Matiyos 21
21
Bo̱r u̱r-kwo̱o̱z o-gaan
Ye̱so co̱wo̱g bo̱-o̱ o-Urusharima
(Mark 11:1-11; Ruka 19:28-40; Yoha 12:12-19)
1Bo̱ Ye̱so u̱n yan-neke̱-mo̱ u̱n wu̱ ne̱ woote̱ bo̱-o̱ o-Bapaji à, o̱ ro̱ yow yow o-Urusharima ne̱ à, be-de u̱n Haag-o̱ u̱n 'yo-se o-Ze̱tun, Ye̱so to̱mu̱ru̱ yan-neke̱-mo̱ u̱n wu̱ ne̱n yoor. 2Wu̱ ze̱e̱ru̱ ye̱, “Co̱w no̱ kà bo̱-o̱ ro̱ u̱n co no̱ à. U̱n ra-o̱ no̱ tu̱wte̱ à, no̱a hyen yo ken janka-yo ke'o, u̱n wà u̱n yo ne̱ n-riib. No̱ ussu̱ndu̱ ye̱, no̱ hantu̱ me̱. 3Wu̱ ken wu̱ citu̱ no̱ yo no̱ m-no̱m à, zee no̱ wu̱, ‘Go̱s-wu̱ wu̱ co̱nu̱ ye̱.’ Wu̱a ya'asu̱ndu̱ no̱ ye̱ ba u̱n naas o-da.”
4To̱ ka a u̱n no̱m to̱ remen a shoosté̱ rii-yo wan-Rwo̱r u̱n Ma-to̱ Shir rwo̱re̱ à u̱nze,
5“Ze̱e̱ no̱ hun-ne̱ ye̱ o-Urusharima,#21:5 u̱t-Girik: Sihiyona. #21:5 Hyen komo: Isha 62:11.
Ko-Gwo̱mo no̱ wu̱ ka ro̱o̱ne̱ be u̱n no̱,
Ko-yan-gwu̱gwe̱r-mo̱ u̱r-hi wu̱,
Wu̱ ro̱ n-to̱n o-janka, wu̱ ro̱ n-to̱n wà-yo o-janka.”#21:5 Hyen komo: Ze̱ka 9:9.
6Ká yan-neke̱-mo̱ u̱n wu̱ ye̱ yoor haaru̱, ye̱ no̱mu̱ru̱ bo̱ Ye̱so zee ye̱ nom à. 7Ye̱ hantu̱ru̱ o-janka u̱n wà u̱n yo ne̱. Ye̱ neksu̱ru̱ matuku-to̱ u̱n ye̱ n-to̱n u̱n wà-yo o-janka. Wu̱ daaru̱ yo, wu̱ she'etu̱ru̱. 8Hun-ne̱ u̱t-mo̱o̱r ne̱ neksu̱ru̱ matuku-to̱ u̱n ye̱ n-dak n-co̱w. Ye̱ ken ye̱ komo ye̱ jetmu̱nu̱ru̱ wa-to̱ u̱s-'yo ye̱ neksu̱ru̱ n-co̱w. 9Hun-ne̱ ye̱ ro̱ u̱n co-o̱ u̱n wu̱ à u̱n ye̱ ro̱ m-do̱re̱ u̱n jim-de u̱n wu̱ ne̱ à. Ye̱ damu̱ u̱s-co̱r, ye̱ zee,
“Bo̱ngo̱n-u̱r#21:9 u̱t-Girik: Hosanna! = Gu na! kumute̱ be-u̱r Wà Dawuda!
Ko-ya-o-kwu̱m-wu̱, wu̱ ro̱ m-haan
u̱n be̱e̱b-de u̱n Yawe à!
Bo̱ngo̱n-u̱r kumute̱ be-de Shir n-To̱n!”#21:9 Hyen komo: Bo̱ng 118:25-26.
10Bo̱ Ye̱so cu̱wte̱ o-Urusharima à, hun-ne̱ ma'asu̱ru̱ u̱s-cot, ye̱ ro̱ m-ze̱e̱, “¿Wan wu̱ ne̱ wu̱ kà?”
