Shwèʼ 19
19
Bol shə̀ʼtə̀ ntɨm jùŋ a Efesùs
1Andìʼ ando Abolòs ndìʼ a ntə̀ʼ Kolìn a shyə Akayà, Bol chò fa tì loʼ ayì ə̀ dyʉ̀ zaʼa a Efesùs ə̀ yèn viʼi vəbyɨməvə vətsenvə tsu, 2ə bèm à vəwenə la, “Andìʼ ando ghə̀ŋ mbyɨmə̀, Kəzhwì kə ŋwòʼəkə mvi li à ghə̀ŋ?” Vəwenə bwènsə̀ la, “Yes nko tɨmə̀ zhʉ̀ tè kənyʉ̀ byìʼì Kəzhwì kə ŋwòʼəkə.”
3Bol bwènsə̀ bèm à vəwenə la, “A tə dìʼ nki mu mə nkò à və tə kù à ghə̀ŋ a?” Vəwenə bwènsə̀ la, “Və nkù mu à yès byìʼì kənyʉ̀ kì a Joyn nziʼì.”
4Bol mù gàʼ la, “Joyn nku mu à viʼi vyi a və nkwitə tətyɨm tə vəwenə be gàʼ à viʼi a vyi la, vəwenə dìʼi byɨmə à wìʼ yì a ghə̀ ndiʼì nè vì fa wen a bàm, adiʼ Yesò.”
5Viʼi avenə zhʉ a lì mù byɨmə à Bobo Yesò, və ku mu à vəwenə ədìʼ la vəwenə byɨmə li à wen. 6Bol mù ghʉ avu wen a vəwenə a tʉ, Kəzhwì kə ŋwòʼəkə mù vì à vəwenə, vəwenə zìtə̀ sə gàʼà təgàʼ tə kədyàŋ, be shə̀ʼtə̀ nyʉ̀ mu və lù fà Nyìngòŋ. 7Lʉmə ndìʼ a ntìntìn viʼi avenə ə zaʼa a njʉ̀sə̀bò.
8Fà yì a bàm, Bol sə dyʉ̀ kwenə a tì ngə̀ŋ ntsèntə̀ gàʼà wenə̀ Vəjew a tì vəsàŋ vətaʼ nə̀ tyɨm toghə, soʼtə̀ nyʉ̀, kəŋə la vəwenə byɨmə la kənyʉ̀ kì a yi gàʼà byìʼì soʼ fòn Nyìngòŋ diʼ nəmwèʼè. 9Viʼi vətsenvə fa vəwenə a ntìntìn to kətʉ ə̀ tyèn la vəwenə ko a byɨmə kənyʉ̀ akì a Bol ngàʼà lì, bè gàʼ nyʉ̀ byɨvə tsenəvə à viʼi a shɨ byìʼì Jì yì a Bobo nkəŋə la və ntsi fa tsu. Bol mù ghʉ̀sə vəwenə ə̀ lyɨ̀ viʼi vəbyɨməvə vi wenə̀ vəwenə sə̀ dyʉ̀ tò mətsi ntsèm a ngə̀ŋ yì a Tylannùs nziʼi viʼi tsu, soʼo nyʉ̀ tsu wenə̀ viʼi. 10Bol nè kənyʉ̀ akì a tì ngwʉ̀ʼsə səbò, Vəjew nə̀ viʼi tɨm vi a və ndìʼ a Asìyà zhʉ kənyʉ̀ byìʼì Bobo.
Vunə Sivà mwòmsə̀ ədzɨ̀m ə shìsə zhwì byɨvə
11Andìʼ ando Bol mbò dìʼ tò a Efesùs, Nyìngòŋ nè ghə̀ sə nè nyʉ̀ kàynəvə. 12Viʼi nlyɨ̀ ndisə shyèʼ wen nə̀ basə ndisə vi a ghə̀ ntyì kəzhʉʼsə kə wen tsu, dyʉ̀ nə̀ wenəvə à viʼi və kwaʼkəvə, və nè vəwenə to, zhwì byɨvə be fʉ̀kə̀ fà vəwenə a təwèn.
13Vəjew vətsenvə a və bè njèʼè dzɨ̀mə̀ shìsə zhwì byɨvə bè sə mwòmsə̀ ndzɨ̀mə̀ a zhiʼ Bobo Yesò. Vəwenə mbʉsə ndzɨ̀mə̀, vəwenə sə gàʼà la, “Ma gàʼà à ghə̀ŋ a zhiʼ Yesò yì a Bol ə̀ ziʼi byìʼì wen la, ghə̀ŋ fʉ fà wèn wìʼ ghèn.” 14Viʼi a və njèʼè nè kənyʉ̀ a kènkə ndìʼ vunə lʉmə vətsenvə sòmbo, a andìʼ vunə pfèm ngə̀ŋ Nyìngòŋ ghoʼo Vəjew tsen a zhiʼ wen ndìʼ Sivà.
