Shwèʼ 25
25
Bol sensə la və dyʉ̀ ə̀ soʼ yi a Lum
1Andìʼ a bàmə mətsi ntaʼ ando Festus nkuʼù a kəkɨ a nə̀ gumnà Sisalìyà, ghə̀ lù kùʼ a Jelusalèm. 2Tʉtʉ vəpfèm və ngə̀ŋ Nyìngòŋ bènə̀ tʉtʉ Vəjew gàʼ nyʉ̀ byɨvə a wen byìʼì Bol. Vəwenə loyn Festus 3la ghə̀ ne və lyɨ Bol ə̀ vì nə̀ wen a Jelusalèm, gàʼà a lì byìʼàndo vəwenə mbaʼtə li əzhwi wen a ji. 4Ghə̀ gàʼ à vəwenə la, “Bol dìʼ mu və shwinə̀ li wen a Sisalìyà, mà diʼi bwènə̀ dyʉ̀ tsu a mətsi ghèn. 5Ghə̀ŋ gaʼà tʉtʉ vəŋə və boʼsə ə̀ vì nə̀ mò tsu shə̀ʼtə̀ kənyʉ̀ kì a ghə̀ byɨsə̀.”
6Festus tsi tsu mətsi fwomə, və sə ngàʼ la mətsi wum ghə̀ bwènə̀ shìʼi a Sisalìyà. Tʉʼ layn ghə̀ dyʉ̀ a kəbòʼ kə nsoʼ ə̀ gàʼ la və dyʉ̀ ə̀ lyɨ̀ Bol ə̀ vì nə̀ wen. 7Və vì nə̀ wen no a zhʉ̀ kò, Vəjew vi a və nlu fa Jelusalèm ə̀ vì tsu tɨmə kàʼa wen sə zhò ndzɨ̀ŋsə byìʼì Bol no səghoʼo alì kò vəwenə lu ndìʼì la kənyʉ̀ a vəwenə gàʼà byìʼì Bol dìʼ nəmwèʼè. 8Bol gàʼ ndi gyàmtə̀ wen ə wen la, “Mà ko kwàʼ soʼ Vəjew, ko ma lù byɨ̀sə kənyʉ̀ kətsenkə à vəwenə a ngə̀ŋ Nyìngòŋ, ko ndiʼ la mà gaʼà li tè kənyʉ̀ kə byɨkə kətsenkə byìʼì fòyn ə ghoʼo ə Lum.”
9Festus nkəŋə la Vəjew ə nkòŋə̀ wen, ghə̀ mù bèm à Bol la, “Wù le a kòŋ ə kuʼ a Jelusalèm və soʼ wù tsu à mò a shɨ byìʼì nyʉ̀ venə a və gàʼà a shèn byìʼì wù lə̀ a?”
10Bol bwènsə̀ la, “Mà dìʼ a shə̀ a kəbòʼ kə nsoʼ fòyn ghoʼo yì a ghə̀ diʼì a Lum, və diʼi soʼ mo tò a shèn. Nkàntə̀ wù ə̀ kɨ no nkàyn la mà ko byɨ̀sə kənyʉ̀ à Vəjew. 11Mà sətsèn ndiʼ mu mà kwaʼà li soʼ a və diʼi zhwi mo, mà ko tènsə la kə və zhwi, alì mu vəwenə sətsèn ngàʼà nyʉ̀ venə byìʼì mò alə̀ à diʼ ndzɨ̀ŋsə, mu wìʼ ko kiʼ kədyòʼ əku mo à vəwenə. Mà sensə̀ la fòn ghoʼo soʼ nsoʼ ghom.”
12Festus chʉʼmə tʉ wenə̀ viʼi vyi a və ku tyɨftə à wen mù gàʼ à Bol la, “Ando wù sensə̀ li la nsoʼ wù dyʉ̀ à fòn ghoʼo lì, nsoʼ ayì lì a dyʉ̀ tò à wen.”
