Roma 3

1Xegi lilɛ nite e, kude woli Yuda ɔnɛ amɔ ní ɔniliɛ gi ónu Yuda ɔnɛ aʋa ɛ? lɛ kedzizɛzɛ woli kalɛ ní ɔyaʋi tsatsa lɔ su u? 2Ní kapɛ kakaa mɛ ɛ, lipɔnɔ koŋ! Ní ɔtɔpu kɔ ɛ, Aya akɔ yɛ liboe le akpɛ ní Yudanɛ ma iwla mɛ.

3Lɛ xegi kuziŋa kúze ní bamɛ batɔ awla xwɛ ɛ? Ba kumɔziŋaa kwiaki si Aya ɔ́trabitɛ ní yɛ anukwarɛɛ aʋa na a? 4Lítraze nite kura a! Lilɛ si Aya oze anukwarɛɛ onete, xegi ɔnɔ kakaa onu ɔsia nɛ kyɛ ɛ. Kiliɛ gi bɛŋwlimi kpɛ ní Aya yɛ liboe le keplekpaa mɛ si i, “Lilɛ si babasɛ si wɔ linɛ ligyɔ xegi wɔpani i; lɛ lilɛ si wɔaŋwɛ oyi xegi bɛxwa litsi iiki wɔ ɛ.”

5Pɔ̀ xe blɔ eboe zimizi na aabu Aya yɛ eboe gyɔgyɔ la kubasɛ sanɔ ɛ, kɔ liboe woli kwiapani i? Kibu kwiabu Aya lipɔ si ehe kutu aki blɔ a? Lɛ ya liaze kuʋiʋi uliɔ gi biaʋi i. 6Liwewe! Xegi Aya onu ɔnɔ gi yɛ bede ʋa bágyɔ ɛ, kitɛ aaxwa litsi ni kelea mɛ ɛ?

7Pɔ̀ xe mɛ asia na aaki si Aya yɛ kusudraa ni yɛ anukwarɛɛ aaŋwi mɔmɔmɔ ɛ, ege lɛ loso biazebu mɛ lipɔ kokoko ŋwisi ɔnɔ zimizi kinɛ ɛ? 8Ege lɛ loso mlatrápani si, lɛ kɔ mlaki tɔ kubitɛ eboe zimizi tɔ eboe gbã na aado dɔ ní la mɛ ɛ? Koko e, banɔ batɔ beekpini me lɛ beebu me lipɔ si mapani liboe lɛ ya ɖii! Biabu ba lipɔ kiliɛ gi liziã ɛ.

Ɔnɔnɔ Ɔ́na

9Kɔlɔ kitɛ kwiatsa lɛ mɛ ɛ? Blɔ Yudanɛ ma kulɛ ní kizeze me gbã mɛ sani banama gi bénu Yudanɛ ma na a? Líma lɛmɛ ɛ! Mabasɛ kooko si Yudanɛ ma ni banama gi bénu Yudanɛ pɔ́ bákpasi ni kuzimizi yo kigaglaɛ ese e. 10Kiliɛ gi bɛŋwlimi kpɛ ní Aya Liboe le keplekpaa mɛ si:

“Ɔnɔnɔ ɔ́ma gi yɛ bede ʋa bɛgyɔ ɔ, ni tolee fɛ ɔ́ma a,

11ɔnɔnɔ ɔ́ma gi enu Aya yɛ anukwarɛɛ ese e,

loo ɛɛpɛ si yite Aya.

12Ba pɔ́ bekyi kede kpɛ Aya a;

ba pɔ́ bápɛ ɛki kididɔ ɔ; ɔnɔnɔ ɔ́ʋibitɛ eboe gbã, ani tole e.

13Ba ile le me ilɛ ŋwisi ikpodrɔ gi bɛdra edu u;

lɛ ba binemi ʋe e, bizɛɛsɛ asia

lɛ egle ʋa aɖi yɛ ɔlɛ ní ba onu.

14Ba enugumeboe la enu ifixoxo nì kuyeʋiyeʋi.

15Ba ikli lɛ izɛɛkɔsi si lɛɛbali inɔ́ka kese;

16Lɛ bidɔ zizizizi ni ɔzia izeze ni ba kude e.

17lɛ béte kusuyɔ kude e,

18lɛ Aya kusese kúma ní ba aŋu mɛ ɛ.”