15A sə ndiʼ kətsi kətsenkə, vəwenə dyʉ̀ yèn wutsen ghə̀ kiʼ kəzhwì kə byɨkə. Vəwenə sə mwòmsə̀ ədzɨ̀m ə shìsə kəzhwì kə byɨkə akì, kə gàʼ à vəwenə la, “Mà kɨ Yesò bè kɨ Bol. Ghə̀ŋ ke dìʼ vəndò?” 16Ando kə ngàʼa a lì, wìʼ ayì a ghə̀ nkiʼ kəzhwì kə byɨkə akì shen ə̀ ghaʼ vəwenə no vətsèm, ə̀ ghòm no a nkàyn. Vəwenə nyɨŋkə fʉ̀ fà ngə̀ŋ ayì mu və bàtə li ndisə vəwenə bè lyomsə vəwenə a ji byɨ.
17Vəjew nə̀ viʼi tɨm vi a və ndìʼ a Efesùs nè zhʉ̀ kənyʉ̀ a kə yì chò sə̀ diʼ nə̀ fanə mù sə kuʼsə zhiʼ Bobo Yesò. 18Viʼi vəbyɨməvə sə fʉ̀ vì a ndayn, shə̀ʼtə̀ nyʉ̀ byɨvə vi a vəwenə tə nè mibu sə byɨmə. 19Nghoʼo viʼi a vəwenə nè nyʉ̀ fʉ̀ vì nə̀ vəŋwàʼlə̀ vi a vəwenə ndzàŋə̀ nyʉ̀ fənyoʼ a vyi fa tsu ə̀ nyʉ̀ʼ tò a shɨ viʼi vətsèm. Ko vəŋwàʼlə̀ a vyi nto no nànto. 20Kənyʉ̀ kə Nyìngòŋ mù sə sàykə̀ dyʉ̀ tò dyʉ̀, viʼi no və ghoʼo byɨmə byìʼì nyʉ̀ kanəvə vi a vəwenə nyenə.
Ngəʼ fʉ̀ a Efesùs
21A bàmə nyʉ̀ avenə, Kəzhwì kə ŋwòʼəkə nè, Bol ghʉ la ghə̀ a chò fa shyə loʼ Macedonia bènə̀ fa Akayà ə dyʉ̀ zaʼa a Jelusalèm. Ghə̀ bè ghʉ̀ la ghə̀ a tsìtə tsu ə mu chò dyʉ̀ a Lum. 22Ghə̀ ghʉ a lì mù tɨ̀m viʼi vi vəbò a və ngyàmtə̀ wen a ndiʼì Timotì wenə̀ Elastùs, la vəwenə dyʉ̀ a Macedonia a mbì, ghə̀ be tsìtə a Asìyà.
23Ngəʼ ghoʼo tsen zìtə̀ a Efesùs a mətsi ayì byìʼì Jì yì a Bobo nkəŋə la viʼi ntsi fa tsu. 24Wutsen ndìʼ tsu, ti fo nə̀ kəlàmkə, zhiʼ wen diʼ Demetyòs. Ghə̀ ti mənyo mə ngə̀ŋ jɨm Altemis a ndiʼì Nyìngòŋ wùwì. Shyèʼ aghenə nku ko à viʼi shwèʼ wen no ghoʼo. 25Demetyòs dzàŋtə̀ viʼi shwèʼ wen bènə̀ viʼi vətsenvə a və bè nti fo ə̀ gàʼ à vəwenə la, “Vəlèmə̀ vwomə, ghə̀ŋ ə kɨ la vəghəŋ ə kiʼì ghoʼ vəghəŋ tò fa shyèʼ ghèn a vəghəŋ ə shwèʼè lə̀. 26Ghə̀ŋ zhʉ li be nyen kənyʉ̀ a Bol ghèn ə nè fà ghə̀ŋ a ngəŋsə. Ghə̀ ne li nghoʼo viʼi a Efesùs nə̀ a Asìyà no vətsèm mbyɨmə la vənyìngòŋ vi a və shɨ̀tə̀ lì ko diʼ nkàyntə̀ vənyìngòŋ. 27Ngəʼ lì dìʼ luwèn la viʼi a zìtə̀ ngàʼà nyʉ̀ byɨvə byìʼì shwèʼè vəghəŋ kèn la vəwenə be a nlyɨ̀ ngə̀ŋ jɨ̀m Altemis la àdìʼ kəfo kətsenkə. Na kènkə a nè kò a ndìʼ la Nyìngòŋ aghèn be a nkiʼ ghoʼsə, andiʼ tò wen a viʼi Asìyà nə̀ viʼi mbyi no vətsèm nghoʼsə̀.”
