Romans 3
3
1Taan maak ishi wiyaahpach Jewa e itiskaanesit awen. Taan ishi wiyaahpach aat e chii chischinuwaachishwaakanuut awen. 2Mistahii kiipaa chekwaan iteyihtaakun Jewa e itiskaanesit awen. Mistahii taapwe iteyihtaakun. Niishtam chekwaan. Eukw uchii Jewa kaa itiskaanesitwaau iinuuch kaa miyaakanuutwaau chechii aapatisiihkahtamuwaatwaau Chishemanituuh utayimuwiniyuu. 3Pasch aniyuuh Jewa kaa itiskaanesiitwaauh namui uhchi taapweucheyihtaakusiyuuh, ekw aa maak namui taapweucheyihtaakusuu kaye wiya Chishemanituu. 4Namui kiipaa, namui mitun chika chii ishinaakuniyuu ekaa maamuyaam chechii ihtit Chishemanituu. Taapweu wiya Chishemanituu aat misiwe awen e nanatayit. Itashteu Chishemanituu utayimuwinihch wiya Chishemanituu e aayimuumaakanuut,
Ayimiine misiwe awen chika chischeyihtam e taapweyin. Ekw maak mamishimikuyine e itikuyin e machituutaman chika nuukun taapwe ekaa uhchi ihtuutaman taan e ishi mamishimikuyin.
5Maak chipaachii iteu awen, “E machituutamuhkw ekut etituu wehchi piyekasch waapahtamuwaatwaau awenichii Chishemanituuh ukuiskutaatisiiwiniyuu. Chekwaan maak wehchi waweshihiihtakw Chishemanituu e machituutamuhkw.” Namui kiipaa maamuyaam ihtuu Chishemanituu uyuu e ihtuutaatahkw. Eukw uyuu e itwetwaau pasch awenichii. 6Namui maak mechim uu chipaa uhchi ishi ayiminaanuu. Ekaa waweshihaate Chishemanituu aweyuu e machituutamiyich katachii aa wiyaaskunam uyuu aschiiyuu. 7Chekwaan maak che uhchi wiyaaskunikuyaan e nuukuniyikwe Chishemanituu taan nihaau e ishi kuiskw ihtit anit uhchi e machituutamaan kaye maak etituu e chisteyihtaakuhaakanuut aniyuu uhchi. 8Chekwaan che uhchi ekaa chii itweyihkw, “Machituutahtaau chechii uhchi nuukuniyich Chishemanituu muush kuiskw e ihtit.” Nichii maayeyimikuch kutakach awenichii nitamukw e chii ishi mamishimitwaau, e chii itwetwaau uyuu e chii itweuch. Ishinaakuniyuu maak taapwe chechii wiyaaskunaakanuutwaau uchii.
Namui awen kuiskutaatisiiu
9Ishi kakwechihcheyimut aahch awen, uste aa chiyaanuu Jewa kaa itiskaanesiihkw chititeyimikunuu Chishemanituu e iteyimaat aniyuuh ekaa Jewa kaa itiskaanesiyich. Namuwaach kiipaa. Shaash chichii wiihtamaatinaawaau, misiwe awen Jewa kaa itiskaanesit kaye ekaa Jewa kaa itiskaanesit tipeyimikuu machihtwaawiniyuu. 10Mwehch e itashtech anite Chishemanituu utayimuwinihch,
Namui awen kuiskutaatisiiu. Namui waawaach peyakw awen. 11Namui waawaach peyakw awen nisituhtam taapwewiniyuu. Namui waawaach peyakw awen wii chischeyimeu Chishemanituuh, namui waawaach peyakw awen aapateyihtamuweu utiteyihtamuwiniyuu. 12Misiwe awen chii pachischisaapemeu Chishemanituu. Misiwe awen namui wiyesh iteyihtaakusuu. Namui ihtaau awen kuiskw e ihtit, mechim peyakw awen chechii ihtaat. 13Nipahiiwemakaniyuuh utitwewinawaauh. Pisikw wiyeshimuweuch taan e itwetwaau. Mwehch chinepukw kaa iteyihtaakuniyich upihchipuuyaapuuh ekun e iteyihtaakuniyich utayimuwinawaau. 14Pisikw chishuu ayimuuch. Kaye pisikw waawiihkwaateuch aweyuu. 15Naashch taapwe chiistapayuuch chechii nanehkaachihaatwaau aweyuuh kaye chechii ati nipahaatwaau wiipach chesiwaahiikutwaau. 16Taanite mikw e ati aihtaatwaau muush ayaahkuheuch aweyuuh. Kaye muush ihtaayuuh aweyuuh e nanehkaateyimuhaatwaau. 17Namui mitun wii kuchihtaauch chechii miyu wiichewaatwaau aweyuuh. 18Namui mitun nanihchiishtuweuch Chishemanituuh.
Eukun e itashtech Chishemanituu utayimuwinihch.
19Chichischeyihtenaanuu anichii kaa miyaakanuutwaau uyuu wiishuwewiniyuu chipaa nanihiihtamuch misiwe taan e itashuwemakaniyich. Eukw maak uu che uhchi ekaa mitun chii itwet awen ekaa uhchi chischeyihtahk e chii machituutahk kaye maak ekun wehchi misiwe awen utah aschiihch ishinaakuniyich chechii wiyaaskunikut Chishemanituuh. 20Wesh taapaa awen chii kuiskunaakuhiisuu Chishemanituu ishi e ihtaayich mikw aniyuu e nanihiihtahk wiishuwewinh. Chichischeyihten aa taan e itaapatahkwaauh uyuuh wiishuwewinh. Chechii chischeyihtahk awen e machituutahk ekun e itaapatahkwaauh.
