Shwèʼ 22
22
1“Vəlèmə̀ vwomə, nə̀ vətìʼ vwomə, ghə̀ŋ zhʉtə kənyʉ̀ a ma ti a ghə̀ŋ a shɨ əgàʼ ndi gyàmtə̀ wen ə ghom a.” 2Vəwenə nè zhʉ̀ ando ghə̀ ngàʼà gaʼa Hibùlù, vəwenə chiʼ ədyʉ̀ tò la kùʼ. Bol gàʼ la:
3“Mà dìʼ alə̀, diʼ wu Jus, mu və mbwì mo a Talsus, a loʼ Silisiyà, mà kwi ə kuʼ tò a ntə̀ʼ a shə̀, ndìʼsə̀ ghom ndìʼ Gamalè. Ghə̀ ndìʼsə̀ li mò nə̀ təsoʼ tə vətìʼ və vəghəŋ və mbì no tətsèm. Kənyʉ̀ kə Nyìngòŋ kə sə̀ lɨ̀mə̀ à mo a wèn tò ndə̀ŋndəŋ ando kə be lɨ̀mə̀ à ghə̀ŋ a təwèn layn. 4Mà nyàblə̀ nə̀ viʼi vəbyɨməvə a və ndzɨ̀mtə̀ Jì fi ghèn a no nkàntə̀ mò ə jèʼè fa tsu layn lə̀, ə̀ zhwilə vətsenvə. Mà nghaʼtə lʉmə nə̀ ki shwìnə̀ a mfɨŋ. 5Kətʉ kə tʉtʉ vəpfèm və ngə̀ŋ Nyìngòŋ nə̀ vəchəʼ və loʼ no vətsèm zì və tɨmə a nə̀ viʼi və yenəvə a nyʉ̀ venə a ma gàʼà lə̀. Vəwenə nyòʼò li vəŋwàʼlə̀, ə̀ kù kədyòʼ à mò gàʼà la mà dyʉ̀ ə̀ kù à vəlèmə̀ vwomə Vəjew a ntə̀ʼ Damaskus ə̀ ghaʼtə viʼi vyi a və ndzɨ̀mtə̀ Jì fi aghèn ə̀ vì nə̀ vəwenə a Jelusalèm ndi və ku ngəʼ à vəwenə.
Bol shə̀ʼtə̀ kənyʉ̀ kì a kə ncho mibu ghə̀ sə diʼ wu byɨmə
6“Andìʼ ando mà njèʼè nè sə mboʼsə̀ dyʉ̀ a Damaskus, bayn tsenghə bvʉ̀tə̀ fʉ̀ fa kàŋ ə̀ bàŋ a kəshi a mà ndiʼì tsu a ntìntìn nə̀nchwì. 7Mà fəŋ a nse ə̀ zhʉ̀ ando wìʼ toŋtə̀ mò ə ngaʼ la, ‘Saul, Saul, wù tsuʼu kəghʉ komkə alə̀ byìʼì ghò?’ 8Mà bèm à wen la, ‘A dìʼ wu ndo a Bobo?’ Ghə̀ bwènsə̀ la, ‘A dìʼ mo Yesò ə wù Nazalèt yì a wu tsuʼ a ghʉ wen lì.’ 9Viʼi vi a yo vəwenə njèʼè a muʼu yen li bayn ayi alì kò vəwenə lù zhʉ̀ kənyʉ̀ kì a və ngàʼà à mo. 10Ma mù bèm à wen la, ‘Mà lè zì mà ne no ghò luwèn a Bobo?’ Ghə̀ gàʼ la, ‘Lù kwen ə̀ dyʉ̀ a tì ntə̀ʼ Damaskus, a və a shə̀ʼtə̀ kənyʉ̀ kì a Nyìngòŋ ə kəŋə la wù ne.’ 11Bayn ayi ə̀ ne li kò ma be nyenə shi, viʼi vi a yo vəwenə njèʼè a muʼu ghaʼ mo fa kwoŋ ə̀ gùftə̀ kwèn nə̀ mò a Damaskus.
12“Wutsen ntsi tsu gumlə̀ Nyìngòŋ be tsi ando soʼ vəghəŋ ə kəŋə, Vəjew no vətsèm ngumlə̀ wen, zhiʼ wen ndìʼ Ananyàs. 13Ghə̀ vì tɨ̀mə à mò a mbyɨ̀ ə̀ gàʼ à mò la, ‘Lèmə̀ ghom Saul, bwènsə̀ nyenə shi!’ Tò a zhʉ ayì ashɨ ghomə bòʼkə̀, mà ki ə̀ yèn wen. 14Ghə̀ gàʼ à mò la, ‘Nyìngòŋ yì a vətìʼ və vəghəŋ nlù sə gumlə̀ lì, ə tsuʼ li wù la wù kɨ kənyʉ̀ a ghə̀ kəŋə la wù nè be yen ə̀ kɨ wù kənyʉ̀ kə tɨmə kə yì a ghə̀ shwèʼè à wen, bè zhʉ̀ ando ghə̀ gàʼà à wù fà wen a ngə̀ŋ, 15byìʼ ando wù a nti a nə̀ wuyenə à wen, be nshə̀ʼtə̀ nyʉ̀ vyi a wù zhʉ li be nyen fa wu a ngə̀ŋ à viʼi vətsèm. 16Luwèn lə̀, kə be a zhwi zhʉ, lu shì mu ə̀ sènsə Bobo la ghə̀ lyesə nyʉ̀ byɨvə wù.’
