John 1
1
Christ kaa tipaachimaakanuut che takushinit
1Anite maauch niishtam, eshkw ekaa uhchi ihtakuhch chekwaan shaash chii ihtaau Ayimuwin. Chii wiicheweu Chishemanituu kaye wiya chii aau Chishemanituu an Ayimuwin. 2Muush chii ihtaau Chishemanituu an maak Ayimuwin kaa ishinihkaasut shaash chii ihtaau kaye chii wiicheweu Chishemanituuh. 3Ayimuwinihch ekut misiwe chekwaan kaa uhchi ushihtaakanuuhch. Namui chekwaan uhchi ushihtaakanuu ekaa wiya uhchi ushihtaat Ayimuwin. 4Wiya e ihtaat uhchipayuu pimaatisiiwiniyuu, pimaatisiiwinihch maak ekut kaa uhchi waapahtahkwaau awenichii waashtewiniyuu. 5An waashtewin chihkaashteu anite wanitipiskusiiwinihch, wanitipiskusiiwin maak namui chii aashtuweham aniyuu waashtewiniyuu.
6Chii ihtaau naapeu Chishemanituu e chii pechi itishahukut John e ishinihkaasut. 7Uu maak John chii pechi takushinuu chechii tipaatutahk waashtewiniyuu ekw maak misiwe aweyuu pehtamiyichenh uyuu miywaachimuwiniyuu chechii taapwehtamiyich. 8Namayeu maak wiya John uu waashtewin kaa aayimuutech mikw maak wiya chii pechi itishahwaakanuu chechii tipaatutahk waashtewiniyuu. 9Uu waashtewin chii pechi takushinuu utah aschiihch misiwe aweyuuh chechii waashtenamuwaat.
10Utah aschiihch chii ihtaau Ayimuwin. Aat wiya e chii ushihtaat uyuu aschiiyuu yaapach namui uhchi chischeyimikuu aweyuu iskutak kaa takushinit. 11Kaa takushinit utah aschiihch wiya tipiiwe utiiniimh chii pechi nituwaapameu, mikw maak namui uhchi aapateyimikuu. 12Aniyuu maak aweyuu kaa utinikut kaye kaa taapweyimikut chii miyeu suuhkaatisiiwiniyuu chechii utawaashiimitutaakuyich Chishemanituu. 13Aniyuuh maak kaa taapweyimikut uschi pimaatisiyuuh Chishemanituu e ihtaayich uhchi, namui wii muhch iskweu ekw maak naapeu e ihtaayich uhchi pimaatisiyuuch namui kaye iinuu utiteyihtamuwiniihch uhchi. Taapwe Chishemanituu e ihtaayich chii uhchi uschi pimaatisiyuuch.
14An maak Ayimuwin iinuu chii ishinaakuhaakanuu. An kaa saakaschineshkaakut chishewaatisiiwiniyuu kaye taapwewiniyuu, chichii wiichimikunuu utah aschiihch. Chichii waapamaanuu maak e chisteyihtaakusit mwehch e ishpish chisteyihtaakusiyich Chishemanituuh aniyuuh Uhtaawiih wesh wiya mikw peyakushuu e Ukusiitutaakut Chishemanituu.
15John chii wiihtam aweyuu nihaau Jesus e aawiyich. Eyuu maak chii wiihtam e itwet, “Chichischisinaawaau aa kaa aayimuumak awen kaa itweyaan, ‘Chika pechi takushinuu eshkw awen etituu e chisteyihtaakusit ishpishaat niya. Eukw uu Jesus kaa aayimuumak an kaa ihtaat eshkw ekaa uhchi pimaatisiyaan niya.’ ”
16Aniyuu e saakaschineshkaakut chishewaatisiiwiniyuu misiwe e tashiihkw naashch taapwe chishaweyimikunuu, namui maak nihtaa chika uhchi puuniyuu e shaweyimitahkw. 17Chishemanituu chii aapachiheu aniyaanaa Moses chechii wiihtamuwaayich iinuuh uwiishuwewinh. Kaye maak Jesus Christ chii aapachiheu chechii nuukuhtaayich utaapwewin kaye uchishewaatisiiwin. 18Namui wiiskaat awen uhchi waapameu Chishemanituu, mikw aniyuu kaa peyakushiyich Ukusisa kaa saachihaat chii ihtuutaakuu chechii chischeyimaakanuut.
