Mak 2

Yesu ayɔni ɔnyanya gi yɛ kapɛ tiele ketse e

1Ewe atɔ kede e, gi Yesu edzi atrɛ ní Kapɛrnaum i, liyii klanɔ si eze ní kepea mɛ. 2Banɔ glegle bɛba ɛkpɛ likpɔ níklɔ lɛ loso e, ɔkli ɔkpɛkɔ óze ligba lɛ mɛ kɔmanɔ ní ligba lɛ kevunu ya a. Yesu azɛɛpani liboe gbã nɛ asi ba. 3Niklɔ benyime tiene bɛba eku i. Befeke onyime ɔtɔ gi yɛ kapɛ̀ tiele ketse e manɔ ní Yesu klɔ. 4Linɔkpi le lɛ loso e, bátani ɔnɔɛ kukɔtsini yɛ ɛ. Lɛ loso bepu liwui ní ligba lɛ ada la mɛ niklɔ gi Yesu eze e. Gi bepu liwui le pɔ́ ɛ, bepleni ɔnɔɛ nì yɛ ɔtɔsi lɔ ɛkpɛ. 5Gi Yesu amɔ kuziŋa liɔ gi kwize ní ba awla ɛ, edo asi ɔnyanyaɛ si, “Obi, bɛkɔ wɔ eboe zimizi na ɛkyɛ wɔ.”

6Ɔsã nɔ badɔbasɛ batɔ gi beze niklɔ ɛ begyo le edi ní ba isu ya mɛ si, 7“Kitɛ mɛ edo igyi le xe apani te e?” Libusioboe lɛ ya! Aya ko onu ɔniliɛ gi aatani eboe zimizi na kukɔkyɛ ɛ.

8Yesu ete ní Ɔfuɛfuɛ nɔ mɛ kyɔŋ liboe lɛ gi bezegyo edi i, lɛ eʋi ba si, “Ege lɛ loso eboa la ya elu akpasi ní mlɔ etukpo la mɛ ɛ? 9Liwoli lisa ɛplɔplɔ gi biapani i si kapɛ tiele tsetsea ɔnete liɛ ya: ‘Bɛkɔ wɔ eboe zimizi na ɛkyɛ wɔ,’ loo, ‘Yɔ, feke wɔ ɔtɔsi lɔ tɔ ga na a?’ 10Mapɛ si mlete si kigagla kiliɛ ní Ɔnɔɛ Yebi ye awla ní kesea aʋa si aakɔ̀ eboe zimizi na kukɔkyɛ ɛ.” Lɛ loso edo asi ɔnyanyaɛ sì, 11“Mɛsì yɔ! Feke wɔ ɔtɔsi lɔ tɔ sɛ trɛ kepea mɛ.”

12Ba pɔ́ bezee di onyimee xe ayɔ ɔ. Efeke yɛ ɔtɔsi lɔ lɛ akɔsi asɛ ní ba aŋu na mɛ ɛ. Ba pɔ́ ba inugu itse e. Niteme si bɛkpɔ̀ Aya lɛ bɛpani sì, “Kuʋímɔ kiliɛ ya elu iʋídi i!”

Yesu axwa Lewi si okuni yɛ kude e

13Lɛ Yesu atrɛ ní Galilea Limu ne kutu dzɛ ɛ. Linɔkpiʋidi itɔ liba yɛ klɔ lɛ ekpese le bidɔ kubasɛ ɛ. 14Gi azɛɛga atrɛ ɛ, amɔ ɔbɔgyɔ ɔtɔ, Lewi gi onu Alfeo Yebi i. Eze yɛ lixwɛwagba lɛ mɛ. Lɛ Yesu asi yɛ sì, “Kuni mɛ kude.” Lewi ayɔ, lɛ ekuni yɛ kude e.

15Lɛ kede e, gi Yesu azɛɛŋa bidɔ ní Lewi kepea mɛ ɛ. Babɔgyɔ glegle atɔ ni banama gi bɛta Yudanɛ ma isã nɛ ese e, ba mɛ batɔ bekuni Yesu kude e. Niteme si ba mɛ beglegle bɛkpɛ awla ní kezi me e pɔni Yesu ni yɛ badɔkpasi ba. 16Ɔsã nɔ badɔbasɛ batɔ gi beze Farisianɛ ɛ, bɛmɔ si Yesu azɛɛŋa bidɔ ni banama gi bɛta Yudanɛ ma isã nɛ ese e, ni babɔgyɔ ba lɛ loso beʋi yɛ badɔkpasi ba si, “Ege lɛ loso Yesu izɛŋa bidɔ nì banɔ ba ya elu na a?”

