Mark 12

NAKATA 12

Hivuniunek ahiakagvikun

(Mt. 21:33-46; Lk. 20:9-19)

1Talva Jesus ukagahualektuk tapkununga hivuniunektigun, “Inuk ahiakagvikhaminik havaktuk avalugivlugulu. Aahin ipteyavikhamiglu hanayuk napagiakliukhunilu. Kinguagun havaktit munakhikugamigit nunamun ungahiktumun aullaktuk. 2Ahiallu naulengmata tapfuma kivgani tiliyaa havaktinun ahianiktukuvlugu tapkunanga. 3Tapkuali tigugamitku tiliyauyuk kektuktaat aullaktitugu ahianik tunihimaitunik. 4Aahintauk nauttivilgum kivgani aipa tilimagu havaktit aanektaat niakuagun kapiahuktitugu. 5Aahintauk allatauk tilimagu, inuktagiyaat allatauk taima ilangit kektukpagain ilangillu tukutugit. 6Kinguagun tapfuma engniga avaliektuk nagugigaluaktillugu akhun tiliyaa tapkununga ukakhuni, “Kanuiliugunaitugaluit engnimnun' 7Tapkuali havaktit ingmingnik ukallaktun, 'Tamayya kinguvakhekhiyi, takki tukulakput tapfuma kinguvakhainik pikuvluta.' 8Tapkuali tigugamitku tukuvlugu igitaat ahiakagvingmin. 9Nauttivilik huliniakka? Kainiaktuk havaktit tapkua tukukuvlugit ahiakagvia munagiyaukuvlugu havaktinin allanin naguyunin. 10Godim ukauhianik uminga taigugngilahi,

'Uyagak igitauhimayuk igluliuktinin iglukpaum kiglingata ataani iliyauyugaluak. 11Atangum pimagu tamna alianakpiaktuk iyiptingnun'?”

12Tapkualu tigunahualektat inungninli ekhiukpallaaktugaluit Jesusim hivuniunekun ukautigimatik. Talva kimakhugu aavungaktun.

Inuit akilekhiyukhaumangan maninik Caesarmun

(Mt. 22:15-22; Lk. 20:20-26)

13Talva Pharisekut ilait Herodim inungillu tiliyauyun Jesusmun apekkutitigun aiyukaktikuvlugu. 14Kaigamiglu ukallautiyaat, “Ilihauyyi ilumugavin ilihimagaluaktugut inuit ekhiginginapkin kamahugngitkivlutinlu atanekpainun, Godim apkutaanik ilihauyyikuvlutin ilumuktumik. Caesarmun maninik akilekhigupta naamakpak naamangngitpalunin? 15Akilekhiyukhauvita uvagut akilekhiyukhaungitpitalunin?” Jesusimli apekkutikain ihuigigamigit ukallautiyain, “Hug uktukpihinga? maniuyak kaiyyuk takulagu.” 16Tapfuminga takupkaktimani, ukallautiyain, “Umani kia niakuguanga atingalu?” Kiuyaat, “Caesaum”. 17Jesusim ukautiyain, “Talva Caesaum piyutainik tunihigitti Caesarmun, Godimtauk piyutainik tunihigitti Godmun.” Inuillu agligutautigiyaat.

Apekkut tukungayun makiyyutaitigun

(Mt. 22:23-33; Lk. 20:27-40)

18Talva Sadducekut upaktaat. Tapkua tukungayun inupkaktaulimainahugiyain. Tapkua apekhiyun tapfuminga ukakhutik, 19“Ilihauyyi, Moses tiitigakhimavaktuk, angutim angayua tukutpan nutagaitumik nuliani kimakhugu, tapfuma tukungayum nukaata nuliagiyakhagiyaa angnak kimakhimayuk nutaganikuvlugu angayua pivlugu. 20Ilaa uvaptingni nukagit 7guyun itpaktun, hivullik nulianikaaktillugu tukuyuk nutagaitillugulu. 21Tugliatalu nuliagigamiuk tamna tukuvaktugli nutagaitumik, aahin pingahua taimalivaktuk. 22Tamangmiglu nukagit taimalivaktun kingullik tikittugu nutaganiyuitkivlutik. Kinguagun angnak tukuvaktuglu. 23Ilaa tukungayun makilviata uvlua tikitpan nalliata 7n nuliaginiakkauk? Tamangmik pihimayagaluangat.