Taan kaa itaachimut John siikahaahtaacheu
Matthew 3.1-12; Mark 1.1-8; Luke 3.1-18
19Jewa tipeyihchichesuuch chii itishahuweuch John anite e ihtaayich Jewa e itiskaanesiyich ayimiheuchimaauh kaye e ayimihewaatisiitwaau Levi iinuuh Jerusalemihch e uhchiyich chechii nituu chischeyimikut wiya e aawiikwe an Christ Chishemanituu kaa pechi itishahwaat chechii pimaachihaayich aweyuuh.
20John maak kuiskw chii wiihtamuweu e itaat, “Namui, namayeu niya Christ.”
21Ekw kaa kakwechimikut e itikut, “Awen maak chiya. Elijah aa.” “Namui. Namayeu niya Elijah,” chii iteu John. “Eukw aa chiya an uchischiwehiichesuu nipaa pechi itishahamaakunaan,” chii itikuu. “Namui,” chii iteu John.
22Ekw miin kaa itaatwaau, “Pechi wiihtamuunaan maataan awen chiya, chechii wiihtamuwachihtwaau anichii kaa pechi itishahuyimihtwaau e wii chischeyimiskwaau awen e aawiyin.”
23Ekw John kaa itwet, “Eukw an niya kaa chii tipaachimit aniyaanaa uchischiwehiichesuu Isaiah. Chii iteu,
Chika takushinuu awen anite pakwaatiskamikaahch e uhtuhtet e ishi tepwet, Ayeskawiihkamuwaahkw Utipeyihchikeu umeskanaam anit che pimuhtet, kuiskumuhtaawaahkw.”
24Anichii maak Phariseeh kaa pechi itishahukutwaau chii kakwechimeuch John, 25“Chekwaan maak wehchi siikahaahtaacheyin ekaa e aawane Christ maak Elijah maak an uchischiwehiichesuu.”
26Ekw John kaa itaat, “Chit siikahaahtaatinaawaau nipiihch, chiwiichikaapuushtaakuwaau maak anit awen ekaa chischeyimekw. 27Uu maak eshkw che takushihk wiya uste chisteyihtaakusuu ishpish niya, namui waawaach nitepicheyihtaakusin chechii aapihkunamuch umaschisiniyaapiih.”
28Anite maak Bethany kaa ishinihkaatech ihtaawin ekute kaa ispayihch uu, anite itehche waapanuutaahch an Jordan siipii anite kaa siikahaahtaachet John.
Jesus eukw Chishemanituu umaanishchaanishimh
29Miin maak aniyuu wiyaapaniyich John chii waapameu Jesus e pechi naatikut, ekw kaa itwet, “Kanawaapamaahkw maa uu naapeu, eukw uyuu Chishemanituu umaanishchaanishimh kaa pechi itishahwaat chechii wepeyihtamuwaakanuyich aweyuuh umachihtwaawiniyuuh. 30Eukw maak uu kaa aayimuutamaatakuch kaa ititakuch, ‘Chika takushinuu naapeu, wiya maak etituu kata chisteyihtaakusuu ishpish niya wesh eshkw namui nuuhchi pimaatisiiwaan shaash chii ihtaau wiya.’ 31Namui nuuhchi chischeyimaau awen an, mikw maak nichii pechi takushin chechii siikahaahtaacheyaan nipiihch chechii uhchi chischeyimakut Jesus Israel iinuuh.”
32John maak chii wiihtam taan kaa ishi waapahtahk e itwet, “Nichii waapamaau Kaa payehchisiit Ahchaahkw muyaam kaa waapasit piyeshiish chii ishinaakusuu kihchikiishikuhch e uhchi pechi aashiitutaakut, ekun kaa itakushiyich anit e ihtaat. 33Namui nuuhchi chischeyimaau, mikw maak Chishemanituu an kaa pechi itishahuut chechii siikahaahtaacheuch nipiihch, nichii itikw, ‘An naapeu che waapamat Ahchaahkw e pechi aashiitutaakut anit maak e ihtaat e ihtaayich, eukw an che siikahaahtaachet Kaa payehchisiyich Ahchaahkwa.’ 34Nichii waapahten uu kaa ispayihch kaye chiwiihtamaatinaawaau eukw aniyuu Chishemanituu Ukusisa,” chii iteu John.
