1 Kɔrent 1

1Menee Pɔɔl aa too Korowii tea asɛ o lee mɛ ŋɔ ń ba ɛ Yeesu Kristo torome la. N ne n dɔŋ Sɔɔstenes bwaa chwerɛ tɔn nɔ dɛɛ tɛ he asɔre tena haa lɔ Kɔrent#Weɛ 18:1-18 dɛɛ tomɛ Korowii la.

2Korowiirii le heya, dɛ koh pɛɛ he ne Yeesu Kristo aa pɛa la waa dɛ laa doŋa bɛlbwa kpɔ he nɛɛ dɛ ɡel he ɛ o nɛra. Ya dɛ chwerɛ he ne nɛra baa lɔ bobɛlbwa dɛɛ tomɛ ya ne ba bwa Dɔɔ Yeesu Kristo la.

3N Naa Korowii ne ya Dɔɔ Yeesu Kristoo dɛ́ cha heya, dɛ́ tɛ heyaa bosɔɔhna.

Korowii jaama

4N dɛ jam Korowii tɔpere bɛlbwa kɛ waa koh pɛɛ he ne Yeesu Kristo aa pɛa la waa dɛ sune he nɛɛ dɛɛ cha heyaa nɔ. 5He ne waa pɛa la nomanta, o ja heyaa kpeɡri ŋwɛnɛ bɛlbwa ta. O ɡelɔ he jemɛ wobol, dɛ tɛ heyaa wejema, asɛ a baɡle kɛŋɔ 6Yeesu Kristo waa la ya fa aa bol he be la jo he bambile bini kɛrɛdɛ. 7Anomanta, taraken haa kpɔ hwɛɡa dɛɛ kpa ya Dɔɔ Yeesu Kristo bala nɔ, wobɛlbwa kpeɡri ta heyaa nyae le Korowii be. 8Ya Dɔɔ Yeesu Kristo nɔɔ dɛɛ ba ɡela he che kiŋkiŋ ka tel he serewe bena, ásɛ awola tɔpere waa ba la, wechɔɡa bɛlbwa bɛ he nɛɛ do. 9Korowii ɛ kasinteŋ te. Onee le heyaa ŋɔ hé ne o Bie la do som. O Bie laanee ya Dɔɔ Yeesu Kristo la.

Asɔre tena dɔŋa baah peɡra wa

10Yabala, n kpɔ ya Dɔɔ Yeesu Kristo dɛɛ soŋe heyaa kɛ hé bwa ɛ beŋkpoŋ. He bɛ dɔŋa baahna peɡri, hé ɡel he nyoa pɛ he we-ɛɛla ne he liire ta. 11Yabala, nɛra bane le Kloi dem dɛ ba ŋɔ n be ŋɔ, webeɡra chole he bini bane baah ta, a waa n bol a ɡɛ waa nɔ la. 12N noɔ kɛ bane ŋɔ ba teŋɛ men Pɔɔl nɛ, bane ɡe ŋɔ ba teŋɛ Apolos nɛ, asɛ bane ɡe ŋɔ Pita nɛɛ ba te teŋɛ, bane ɡe ŋɔ ba teŋɛ Yeesu Kristo nɛ.#1Kɔ 3:4 13Hé na! Yeesu Kristo binii he bɔne la! Men Pɔɔlee ba koh he waa kpaa pɛl daɡaɡre ta la aa? Kɛɛ n sɔn nee ba sɔ heyaa Korowii nee ŋɔ hɛ́ɛ teŋɛ n nɛɛ la? Akai!

14N dɛ jam Korowii kɛ ɡɛ saŋ n fa aa lɔ he be la, n ta nomɛlbwa Korowii nee sɔe ka ja Krispus ne Gayos nɛ.#Weɛ 19:29 15Anomanta, nomɛlbwa toole dɛ́ won ŋɔ n sɔ heyaa Korowii nee ŋɔ hɛ́ɛ teŋɛ n nɛ. 16Dɛ Stɛfanas ne o dem tena ɡe laa n berɛ sɔ Korowii ne aa, maa lii kɛŋɔ n sɔ nomɛl nee kpa. 17Yeesu Kristo fe ta men tomɛ ŋɔ ń baa sɔ nɛra Korowii ne. O ŋɔ ń ba bol Amanesoma la nɛra be, kɛ n bɛ n ɡbaɡba wejema ne nyotor kpɔ dɛɛ bol waa la, ásɛ Yeesu sewa waa sewɛ daɡaɡre ta la bɛ pɛɛpɛɛ ɛ.

