Amos 1
1
Wat Amos gesê het
1Die woorde van Amos.
Amos was 'n skaapboer. Hy het in die stad Tekoa gewoon. Die Here het vir hom gewys wat met die Israeliete sal gebeur. Dit was twee jaar voor die aardbewing. In daardie tyd was Ussia die koning van die land Juda, en Jerobeam was die koning van die land Israel. Jerobeam was die seun van Joas.
2Amos het gesê:
“Wanneer die Here uit Jerusalem praat, dan is dit soos 'n leeu wat brul. Dan word die veld droog waar die skape moet wei, die plante op Karmel-berg gaan dood.”
Die Here sal die Arameërs straf
3Die Here sê:
“Die mense van die stad Damaskus
het 'n baie groot sonde gedoen,
daarom sal Ek hulle straf.
Hulle het wrede dinge gedoen
aan die mense van die land Gilead.
4Ek sal 'n vuur stuur na die huis
wat koning Gasael gebou het,
en die mooi huise
wat koning Ben-Hadad
gebou het, sal afbrand.
5Ek sal die poort van Damaskus
oopbreek.
Ek sal al die mense
wat in Bikat-Awen woon,
doodmaak saam met die koning
in die stad Bet-Eden.
Die vyande sal die Arameërs vang
en wegvat na die land Kir.”
Dit is wat die Here gesê het.
Die Here sal die Filistyne straf
6Die Here sê:
“Die mense van die stad Gasa
het 'n baie groot sonde gedoen,
daarom sal Ek hulle straf.
Hulle het in party stede
al die mense gevang en verkoop,
en die mense het die Edomiete
se slawe geword.
7Daarom sal Ek 'n vuur stuur
na die stad Gasa.
Sy mooi huise sal afbrand.
8Ek sal al die mense
van die stad Asdod doodmaak,
en ook die koning
in die stad Askelon.
Ek sal die mense
in die stad Ekron straf.
Die Filistyne wat oorgebly het,
sal sterf.”
Dit is wat die Here gesê het.
Die Here sal die mense van Tirus straf
9Die Here sê:
“Die mense van die stad Tirus
het 'n baie groot sonde gedoen,
daarom sal Ek hulle straf.
Hulle het in party stede
al die mense
wat gevangenes was,
verkoop aan die Edomiete
en die mense het die Edomiete
se slawe geword.
Die mense van Tirus het vergeet
dat hulle 'n ooreenkoms
met daardie mense gemaak het.
10Daarom sal Ek 'n vuur stuur
na die stad Tirus.
Sy mooi huise sal afbrand.”
Die Here sal die Edomiete straf
11Die Here sê:
“Die mense van die land Edom
het 'n baie groot sonde gedoen,
daarom sal Ek hulle straf.
Hulle het oorlog gemaak
teen mense wat familie is van hulle.
Hulle was nie jammer
vir hulle familie nie.
Hulle het aangehou
om mense dood te maak.
Hulle het kwaad gebly.
12Daarom sal Ek 'n vuur stuur
na die stad Teman,
en die stad Bosra se mooi huise
sal afbrand.”
Die Here sal die Ammoniete straf
13Die Here sê:
“Die Ammoniete het
'n baie groot sonde gedoen,
daarom sal Ek hulle straf.
Hulle het oorlog gemaak
om meer grond te kry
in die land Gilead,
en toe het hulle
swanger vroue oopgesny.
14Daarom sal Ek die stad Rabba
en sy mooi huise afbrand.
Die vyande sal hard skree
wanneer hulle die stad aanval,
hulle sal soos 'n stormwind
deur die stad gaan.
15Hulle sal die Ammoniete
se koning en sy amptenare vang
en wegvat na 'n ander land.”
Dit is wat die Here gesê het.
Currently Selected:
Amos 1: ABA
Highlight
Share
Copy
Want to have your highlights saved across all your devices? Sign up or sign in
© Bybelgenootskap van Suid-Afrika 2007. Gebruik met toestemming. Alle regte voorbehou.