Roma 9
9
Aya nì yɛ banima
1Liboe lɛ gi matrapani i, linu anukwarɛ; menu Kristo ɔnɛ lɛ máʋisɛ asia. Mɛ ɔna nɔ gi lɔ aʋa Aya yɛ Ɔfuɛfuɛ nɔ ɛɛŋa kyɛ ɛ, ɛɛka ní lɛ aʋa ɛki mɛ si máʋisɛ asia. 2Asigaga ɛɛga mɛ lɛ ɔna ɛɛta mɛ lipoe kakaa a. 3Lɛ ese linu si nya maapɛ si mɛ ɔtutɔ mize ní Aya yɛ ifixoxo ese e, tɔ mɛ ni Kristo kusi kùlɛ kɔkpɛ mɛ benemi ba, mɛ ɔtutɔ mɛ akɔanɛ ma loso. 4Ba benu Israel bebi ba; Aya azɛ ba si yɛ bebi lɛ ebu yɛ kusudraa ni kaʋaŋaa abasɛ ba a; anya onugu ni ba, lɛ aki ba Ɔsã nɔ ɔ; lɛ Aya abasɛ ba kiliɛ gi biasumu ye ní kude gbã aʋa a, lɛ bɛzi Aya yɛ kakaplɛa a. 5Bɛgyɔ ɛdɔ ní Yudanɛ ma baka ba okú gi ɛzi linyi me e, lɛ Kristo gi aba ŋwisi ɔnɔ gbagbe e, agyɔ ádɔ ní ba okú no me. Atɔ Aya gi ɛɛŋa aʋa ní ɔkɔ kakaa ɛ, ɔzɛ kukpɔ̀kpɔ̀ tsini kanɔmɛ anɔmɛ! Atɔ liba lɛ mɛ.
6Meʋípani si Aya ɔ́bitɛ ní yɛ kakaplɛa aʋa a; lɛ ese linu si aní Israel bebi ba pɔ́ benu Aya yɛ bebi ba. 7Lɛ aní Abraham yɛ besoebi ba pɔ́ benu Aya yɛ bebi ba. Aya asi Abraham si, “Gani Isak aʋa wɔamɔ besoebi ba ya gi ba maka aplɛ aki wɔ ɔ.” 8Lɛ libasɛ si bebi gi bɛpɔ ní kupɔpɔdeo onu i, bénu Aya yɛ bebi i; boŋu i, bebi ba ya gi bɛpɔ ní Aya yɛ kakaplɛa onu i, ba bɛkɔ si benu besoebi ba ɔtutɔ ɔ. 9Lɛ Aya aka aplɛ ni eboa la ya si, “Ni lipoe gbã nɛ aʋa ɛ, maadzi ba, lɛ Sarai aapɔ obinyime e.”
10Lɛ aní lɛ tètè e, lɛ ese linu si Rebeka yɛ bebinyime tiaʋa ba ɛ, ɔka tole blɔ ɔkatsitsi ye Isak yɛ eze ba ɔkaɛ.
11Lɛ tɔ obinyime tole e, yɛ kukyakya kuze ni Aya yɛ kupɛpɛɔ onu i, gi bápɔ ba a, xe biabitɛ kidɔ gbã loo kidɔ nyani nyani fɛ ɛ, Aya asi yɛ si;
12“Otsitsi ye aasumu ɔnuvɔɛ.” Lɛ loso Aya yɛ kukyakya kwidɔ ní yɛ kuxwaxwaa mɛ ɛ, lɛ aní ní kididɔ gi bɛbitɛ mɛ ɛ. 13Ŋwisi Kiliɛ gi Aya yɛ liboe le lipani si i, “Malɔ Yakob pɔ̀ mekyri Esau.” 14Kɔkpɛ la ya loso e, kɔ kipani kwiapani si Aya yɛ linɛ lígyɔ na a? Líma nite kura a. 15Lɛ apani aki Mose si i;
“Maadi ɔniliɛ gi mapɛ ɛ, asigaga;
lɛ mɛ ɔna nɔ aavu ɔniliɛ gi mapɛ ɛ.”
16Lɛ loso e, kididɔ kidɔ ní kidiliɛ gi blɔ banɔ gbagbe ba kwipɛ́ loo kwibitɛ su u, pɔ̀ ní Aya tètè yɛ asigaga didi la mɛ ɛ. 17Lɛ ese linu si ní Aya yɛ liboe le keplekpaa mɛ ɛ, Aya apani aki Farao Egipteanɛ ma Okusi yɛ si, “Medu wo kukusi tɔ gani wɔ aʋa ɛ, maabasɛ mɛ kigaglaɛ atɔ biaanu mɛ onu ní kelea petee me e.” 18Lɛ loso e, Aya izedi ɔnɔ kakaa gi apɛ́ ɛ, asigaga lɛ izɛbitɛ ɔnɔ kakaa gi apɛ́ ɛ ɔtumonu u.
Aya yɛ kusuyeʋio ni yɛ asigagadidi ki banima
19Pɔ̀ mlɔ mɛ tole aasi mɛ si, “Xe nite lilɛ ɛ, kitɛ Aya aabu ɔnutɔ lipɔ ɛ? Nyaŋwɛ aatani kedu kuyɔ ní Aya yɛ kupɛpɛɔ su i?” 20Pɔ̀ nyaŋwɛ wonu u, si wɔabu le onu ki Aya a? Kefukpo kaʋíʋi ka ɔʋɔʋɔ yɛ si, “Ege lɛ loso xe nite wɔʋɔ mɛ ɛ?” 21Kura kyɛ ɛ, ɔniliɛ klɔ gi ɛɛʋɔ kufukpo e, kudeonu kulɛ ki yɛ si ɔwa osiseme no su axwɛ kiliɛ gi apɛ́ ɛ, lɛ aatani kufukpo tuʋa kuʋɔ dɔni osiseme tole mɛ, tiele ki liboe veve etɔ su axwɛ kuwawa lɛ kaʋlaa ki lipoe kakaa su axwɛwawa.
22Lɛ nite ke lilɛ ki kidiliɛ gi Aya abitɛ ɛ. Apɛ si yibasɛ yɛ kusuyeʋio tɔ ɔki si bete yɛ kigaglaɛ. Pɔ̀ aplɛ litɔ kese koŋu aki banama gi bɛkpɛ yɛ kusuyeʋi yo o, gi akpɛ ba lixaŋu si ba oblo kɔ onu si biazizi petee e. 23Lɛ apɛ́ fɛ si yibu yɛ kusudraa ní kɔ kisrɛsrɛ mɛ ɛbasɛ ɛ, gi kɔ enye abali ní blɔ banama a, gi blɔ binɛ binu yɛ asigagadidi la a, blɔ kunu banama gi abla si kwiazi yɛ kusudraa a. 24Lɛ ese linu si blɔ kunu banama gi axwa a, aní dɔni Yudanɛ ma tètè kusi i, pɔ̀ dɔnɔ ni banama gi bénu Yudanɛ ma kyɛ kusi i. 25Liboe lɛ ya Aya apani ní Hosea keplekpaa mɛ si,
“Banama gi béze mɛ banɛ ɛ,
Maaxwa ba si ‘Mɛ banɔ.’
maadimɛ ni banama
gi mádimɛ nɔ ɛ ‘lɛ maaxwa ba si mɛ banɔ ɔ.’ ”
26Lɛ “niklɔ ɖii gi bɛsi ba si, ‘Mlénu mɛ banɔ ɛ,’
“niklɔ biaxwa ba si Aya gi ɔlɛ ligbã́ nɛ ɛ, yɛ bebi ba.”
27Lɛ Yesaya akpɛ lɛ ozi ní Israel su si i, “Xe Israel banɛ ma bɛsrɛ ŋwisi siklami ní axuta la kyɛ ɛ, bamɛ basisami batɔ ko biabu u; 28Lɛ ese linu si Ɔkaɛ aakɔsi lɛ aahe kutu ki banima ní kelea mɛ kyikya.” 29Lilɛ ko ŋwisi kiliɛ gi Yesaya apani azanɔ si i, “Xe nya blɔ Ɔka Kigaglaɛ petee onetee ɔ́ki blɔ besoebi batɔtɔ ɛ, nya kwiadzi ŋwisi Sodom, nya kwiaze ŋwisi Gomora.”
Paulo yɛ Aya kuxwaxwa ki Israel
30Kɔ lɛ loso kwiapani si banama gi bénu Yudanɛ ɛ, gi bazetutru si bialulɔ ba ni Aya kusi i, Aya aki si ba bede ʋa bɛgyɔ lɛ ese linu si bɛzi Aya aʋa ɛɛŋa a, 31lɛ Yudanɛ ma gi beeze ni ɔsãa nɔ ɔ, gi aaki si ba kudeo kwiagyɔ ni Aya aŋu mɛ kude e, bámɔ kudeo o. 32Lɛ ege lɛ loso e? Lɛ ese linu si bápɛ lɛ gani kuziŋa mɛ ɛ, pɔ̀ gani ba axwɛwawa la mɛ ɛ. Lɛ loso bezetù bikliʋi ʋɛ ní “likliʋitukla nɛ su.” 33Gi lɛ su Aya liboe le lipani si i, “Dike, Maplɛ likla ní Zion, likla gi liaki si banima biatu bikliʋi, liklakpɔ gi liaki si biagleʋe e. Pɔ̀ ɔniliɛ gi azɛ yɛ aʋa ŋa ɛ, yɛ ɔna ɔ́tragbɔ̀ ɔ.”
Currently Selected:
Roma 9: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
