2 Kɔrent 3

1Yaa dɛ ŋɔ ken nɔ, kpɛɛraa yaa kpɛɛ ya te ja kɛɛ? A hiaoh kɛŋɔ ya kpoŋe tɔne aa baɡle ya nɛnsoo ne ɡɛ ya toma aa doa mɔɔ he lɛ yaa aa? Kɛɛ a hiaoh kɛ ya dɔ ane le he be ásɛ nɛra won yarada yaa aa? 2He ɡbaɡbaa ya tɔn waa dɛ baɡle tondɛɛɡa yaa ɛa. Ya bambile taa Korowii chwerɛ, ásɛ nomɛlbwa na heya, dɛɛ pese heyaa kɛŋɔ nɛn aa dɛ kure tɔn la. 3He we-ɛɛla dɛ baɡle kɛŋɔ he ɛ Yeesu Kristo tɔn waa cheɡɛ ya nɛɛ dɛ chwerɛ. Iŋki ne laa o chwerɔ, Korowii waa lole saŋ bɛlbwa la Domadɛɛɡee o kpɔ chwerɛ. Bwe ta laa o chwerɔ, bambile taa o chwerɔ.#Kaa 34:1; Jer 31:33

4Ya won ɡɛ bola, dɛkalkɛŋɔ ya cheɡɛ Yeesu Kristo nɛɛ dɛɛ yarada Korowii a ɡɛ waa nɔ ta. 5A ta ɛɛ kɛŋɔ ya dɛ lii kɛŋɔ ya won waane ɛɛ ya ɡbaɡba kpeɡri ta. Korowii bee ya dɔ kpeɡri dɛɛ ɛ anɔ la bwa yaa dɛ ɛ. 6Korowii ɡelɔ ya won dɛɛ ɛ o fɔofale la toma. A ɡɛ fɔofale nɔ ta mmara baa chwera waa ɛɛ, Korowii Domadɛɛɡe waa. Mmara baa chwera la dɛ ba seo ne, kɛ Korowii Domadɛɛɡe la te dɛ ba mkpa ne.

7Bwe taa Korowii faa chwerɛ Mosis Mmara la dawɛ. Bela Korowii aa kpɔ Mmara la tɛ Mosis la, Korowii jirima ba bela, bela bwa chaah, dɛ chaah Mosis nɛɛ o siebɔr ɛɛ nyɛɡle. Mosis aa la Israel tena be la, dɛ nyɛɡla o siebɔr aa dɛ nyɛɡle la nyoa sɔɔhnɔ tonɛ. Kɛ Israel tena aa nao la, ba ŋɔ o siebɔr dɛ nyɛɡle kohona to, ba ta wone nyiŋu. Mosis Mmara kwara waa dɛ la nɛn ne seo ta la wono ba jirima nɔ dɔŋ ne naa,#Kaa 34:29-35 8dɛ ɛrɛɛ Korowii Domadɛɛɡe la wa ɛɛ ba doe yɔ? Aa ɡɛɛ ɡwaa la aa? 9Waa aa ɡela nɛra ɛɛ di bolchɔɡe Korowii sie la dɔ jirima ken aa, dɛ anɔ la aa ɡela nɛra ɛ nɛndɛɛɡa ba wa ɛɛ su o siwi la, ɛrɛɛ a jirima ɛɛ ba doe yɔ? 10Waa a fa aa dɔ jirima kohona la, taraken a ta jirima dɔe kpa, dɛkalkɛŋɔ anfala jirima tɔɔɡe a nɛ. 11Waa aa ɛa tɔpera anɛ dɛ tonɛ la, dɛ a dɔ jirima aa, dɛ anɔ la aa wola jaɡa dɔe bwa la, a jirima ta ɡwaalaa?

12Ya dɔ hwɛɡa ɡɛ waa nɔ ta, anomanta, yaa ɔmɛ. 13Ya ta do kɛ Mosis o fa aa wola nyin kɛ Israel tena na kɛŋɔ o siebɔr nyɛɡla nyoa dɛ sɔɔh, dɛ koh a waa kpɔ yachaahne tɔ sie la. 14Israel tena fa aa waa la mun no. Taraken ɡba, ɡɛɛ ba ta do. Baa dɛ kure fɔobene la waa la, a ta do kɛ baa kpɔ yachaahne tɔ ba sie. Ba ta Yeesu Kristo waa lɛɛ yaa, yachaahne la aa ba sie lee ba. 15Hale fini ɡba, saŋ bɛlbwa ba dɛ kure Mosis Mmara Tɔn aa, a ta do kɛ yachaahne aa tɔ ba liire, dɛ ɡel baa a mun no.

16Kɛ, saŋ bɛlbwa nɛwɛnyini aa charɛ o liire dɛ́ berɛ ba Yeesu be la, yachaahne la ɛɛ leo. 17Ya Dɔɔ Yeesuu Domadɛɛɡe la. Bobɛlbwa ɡe o Domadɛɛɡe la aa lole la, nomɛlbwa dɔ o te, o toole Mmara lɔɡa.#Gal 5:1 18Anomanta, komɛlbwa ta ya te sie tɔe. Ya Dɔɔ Yeesu jirima chaah ya nɛ, dɛɛ beɡre yaa asɛ yaa do ɡɛ waa doa, jirima yaa dɔa la ɛɛ ja. Ya Dɔɔ Yeesu waa ɛ Domadɛɛɡe la bee a bwa le.

Currently Selected:

2 Kɔrent 3: mzw

Highlight

Copy