19Abla ɛ, kwite si kidɔ kakaa ní Ɔsã nɔ mɛ ɛ, kiliɛ ki banama gi balɛ ní Mose Ɔsã nɔ ese e, tɔ banima eboe onu kububu kumɔni atɔ biaamani kelea petee ní Aya litsi xwaxwa nɛ ese. 20lɛ ese linu si ɔnɔnɔ linɛ lígyɔ ní Aya aŋu mɛ, xe abitɛ kidiliɛ gi Ɔsã nɔ eʋi kyɛ ɛ; boŋu kidiliɛ gi Ɔsã nɔ izɛɛbitɛ ɛ, kɛ kinu si izɛɛki si tɔ kute si kwibitɛ eboe zimizi.

Kiliɛ gi Aya izɛɛlulɔ blɔ ni yɛ kusi i

21Pɔ̀ abla ɛ, Aya ebu bede ba klɔ aʋa gi izɛga a, xe aaki si banima bede ʋa biagyɔ ɛ abasɛ ɛ. Ɔsã nɔ ɔma ní lɛ mɛ ɛ, pɔ̀ Mose Ɔsã nɔ nì beboedoplɛ ba bɛŋa katsalia ɛki lɛ. 22Lɛ Aya izɛɛki si banima bede ʋa biagyɔ ɔ, gani ba kuziŋaa ní Yesu Kristo me e, ɛki banama petee gi bɛziŋa ɛ. Aya abitɛ lɛ nite lɛ ese linu si lidzegaga ɛtɔtɔ líma koŋu u: 23ɔnɔ kakaa abitɛ eboe zimizi, lɛ kulɛ ní ɔdzage ní Aya yɛ kubúbú yo su u. 24Pɔ̀ gani Aya yɛ bidɔ kɔkɔ gi aki blɔ faã ní yɛ lipomepɛpɛ nɛ onu i, aki si ba linɛ ligyɔ gani Yesu Kristo aʋa gi yɛ aki ba ɔwlamɔmɔ nɔ ɛ. 25Aya akɔ yɛ akɔ ŋwisi liʋɛtsatsa ní blɔ eboe zimizi na litukpo kinɛ ɛ, gani kuziŋa ní yɛ mɛ. Aya abitɛ lɛ nite tɔ yikɔ lɛ ebu ibasɛ si yɛ linɛ ligyɔ. Lɛ ese linu si kɔkpɛ yɛ litɔ plɛplɛ kesea loso e, ada bimbi ʋe akpɛ banima eboe zimizia na gi bɛbitɛ zanɔ ɛ; 26tɔ yibu yɛ kude gyɔgyɔ ɛbasɛ abla. Gani lɛ ya mɛ ɛ, Aya izɛɛbasɛ si yɛ ɔtutɔ yɛ alɛ ní yɛ kude gyɔgyɔɔ aʋa, lɛ izɛɛtsini ɔnɔ kakaa gi azɛ Yesu aʋa aŋa ɛ, ní kude gyɔgyɔɔ aʋa.

27Kɔlɔ ege aʋa kwiafeke isu ya ɛ? Kididɔ! Lɛ ege lɛ loso e? Aní gi kwibitɛ ní Ɔsã nɔ aʋa loso e? Kura!, pɔ̀ gi kwiziŋa ɛ loso. 28Kwitsà lɛ si ɔnɔ kude kuzɛɛgyɔ ni Aya gani kuziŋaa tete ko me, lɛ aní gani Ɔsã nɔ aʋa kubitɛ mɛ ɛ. 29Lɛ Aya onu Yudanɛ ma tete ɔnɛ na a? Aní banama gi bénu Yudanɛ fɛ Aya onu na a? Kikakaa elu e, onu ba fɛ ɔnɛ. 30Abla gi Aya tole ɔlɛ ɛ, aamani Yudanɛ ma ní kude gyɔgyɔɔ aʋa gani ba kuziŋaa aʋa, lɛ aamani banama gi bénu Yudanɛ ma fɛ ni kude gyɔgyɔɔ aʋa gani ba kuziŋaa liɔ ke me e. 31Kɔ lɛ ese linu si gani kuziŋaa liɔ ya aʋa ɛ, kwiyurɔ Ɔsã nɔ na a? Kura aníte, boŋu i, kwivu Ɔsã nɔ gaglaa.

Currently Selected:

Roma 3: avn

Highlight

Copy