saŋ wee aa cheɡɛ nyufala la, n ne nyiŋa dɛ nii le nyundua dɛ chaah bɔr ɡwaa wee, dɛ chaah bɔr bar n ne nɛra yaa dɛ valɛ la. 14Belaa ya bwa choɡli harɛ, asɛ n no kɛŋɔ nomɛl aa kpɔ ya bwɛɛ Juu tena wobol#26:14 Juu tena wobol ne Hibru tena wobol bwa beŋkpoŋ. dɛɛ bol waa n be, dɛ ŋɔ, ‘Oo, Sɔɔl! Ɛrɛɛ he che n nɛɛ ɡɛ nɔɔ? He ɡbaɡbaa hɛɛ ɛ la. He ne nao baa doo ŋwɛn dɛɛ teɡɔ o ta naa dɛɛ yaɡre o dɔɔ da bwa beŋkpoŋ.’

15Anee n ŋɔ, ‘Henee umeo, n Dɔɔ?’

Asɛ o ŋɔ, ‘Menee Yeesu haa cheɡɛ n nɛɛ la. 16Ir che! N dɛ nyin n lee ásɛ he ɛ n bonɔɔ dɛ valɛ dɛɛ bol waa haa naa fini nɔ, ne anɔ la haa naa kerekere la nɛra be. A waa n kpɔ n te chaɡle la. 17Mɛɛ tomɛɛ Juu tena ne nɛra baa wola Juu tena ɛɛ bwa bee, dɛɛ kisii wechɔɡe ba be. 18Hen dɛ́ ka pili ba sie, ásɛ ba le biro ta dɛ́ ba bochaah ta bela nii aa lole, dɛ́ le Bɔnsam nɔn ta dɛ́ ba Korowii be, ásɛ o kpɔ ba wechɔɡa kɛ ba, ásɛ ba ba ja nɛra baa yarada mɛ n sɔ ba doŋa bwa ta ba ɛ n bii la nɛ.’

19N Naa kooro, maa na ɡɛ waa nɔ la, n ta vɛɛh. Gɛ bwa Yeesu aa le nyundua ba ŋɔ n be la, n ɛo. 20N tɔ sie la Damaskɔs, dɛ la Jerusalam, dɛ ɡaaɡe Juda harɛ la te bwa, dɛ la harɛre a nɛra aa wola Juu tena ɛɛ ɡe ta. Maa dɛ ɡaaɡe la bwa, dɛ n dɛ ŋɔ ba be ŋɔ bá charɛ ba liire, dɛ́ le ba wechɔɡa ta, dɛ́ ba Korowii be, ásɛ dɛ ɡel ba we-ɛɛla chaɡle kɛ ba charɛ ba liire dɛ le ba wechɔɡa ta. 21Gɛ waa nɔ waa Juu tena laɡ mɛ ɡɛ saŋ maa lɔ Korowii Dea la, dɛ fe ɛɛ nyin n kpoe. 22Dɛ le ɡɛ saŋ nɔ bwa ba le fini nɔ, n dɛ lii kɛŋɔ Korowii alaworomɛɛ n ta do le, dɛ won che he sie dɛɛ di waa nɔ danseɛ nomonjena ne bechale bwa be nɔ. Waa Korowii keamere ne Mosis fa aa dɛ bol ŋɔ aa ɛo laanee n ɡe ɛɛ bol. 23Anee kɛŋɔ a chɛ kɛ Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la na wahala, dɛ́ tɔ sie ir seo ta lala bwa nɛ, dɛ́ won che o seo ta ira la ta, dɛ́ baɡle Juu tena ne nɛra baa wola Juu tena ɛɛ la kɛŋɔ ya toole seo nɔn ta ne biro ta kpa, dɛkalkɛ nii chaah ya nɛ.”#Luk 24:26

24Pɔɔl aa dɛ bol waa ken la, Koojen Fɛstɔs kɔro ŋɔ, “Pɔɔl, choɡlaa dɛɛ wee kɛɛ? He tɔn jema kohona laanee dɛɛ wee choɡla la!”

25Anee Pɔɔl ŋɔ, “Nomoa, choɡla laa mɛɛ we! Kasinteŋ torodoo mɛɛ bol la. 26N Naa kooro Aɡrepa te jemɛ waa maa dɛ bol nɔ bwa. A waa maa wola waa bola o sie ɔmɛ la. N jemɔ kɛŋɔ a bɛlbwa ta o habɔɔ leɛ, dɛkalkɛŋɔ a bɛlbwa ta waa baa sɔah ɛ ɛɛ. 27N Naa kooro, he yarada waa Korowii aa ɡela o keamere la bol la aa? N jemɔ kɛŋɔ he yaradaa.”

28Belaa Kooro Aɡrepa ŋɔ, “He dɛ lii kɛ hɛɛ wonoo ɡel n berɛ asɔre te buɡ nɔ ta kɛɛ?”

29Anee Pɔɔl ŋɔ, “Dɛ buɡ nɔ taa yoo, dɛ kerekeree yoo, n te waa maa dɛ soŋe Korowii laanee kɛŋɔ, he ne nɛra baa dɛ no n waa fini nɔ fe do kɛŋɔ maa doa nɔ. Kɛ maa soŋe kɛ ba doe jɔɡrɔre kɛ baa do mɛ nɔ te.”

30Belaa Kooro Aɡrepa ne Nomoa Fɛstɔs ne Bɛnes, ne nɛra baa lɔ bela la bwa ir, 31asɛ baa le bela la, baa ŋɔ dɔŋa be ŋɔ, “Baa nɔ wobɛlbwa ta baɡlɛ kɛ o chɛ kpoe, kɛɛ ba doo dea.”

32Kooro Aɡrepa ŋɔ Nomoa Fɛstɔs be ŋɔ, “Dɛ ken laa o soŋe ŋɔ hé la o ne Rom Koojen Siisa be ó ka bol o waa dɛ́ pa bole nɔ naa, n fe ɛɛ ŋɔɔ hé kpɔɔ ta wɛɛ la.”

Currently Selected:

We-ɛɛla 26: mzw

Highlight

Copy