28Nòyn viʼi vi nè zhʉ̀ kənyʉ̀ a kènkə, tinsə vəwenə sə fwi, vəwenə sə zɨmə̀ gàʼà la, “Altemis yì a vəghəŋ ghoʼsə̀ a Efesùs ə̀ ŋaŋtə chò no vənyìngòŋ vətsèm!” 29Zɨmə aghenə sàykə̀ dyʉ̀ a ti ntə̀ʼ no tsèm, nòyn ayì shen ə̀ dyʉ̀ ghàʼ viʼi jèʼ Bol vətsenvə, andiʼ viʼi Macedonia ə̀ kwen ə̀ dyʉ̀ nə̀ vəwenə a kəshi kə ntsèntə̀ ntə̀ʼ. Təzhiʼ tə viʼi a vyi ndìʼ Gayòs wenə̀ Alistakùs. 30Bol nkəŋə ədyʉ̀ tsu əgàʼ à viʼi, alì viʼi vəbyɨməvə tensə la kə ghə̀ à dyʉ̀. 31Viʼi vəghoʼkəvə vətsenvə a və ntisə̀ nyʉ̀ a shyə loʼ ayì, ndìʼ ndoŋsə Bol. Vəwenə tɨm ntɨm à wen ə̀ gàʼ la kə ghə̀ à dìʼ kəʼə wen a ntsèntə̀ ayì. 32Andìʼ a lì, no ndò zɨmə̀ gàʼà tò kəwen kənyʉ̀ byìʼàndo nghoʼo viʼi nko kɨ̀ tè la və yì tsèntə̀ tsu ənè gho lo. 33Viʼi vətsenvə nyenə tò la Alèksandà kìʼ kənyʉ̀ əgàʼ byìʼàndo Vəjew ngàʼà la ghə̀ cho ə̀ tɨ̀mə a mbì. Alèksandà tsòʼsə̀ kəvu kə wen a kàŋ ə̀ nè la viʼi chɨmə, mù zìtə̀ əgàʼ ədìʼ la à ko yì zìtə̀ Vəjew nzìtə̀ ngəʼ aghèn, 34alì viʼi avenə nè yen ə̀ kɨ̀ la Alèksandà dìʼ wu Jus, vəwenə zìtə̀ sə tsèntə̀ zɨmə̀ a gɨ to la, “Altemis yì a vəghəŋ ə ghoʼsə̀ a Efesùs ə ŋaŋtə chò vənyìngòŋ no vətsèm!” Vəwenə faŋ ə̀ sə̀ zɨmə̀ tò a lì a tì vəhawà vəbò.
35Fa yì bàm, wìʼ a ghə̀ nyòʼò nyʉ̀ be tùʼmə̀ nə̀ ntə̀ʼ ayì nè, viʼi chìʼ la kùʼ, ghə̀ mù gàʼ à vəwenə la, “Viʼi vətsèm ə̀ kɨ la ghə̀ŋ viʼi Efesùs diʼ ntùʼmə̀ nə̀ ngə̀ŋ jɨ̀m Altemis, be tùʼmə̀ nə̀ ngùʼ yì a ghə̀ mfəŋə fa kàŋ a nse, vəghəŋ sə̀ ghoʼsə. 36No wìʼ muʼ ko zì ghə̀ tensə nyʉ̀ avenə. Ma sə gàʼà à ghə̀ŋ la ghə̀ŋ bwaʼsə tətyɨm tyəŋtə, kə wìʼ a dèmə nè kənyʉ̀ ke kwòʼtə̀, 37byìʼe ghə̀ŋ vì li nə̀ viʼi venə vəbò a shèn ko ndiʼ la vəwenə tsoŋ li kəfo fa vəghəŋ a ngə̀ŋ jɨ̀m ko telə Nyìngòŋ vəghəŋ. 38A sətsèn ndiʼ la Demetyòs wenə̀ viʼi shwèʼ wen kiʼ kənyʉ̀ əghàm wìʼ fa viʼi venə tsu, vəwenə lyɨ̀ wìʼ ayì ə̀ dyʉ̀ nə̀ wen a kəshi kə nsoʼ, byiʼ ando viʼi vi a soʼò nsoʼ ə vì tsu no mətsi ntsèm. 39Sətsèn ghə̀ŋ be ə kiʼi kənyʉ̀ ə chò nakènkə a ghə̀ŋ ə kəŋə, ghə̀ŋ ə dyʉ̀ nə̀ kəwenkə a ntsèntə̀ yì a viʼi ntə̀ʼ ə tisə̀ nyʉ̀ tsu, 40byìʼàndo kə sətsèn nè fʉ̀ la vəghəŋ ə səʼə li ngəʼ, kə ne mfànsə̀ no nànto. Kə a ndiʼ la wìʼ fa vəghəŋ ne taŋ ə layn fa nsoʼ ayì.” 41Ghə̀ gàʼ a lì mù gàʼ la no ndò lu mpfwo.
Currently Selected:
Shwèʼ 19: bbkDBLnt
Highlight
Share
Compare
Copy
Want to have your highlights saved across all your devices? Sign up or sign in
