মীখ 4
4
4 অধ্যায়
ইস্ৰায়েলৰ ভাবী মঙ্গল।
1কিন্তু আহি থকা দিনত এইদৰে ঘটিব,
যিহোৱাৰ গৃহ থকা পৰ্ব্বতটো
আন পৰ্ব্বতবোৰৰ ওপৰত স্থাপন কৰা হ’ব।
এই গৃহটি পাহাৰবোৰতকৈয়ো উচ্চ কৰা হ’ব;
আৰু লোকসকল সোঁত বোৱাদি তালৈ যাব।
2অনেক দেশৰ লোক যাব আৰু ক’ব,
“আহাঁ, আমি যিহোৱাৰ পৰ্ব্বতটোলৈ উঠোহঁক,
আৰু যাকোবৰ ঈশ্বৰৰ গৃহলৈ যাওঁহক।
তেওঁ আমাক তেওঁৰ পথৰ বিষয়ে শিক্ষা দিব,
আৰু আমি তেওঁৰ পথত চলিম;”
কিয়নো চিয়োনৰ পৰা বিধান,
আৰু যিৰূচালেমৰ পৰা যিহোৱাৰ বাক্য বাহিৰ ওলাব।
3তেওঁ অনেক লোকৰ মাজত বিচাৰ কৰিব,
আৰু দূৰত থকা বহুতো দেশবাসীৰ বিষয়ে সিদ্ধান্ত ল’ব;
তেওঁলোকে তেওঁলোকৰ তৰোৱাল ভাঙি নাঙলৰ ফাল,
আৰু তেওঁলোকৰ যাঠী ভাঙি কলম দিয়া কটাৰী গঢ়াই ল’ব;
এটা দেশে আন দেশৰ বিৰুদ্ধে তৰোৱাল নাদাঙিব,
অথবা তেওঁলোকে যুদ্ধবিদ্যা পুনৰ নিশিকিব।
4তাৰ পৰিৱৰ্তে প্ৰতিজন লোকে দ্ৰাক্ষাবাৰী,
আৰু ডিমৰু গছৰ তলত বহিব।
কোনেও তেওঁলোকক ভয় খুৱাব নোৱাৰিব;
কাৰণ বাহিনীসকলৰ যিহোৱাই নিজৰ মুখেৰে এই কথা কৈছিল,
5কাৰণ সকলো লোকে
নিজৰ নিজৰ দেৱতাৰ নামেৰে চলে,
কিন্তু আমি চিৰকাললৈকে
আমাৰ ঈশ্বৰ যিহোৱাৰ নামেৰে চলিম।
6যিহোৱাই কৈছে, “সেই দিনা মই যিসকলক দুৰ্দশাগ্রস্ত কৰিছিলোঁ,
সেই পঙ্গুসকলক মই একগোট কৰিম,
আৰু অনুন্নত লোকসকলক একত্রিত কৰিম।
7মই পঙ্গুক অৱশিষ্ট কৰি ৰাখিম,
আৰু যিজনক দূৰ কৰা হৈছিল, তেওঁক এক বলৱান জাতি কৰিম;
আৰু মই, যিহোৱাই এতিয়াৰ পৰা চিৰকাললৈকে
চিয়োন পৰ্ব্বতত তেওঁলোকৰ ওপৰত ৰাজত্ব কৰিম।
8তোমালোক পশুৰ জাকৰ বাবে পহৰা দিয়া দুৰ্গ,
আৰু তোমালোকলৈ
চিয়োন জীয়ৰীৰ পাহাৰ,
পূৰ্বৰ শাসন,
যিৰূচালেম জীয়ৰীৰ ৰাজ্য আহিব।
9এতিয়া কিয় তোমালোকে চিঞৰি কান্দিছা?
প্ৰসৱ কৰা মহিলাৰ দৰে, তোমালোকৰ যে আকস্মিক বেদনা হৈছে;
তোমালোকৰ মাজত কোনো ৰজা নাই নে?
আৰু তোমালোকৰ পৰামৰ্শদাতা বিনষ্ট হ’ল নে?
10চিয়োন জীয়ৰী,
বেদনা অনুভৱ কৰা,
প্রসৱ কৰিবলৈ লোৱা মহিলাৰ দৰে,
উৎপন্ন কৰিবলৈ পৰিশ্রম কৰা,
কাৰণ তোমালোক এতিয়া নগৰৰ পৰা বাহিৰ ওলাই গৈ,
পথাৰত থাকিব লাগিব,
আৰু বাবিললৈ যাব লাগিব;
সেই ঠাইতে তোমালোকে উদ্ধাৰ পাবা,
সেই ঠাইতেই যিহোৱাই তোমাৰ
শত্ৰুৰ হাতৰ পৰা তোমাক মুক্ত কৰিব।
11এতিয়া অনেক দেশ তোমালোকৰ বিৰুদ্ধে একত্রিত হ’ব;
তেওঁলোকে কৈছে, তেওঁক কলুষিত হ’ব দিয়া,
আমাৰ চকুক চিয়োনক আগ্রহেৰে চাব দিয়া।”
12ভাববাদীয়ে কৈছে, “তেওঁলোকে যিহোৱাৰ কল্পনাবোৰ নাজানে,
নাইবা তেওঁলোকে তেওঁৰ আঁচনিবোৰ নুবুজে;
কাৰণ তেওঁ মৰণা মৰা ঠাইত ডাঙৰি গোটোৱাৰ দৰে তেওঁলোকক গোটাইছে।”
13যিহোৱাই কৈছে, “হে চিয়োন জীয়ৰী উঠা, আৰু প্রহাৰ কৰা;
কাৰণ মই তোমাৰ শিং লোহাৰ
আৰু তোমাৰ খুৰা পিতলৰ কৰিম;
তুমি অনেক লোকক মাৰি চূৰ্ণ কৰিবা;
মই যিহোৱাই নিজৰ বাবে তেওঁলোকৰ অন্যায়ৰ সম্পত্তি উৎসৰ্গ কৰিম,
তেওঁলোকৰ অধিকাৰ গোটেই পৃথিবীৰ প্ৰভুৰ উদ্দেশ্যে উৎসৰ্গ কৰিম।”
Currently Selected:
মীখ 4: IRVAsm
Highlight
Copy
Compare
Share
Want to have your highlights saved across all your devices? Sign up or sign in
Creative Commons License
Indian Revised Version (IRV) - Assamese (ভারতীয় সংশোধিত সংস্করণ - আসামি), 2019 by Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
