Matthew 28

NAKATA 28

Jesus makittuk

(Mk. 16:1-18; Lk. 24:1-2; Jn. 20:1-10)

1Sabbathim uvlua nunguman, Sundaymi kaulgaktillugu, Mary Magdalamiutak, Marylu aipa kaimiyuk takuyaktugumavlugu iluvga. 2Talva nuna ingutaktuk Atangum ihalgulia atkangman kilangmin. Tikinami uyagak akhaluaktaa kangani ingivluni. 3Tapfuma takua kalluktitun-iliyuk, annugaillu aputitun-itun. 4Anguyaktillu ekhigigamitku kuglukpallaakhutik ulguyun tukungayutun-ilivlutik.

5Tapfumani ihalgulgum angnak ukautiyaik, “Ekhitailutik kenilegapfiuk Jesus kikiaktuktauhimayuk ilihimayunga. 6Hamaniingitugaluak makihimagami taima ukakhimavaktuk. Takki tapfuma iluviyagaluanga takuyaktugluhiuk. 7Aullagittilu kilamik maligutait uniutikuvlugit tukungayunin makitpangman, hivunipfingnunlu Galileemungaulengman takanini tautugniaktakhi. Tayya ukautigaptik.”

8Taima kilamiuvlutik aullaktuk iluvgaanin kuviatakpiakhutik kuglukpiakhutiglu atautikun, akpalekhutik uniutivlugit maligutait. 9Talva Jesusim paaktaik ukakhuni “Hallu”. Tapkuaglu upagamikku itigain tiguyain angayyuvigivlugu. 10Talva Jesusim ukallautiyaik, “Ekhitailutik, tavungaugittik katangutitka ukallautiyyavatik Galileemungaukuvlugit takanani tautugniaktangnga.”

11Aahin aullaktillugik tapkua, anguyaktit illait iglukagvingmungaktun uniuyyikuvlugit tamainik angayyuvikpagyuakun ataningingnun. 12Tapkua, inuit atanekpaillu katimagamik anguyaktit tuniyain maninik amigaitunik, 13ukakhutik, “Unipkagitti inungnun imaatun, 'Unuak hiniktilluta, tapfuma maligutaita kukitpagaat timaa.' 14Aahin atanek taimatumik tuhaakpan uvagut ihumaluguektihunguyakkput imakaagiyaukunahi ilipfi.” 15Tayyainak maninik pivaktun tuhaavlugut atanekpait. Talvangaanin ikuvlutik unipkautigiyaat Jesusim tamagvia Jewmiunun.

Jesus hagyaektuk maligutiminun 11nun Galileemi

16Tapkua maligutait 11guktun Galileemun aullaktun manilgulmun, Jesusim aullakumatik. 17Aahin takugamitku angayyuvigiyaat ilangitli ukpegluangitugaluit. 18Jesusim upakhugit ukautiyain, “Hakugiknikaktunga tamainun kilangmi nunamilu. 19Talva aullagitti nunakatigingnun tamainun malikulugit uvamnun inuit, baptaieklugillu atinganun Godim engnilgum, Engningatalu, Anengnim Naguyumlu. 20Ilihautilugillu malikuvlugit inuit pitkuyamnik tamainik tuhaayapfingnik uvamnin. Aahin uvanga naiyuinagniagipfi taima nunaum ihua tikitinagu.”

Currently Selected:

Matthew 28: Sperry

Highlight

Copy