Festus shə̀ʼtə̀ nsoʼ Bol à Fòn Aglibà
13A sə ndiʼ a bàmə vəsàŋ vəshyəʼ alə̀, Fòyn Aglibà wenə̀ Beniys vì a Sisalìyà ətoŋtə be shisə Festus. 14Vəwenə nè tsìtə tsu mətsi nshəʼ alə̀, Festus shə̀ʼtə̀ ngəʼ Bol à wen gàʼà la, “Wìʼ dìʼ a shə̀ a Felik tə shwìn ə̀ ghʉ̀sə a ngə̀ŋ mfɨŋ, 15ma tə nkuʼ ndyʉ̀ a Jelusalèm, tʉtʉ vəpfèm və ngə̀ŋ Nyìngòŋ bènə̀ vəchəʼ və Vəjew gàʼ nyʉ̀ byɨvə byìʼì wen bè gàʼ nyʉ̀ la mà byɨmə la və diʼ ku ngəʼ à wen. 16Ma gàʼ à vəwenə la, ‘A ko diʼ ntsìnə̀ yes, viʼi Lum ə ku wìʼ a və gàʼà la ghə̀ byɨsə li kənyʉ̀ la və ku ngəʼ à wen kò à ndiʼ la ghə̀ tɨmə̀ tɨ̀mə a shɨ viʼi vyi a və ghàmə̀ wen lì ə gàʼ kənyʉ̀ ndi gyàmtə̀ wen ə wen.’ 17Andìʼ ando vəwenə nshiʼi vì a shèn, mà ko nzhwi zhʉ. Tʉʼ ə layn tò laynə, mà dyʉ̀ ŋwʉʼʉ a kəbòʼ kə nsoʼ ə̀ gàʼ la və dyʉ̀ lyɨ̀ ə̀ vì nə̀ wen. 18Ghə̀ vì, viʼi a və nghàmə̀ wen lì lù sə gàʼà, ko ndiʼ la vəwenə gaʼà li kənyʉ̀ kə byɨkə kətsenkə fa nyʉ̀ a mà tə nkwòʼtə̀ la ghə̀ nè li. 19Vəwenə mbòŋsə̀ soʼo tò nyʉ̀ wenə̀ və Bol byìʼì jì yì a vəwenə ghoʼsə̀ Nyìngòŋ tsu, bènə̀ byìʼì wutsen a ghə̀ mpfʉ li və dzàŋə̀ wen nə̀ Yesò, alì Bol gàʼ la ghə̀ dìʼ to. 20Mà ki kənyʉ̀ akì kə ghoʼ mo, mà mù bèm à Bol la ghə̀ a kòŋ ədyʉ̀ a Jelusalèm və soʼ nsoʼ wen tsu lo? 21Bol sensə la və ghʉ yi tò a ngə̀ŋ mfɨŋ əzaʼa fa zhʉ a fòn ghoʼo a soʼ nsoʼ wen, mà mù ghʉ wen la kətsi kə vì ə mà tɨm wen à Fòn ghoʼo.”
22Aglibà gàʼ à Festus la, “Ma kòŋ əzhʉ gaʼa wìʼ ghenə fà mò a ngeŋ.”
Festus bwènsə̀ à wen la, “Wù lu zhʉ gaʼa wen a boʼòngə̀ŋ.” 23Tʉʼ layn, Aglibà wenə̀ Beniys vì nə̀ adɨŋə, ə̀ kwen ə̀ ŋwʉʼʉ a ngə̀ŋ ghoʼo yì a viʼi mvì zhùŋtə̀ tsu. Ghə̀ mvi wenə̀ tʉtʉ vəsugyèʼ vəghoʼkəvə bènə̀ viʼi və ghoʼkəvə a və ndìʼ a ntə̀ʼ ayì. Festus gàʼ və dyʉ̀ lyɨ̀ Bol vì nə̀ wen. 24Festus mù gàʼ la, “Fòn Aglibà bènə̀ viʼi vətsèm a və diʼì a shèn ghə̀ŋ yen a. Ghèn dìʼ wìʼ a Vəjew no vətsèm, vi a və diʼì a Jelusalèm bènə̀ vi a və diʼì a shə̀ ə gàʼ nyʉ̀ no ghoʼo byìʼì wen. Vəwenə tə zɨmə̀ gàʼà la, ghə̀ diʼi pfʉ. 25Nkàntə̀ mò nki ə nyen la ghə̀ ko nè kənyʉ̀ a kə dìʼì la və diʼi zhwi wen. Ando nkàntə̀ wen tə sènsə la yì a kòŋ əyen fòn ghoʼo, ghə̀ soʼ yi, mà mù ghʉ̀ la ma tɨm wen à fòn, 26alì kò ma lu nkiʼ no kətʉ kə kənyʉ̀ kə mùʼ ənyòʼ à fòn ghoʼo byìʼì wen. A le kənàʼ kə kənyʉ̀ a ma gaʼà la və vi nə̀ wen à ghə̀ŋ ndi ghə̀ gàʼ no tò à wù a shɨ a Fòyn Aglibà. Vəghəŋ ne soʼ nsoʼ ayì mà mu nkiʼ kənyʉ̀ a mà zì mà nyoʼ, 27byìʼàndo mà yen li la kə ko bòŋ la mà tɨm wù mfɨŋ, ke tuʼu shə̀ʼtə̀ kənyʉ̀ kì a ghə̀ byɨsə̀.”