17Agi Yesu enu ba liboe le e, Yesu ebu le onu si, “Banama gi ba isu ya mɛ ilɛ mumɔ ɛ, báziã ɔwabitɛ ɛ. Pɔ̀ banama gi bɛɛnya ɛ, ba bɛziã ɔwabitɛɛ ɛ. Mába si mixwa banama gi ba bede ʋa bɛgyɔ ɛ. Boŋu i, banɔ ba ya gi benu banɔ zimizi ba ba loso maba a.”

Kuʋiʋi ní onugu nyanya su

18Yohanes Kuni yo ɔkpɛkpɛɛ yɛ badɔkpasi ba ni Farisianɛ ma bɛzɛɛnya onugu. Banɔ batɔ bɛba Yesu klɔ lɛ beʋi ye si, “Ege lɛ loso Yohanes yɛ badɔkpasi ba ni Farisianɛ ma ba badɔkpasi ba bizɛɛnya onugu, xe wɔ banɛ ma pɔ̀ baʋínya onugu na a?”

19Yesu ebu abee aki ba si, “Mlɛpɛ si banama gi bɛba ɔdzɛɛ ɔgbanɔ klɔ ɛ, baza kuʋɛ na a?” Litrába lɛ mɛ ɛ. Xegi ɔdzɛnyee ɔlɛ basu i, bátranya onugu u. 20Pɔ̀ liwe etɔ litraba gi biagbani ɔdzɛnyee sɛnɔ ní basu u. Lipoe lɛ klɔ bianya onugu lo.

21“Ɔnɔnɔ ɔʋíkɔ lisaba vuvu kukɔlulɔ kusa koko o, lɛ ese linu si kusa kokoo kuapá vu lisaba vuvu nɛ kɔ liwu le likeme esani kiliɛ gi lize tsã ɛ. 22Kɔpɔnɔ ɛ, ɔnɔnɔ óʋinye kuda vuvu kukɔkpɛ ní kagaplekpa keʋe koko me e, lɛ ese linu si kuda vuvu yɔ kwiaki sì kagaplekpa keʋe kokoa kiata. Boŋu i, lilɛ si benye kuda vuvu yɔ akpɛ ní kagaplekpa keʋe vuvu mɛ.”

Kuʋiʋi ní Lizemɔniwe le su

23Yesu azɛɛga aza ní idoli inyrɔ ɛtɔ mɛ ní Lizemɔniwe le aʋa. Gi yɛ ni yɛ badɔkpasi ba bɛzɛza ɛ, beku idoli le kuyasi mɛ ɛ. 24Nite si Farisianɛ ma bɛsi yɛ si, “Di! Wɔ badɔkpasi ba bɛta blɔ ɔsã nɔ ese, gi bɛɛbitɛ nite ní Lizemɔniwe le aʋa ɛ!”

25Yesu ebu le onu si “Mlákla kidiliɛ gi Dawid abitɛ ní lipoe lɛ klɔ aʋa gi aziã kidiitɔ si yiŋa na a? Kuʋɛ kwizeeku ye nì yɛ banima. 26Nite si atrɛ Aya kepea mɛ gi azɛɛta liklã dradra lɛ gi bɛbla plɛ ki Aya ɛ. Liba lɛ mɛ nite lipoe lɛ klɔ gi Abiata eze Kusumu yo Ɔka ʋidi ye e. Ni ɔsã nɔ onu i, kusumu yo baka ba ko biata liklã ɛnɛ klɔ xe e, pɔ̀ Dawid atà nɛ lɛ aki yɛ banima kyɛ ɛ.”

27Lɛ Yesu agù yɛ liboe le si, “Lizemɔniwe le ɛ, bɛbitɛ lɛ ɛki banɔ kupɛ̀pɛ, bábitɛ banima aki Lizemɔniwe le e. 28Lɛ loso Ɔnɔɛ Yebi ye onu Ɔkaɛ, gi aŋa Lizemɔniwe le kyɛ aʋa a.”

Currently Selected:

Mak 2: avn

Highlight

Copy