2 Tesalonika 3
3
He soŋe Korowii tɛ yaa
1Anɔ la aa kaa la, yabala, hé soŋe Korowii dɛɛ tɛ ya ɡba, ásɛ ya Dɔɔ waa la won perɛ kɛrɛdɛ dɛ́ won dɔ jirima, ásɛ nɛra no kɛŋɔ ɡɛ he ɡe fa aa noa la.#Mat 9:38 2Hé soŋo o lɛ yaa dɛɛ le meesɔɔh tena ne nɛnchɔɡa be, dɛkalkɛŋɔ nomɛlbwa laa dɛ́ no waa yaa dɛ bol la dɛ yaradaa. 3Kɛ Korowii waa dɔ kasinteŋ la, wɛɛ ɡeloo hɛɛ kpeɡ waa la ta teŋa ta, dɛ́ lɛ heyaa le Bɔnsam nɔn ta o bɛ heyaa dɔ. 4Yaa dɛ yarada ya Dɔɔ la waa ya won dɛɛ yarada he ɡe kɛŋɔ he dɛ teŋɛ ɡɛ ya fa aa baɡle heyaa la ta la, dɛ berɛ dɛɛ yarada heyaa kɛ hɛɛ kpoŋe ɡɛ ya fa aa bol he be laanee dɛɛ la. 5Yá Dɔɔ Yeesu Kristo cha heya, ásɛ he won jemɛ nyina Korowii aa nyin heya, ne bambile Yeesu Kristo aa lawa o hɔhɔrɔwa la bini la.
Sie doe dɛɛ ɛ toma
6Yabala, ya cheɡɛ ya Dɔɔ Yeesu Kristo sɔn ta dɛɛ ŋɔ he be ŋɔ, he bini bɛlbwa dɛ ɛ bɔhwaah o ta sɛɛh dɛɛ ɛ toma ɡɛ yaa baɡla la aa, hé ɡelo, he ne o bɛ pɛ. 7Ya fa aa lɔ he be la, dɛ ya ta bɔhwaahra ɛɛ. Anomanta, he jemɛ ɡɛ haa ɛ dɛ́ teŋɛ ya nɛ. 8Ya ta nomɛlbwa kondikwaa dii pɛɛpɛɛ. Ya ɛ toma chɔɔ ne jwaana dɛɛ koh kɛrɛdɛ, dɛ bɛ heyaa ha ya kondikwaa wa.#Neh 5:18 9Yaa ɛ ɡɛ nɔ, a ta ɛɛ kɛŋɔ ya ta ŋwɛnɛ dɔe kɛ ya lɛ ɡɛ kwaa nɔ le he be. Ya dɔ ŋwɛnɛ, kɛ ya ɛ ɡɛ dɛ kpɔ baɡle heyaa ásɛ hɛɛ teŋɛ a ta. 10Waa yaa kpɔa tɛ heyaa ɡɛ saŋ ya fa aa lɔ he be bela laanee kɛŋɔ, nomɛlbwa waa ŋɔa waa tomaa ɛ la ta chɛ kɛŋɔ ó di kwa.
11Ya dɛ no he waa kɛŋɔ he bane ta sɛɛh dɛɛ ɛ toma, dɛ valɛ pɛɛpɛɛ dɛ kpɔ nyoa dɛɛ do nɛra waa ta. 12Ya cheɡɛ ya Dɔɔ Yeesu Kristo sɔn ta dɛɛ ŋɔ ɡɛ nɛra nɔ be ŋɔ bá do sie dɛɛ ɛ ba ɡbaɡba toma dɛɛ di ba koeh ta. 13Yabala, hé ɛ wedɛɛɡa dɛɛ la, dɛ bɛ ŋɔ he koɔh.#Gal 6:9
14Dɛ nomɛlbwa ta sɛɛh kɛ wɛɛ teŋɛ ɡɛ yaa ŋɔa tɔn nɔ bini nɔ taa yaa, hé nyiŋu kɛrɛdɛ. He ne o bɛ pɛ dɛɛ ɛ wobɛlbwa, ásɛ sihiih kpoo. 15N ta ŋɔe ŋɔ hé kpɔɔ berɛ he dɔm te, kɛ hé jao kɛrɛdɛ kɛŋɔ ɡɛ haa dɛ ja he nimanar.
Kala aa ka mun
16Ya Dɔɔ Yeesu Kristo la ɡbaɡba waa dɔ bambisɔn kɛrɛdɛ la, ó tɛ heyaa bambisɔn saŋ bɛlbwa, wobɛlbwa ta, dɛ ja he bwa nɛ.
17Men Pɔɔl ɡbaɡbaa chwerɛ bonɔ nɔ. N dɛ na heya. Kenii n yon dɛɛ ɛ n tɔn bɛlbwa bini, ásɛ he won jemɛ kɛŋɔ n tɔnee.
18Yá Dɔɔ Yeesu Kristo waa dɛ na nɛra sum la cha he bwa sekwaraa.
Currently Selected:
2 Tesalonika 3: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