Bol shə̀ʼtə̀ ando Bobo ntɨmə wen à viʼi tɨm
17“Mà bwènə̀ dyʉ̀ a Jelusalèm ə̀ dyʉ̀ a ngə̀ŋ Nyìngòŋ sə njɨ̀mə̀, kənyʉ̀ kə fʉ̀ a mò a kə̀ʼ sə a tsi jòm. 18Ma yen Bobo, ghə̀ gàʼà gàʼ à mò la, ‘Zàŋsə̀ lù fʉ̀ fà Jelusalèm a shə̀ byìʼàndo viʼi avenə ko byɨmə kənyʉ̀ a wù gàʼà byìʼì mò.’ 19Ma bwènsə̀ gàʼ à wen la, ‘Bobo, vəwenə kɨ li nəmwèʼè la no nkàntə̀ mò tə njèʼè fà a loʼ ntsèntə̀sə ghaʼtə̀ viʼi vyi a və byɨmə à wù dyʉ̀ shwìntə̀ a mfɨŋ be ghòmə̀. 20Andìʼ ando və nzhwi Stifèn ando ghə̀ nti a nə̀ wuyenə byìʼì wù, nkàntə̀ mò ndìʼ tsu tomsə̀ la və zhwi wen. A ntùʼmə̀ nə̀ mò tùʼmə̀ nə̀ gwʉ̀nə̀ viʼi vyi a və nzhwi wen.’ 21Bobo bè gàʼ à mò tò la, ‘Lu, byìʼàndo ma tɨm wù no kəghaf à viʼi tɨm.’”
22Bol ngàʼà a lì, vəwenə zhʉtə̀ tò zhʉ̀tə. Ghə̀ nè gàʼ ə̀ zaʼa kəlyɨŋ kènkə, vəwenə zìtə̀ sə̀ zɨmə̀ no a gɨsə sə̀ tosə gàʼà la, “Ghə̀ŋ zhwi kəfo akènkə ə̀ màʼà dyʉ̀! Ghə̀ ko kwʉ̀ʼ əndiʼ.” 23Vəwenə sə nzɨmə̀, ə̀ tsùʼtə ghʉnə vəwenə vətsenvə sə bvɨ̀ŋə̀ a kàŋ, ŋwàʼà kəbyìʼ waŋ ə kuʼsə a kàŋ. 24Kətʉ kə vəsugyèʼ kì gàʼ və lyɨ̀ Bol ə̀ kwen ə̀ dyʉ̀ nə̀ wen a tì kəbə̀ŋ kə vəsugyèʼ kì ə̀ ghòm wen no nkàyn ndi ghə̀ shə̀ʼtə̀ la Vəjew venə zɨmə gàʼà nyʉ̀ venə alə̀ byìʼì wen byìʼì ghò lo. 25Andìʼ ando və nkwìʼi wen mù sə kəŋə ə nghòmə̀, ghə̀ bèm à kətʉ kə vəsugyèʼ kətsenkə a kə nti boʼsə wen la, “Soʼ lè byɨmə la və ghom wù Lum kènla və soʼ li wen əyen la ghə̀ byɨsə li kənyʉ̀ lo?”
26Kətʉ kə vəsugyèʼ akì nè zhʉ̀ kənyʉ̀ akènkə ə̀ dyʉ̀ bèm à kətʉ kə vəsugyèʼ kə ghoʼo kə kì la, “Wù kəŋə ə mwòmsə gho? Wìʼ ghèn dìʼ alə̀ diʼ wù Lum.”
27Kətʉ kə vəsugyèʼ kə ghoʼokə akì dyʉ̀ yèn Bol ə̀ bèm à wen la, “shə̀ʼtə̀ à mò, la wù bè dìʼ wù Lum lo.” Bol bwènsə̀ la yì dìʼ wù Lum.
28Kətʉ kə vəsugyèʼ akì gàʼ la yi nlòʼò ko no ghoʼo mibu ndiʼ wù Lum, alì Bol gàʼ la, “Mà dìʼ wù Lum fà bwi.”
29Ando ghə̀ ngàʼa a lì no a zhʉ̀ kò, viʼi vyi a və kəŋə ə ghòmə wen, zìtə̀ sə kòytə̀ a bàm. Fàynə vì à kətʉ kə vəsugyèʼ kì ando ghə̀ nzhʉ la Bol dìʼ wù Lum mu ghə̀ be kwìʼi wen nə̀ mpfɨŋsə.
30Tʉʼ lan, kətʉ kə vəsugyèʼ kə ghoʼokə kì gàʼ la və zatə wen, be gàʼ la tʉtʉ vəpfèm və ngə̀ŋ Nyìngòŋ bènə̀ viʼi soʼò nsoʼsə vì tsèntə̀ byìʼàndo ghə̀ nkəŋə əzhʉ la Vəjew ə ghàmə̀ Bol byìʼì ghò lo. Vəwenə vì ghə̀ mù gàʼ la Bol cho ə̀ tɨmə a mbì ntsèntə̀ ayì.
Currently Selected:
Shwèʼ 22: bbkDBLnt
Highlight
Share
Compare
Copy
Want to have your highlights saved across all your devices? Sign up or sign in
