Hebr 13

Kigagla kukpɛkpɛ gɔgɔɔ

1Mlatrɛ lɛ aʋa tɔ mlalɔ mlɔ benemi ba! 2Mlaplɛ aŋu tɔ mlazɛ bababa ba; lɛ ese linu si gani kiboebitɛ liɛ ya mɛ ɛ, banɔ batɔ bɛzɛ Aya yɛ baxwɛdzɛ ba gi béte e. 3Mlaplɛ aŋu ní banama gi bakpasi ní agba la aʋa a, ŋwisi mlɔ fɛ ligba lɛ mlalɛ apɔni ba kinɛ ɛ, ani banama gi beebu kini ikɔ fɛ ɛ ŋwisi banama gi ba fɛ bɛɛmɔ kini ye pɔni ba kinɛ ɛ.

4Mlɔ pɔ́ mlakpɛ kubùbù yo ní kudzɛgbanɔɔ nì kunyimezenoo su, lɛ ɔnɔnɔ ɔkido ní yɛ ɔhanuglɔɛ aʋa si yizɛɛŋa kuglɔ ɔ; lɛ ese linu si Aya aaxwa litsi ni bahasi nɛ ba ni bawawadze ba ani banama gi bizɛga ɔma mɛ ɛ. 5Mlakíki tɔ mlɔ agbã́ na ezè ní kibɔɛ kudimɛnɔɔ su, lɛ kidiliɛ gi kilɛ ní mlɔ awla ɛ, mlaki tɔ kiku mlɔ aŋu lɛ ese linu si Aya apani si,

“Mátrayurɔ mlɔ liwewe

mátrakyi kede ekpɛ mlɔ liwewe.”

6Lɛ loso kwipani nì likla trɔtrɔ si,

“Ɔkaɛ yɛ onu mɛ ɔpɔnɔpɔnɔɛ,

matrase lifu u;

ege ɔnɔ aatani mɛ kubitɛ ɛ.”

7Mlaplɛ aŋu ní mlɔ onu bezeze ba aʋa, banama gi bɛpani Aya yɛ Liboe le ɛsi mlɔ ɛ, lɛ mledi kidiliɛ gi kidoedɔ ba agbã́ na mɛ ɛ, tɔ mlakpasi ba kuziŋaa. 8Yesu Kristo onu ɔnɔ gi oʋikyi i, kiliɛ gi eze azanɔ ɛ, nite ɔlɛ abla lɛ nite ke atráze kɔtsinɔ kanɔmɛ anɔmɛ.

9Mlakíki bidɔbasɛbasɛ dzedze ʋe bikyí mlɔ begyodi ʋa; lɛ ese linu si lipɛ si Aya yɛ lipomepɛpɛ nɛ likpɛ blɔ ina nɛ kigagla, aní isã aʋa kubitɛ ní bidɔŋaŋa ikɔ gi iʋibu libiitɔtɔ ɛki banama gi bɛŋa ʋɛ ɛ.

10Ɔdɔpɔʋisuʋɔ ɔlɛ ní blɔ awla, gi kusɔliɔ baka ʋa a, gi bizeesumu ní lisumugba lɛ mɛ ɛ, bámɔ kude gi biaŋa bidɔ ɔ gi bɛkɔ ní lɔ aʋa a.

11Kusumu yo Ɔka ʋidi ye e, izɛɛkɔ bagaa ʋa gi bɛkɔ ɛki banima eboe zimizi na kukɔkyɛ ɛ, ba ika lɛ tsini ɔdradra klɔ petee, pɔ̀ bizɛkani baga zizi ʋa ní ɔma nɔ kutu yɔ. 12Lɛ loso e, Yesu fɛ amɔ ɔziã ní ɔma nɔ kutu yɔ, tɔ yikɔ yɛ ɔtutɔ yɛ ika lɛ kɔɛdra yɛ akɔanɛ ma su u. 13Lɛ loso mlaki tɔ kutrɛ yɛ klɔ ní ɔma nɔ ese, tɔ blɔ kyɛ bakpɛ blɔ kuyeo ŋwisi kiliɛ gi bɛkpɛ yɛ kinɛ ɛ. 14Lɛ ese linu si ní kesea aʋa ya ɛ, ɔma gi aakyrɔ ɛ, lɔ ɔlɛ ní blɔ awla, pɔ̀ kwidi kudeonu iiki ɔma gi ɔ́trakyrɔ ɔ.