Yeesu dɔ wejema ne kpeɡri le Korowii be

18O daɡaɡre la ta seo la yaa dɛ bol a waa la ɛ wesale tɛ nɛra baa dɛ nyoɡre. Kɛ ya banɔ la Korowii aa dɛ lɛ yaa la te, ya jemɔ kɛŋɔ Korowii kpeɡri lɔ a ta. 19Ba chwerɛ Korowii Tɔn bini ŋɔ Korowii ŋɔ,

“Mɛɛ ɡeloo nɛra wejema ne tɔn jema ɛ pɛɛpɛɛ.”#Aes 29:14

20A ba ɡɛ naa, dɛ lee wejerema ne tɔnjerema wejema dɔɔ jaɔ? Nɛra baa dɔ wobol wejema ɡe, dɛ lee ba dɔɔ? Korowii ɡelɔ nɛwɛnyini wejema ɛ pɛɛpɛɛ. 21Ba ɡbaɡba wejema ɡelɔ baa Korowii jemɛ. Korowii kpɔ o wejema ɛa ɡɛ, dɛ ŋɔ a ɛo silɛɛ kɛ wɛɛ lɛ nɛra baa yarada Amanesoma yaa bola dɛɛ baɡle nɛra asɛ baa liira wesale la. 22Juu tena dɛ nyin ya ɛ nyokpowaa baɡ ba, Grik tena ɡe ɛɛ nyin kɛ ya baɡ ba wejema mɔɔ ba yarada. 23Ya te, Yeesu Kristo sewa daɡaɡre ta la waa yaa bol. A ɛ waa Juu tena aa dɛ lɔ naa a ta dɛɛ vɛah, asɛ nɛra baa wola Juu tena ɛɛ ɡe la, a ɛ wesale ba be. 24Kɛ Juu tena ne Grik tena Korowii aa lee ba ŋɔ bá ba ɛ o nɛra la, Yeesu Kristo waa la ɛ Korowii kpeɡri ne o wejema ba te be.#Kol 2:3 25Waa nɛra aa dɛ lii kɛ a ɛ Korowii wesale la, a ɡwaa nɛwɛnyini wejema, o ɡwɛɡra ɡe ɡwaa nɛwɛnyini kpeɡri.

26Yabala, hé lii ɡɛ haa doa asɛ Korowii le heyaa ŋɔ hɛ́ɛ teŋɛ o nɛɛ la. He ɡalɡa ta wejerema ɛɛ nɛra be. He ɡalɡa ɡe ta nɛnjena ɛɛ nɛra be. He bwa ɡe laa ɛ koobii. 27Korowiirii saahna le waa nɛra aa dɛ liira wesale dɛ́ ɡel sihiih kpo wejerema, asɛ dɛ saah le ɡwɛɡra ɡe dɛ ɡel sihiih kpo kpeɡnɛra, 28dɛ kpɔ waa nɛra aa haah, ne anɔ la baa dɛ liira wepuu, ne anɔ la baa wola a waa jemɛ ŋɔ á ba chɔɡ anɔ la nɛra aa dɛ maŋkuraa la, 29ásɛ nɛn bɛ won ɡɔɔ o te Korowii sie. 30Korowiirii ɡela he ne Yeesu Kristo pɛ, ásɛ ya che o nɛɛ dɛ dɔ Korowii wejema. O nɛɛ a che Korowii na yaa kɛ nɛndɛɛɡa dɛ berɛ kpɔ yaa ɛ o kwa. Onee kpɔ seo dɛ yawɛ yaa le ya wenaale ta. 31Anomanta, ɡɛ Korowii Tɔn la aa ŋɔa la. “Nomɛlbwa waa dɛ nyin o te maŋkurae la, wɛɛ maŋkura o te waa Korowii aa ɛa ta.”#Jer 9:24

Currently Selected:

1 Kɔrent 1: mzw

Highlight

Copy