11Se̱ hun-ne̱ ye̱ ro̱ m-do̱re̱ u̱n Ye̱so à, ye̱ ze̱e̱ru̱, “Ai, wu̱ ka wu̱ ro̱ wan-rwo̱r u̱n Ma-to̱ Shir, Ye̱so wu̱ o-Nazaret o̱ u̱n dak-o̱ o-Gariri.”
Ye̱so we̱ne̱g m-ku̱ko̱p u̱n Pyo-o̱ Shir
(Mark 11:15-19; Ruka 19:45-48; Yoha 2:13-22)
12Ye̱so co̱wu̱ru̱ u̱n Pyo-o̱ Shir, wu̱ hyanu̱ru̱ myet ya-m-o̱ u̱n ya-u̱t-baab ne̱ n-me̱. Wu̱ wagarsu̱ru̱ de̱e̱g-to̱ u̱n yan-shas-o̱ u̱n hwo̱r, u̱n de̱e̱g-to̱ u̱n yan-baab-to̱ u̱n tantabara-ne̱. 13Wu̱ ze̱e̱ru̱ ye̱, “Gense̱ to̱ ro̱, ‘A eeg hur-o re hur-o̱ u̱s-ko̱n,’#21:13 Hyen komo: Isha 56:7; Irmi 7:11. amba no̱ muute̱ o̱ be-de u̱n wuke̱-de u̱n hyow-ne̱.”
14Po̱-ne̱ u̱n ryam-ne̱ ne̱ haanu̱ru̱ be-de u̱n wu̱ u̱n Pyo-o̱ Shir, wu̱ taasu̱ru̱ go̱m-se u̱n ye̱. 15Amba bo̱ Gwo̱mo-ne̱ ye̱ u̱n ko̱n-se Shir u̱n yan-Yoos-de o-karamsa ne̱ hyente̱ rem-se o-made̱ se wu̱ no̱me̱ à, har yakar ro̱ u̱n dak u̱s-co̱r n-me̱ u̱n Pyo-o̱ Shir ye̱ ro̱ m-ze̱e̱, “Bo̱ngo̱n-u̱r#21:15 u̱t-Girik: Hosanna! = Gu na! depete̱ be-u̱r Wà Dawuda,” yan-co swo̱o̱ru̱ u̱s-ryaab.
16Ye̱ ze̱e̱ru̱ Ye̱so, “¿Wo̱ m-ho̱ge̱ u̱n rii-yo ká yakar-ye̱ ro̱ m-ze̱e̱?”
Ye̱so shasu̱ru̱, wu̱ zee, “Eba, ashi, ¿no̱ we̱t m-karante̱ n-me̱ u̱n Ma-to̱ Shir á? To̱ zee,
“ ‘Wo̱ wu̱ yoose̱ yakar u̱n yan-yaar-ne̱
ye̱ nomo wo̱ u̱r-bo̱ngo̱n.’#21:16 Hyen komo: Bo̱ng 8:2 (u̱t-Girik). ”
17Bo̱n káne̱, wu̱ yagu̱ru̱ ye̱, wu̱ ruuru̱ u̱n ká bo̱-o̱, wu̱ argu̱ru̱ o-Betanya, wu̱ rewu̱ru̱ re̱e̱no̱.
Ye̱so hu̱u̱te̱ 'yo-yo o-rum o-nu yo̱-o̱
(Mark 11:12-14,20-24)
18Bo̱ ish geste̱ à, n-sot Ye̱so ro̱ m-warag o-Urusharima me̱r re̱e̱ru̱ wu̱. 19Bo̱ wu̱ hyente̱ yo ken 'yo-yo o-rum yo n-riib n-co̱w à, wu̱ haaru̱ u̱n ká 'yo-yo. Amba wu̱ kum rii á se̱ u̱t-wa. Wu̱ ze̱e̱ru̱ ká 'yo-yo, “Wo̱a do mat u̱n yakar á har o nomot re!” A kane̱ ká rum-yo hwo̱'u̱ru̱ kaw.
