Room 7

Haaŋ yuuri wikpoglaa wia

1Yaabalaa, ii ɛɛ kiizunnaa. Awia, ii daŋ zum lugɔ gbɔgrɛ dɔɔ nɛr u miibɔɔ saŋa maa. 2Di haaŋ yuuwɔ, di u jaari du de, gbɔg la ɔɔ giluu u jaari dɔɔu. Ka di u jaari hiŋ wa siuwɔ, u jaa lii u fɔŋŋa la biinii. 3Di u jaari haa du de, ka u chɔ ga du baal bɛl be, ba daŋ yiruu hahsɛnsɛnni. Ka di u jaari siuwɔ, kii la waa kaa dɔɔ u fɔŋŋa. Di u laŋŋɔ ga yuu jaari bɛl, ka waa kaa ɛɛ hahsɛnsɛnni.

4Too. Yaabalaa, Kɔraawiizi faa gillɔɔ ii gba siu Gbɔg la be, dikuu ii ni Kɔraawiizi n kpauwɛ siu la wia, ka ií wer yuu nɛfalii, unla uŋ lallɛɛ siu biini la. U ɛɛ gunnɛ wínanaa wer lii a biini tɛɛ Kɔraawiizi. 5Saŋa la yaa bɔrahɔna n faa dɔɔ fɔŋŋa yaa ni la, Gbɔg la faa ɔɔ giluu kunnyiŋŋichɔgaa wia ra ɛɛ yaa biine, di lauri yaa yeŋa ra ɛɛ wia la siu n na lii a biine la. 6Ka filaŋkeŋ, yaa lii Gbɔg la fɔŋŋa biinii, dikuubɛɛwiai, yaa siuwɔɔ, wia la n faa lauri yaa la be, di jaa wer ra hum ani bampirfalii la u Dumnanii n tɛɛ yaa la. Yaa waa kaa ra hum dikuu gbɔg n na fir yaa wia.

Gbɔg ni wichɔgaa wia

7Too. Ɛrɛɛ ya ŋɔ naanɛi? Gbɔg la waa wer gɛɛ? Akai. A wessoo. Di a Gbɔg wia lɛi, n faa waa wette zum wichɔgaa. Di Gbɔg la vii waa baglɛɛ lugɔ kɛkɛluu waa wer, n faa waa zummɛ lugɔ kɛkɛluu waa wer. 8Miŋ wa zum Gbɔg la, wichɔgaa jaa na a ŋmɛnɛɛrɛ, di gil n dɔɔ kɛkɛluu werge. Di Gbɔg waa hoo, wichɔgaa ɛɛwɔɔ lugɔ a siuwɔɔ. 9N faa waa Gbɔg zummɛ ka du de. Ka miŋ wa zum Gbɔg la, wichɔgaa jaa izi ra nyiŋ, di kpuŋ. 10Gbɔg la n niŋ vii ɛɛ miibɔɔ wia tɛŋ la bir lawiŋ du lii siu biini.

11Wichɔgaa n wa na a ŋmɛnɛɛ dikuu Gbɔg la wia, a wer dariŋ di kpaa kpuŋ. 12Ama, Gbɔg la ɛɛ kunnanaarɛ. Widaulaa la bɛl maa ge ɛɛ kunnanii. A maa deŋloore, di du wer. 13Wia la n wesse daŋ kpa siu du n ni gɛɛ? Akai. Wichɔgaarɛ niŋ ɛɛ guŋ. Aabuu gillɛ kunnanii bir duŋ siu biini, ń wer zum wichɔgaa zɛɛ. Kii la gillɔɔ n zum gunla wichɔgaa n chummɛ werge maa.

14Yaa zummɔ lugɔ Gbɔg la ɛɛ Kɔraawiizi Dumnanii wiarɛ. Ka miŋwaa du newea duula. Wichɔgaa lawiŋ birgi a yom. 15Maa n himmaa wiɛɛlaa zɛɛ zummɛ. Wia la minna nyiŋŋi ɛɛi, aa lɛi n na ɛɛ. Wia la miŋ hahwɛɛ, aabuu n na ɛɛ. 16Miŋ waa nyiŋŋi a ɛɛi ka ra ɛɛa la, gunna bagli lugɔ n sɛɛwɔɔ lugɔ Gbɔg la wessoo. 17Miŋ lɛi ra ɛɛ a wia. Ka wichɔgaa la n du n biini labuu gillɛ n na ɛɛa.

18N zummɔ lugɔ n manni naa, n newee mannii la, waa winanii maa dɔɔwɛ. N ɔɔ ra nyiŋŋi n ɛɛ winanaa, ka ɛɛa ra huhzi. 19Winanaa la minna nyiŋŋi n ɛɛ, aa lɛi n na ɛɛ. Ka wichɔgaa la miŋ waa nyiŋŋi, aabuu n na ɛɛ. 20Di n na ɛɛ wia la miŋ waa nyiŋŋi, amɔ, miŋ lɛi kaa ra ɛɛa. Ka wichɔgaa la n du n biini labuu jaa ra ɛɛa.

21N jaa na di n mannii guŋ, n vɛɛa huhzi. Saŋa maa, di n waa nyiŋŋi n ɛɛ winanaa, wichɔgaa la ɔɔ du de. 22Kɔraawiizi Gbɔg la wia du n biinii, n na nyiŋŋi n hiŋaa. 23Ka n na lugɔ n bɔrahɔŋ manni kurgɔɔrɛ, di ra yoo n ni n biini nfɛrɛ la, di ɔɔ wer lawiŋ, di gil n na sɛɛ n bɔrahɔŋ wichɔgaa la. 24Ee! Wiarɛ huuziŋ bɔnnaa. Anɛɛ n niŋ wer lɛɛŋ n bɔrahɔnnaa n na nyiŋŋi u kpuŋ naa benei? 25Kɔraawiizii niŋ wer lɛɛŋ, dikuu yaa Dɔɔri Yeesu Kristo wia. U dɔɔ jaannɛ werge.

Awia, n na hiŋ Kɔraawiizi Gbɔgrɛ ani n biini maa, ka ra ɛɛ wichɔgaa ani n newee manni.

Currently Selected:

Room 7: vag

Highlight

Copy