15Lɛ loso e, mlaki tɔ gani Yesu aʋa ɛ, kukɔ blɔ inugu le tɔ kukɔ zɛkpɔ Aya lipoe kakaa; ŋwisi bidɔ pɔʋi pɔʋi gi bizɛɛkɔ ní ɔdɔpɔʋisuʋɔ lɔ aʋa kinɛ ɛ, blɔ inugu le tɔ kukɔ zɛdra yɛ linyi ne su. 16Lɛ mlakídze eboe gbã kubitɛ ni bidɔ mɛ kulɛlɛ nì mlɔ ahanuglɔ ba, lɛ ese linu si bidɔkɔkɔɛ bɛ ya elue bizeeku Aya aŋu.

17Mlenu kutu aki mlɔ onu bezeze ba, lɛ mlakpɛ litukpo ni ba ese, lɛ ese linu si ba beepe mlɔ su, ŋwisi banama gi bɛtráki akɔnta kí Aya kinɛ ɛ. Mlenu kutu aki ba tɔ bawa ba axwɛ na nì isami, atɔ akíze ɔnatata ɛki ba; lɛ ese linu si lítrabu libiitɔtɔ ɛki mlɔ ɔ.

18Mlaxwa Aya ní blɔ litukpo; kwika lɛ aʋa si blɔ begyodi ʋa mɛ bɛdra, lɛ kwipɛ si kwiaze ligbã́ gi lipɛ ní kapɛ kakaa mɛ ɛ. 19Lɛ mɛɛki mlɔ litukpo glegle sanɔ si, mlaxwa Aya ní mɛ litukpo tɔ Aya aadzi ni me kumanɔ ní mlɔ klɔ kpékpe e.

20Atɔ kusuyɔ Aya gi gani kunyanya vuvu yɔ gi kulɛ tsinɔ ɛ, kɔ ika lɛ mɛ, xe agbani blɔ Ɔkaɛ Yesu adɔni bekpo ʋa mɛ ɛ, yɛ Yesu gi onu iʋesi le ɔgbanɔgbanɔ ʋidi ye, 21ɔki mlɔ kidɔ gbã kakaa gi kiaziã tɔ mlabitɛ ní yɛ kupɛpɛɔ aʋa; atɔ ɔbitɛ kidiliɛ gi kiku yɛ aŋu ní blɔ mɛ gani Yesu Kristo aʋa, gi yɛ kwiakɔ kukpɔ̀kpɔ̀ kɔ dɔni kanɔmɛ kɔtsinɔ kanɔmɛ! Atɔ liba lɛ mɛ.

22Mɛ benemi ba, mɛɛki mlɔ litukpo tɔ mlazɛ kugbagba liɔ ya gi mɛkɔ ɛkpɛ mlɔ kigagla ɛ, lɛ ese linu si keplekpa kpékpe ko maŋwlimi atsisi mlɔ ɔ.

23Mɛɛki mlɔ kutete si bebu blɔ onemi ye Timoteo ní ligba lɛ, xegi atsɔ ní ya kuba ɛ, kɔlɔ mɛ nì yɛ kwiana mlɔ.

24Mlapani mlɔ onu bezeze ba petee ani Aya yɛ banima petee. Baʋaziŋa ba gi bɛdɔ Italia ɛ, bɛpani mlɔ.

25Aya yɛ lipomepɛpɛ nɛ lize nì mlɔ petee!

Currently Selected:

Hebr 13: avn

Highlight

Compare

Copy