Luka 5
5
Yesu wakuchema ŵasambiri ŵakudanga
(Mat 4.18-22; Mrk 1.16-20)
1Zuŵa limoza Yesu wakaŵa mu mphepete mwa nyanja ya Genezarete,#5.1 Genezarete: Ndi zina linyakhe la Nyanja ya Galileya. ndipo mzinda wa ŵanthu ŵanandi ukamufinyirizganga kuti upulike mazgu gha Chiuta.#Mat 13.1-2; Mrk 3.9-10, 4.1 2Iyo wakawona ngaraŵa ziŵiri mu mphepete mwa nyanja, kweni ŵarovi ŵakaŵa ŵafumamo kuti ŵakachape mikwawu yawo. 3Yesu wakanjira mu ngaraŵa yimoza iyo yikaŵa ya Simoni, ndipo wakamuromba kuti wayikanchizgeko pachoko waka kufuma ku mlima. Wakakhara pasi mu ngaraŵa yira na kusambizga ŵanthu.
4Para Yesu wakamara kuyowoya, wakamuphalira Simoni wakati, “Kanchizgira ngaraŵa iyi ku luji ndipo muponye mikwawu yinu kuti mukore somba.”
5Simoni wakazgora wakati, “Musambizgi, tatokatoka usiku wose. Tilije kukorapo somba nanga njimoza. Kweni chifukwa cha mazgu ghinu, nditi ndiponye mikwawu.”#Yoh 21.3 6Ŵakati ŵaponya mikwawu, ŵakakora somba zinandi chomene, mpaka mikwawu yawo yikamba na kuparuka wuwo.#Yoh 21.6 7Ŵakachewuzga ŵanyawo awo ŵakaŵa mu ngaraŵa yinyakhe kuti ŵize kawovwire. Para ŵanyawo ŵakiza, ŵakazuzga somba mu ngaraŵa zose ziŵiri, mwa ntheura nazo zikamba kubira. 8Para Simoni Petrosi wakawona ichi, wakajikama pa malundi gha Yesu wakayowoya wakati, “Mwe Fumu, fumaniko kwa ine pakuti ndili munthu wakwananga.”
9Wakayowoya ichi chifukwa iyo pamoza na awo ŵakaŵa nayo ŵakazukuma na unandi wa somba izo ŵakaroŵa. 10Yakhobe na Yohane, ŵana ŵa Zebediya, ŵeneawo ŵakateŵetanga pamoza na Simoni, nawo ŵakazukuma. Ndipo Yesu wakati kwa Simoni, “Ungopanga, kufuma sono uti uŵenge murovi wa ŵanthu.”
11Ŵakati ŵakwezga ngaraŵa zawo pa mlima, ŵakasida vyose na kurondezga Yesu.
Yesu wakuchizga munthu wa vyoni
(Mat 8.1-4; Mrk 1.40-45)
12Apo Yesu wakaŵa mu msumba unji, munthu uyo wakaŵa na vyoni thupi lose wakiza kwa iyo. Wakati wawona Yesu, wakawa kavunama ndipo wakamuŵeya wakati, “Fumu, usange mukukhumba, munganditozga.”
13Yesu wakanyoroska woko lakhe, wakamukhwaska wakati, “Inya, nkhukhumba, tozgeka!” Penepapo vyoni vikamara. 14Yesu wakamuchinyinthizga wakati, “Chenjera, ureke kuphalirapo munthu nanga njumoza. Kweni rutanga, ukajirongore kwa musofi, ndipo ukapereke chawanangwa chakutozgeka kwako icho Mozesi wakalangula kuŵa chipanikizgo ku ŵanthu.”#Lev 14.1-32
15Kweni ndipouli lumbiri lwa Yesu lukatandazgika kwakuruska kosekose. Ndipo mizinda yikuru ya ŵanthu yikiza kwiza kamupulika na kuchizgika ku matenda ghawo. 16Kweni Yesu wakawukapo na kuya kakhara ku mapopa na kuromba.
Yesu wakuchizga munthu wakufwa viŵaro
(Mat 9.1-8; Mrk 2.1-12)
17Zuŵa limoza apo Yesu wakasambizganga, ŵaFarisi na ŵamanyi-marango, ŵakaŵapo. Aŵa ŵakafuma mu vikaya vyose vya mu Galileya na Yudeya, na mu Yerusalemu. Ndipo nkhongono za Fumu zikaŵa mwa iyo pakuchizga ŵarwari. 18Ŵanthu ŵanji ŵakiza uku ŵayegha munthu wakufwa viŵaro pa kasarasara. Ntheura ŵakapenjanga apo ŵanganjirira nayo kuya kamuŵika panthazi pa Yesu. 19Para ŵakatondeka kusanga apo ŵanganjirira nayo chifukwa cha mzinda wa ŵanthu, ŵakakwera pa mtenje wa nyumba. Ŵakati ŵeghurapo pa mtenje, ŵakamukhizgira pa kasarasara wakhe mukati mu ŵanthu panthazi pa Yesu. 20Para Yesu wakawona chipulikano chawo, wakati, “Iwe dada zakwananga zako zagowokereka.”