Aniyuuh chischinuhamuwaakanh niishtam kaa wiyaapamaat Jesus
35Miin maak aniyuu e chiishikaayich miin chii ihtaau anit John kaye maak aniyuu niishu uchischinuhamuwaakanh. 36Iskutak maak wiyaapamaat Jesus e pimuhteyich anite, chii iteu, “Maauyuuh maak Chishemanituu umaanishchaanishimh.”
37Aniyuuh maak niishu uchischinuhamuwaakanh piyehtaakut uyuu e itwet, chii ati wiicheweuch Jesus. 38Jesus maak chii chipihchikaapuu, kaa aapisaapit kaa waapamaat aniyuu e nuushuushkaakut, ekw kaa itaat, “Chekwaan niyaanituwaapahtamekw.” Ekw kaa itaatwaau, “Chischinuhamaachesuu taanite e wiichiyin.”
39Chii iteu maak, “Aashtamukw pechi kanawaapahtamukw.” Ekw kaa wiichewaatwaau, kaa waapahtamuwaatwaau taanit e wiichiyich. Wiyesh neu chii ispayiyiche e chiishkwaapihtaachiishikaayich. Ekut maak kaa ihtaawaatwaau anit e ihtaayich iskan chiishikaauh.
40Simon Peter maak wiichishaanh, Andrew kaa ishinihkaasuyich eukw an peyakw kaa pehtawaat John aniyuu e itweyich kaye wiya maak chii ati wiicheweu Jesus. 41Tiiwehch maak Andrew chii nituu naanituweyimeu aniyuu wiichishaanh Simon ekw kaa itaat, “Nichii miskuwaanaan aahchin Messiah.” Messiah e iinaanuuhch Christ iinaanuu e itweshtamuwaataakanuuhch. 42Ekw kaa ituhtahaat Simon anite Jesus e ihtaayich. Jesus maak chii kanawaapameu aniyuu Simon ekw kaa itaat, “chiya Simon, John ukusisa, Cephas chika ishinihkaasun.” Cephas e itweshtamuwaataakanuuhch Peter maak asinii iinaanuu.
Jesus kaa wiishaamaat Philip ekw maak Nathanael
43Miin aniyuu e ati chiishikaayich Jesus chii iteyihtam Galilee aschiihch chechii ituhtet. Ekute anite kaa miskuwaat Philip ekw kaa itaat, “Pechi papaawiicheu.” 44Philip maak anite Bethsaida chii uhchiyuu anite aniyuu ihtaawiniyuu Andrew ekw maak Peter kaa uhchiitwaau. 45Philip maak chii naanituwaapameu Nathanael ekw kaa itaat iskutak kaa miskuwaat, “Nichii miskuwaanaan aniyuu Moses kaa aayimuumaat anite wiishuwewinihch, kaye anichii uchischiwehiichesuuch kaa aayimuumaatwaau. Eukuu Jesus, Joseph ukusisa, anite Nazareth kaa uhchiit.”
46Ekw Nathanael kaa itaat, “Chika chii uhchiyuu aa awen e chisteyihtaakusit anite Nazareth.” Ekw Philip kaa itaat, “Aashtam pechi nituwaapam.”
47Iskutak maak Jesus wiyaapamaat Nathanael e petaashtamuhteyich chii iteu, “Eukuu chihchiwe Israel iinuu, naashch taapwe kuiskutaatisiyuu.”
48Nathanael maak chii iteu, “Taanite kaa uhchi chischeyimiyin.” Ekw Jesus kaa ishi nishkuushihaat, “Chichii waapamitin e apiyin shiipaa misishuuminaahtikuhch eshkw ekaa uhchi nituwaapamisk Philip.”
49Nathanael kaa itaat, “Chischinuhamaachesuu, eukw chii taapwe Chishemanituu Ukusisa, eukw chiya Chisheuchimaau utah Israelihch.”
50Ekw Jesus kaa itaat, “Chitaapwehten aa an mikw e chii wiihtamaataan e chii waapamitaan shiipaa misishuuminaahtikuhch. Etituu maak eshkw chika waapahten maamishkaach chekwaayuuh.” 51Ekw miin kaa ati itwet, “Kuiskw chiwiihtamaatinaawaau, chika waapahtenaawaau kihchikiishikw e aapahiipayihch, ekw maak Chishemanituu utenchilamh e uhpipayitwaau kaye e pechi aashiitutuwaatwaau Iinuu Ukusisa.”
Currently Selected:
John 1: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.