20Bo̱ yan-neke̱-mo̱ u̱n wu̱ hyente̱ káane̱ à, ye̱ bo̱pu̱ o-nu. Ye̱ ze̱e̱ru̱, “¿Re no̱me̱ ká rum-yo hu̱'u̱te̱ káane̱ ba u̱n rem?”
21Ye̱so shasu̱ru̱, wu̱ zee, “Nip-o̱ me̱ no̱ m-ru̱re̱, u̱rege̱ no̱ m-she̱r ne̱, komo no̱ zap á, ko̱ hiin, no̱a hoks m-no̱m arge̱ rii-yo u̱m no̱me̱ ká rum-yo à. No̱a zee ka haag-o̱ ‘Wuksu̱nde o he̱'e̱be̱ n-me̱ m-sa.’ O̱a nomo no̱ o-do̱ro̱tte̱.#21:21 Hyen komo: Mati 17:20; 1Kor 13:2. 22U̱rege̱ no̱ she̱re̱g o-nip ko̱ ya no̱ ko̱ne̱ Shir, no̱a kum yo.”
A u̱n boog-to̱ u̱n gwo̱mo-u̱t Ye̱so
(Mark 11:27-33; Ruka 20:1-8)
23Bo̱ Ye̱so cu̱wte̱ u̱n Pyo-o̱ Shir à, wu̱ ro̱ u̱r-yoos, Gwo̱mo-ne̱ ye̱ u̱n ko̱n-se Shir u̱n se̱k-ye̱ ne̱ be-de u̱n hun-ne̱ ye̱ haanu̱ru̱ be-de u̱n wu̱. Ye̱ ze̱e̱ru̱, “¿U̱n to̱ ke gwo̱mo-to̱ o̱ wo̱tte̱ u̱n no̱m u̱n ká rem-se? ¿Komo wa ya'u̱ wo̱ kà gwo̱mo-to̱?”
24Ye̱so shasu̱ru̱, wu̱ zee, “Me̱ u̱n cere, man cit no̱ o̱ ken cot-o̱. U̱rege̱ no̱ shaks me̱, man ru̱ru̱ no̱ gwo̱mo-to̱ me̱tte̱ u̱n no̱m u̱n ká rem-se à. 25¿Kene̱ Yohana kume̱ gwo̱mo-to̱ u̱n yo'os-de u̱n hun-ne̱ m-ho̱ de wu̱ no̱me̱ à? ¿Shir o̱ ya'e̱ wu̱ ko̱ ne̱t?”
Ma-u̱t su̱nu̱ru̱ ye̱, ye̱ ro̱ m-ze̱e̱, “A zee no̱ be-de Shir o̱, wu̱a zee na, ‘To̱, ¿remen yan o̱ a she̱rte̱ u̱n wu̱ á?’ 26Amba a zee no̱, ‘Be-de u̱n ne̱t o̱,’ A o-gye̱r u̱n ka bu̱u̱g-de u̱n hun-ne̱ de, remen ko̱wan dekse̱ Yohana ko-yan-Rwo̱r u̱n Ma-to̱ Shir wu̱.”
27Ye̱ shasu̱ru̱ Ye̱so, ye̱ ze̱e̱ru̱, “Te̱ nap á.”
Ye̱so ze̱e̱ru̱ ye̱, “Me̱ u̱n cere man ru̱ru̱ no̱ ko̱ u̱n to̱ ke gwo̱mo-to̱ me̱tte̱ m-no̱m u̱n ká rem-se á.
Sha-mo̱ u̱t-ma mo̱ u̱n ko-wan yakar yoor yan-campo̱-ne̱
28“To̱, ru̱ru̱ me̱ no̱ yo no̱ hyane̱ u̱n to̱ ka ma-to̱ ne̱ à. Wu̱ ken ne̱t-wu̱ ro u̱n yakar-ne̱ yoor yan-campo̱-ne̱. Wu̱ haaru̱ be-de u̱n wu̱ ro̱ se̱k-wu̱ à, wu̱ ze̱e̱ru̱, ‘Wà re, caane̱ neke̱, o nom m-se̱nge̱ o-kat o̱ u̱s-anab.’
29“Ká wà-wu̱ shasu̱ru̱, ‘Ay, man he á.’ Amba da-o ho̱r-o̱, wu̱ ja'asu̱ru̱ u̱s-barag, wu̱ haaru̱.
30“Tato-o haaru̱ be-de u̱n ayoore̱-ye̱ wu̱, wu̱ ru̱ru̱ wu̱ rii-yo wu̱ ru̱re̱ wu̱ u̱r-takan à. Wà shasu̱ru̱, wu̱ zee, ‘To̱, man hees, Tato re o̱.’ Amba wu̱ ha á.
31“Kap yoor-mo̱ u̱n ye̱, ¿wan wu̱ ne̱ nome̱ tato u̱n wu̱ o-do̱ro̱tte̱?”
Ye̱ ze̱e̱ru̱, “Wà u̱r-takan.”
Ye̱so ze̱e̱ru̱ ye̱, “Nip-o̱ me̱ no̱ m-ru̱re̱, yan-go̱ks u̱n tar u̱n ya-o-ás ne̱, ye̱a be'es no̱ co̱w u̱n gwo̱mo-to̱ Shir. 32Me̱ u̱n ze̱e̱ kaane̱ remen Yohana Wa-m-Yo'os u̱n hun-ne̱ m-ho̱ haante̱ wu̱ kutute̱ no̱ co̱w-yo u̱n ho̱o̱g, amba no̱ bo̱p ma-to̱ u̱n wu̱ á. Amba yan-go̱ks u̱n tar u̱n ya-o-ás, ye̱ bo̱k ma-to̱ u̱n wu̱ o-nip. Komo da-o̱ no̱ hyane̱ ka rii-yo ro̱ m-ko̱r à no̱ waktu̱ne̱ no̱ ho'os ba'as-u̱t no̱, no̱ bu̱p wu̱ o-nip á.#21:32 Hyen komo: Ruka 3:12; 7:29-30.
Sha-mo̱ u̱t-ma mo̱ u̱n yan-to̱m-ye̱ go̱kse̱ 'er-de u̱n kat-o̱ u̱s-anab à
(Mark 12:1-12; Ruka 20:9-19)
33“Ho̱gu̱ no̱, mo̱ ken sha-mo̱ u̱t-ma mo̱ komo. Wu̱ ken ne̱t-wu̱ ro kon wu̱ go̱'e̱ kat-o̱ u̱s-anab à. Wu̱ rigimshiru̱ o̱ u̱r-san, wu̱ bo̱o̱ru̱ kuub-o̱ m-po̱t u̱n ho̱-mo̱ u̱n yakar-ye̱ u̱n anab n-me̱. Komo wu̱ maaru̱ kuke̱-o m-pipir remen ya-u̱r-'er. Wu̱ ya'asu̱ru̱ ye̱ ken yan-to̱m-ye̱ mo̱o̱g-o̱ u̱n ká kàt-o̱, ka da-de, wu̱ haaru̱ o̱ ken dak-o̱.#21:33 Hyen komo: Isha 5:1-2. 34Bo̱ da-o̱ m-ce wo̱o̱nte̱ à, wu̱ to̱mnu̱ru̱ gu̱w-ne̱ ye̱ u̱n wu̱. Ye̱ he be-de u̱n ye̱ wu̱ mu̱u̱ge̱ o-kat à, remen ye̱ go̱ksu̱ntú̱ wu̱ o̱ ma u̱n wu̱ nu-o̱, o̱ u̱n kwu̱m-o̱ o-kat.
35“Amba ye̱ mo̱ge̱ o-kat à shipi gu̱w-ne̱, ye̱ kaktu̱ wan-gaan u̱r-bu̱'u̱g, ye̱ ho̱o̱ru̱ wan-gaan, ye̱ kaktu̱ wan-gaan u̱s-jor. 36Wu̱ dooru̱ m-to̱m u̱n gu̱w-ne̱ ho̱r-ye̱ arge̱ ye̱ u̱r-takan. Yan-mo̱o̱g-o̱ o-kat nomu̱ru̱ ye̱ bo̱ ye̱ nome̱ ye̱ u̱r-takan à. 37Har u̱r-ko̱m, ko-ya-o-kat to̱mu̱ru̱ wà u̱n wu̱ ha-mo̱ u̱n be-de u̱n ye̱. Wu̱ zee, ‘Ye̱a 'ye wà re m-se̱k.’
38“Amba bo̱ yan-mo̱o̱g o-kat hyanbu̱te̱ wà-wu̱ u̱n ko-ya-o-kat à, ye̱ ze̱e̱ru̱ hi u̱n de u̱n ye̱, ‘Ehee! Ai, ko-yan-go̱ks u̱n cim-yo o-kat wu̱ ka. A ho no̱ wu̱, kat-o warag o̱ ma na!’ 39Ye̱ argu̱ wu̱ m-ship, ye̱ jorbu̱ wu̱ u̱n jit-de san-de o-kat. Ye̱ ho̱o̱ru̱ wu̱.”
40Ye̱so citu̱ru̱ ye̱, “To̱, ka ko-ya-o-kat-wu̱ mu̱u̱ne̱, ¿ya wu̱ he m-no̱m u̱n ká yan-mo̱o̱g-ye̱ ne̱?”
41Ye̱ ze̱e̱ru̱ wu̱, “Ai, cip wu̱a hoom ye̱, wu̱ ya'as ho̱r-ye̱ mo̱o̱g-o̱ u̱n ká kat-o̱, ye̱ he wu̱ se̱nge̱ m-ya'as u̱n o̱ ma u̱n wu̱ nu-o̱, o̱ u̱n kwu̱m-o̱ o-kat ko̱ o̱ ke hak-o̱.”
42Ye̱so citu̱ru̱ ye̱, “Ashi, ¿no̱ we̱t m-karante̱ u̱n ge̱n-mo̱ u̱n Ma-to̱ Shir á?
“ ‘Ta'ar-de ya-u̱t-ma ginme̱ à,
de waragte̱ ta'ar-de jiishe̱ u̱r-bon myet be-de u̱t-ma à.
Mo̱ ka no̱m-m Yawe mo̱,
rii-yo u̱t-hyat yo ne̱
u̱n yish na.#21:42 Hyen komo: Bo̱ng 118:22-23.’
43“Rii-yo me̱ no̱ m-ru̱re̱ à yo ro̱ a rumus gwo̱mo-to̱ Shir u̱n kom-u̱t no̱, a ya'as ye̱ a hette̱ kum u̱n rii-yo u̱r-bon à. 44Bo̱n ne̱t-wu̱ pu̱kse̱ u̱n ká ta'ar-de à, dea jetem wu̱. Komo ká ta'ar-de a rugum re̱e̱w wu̱ de he̱'e̱be̱ be-de u̱n wu̱ à.”#21:44 Mo̱ ken ge̱n-mo̱ de̱e̱n mo̱ n-ga ro̱tt kà ci-yo á. #21:44 Hyen komo: Ruka 20:18.
45Bo̱ Gwo̱mo-ne̱ ye̱ u̱n ko̱n-se Shir u̱n Parisa-ne̱ ho̱gu̱te̱ ká sha-mo̱ u̱t-ma mo̱ Ye̱so rwo̱re̱ à, ye̱ napu̱ru̱ u̱nze ye̱ wu̱ ro̱tte̱ u̱t-ma. Ye̱ ro̱ ká yan-mo̱o̱g-o̱ o-kat ye̱. 46Ye̱ co̱nu̱ru̱ wu̱ m-ship, amba ye̱ ro̱ u̱n gye̱r-o̱ u̱n hun-ne̱ remen hun-ne̱ dekstu̱ Ye̱so ko-yan-Rwo̱r u̱n Ma-to̱ Shir wu̱.
Currently Selected:
Matiyos 21: uth
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with the U̱t‑Hun Bible Trɑnslɑtion Project All rights reserved.