24Jesusim ukallautiyain, “Ulamnektuhi Godim ukauhianik hakugigninganiglu ilitukhinginapfi. 25Tapkua tukungayunin makikumik inuit nulianiyunaitun uinilimaitkivlutiklunin ihalguliktituniniagamik. 26Tukungayullu makilvingagun taigugngitpakpihi Mosesim tiitigaini Godim Moses ukagvigivangmagu ukpigmin ukakhuni, 'Abraham Godigiyanga, Isaacimlu Godigiyanga, Jacobimlu Godigiyanga'? 27Tukungayun God Godigingitaat, inuyun kihimi. Taima ihumapfingni ulamnauyuhi.”

Apekkut pitkuyatigun nalliak angikiyaumangan

(Mt. 22:34-40)

28Tiitigaktit ilangat kaigami tuhaayain tapkua kangutilektillugit, Jesuslu kiuyyagikpiangman tapkununga, apegiyaa, “Pitkuyainin tamainin nalliak angikiyauva?” 29Jesus kiuyuk, “Angikiak imaatunituk, 'Israelmiun tuhaagitti, Atanek Godikput atauhiyuk, 30Godin Atanin nagugiyakhagiyan umatingnin tamaanin, napatingninlu tamaanin, ihumatingninlu tamainin, hakugigninlu tamaanin.' 31Tapfuma tugliatauk imaatun-ituk, 'Nuakatin nagugiyakhagiyan iliptun.' Pitkuyat allat ukunanga angikiyaungitugaluit.” 32Tiitigaktimlu ukautiyaa, “Ilihimayutin ilihauyyi, God atauhiuman, tapfumangalu allaiman ukagavin ilumuktuk. 33Aahin nagugiguptigu umatiptingnin tamainin, ihumatiptingninlu tamainin, hakugigniptingninlu tamainin, nuakativullu nagugiguptigit uvaptitun tamna nagutkiak aitutikhainin ikualakhimayunin tamainin.” 34Tamna kiuyyagigman Jesusim ukallautiyaa, “Godim atanguvianin ungahikpallaangitgaluaktutin.” Kinguagunlu inuit tapfuminga apekhiyumangngitun kamahukhutik.

Apekkut Messiahkun

(Mt. 22:41-46; Lk. 20:41-44)

35Angayyuvikpagyuami Jesus ilihauyyigami ukaktuk, “Kanuk tiitigaktit ukakkat Davidim Christ engnigivagnahugivlugu? 36David inmi, Anengnikun Naguyukun, ukauyyiyuk,

'Atanek Atanimnun ukallaktuk, Talekpingma tunganun ingitin

akigatin itigakpit ataanungautikaaktinagit'.

37Davidim tamna taigamiuk Atanemnik kanuk engnigivauk?” Inuit kuviahuktun nalautillugit tapfumunga.

Jesusim tiitigaktit ihuigiyain

(Mt. 23:1-36; Lk. 11:37-54, 20:45-47)

38Jesuslu ilihauyyitillugu ukaktuk, “Upingakhitailuhi tiitigaktinin, pihugumainakpiangmata annugakaktillugit takiyunik, hallutauyumavlutik inungnin niuvaavingni, 39atugvingnilu ikhivautait nagutkiat atugumainaktain, negikataugagamiglu atanekpait ikhivakatigiyumavlugit. 40Aahin tapkua uilgaktun piyutainlu aagiyain piyutigivlugit, kengakpakhutik amihumik ilumukhektutun-ilivlutik pivaktun. Tapkua ilaa ihuigiyaukiyauhunguyun.”

Uilgaktuk aituktuk

(Lk. 21:1-4)

41Jesuslu angayyuvikpagyuam manikagvia tungani ikhivayuk kungniakhugit inuit maninik aituktillugit manikagvingmun. Manigiektullu amigaitumik aituktun. 42Talva uilgaktuk ilingayuk kaiyuk ilivluni maniuyangnik kanuyangnik malgunik. 43Jesusim maligutini kaitkuyain inminun ukautivlugit, “Ilumun ukautigipfi, tamna uilgaktuk ilingayuk aituktuk amigaitkiyanik inungnin allanin tamainin. 44Tapkua manigiekaluaktillugit aituktun, angnagli inugutikhaminik tamainik aitukpaktugaluak.”

Currently Selected:

Mark 12: Sperry

Highlight

Copy

Compare