21Ndipo ŵamanyi-marango na ŵaFarisi ŵakamba kujifumba ŵakati, “Kasi ndi njani mweneuyo wakuyowoya matusi? Ndi njani wangamanya kugowokera zakwananga, asi ndi Chiuta pera?”
22Kweni Yesu wakati wamanya ivyo ŵakaghanaghananga, wakaŵazgora wakati, “Chifukwa uli mukughanaghana vya ntheura mu mitima yinu? 23Kasi chipusu ndi nchi, kuyowoya kuti, ‘Zakwananga zako zagowokereka,’ panji kuyowoya kuti, ‘Wuka, wendenge?’ 24Kweni mwakuti mumanye kuti Mwana wa Munthu wali na mazaza pa charu kugowokera zakwananga,” wakati kwa munthu wakufwa viŵaro, “Nkhukuphalira kuti, wuka, nyamura kasarasara wako ndipo rutanga ku kwako.”
25Maluŵiro wakawuka uku wose ŵakuwona, wakanyamura icho wakagonangapo, ndipo wakaruta ku kwakhe uku wakuchindika Chiuta. 26Ŵanthu wose ŵakazukuma na kuchindika Chiuta, ndipo ŵakazura na wofi na kuyowoya kuti, “Muhanya uno, tawona vyakuzukumiska.”
Yesu wakuchema Levi
(Mat 9.9-13; Mrk 2.13-17)
27Pamanyuma pa vyeneivi, Yesu wakafumira kuwaro ndipo wakawona wakusonkheska msonkho zina lakhe Levi wakhara mu nyumba yakusonkheramo msonkho. Yesu wakati kwa iyo, “Ndirondezga.” 28Ndipo wakareka vyose, wakawuka na kumurondezga.
29Ntheura Levi wakanozgera Yesu chiphikiro chikuru mu nyumba yakhe. Pakaŵa mzinda ukuru wa ŵakusonkheska msonkho pamoza na ŵanthu ŵanji awo ŵakakhara nawo pa chakurya. 30ŴaFarisi na ŵamanyi-marango ŵawo, ŵakamba kudinginyikira ŵasambiri ŵakhe ŵakati, “Chifukwa uli mukurya na kumwa pamoza na ŵakusonkheska msonkho na ŵakwananga ŵanji?”#Luk 15.1-2
31Ndipo Yesu wakaŵazgora kuti, “Awo mba msuma kuti ŵakupenja ng'anga chara, kweni ŵarwari ndiwo. 32Ine kuti nkhizira kuchema ŵarunji chara, kweni ŵakwananga kuti ŵang'anamuke mu mtima.”
Fumbo pakuziŵizga kurya
(Mat 9.14-17; Mrk 2.18-22)
33Ŵanthu ŵakati kwa Yesu, “Ŵasambiri ŵa Yohane ŵakuziŵizga kurya rutaruta na kuromba malurombo ndiposo na ŵasambiri ŵa ŵaFarisi, kweni ŵinu ŵakujiryera waka na kumwa.”
34Yesu wakaŵazgora kuti, “Kasi mungamanya kuŵaziŵiziska chakurya ŵanthu awo ŵakuchemekera pa nthengwa, uku mwene-nthengwa wali nawo? 35Kweni nyengo yitizenge apo mwene-nthengwa wati wawuskikeko kwa iwo. Penepapo ndipo ŵizamkuziŵizga kurya mu mazuŵa gheneagho.”
36Yesu wakaŵaphaliraso ntharika wakati, “Palije munthu uyo wakuchekera chigamba ku laya liphya na kugambika pa laya likoroŵere. Usange wangachita ntheura, ndiko kuti wati waparure laya liphya. Ndipo chigamba cha laya liphya chiti chiyane na laya likoroŵere chara. 37Ndiposo palije munthu uyo wakupungulira vinyo liphya mu mathumba gha vikumba vidala. Usange wangachita ntheura, vinyo liphya lira lingaphumula mathumba gha vikumba vidala vira, ndipo vinyo lingathikira pasi. Ntheura mathumba gha vikumba nagho ghakunangika. 38Kweni vinyo liphya likwenera kuŵikika mu mathumba gha vikumba viphya. 39Ndipo palije munthu uyo wakukhumba vinyo liphya para wamwa likoroŵere, chifukwa wakuti, ‘Lidala ndilo ndiweme.’ ”
Currently Selected:
Luka 5: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi