Roma 1

1Keplekpa lia ya kɛdɔ ní mɛ Paulo kɔ gi menu Kristo Yesu yɛ ɔnɔsumu u, ni ɔnɔ kpɛkpɛ gi Aya akya a si mipani yɛ Liboe Gbã nɛ. 2Liboe Gbã nɛ gi Aya aka aplɛ kooko gani yɛ beboedoplɛ ba aʋa, kiliɛ gi bɛŋwlimi lɛ ɛkpɛ ní Aya yɛ Liboe le keplekpaa mɛ ɛ. 3Liboe lɛ ya ní Aya yebinyime, gi ní kisugyaɛ liɛ ya mɛ ɛ, eze ɔnɔ gi bɛpɔ ɔ, xe eze Dawid yɛ osobi i; 4lɛ ní Aya yɛ Ɔfuɛfuɛ nɔ mɛ ɛ, Aya ebu abasɛ ni kigagla ʋidi si onu yebinyime gi yɛ ayɔnɔ adɔ ni bekpo ʋa mɛ ɛ. 5Gani yɛ aʋa a, lɛ kɔki yɛ linyi ne loso e, Aya apɛ lipo me aki blɔ, lɛ aki si kudzi banɔkpɛkpɛ, tɔ kugbani banima dɔni banama gi bénu Yudanɛ ma kusi i, tɔ bedzi banɔ gi bizenu kutu gani kuziŋa mɛ ɛ. 6Lɛ mlɔ fɛ ɛ, mlakpasi ní banama gi bɛxwa si bedzi Yesu Kristo banɛ ɛ, kusi.

7Lɛ loso e, mɛɛŋwlimi keplekpaa lia ɛki mlɔ banama petee gi mlalɛ ní Roma a, gi Aya alɔ ɔ, xe axwa si mledzi baʋaziŋa ɛ.

Atɔ Aya blɔ Ɔka ani Ɔkaɛ Yesu Kristo baki mlɔ lipomepɛpɛ ni kusuyɔ.

Paulo apɛ veve si yɛ atrɛ ní Roma

8Kpɛ ɔtɔ ɛ, medo mɛ Aya ɖase ní mlɔ petee litukpo gani Yesu Kristo aʋa, lɛ ese linu si kelea petee keenu mlɔ kuziŋaa ní Kristo me onu. 9Aya gi yɛ meesumu u ni mɛ ɔna nɔ petee gi mɛɛpani liboe gbã nɛ ní Yebi ye su i, yɛ onu mɛ katsalia si liboe lɛ gi maapani i linu anukwarɛɛ, yɛ ete si mɛɛplɛ aŋu ní mlɔ aʋa lipoe kakaa 10gi mɛɛxwa Aya ɛ. Mizeeʋi ye si xegi linu yɛ kupɛpɛ ɛ, ɔki tɔ lidɔ ní lɛ aʋa kimɛ tɔ migadi mlo ablɔ kɔ.

11Lɛ ese linu si mapɛ vevee si mimɔ mlɔ, tɔ maapɔni mlɔ tɔ mlamɔ Ɔfuɛfuɛ nɔ mɛ kukrira gi kwiakpɛ mlɔ kigagla a. 12Liboe lɛ gi mɛɛpani linu si maakpɛ mlɔ kigagla a, lɛ mlɔ fɛ mlaakpɛ mɛ kigagla a, lɛ ese linu si mɛ kuziŋaa kwiakpɛ mlɔ kigagla lɛ mlɔ kuziŋaa fɛ kwiakpɛ mɛ kigagla a.

13Mɛ benemi ba, mapɛ si mlete si lipoe glegle e, mapɛ si miba adi mlo, pɔ̀ kiditɔ kiitsí kudeonu ɛki mɛ gakɔ nani abla. Mapɛ si míbu banima tɔ bazɛ aŋa ní mlɔ kyɛ kusi ŋwisi kiliɛ gi mabitɛ ní iho dzedze elɛ gi ínu Yudanɛ ɛ ba kusi. 14Lɛ ese linu si linu mɛ lixwɛ ki banima petee e, Helanɛ ni banama gi bénu Helanɛ ɛ, beboete ni banama gi béte liboe e. 15Lɛ loso mɛ kimbi kizã si mipani Liboe Gbã nɛ ki mlɔ banama gi mlalɛ ní Roma fɛ ɛ.

Liboe Gbã nɛ lɛ kigagla ɛ

16Liboe gbã nɛ líʋiku mɛ kuye e; lɛ ese linu si lɛ linu Aya yɛ kigaglaɛ ɛ, gi kiabu banama pɔ́ ɔ, gi bɛziŋa ɛ, ní ɔtɔpu kɔ ɛ, kí Yudanɛ ma lɛ kede e, kí banama gi bénu Yudanɛ ɛ. 17Lɛ ese linu si ní liboe gbã nɛ mɛ ɛ, Aya yɛ kude gyɔgyɔ kwiŋwi. Aya yɛ kude gyɔgyɔ kwiga kuziŋa mɛ dɔni okpese kɔ kɔtsinɔ oblono kɔ ɔ. Kiliɛ gi bɛŋwlimi kpɛ ní Aya yɛ keplekpaa mɛ si i, “Gani kuziŋa mɛ banama gi ba bede ʋa bɛgyɔ ní Aya kɔ ɛ, biaze ligbã́.”

Aya yɛ kusuyeʋio ní ɔnɔ gbagbe su

18Aya ɛɛbasɛ yɛ kusuyeʋio dɔni lifunu ne ní banama petee gi béte Ye e, ni ba eboe zimizi na su gi ba bizeetsi kude ɛki banima si bakíte yɛ anukwarɛɛ ɛ. 19Lɛ ese linu si kidiliɛ gi lilɛ si bete ní Aya su i, kɛ mɛ kidra ɛki ba lɛ ese linu si Aya ɔtutɔ adra kɛ mɛ aki ba a. 20Dɔni okpese klɔ gi Aya ebu kelea mɛ ɛ, yɛ kizezee me gi baʋímɔ ɛ, yɛ kigaglaɛ liɛ gi odukɔ ɔma ɔki kɛ, lɛ onu Aya ní yɛ kilɛlɛ mɛ ɛ, biŋwi gaã gi bizeenu u bɛmɛ gani bidɔ bɛ ya gi Aya abitɛ mɛ ɛ. Lɛ loso e, banɔ baklɔ ba ɛ, isu unu kububu kutɔtɔ kúma kí ba tɔɔ ɔ, kɔ kpɛ kidiliɛ gi bɛbitɛ ɛ! 21Bete Aya, pɔ̀ báki yɛ kubùbù liɔ klɔ gi kunu yɛ kunɛ ɛ, lɛ baʋído ye ɖase e. Boŋu i, ba begyodi ʋa bedzi bepluplu, lɛ ba ina nɛ mɛ idzi litumu u. 22Bɛɛmɔ isu ya si bete liboe, pɔ̀ benu kunukpaʋi nì kunukpadze e. 23Agi biasumu Aya gi oʋítse liwewe onu i, beesumu bidɔbitɛbitɛ ʋɛ gi biŋwi ŋwisi ɔnɔ gbagbe e, loo kudzɔʋi, loo baga ʋa, aloo baga gi bizeetì ní ba epò la aʋa ɛ, ŋwisi bagblaga kinɛ ɛ.

24Lɛ loso Aya ayurɔ banɔ ba klɔ ba kɔ si babitɛ eyekubo ala gi ba ina nɛ idimɛ nɔ ɛ, lɛ bɛɛbitɛ anyaniboe ni ba ahanuglɔ ba a, gi la izɛɛkpɛ ba kakpaa ɛ. 25Bɛtsrɛ Aya yɛ anukwarɛɛ liboe le ni asia na; lɛ beesumu u, xe bɛɛdzi axwɛ ɛki Aya yɛ awla la onu bidɔbitɛbitɛ ʋɛ ɛ, sani si besumu Aya ɔtutɔ lɔ, gi yɛ linu si kukɔ kukpɔ̀kpɔ̀ akɔ ɛ, kɔtsini kanɔmɛ anɔmɛ! Tɔ liba lɛ mɛ. 26Kɔkpɛ kiboebitɛ liɛ ya loso e, Aya ayurɔ ba aki eyeyeboe ni kusuŋwasi. Lɛ ba badzɛ ba kyɛ ɛ, bɛyurɔ benyime ba, lɛ bɛɛbitɛ eyeyeboe la ni badzɛ dzedze ba ɛ. 27Niteme kee, benyime ba kyɛ bɛyurɔ ɔdzɛ ni onyime kigaga lɛ bizɛsrɔ̀ nì kulekuku zimizi ki ba ahanuglɔ benyime ba a, gani lɛ mɛ ɛ, Aya ehe kutu gi kwigyeno ɛki ba a, kɔkpɛ ba eboe zimizi na loso.

28Agi banɔ baklɔ ba bápɛ si biakɔ Aya yɛ kutete gbã ɛkpɛ, ní ba begyodi ʋa mɛ ɛ, lɛ loso ayurɔ ba akpɛ ní ba begyodi zimizi ba mɛ ɛ, atɔ babitɛ kidiliɛ gi líma si babitɛ ɛ. 29Litukpo me gagla kakaa elu lilɛ ní ba mɛ, bɛ binu kuzimizi, kuŋazi ani kimbi kyikyi; ba kiboebitɛ kiyí ni kaŋuzã, kunɔye, kugɔni, kunɔmeno ani onugu kedzi kugaga. Bizegu kunugu ni banɔ su, 30lɛ bizezizi ba ahanuglɔ ba su u; bekyri Aya, bizedu onugu, bizefeke isu ya lɛ benu basudɔ ɔ. Bizɛpɛ bede ʋa ya onu gi biakɔbitɛ eboe zimizi i, lɛ báʋibu ba bapɔnɛ ba a. 31Béte lidzegaga ní eboe gbã ni eboe zimizi kusi i; baʋíga ní ba kakaplɛ aʋa a, lɛ báʋidi banɔ asigaga a, lɛ baʋíkɔkyɛ ɛ. 32Bete si Aya ɔsã nɔ ɛpani si banama gi balɛ ligbã ɛnɛ ya elu e, begyeno ki kutse. Pɔ̀, bɛtrɛ ní ba ligbã́ɛ nɛ klɔ aʋa a, lɛ bɛtrɔ ní banama gi bɛbitɛ niteme eboa la fɛ aʋa a.

Currently Selected:

Roma 1: avn

Highlight

Copy