Mark 7

NAKATA 7

Jesus Jewmiun pitkuyainik maligluanginami ukaktuk

(Mt. 15:1-20)

1Tapfumani Pharisekut, tiitigaktillu akuihimayun Jerusalemin katimagamik Jesusmun, 2tautuktain maligutait negivangmata uakhimaitumik algait halumaitillugit. 3(Pharisekut Jewmiut tamangmik negitinatik uakpaktun algamingnik hivullingita pitkuhiit malikhugit 4aahin niuvavingnin aigagamik negiyunaitun ingmingnik uaktinatik; pitkuhit allat malingnaktain, kallutait, akiutaillu, kattaillu uakhugit) 5Pharisekut Tiitigaktillu apegiyaat, “Hug maligutitin hivullipta pitkuhiit maligngipahigit negivlutik algamingnik uakhimaitumik?” 6Ukallautiyait, “Itkumayumik Isaiah hivuniugiakpaktuk ilipfigun ilumukhektutigun, tiitigakhimangman, 'Hapkua inuit nagugitillunga uvanga kanimingnin uvamnin ungahiktumiitgaluaktun umatimingni. 7Angayyuvigiyangnga ilumuktungngitutun inuit pitkuhigingnik ilihauyyingnakpiagamik.' 8Godim pitkuyanga kimagapfiuk inuit pitkuhiit malingnakuvlugit.”

9Ukautiyaillu “Godim pitkuyain igitpaktahi ilipfi pitkuhihi malikuvlugit. 10Moses ukakhimangman, 'Angutin angnallu nagugilugik' imaatunlu, 'Kinalika anguminun angnaminunlunin ukanilukumi tukutauli' tamna. 11Ilipfili ukagaluaktuhi, 'Inuk anguminun angnaminunlunin ukakkan, Hullika piyakhagiyahi uvamnin Corbanguyuk' (Imaatun-ituk-Godmun tuniyauyuk) 12Talva ilipfi ikayukiktailiyakhi tamna angayukaminun. 13Taima pitkuhipfigun tapkuninga ilihauyyigapfi Godim ukauhiit hugnektitahi. Allaniglu ayyikiitumik pivaktuhi.

14Aahin Jesusim kaitkugamigit inuit inminun ukallautiyain, “Nalaugitti uvamnun tamapfi kangekhiluhilu. 15Hullika inum hilataaniituk iluanungaugumi halumaektilimaituk tapfuminga, tapkuali inum iluanin aniyun halumaektiyagaluangat tamna.

16Inuk hiutilik hapkuninga tuhaali. 17Iglumunlu itegman kimakhugit inuit maligutaita apegiyaat hivuniunekun. 18Ukallautiyain, “Ilipfitauk kangekluangitpihi? Ilihimangngitpihi hullika inum hilataanin iluanun itegumi halumaektilimaitaa, 19umataanun itegnginami akeaguanun kihianun anaktauvlunilu?” (Taima Jesusim nekikhat tamaita halumagnahugiyain) 20Ukaktuglu, “Hullika inungmin aniyuk halumaektiyuk inungmik. 21Imaatun-ituk, inuk ihuitumik ihumalegumi allatugumagumilu, kukitumavlunilunin, inuagumagumi 22aagukhukpiakhuni, huinekiyumavluni, ikugumi, tuhuvluni, uneglukpiagumilu, anangaiyakhuni, tiitakpiagumilunin, 23hapkuninga tamainik inuk pigumi hivungani ihumalektuk umamini, tapkuaktauk inuk halumaektitaa.”

Angnaguhek Jewmiungituk naguhipkaktauyuk

(Mt. 15:21-28)

24Talva nangekhuni Jesus aullaktuk Tyrm Sidonim nunainun. Iglumunlu itegumayuk inungnin tautugnaitillugu, iyektaulimaitugaluak tapkunanga. 25Tayyainaglu angnak panikaktuk agiuktulingmik tuhaagami Jesuskun upautiyuk pallukhuni itigainun. 26Angnak tamna Greekmiutauyuk Syropheniciamiuni inuhimayugaluak. Tapfuma tukhiagvigiyaa agiuktuk anipkakuvlugu panianin. 27Ukallautiyaa, “Kitungauyun negipkaktaulit, ihuiman kitungauyun nekhautain tuniyaupata kenminun.” 28Kiuyagaluanga angnam, “Ilaa Atanek, kenmitlunin ikpatim ataaniitun kitungauyun nekhautaita ilakungit katakhimayun negiyain.” 29Jesusim ukallautiyaa, “Ukagavin taima aiyyavutin, agiuktum panin kimangmagu.” 30Aigamilu panini tautuktaa nallakhuni iglengmi, agiuktuektuglu.

Angut tuhaayuituk, ukayyagluktuglu naguhipkaktauyuk

(Mt. 15:29-31)

31Tyreminlu utegami apkutigiyaa Sidon attakhuni Galileem tahianun aullakhuni iglukagvitigun kulitigun. 32Inuillu tikiutiyaat Jesusmun inuk tuhaalimaiman ukayyaglukhunilu, tukhiagvigivlugulu aktuinakuvlugu. 33Jesusimlu aahinungautigamiuk hiutaik aktuktaik, ukaalu mihaktektaa kaniminin. 34Kilangmun aaglukhunilu anekhaumiyuk ukautivlugu, “Ephaphatha” –imaatun-ituk, “Angmagin”. 35Hiutaillu angmaktuk ukayyagikhiyuk tayyainak. 36Jesusimlu unipkaktailiyain tapfuminga, akhunli uniutivagain tamaita tamainik. 37Tapkualu agligutakpiakhutik ukaktun, “Una tamainik naguyunik pivaktuk. Tuhaayuitun tuhaatitain, ukayuitullu ukaktitugit.”

Currently Selected:

Mark 7: Sperry

Highlight

Copy

Compare