Taanite wehchi kuiskutaatisiihaakanuut awen
21Anuhchiish maak ekw e nuukuhtaat Chishemanituu taanite wehchi kuiskunaakuhaat aweyuuh wiya ishi e ihtaat. Namayeyuu maak wii e nanihiihtahk awen kaye e ihtuutahk wiishuwewiniyuu wehchi kuiskunaakusit Chishemanituu ishi e ihtaayich. Wiishuwewinihch ekut waahtaakuhch taan che ihtit awen chechii kuiskunaakusit Chishemanituu ishi e ihtaayich. Aniyehkaanaanich maak uchischiwehiichesuuch eukw uyuu kaa ishi wiihtahkwaau kaye wiyawaau. 22Ukuiskutaatisiiu ishi kanawaapameu Chishemanituu aniyuu aweyuuh kaa taapweyimaayich Jesus Christ. Misiwe maak aweyuuh, aniyuuh Jewa kaa itiskaanesiyich kaye aniyuuh ekaa Jewa kaa itiskaanesiyich, kaa taapweyimaayich Jesus, ekun e ishi ihtuutamuwaat. Wesh misiwe peyakunihch ishi kanawaapameu misiwe aweyuuh Chishemanituu. 23Misiwe awen chii machituutam. Ekut maak wehchi misiwe awen nuuhtaashkamuwaat Chishemanituuh uchisteyihtaakusuwiniyuu. 24Aniyuu sehchei e ishi miyaat e chishewaatutawaat aweyuuh Chishemanituu ukuiskutaatisiiu ishi kanawaapameu aniyuu kaa taapweyimaayich Christ Jesus. Christ Jesus chii iichenamuweu aniyuuh aweyuuh kaa taapweyimikut taan kaa ishi iteyihtaakuniyich chechii wiyaaskunikuyich Chishemanituuh. 25Wesh Chishemanituu chii pachishtineu Jesus chechii nipahaakanuyich aashiteyaahtikuhch chechii uhchi wepeyihtamuwaakanuyich aweyuu umachitwaawiniyuuh. E taapweyimaat maak awen Jesus ekut e uhchi wepeyihtamuwaakanuut umachihtwaawinh. Chishemanituu chii ihtuutam uyuu chechii waapahtiiwet muush kuiskw e ihtit. Ute ishi utaahch naashch taapwe chii siipiiwesiistaacheu Chishemanituu taan kaa ishi machituutaakanuyich. Namui muush nihaau e iteyihtaakuniyich chechii ishi wiyaaskunaakanuyich aweyuuh uhchi ishi wiyaaskuneu. 26Anuhchiish maak wii namui ekw ekaa piskaatamuweu aweyuuh umachihtuutamuwiniyuuh Chishemanituu, waapahtiiweu taan e ishi kuiskw ihtit kaye maak taapwe ukuiskutaatisiiu e ishi kanawaapamaat misiwe aniyuuh aweyuuh kaa taapweyimaayich Jesus.
27Taan maak chechii ishi nanaapeumut ekw awen. Namui mitun ihtakuniyuu taan chechii ishi nanaapeumut. Namui awen chika chii iteu e kuiskunaakusit mikw e nanihiihtahk wiishuwewiniyuu. Wesh e taapweyimaat awen Jesus ekut mikw ukuiskutaatisiiu chechii ishi kanawaapamikut Chishemanituu, namui wii e nanihiihtamuwaat uwiishuwewiniyuu. 28Eukw maak uu e ishi wiihtamuhkw. E taapweyimaat awen Jesus ekut mikw wehchi ishinaakuniyich ukuiskutaatisiiu chechii ishi kanawaapamikut Chishemanituu, namui wii aniyuu e nanihiihtamuwaat uwiishuwewiniyuu. 29Maak e iteyihtamukwe awen, ekw aa maak mikw anichii Jewa kaa itiskaanesitwaau Wechishemanituumitwaau Chishemanituu. Namui aa kaye wiyawaau anichii ekaa Jewa kaa itiskaanesitwaau Uchishemanituumuuch Chishemanituu. Kiipaa kaye wiyawaau anichii ekaa Jewa kaa itiskaanesitwaau wechishemanituumitwaau Chishemanituuh, namui mikw wiyawaau anichii Jewa kaa itiskaanesitwaau. 30Wesh peyakushuu mikw Chishemanituu, taapishkun aniyuuh Jewa kaa itiskaanesitwaau ekw maak aniyuuh ekaa Jewa kaa itiskaanesitwaau kuiskutaatisiiwinihch chika ishi kanawaapameu taapweyimaatwaawenich Jesus. 31Ekw aa maak wiyepinamuhkw wiishuwewin e itweyihkw mikw e taapweyimaat awen Jesus e uhchi kuiskunaakuhaakanuut Chishemanituu ishi e ihtaayich. Namui kiipaa. Teyakuch chichiihkaayeyihtaakuhtaanaanuu taan chihchiwe e itaapatahch an wiishuwewin.
Currently Selected:
Romans 3: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