Currently Selected:
Shwèʼ 25: bbkDBLnt
Highlight
Copy
Compare
Share
Want to have your highlights saved across all your devices? Sign up or sign in
Shwèʼ 25
25
Bol sensə la və dyʉ̀ ə̀ soʼ yi a Lum
1Andìʼ a bàmə mətsi ntaʼ ando Festus nkuʼù a kəkɨ a nə̀ gumnà Sisalìyà, ghə̀ lù kùʼ a Jelusalèm. 2Tʉtʉ vəpfèm və ngə̀ŋ Nyìngòŋ bènə̀ tʉtʉ Vəjew gàʼ nyʉ̀ byɨvə a wen byìʼì Bol. Vəwenə loyn Festus 3la ghə̀ ne və lyɨ Bol ə̀ vì nə̀ wen a Jelusalèm, gàʼà a lì byìʼàndo vəwenə mbaʼtə li əzhwi wen a ji. 4Ghə̀ gàʼ à vəwenə la, “Bol dìʼ mu və shwinə̀ li wen a Sisalìyà, mà diʼi bwènə̀ dyʉ̀ tsu a mətsi ghèn. 5Ghə̀ŋ gaʼà tʉtʉ vəŋə və boʼsə ə̀ vì nə̀ mò tsu shə̀ʼtə̀ kənyʉ̀ kì a ghə̀ byɨsə̀.”
6Festus tsi tsu mətsi fwomə, və sə ngàʼ la mətsi wum ghə̀ bwènə̀ shìʼi a Sisalìyà. Tʉʼ layn ghə̀ dyʉ̀ a kəbòʼ kə nsoʼ ə̀ gàʼ la və dyʉ̀ ə̀ lyɨ̀ Bol ə̀ vì nə̀ wen. 7Və vì nə̀ wen no a zhʉ̀ kò, Vəjew vi a və nlu fa Jelusalèm ə̀ vì tsu tɨmə kàʼa wen sə zhò ndzɨ̀ŋsə byìʼì Bol no səghoʼo alì kò vəwenə lu ndìʼì la kənyʉ̀ a vəwenə gàʼà byìʼì Bol dìʼ nəmwèʼè. 8Bol gàʼ ndi gyàmtə̀ wen ə wen la, “Mà ko kwàʼ soʼ Vəjew, ko ma lù byɨ̀sə kənyʉ̀ kətsenkə à vəwenə a ngə̀ŋ Nyìngòŋ, ko ndiʼ la mà gaʼà li tè kənyʉ̀ kə byɨkə kətsenkə byìʼì fòyn ə ghoʼo ə Lum.”
9Festus nkəŋə la Vəjew ə nkòŋə̀ wen, ghə̀ mù bèm à Bol la, “Wù le a kòŋ ə kuʼ a Jelusalèm və soʼ wù tsu à mò a shɨ byìʼì nyʉ̀ venə a və gàʼà a shèn byìʼì wù lə̀ a?”
10Bol bwènsə̀ la, “Mà dìʼ a shə̀ a kəbòʼ kə nsoʼ fòyn ghoʼo yì a ghə̀ diʼì a Lum, və diʼi soʼ mo tò a shèn. Nkàntə̀ wù ə̀ kɨ no nkàyn la mà ko byɨ̀sə kənyʉ̀ à Vəjew. 11Mà sətsèn ndiʼ mu mà kwaʼà li soʼ a və diʼi zhwi mo, mà ko tènsə la kə və zhwi, alì mu vəwenə sətsèn ngàʼà nyʉ̀ venə byìʼì mò alə̀ à diʼ ndzɨ̀ŋsə, mu wìʼ ko kiʼ kədyòʼ əku mo à vəwenə. Mà sensə̀ la fòn ghoʼo soʼ nsoʼ ghom.”
12Festus chʉʼmə tʉ wenə̀ viʼi vyi a və ku tyɨftə à wen mù gàʼ à Bol la, “Ando wù sensə̀ li la nsoʼ wù dyʉ̀ à fòn ghoʼo lì, nsoʼ ayì lì a dyʉ̀ tò à wen.”
Festus shə̀ʼtə̀ nsoʼ Bol à Fòn Aglibà
13A sə ndiʼ a bàmə vəsàŋ vəshyəʼ alə̀, Fòyn Aglibà wenə̀ Beniys vì a Sisalìyà ətoŋtə be shisə Festus. 14Vəwenə nè tsìtə tsu mətsi nshəʼ alə̀, Festus shə̀ʼtə̀ ngəʼ Bol à wen gàʼà la, “Wìʼ dìʼ a shə̀ a Felik tə shwìn ə̀ ghʉ̀sə a ngə̀ŋ mfɨŋ, 15ma tə nkuʼ ndyʉ̀ a Jelusalèm, tʉtʉ vəpfèm və ngə̀ŋ Nyìngòŋ bènə̀ vəchəʼ və Vəjew gàʼ nyʉ̀ byɨvə byìʼì wen bè gàʼ nyʉ̀ la mà byɨmə la və diʼ ku ngəʼ à wen. 16Ma gàʼ à vəwenə la, ‘A ko diʼ ntsìnə̀ yes, viʼi Lum ə ku wìʼ a və gàʼà la ghə̀ byɨsə li kənyʉ̀ la və ku ngəʼ à wen kò à ndiʼ la ghə̀ tɨmə̀ tɨ̀mə a shɨ viʼi vyi a və ghàmə̀ wen lì ə gàʼ kənyʉ̀ ndi gyàmtə̀ wen ə wen.’ 17Andìʼ ando vəwenə nshiʼi vì a shèn, mà ko nzhwi zhʉ. Tʉʼ ə layn tò laynə, mà dyʉ̀ ŋwʉʼʉ a kəbòʼ kə nsoʼ ə̀ gàʼ la və dyʉ̀ lyɨ̀ ə̀ vì nə̀ wen. 18Ghə̀ vì, viʼi a və nghàmə̀ wen lì lù sə gàʼà, ko ndiʼ la vəwenə gaʼà li kənyʉ̀ kə byɨkə kətsenkə fa nyʉ̀ a mà tə nkwòʼtə̀ la ghə̀ nè li. 19Vəwenə mbòŋsə̀ soʼo tò nyʉ̀ wenə̀ və Bol byìʼì jì yì a vəwenə ghoʼsə̀ Nyìngòŋ tsu, bènə̀ byìʼì wutsen a ghə̀ mpfʉ li və dzàŋə̀ wen nə̀ Yesò, alì Bol gàʼ la ghə̀ dìʼ to. 20Mà ki kənyʉ̀ akì kə ghoʼ mo, mà mù bèm à Bol la ghə̀ a kòŋ ədyʉ̀ a Jelusalèm və soʼ nsoʼ wen tsu lo? 21Bol sensə la və ghʉ yi tò a ngə̀ŋ mfɨŋ əzaʼa fa zhʉ a fòn ghoʼo a soʼ nsoʼ wen, mà mù ghʉ wen la kətsi kə vì ə mà tɨm wen à Fòn ghoʼo.”
22Aglibà gàʼ à Festus la, “Ma kòŋ əzhʉ gaʼa wìʼ ghenə fà mò a ngeŋ.”
Festus bwènsə̀ à wen la, “Wù lu zhʉ gaʼa wen a boʼòngə̀ŋ.” 23Tʉʼ layn, Aglibà wenə̀ Beniys vì nə̀ adɨŋə, ə̀ kwen ə̀ ŋwʉʼʉ a ngə̀ŋ ghoʼo yì a viʼi mvì zhùŋtə̀ tsu. Ghə̀ mvi wenə̀ tʉtʉ vəsugyèʼ vəghoʼkəvə bènə̀ viʼi və ghoʼkəvə a və ndìʼ a ntə̀ʼ ayì. Festus gàʼ və dyʉ̀ lyɨ̀ Bol vì nə̀ wen. 24Festus mù gàʼ la, “Fòn Aglibà bènə̀ viʼi vətsèm a və diʼì a shèn ghə̀ŋ yen a. Ghèn dìʼ wìʼ a Vəjew no vətsèm, vi a və diʼì a Jelusalèm bènə̀ vi a və diʼì a shə̀ ə gàʼ nyʉ̀ no ghoʼo byìʼì wen. Vəwenə tə zɨmə̀ gàʼà la, ghə̀ diʼi pfʉ. 25Nkàntə̀ mò nki ə nyen la ghə̀ ko nè kənyʉ̀ a kə dìʼì la və diʼi zhwi wen. Ando nkàntə̀ wen tə sènsə la yì a kòŋ əyen fòn ghoʼo, ghə̀ soʼ yi, mà mù ghʉ̀ la ma tɨm wen à fòn, 26alì kò ma lu nkiʼ no kətʉ kə kənyʉ̀ kə mùʼ ənyòʼ à fòn ghoʼo byìʼì wen. A le kənàʼ kə kənyʉ̀ a ma gaʼà la və vi nə̀ wen à ghə̀ŋ ndi ghə̀ gàʼ no tò à wù a shɨ a Fòyn Aglibà. Vəghəŋ ne soʼ nsoʼ ayì mà mu nkiʼ kənyʉ̀ a mà zì mà nyoʼ, 27byìʼàndo mà yen li la kə ko bòŋ la mà tɨm wù mfɨŋ, ke tuʼu shə̀ʼtə̀ kənyʉ̀ kì a ghə̀ byɨsə̀.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in