Matiu 4
4
Yeesu ɛɛi na wia
(Maak 1:12-13; Luuk 4:1-13)
1Denii Kɔraawiizi Dumnanii kpogli Yeesu di zuu pir. Sitaani ge faa du de ú ɛɛu na, ú vii ɛɛ wichɔgaa.#Hib 2:18 2Yeesu faa du denii di ra vɔɔ nua hɔpizaa tokkoanɛɛ biini. Uŋ vɔɔ u nua di birgi gunla, lɔzi jaa waa kpuu. 3Sitaani jaa hel di ŋɔ, “Di i ɛɛ Kɔraawiizi Biibaal himmaanii, amɔ, í ŋɔ bia naa be á birgi paanuuzi í hee.”
4Ka Yeesu ŋɔ u be, “Ba sɛbɔɔrɛ Kɔraawiizi Hɔŋ biini di ŋɔ, ‘Diwee bɛŋ lɛi ra tɛɛ nɛr miibɔɔ. Ka Kɔraawiizi wiŋɔɔlii bɛl maa gba daŋ wer tɛu miibɔɔ.’ ”#Gbɔg 8:3
5Denii Sitaani kpogluu zuu bolzeŋ Jɛrusalɛm biini, di ga kpau chiŋŋi Kɔraawiizi Dia bɔr la n la chiŋ werge, 6ka ŋɔ u be,
“Di i ɛɛ Kɔraawiizi Biibaal himmaanii,
amɔ, í kutti lii bɔnnaa di chol hɛri, dikuubɛɛwiai,
ba faa sɛbɔɔrɛ Kɔraawiizi Hɔŋ biini, di ŋɔ,
‘Kɔraawiizi daŋ gil u mɛlikazi du i tau.
A daŋ lallii chiŋ
í gilɛɛ wa kpa i naa di ra lɔ bii.’ ”#Yira 91:11
7Yeesu bir ŋɔ u be, “Ba kaa sɛbi yembɛllɛ, di ŋɔ, ‘Gilɛɛ waa ɛɛ wia di ŋɔ í ɛɛ i Dɔɔri Kɔraawiizi la hinna hum la di na.’ ”#Gbɔg 6:16
8Sitaani kaa kpau di ga chiŋŋi bizeŋ nyuu, di gil u binni durnya kossi maa ni a girme, 9ka ŋɔ u be, “Di i sɛɛwɔ lugɔ í togni di sɛɛŋ dɔɔra di jaamiŋ, n daŋ kpa annii naa maa hin nawɛɛ naa di tɛi i dɔɔa.”
10Denii Yeesu ŋɔ u be, “Sitaani, gil miŋwaa! Ba faa sɛbɔɔrɛ Kɔraawiizi Hɔŋ biini, di ŋɔ, ‘A sɛɛ Kɔraawiizi la hinna hum la dɔɔra, di ra jaami u bɛŋ.’ ”#Gbɔg 6:13
11Sitaani jaa giluu. Mɛlikazi ge ba di wa hiinuu.
Yeesu n faari u huma Galilii hɛri wia
(Maak 1:14-15; Luuk 4:14-15)
12A saŋa di ba tɔ Jɔɔn dia. Yeesu n wa nuu guŋ, u izi kaali Galilii hɛri.#Mat 14:3 13Waa kaa du Nazarɛf ka la ga du Kapɛniɔm la n du Zɛbulɔn ni Naftali barii muuzeŋ la nua. 14Kɔraawiizi dɔgtɛɛ Aizaaya faa bagli guŋ wiarɛ, guŋ ge wa ɛɛ. U faa ŋɔwɔɔrɛ,
15“Zɛbulɔn ni Naftali hɛssi
la n du muuzeŋ la nua,
ni banla n soge Jɔɔdan muu ni
Galilii hɛri hina la
n waa Jus hina ɛɛwɛ la, ií ra nuu,#Aiza 9:1-2
16nɛra la n du bɔbiri,
jaa na ninzeŋ bɛllɛ unna chaani filaŋkeŋ.
Siurɛ faa tɔ baa bɔbiri la,
ka bɔchaaŋ daŋ ba wa chaani ba ni.”
17Denii Yeesu jaa izi di ra bagli nɛra Kɔraawiizi wia a saŋa hiŋ, di ra ŋɔ, “Ií gil ii biine chɔgi dikuu ii wichɔgaa wia di gilaa ta, dikuubɛɛwiai, Kɔraawiizi Kora dii saŋa duglɔɔrɛ.”
Yeesu n yir nyinlaura banaazu wia
(Maak 1:16-20; Luuk 5:1-11)
18Denii u ga Galilii muuzeŋ la nua di ra kaali di ga na nyinlaura banɛɛ n na ta asauzi muuzeŋ la biini. Bɛl sɔnnɛ Saimɔn, ba kaa ra yiruu Pitta. Bɛl ge sɔnnɛ Andru, u faa ɛɛ Saimɔn niweere.#Jɔɔn 1:40-42 19Yeesu ŋɔ ba be, “Ií izi di ra hiŋiŋ. Ii faa ra kuuh nyinni kuuhnii. N daŋ jaa gil ii ra kuuh newea kuuhni.” 20Ba gil ba asauzi ka izi manaŋ di ra hiŋuu.
21U kaa ra la see di ga na baal bɛl banna yir Jems ni u niwee Jɔɔn, di ba ni ba mɛɛ Zɛbɛdi sogo muugbera biini di ra lonzi ba asauzi. Yeesu yir ba ge. 22Ba izi manaŋ di gil ba mɛɛ ni ba muugbera la ka ra hiŋuu.
Yeesu n chaa wiila hina wia
(Luuk 6:17-19)
23U vol Galilii hɛri la maa di ra bagli nɛra ba jaamaa diini biini di ra ŋɔ Kɔraawiizi kora amaniyesuma wia ra tɛɛ baa di ra chaa nɛra wiila maa ni a dizi. 24Nɛra faa ra ŋɔ u wiarɛ Siiria hɛri maa. Ba ra paagi ba wiila hina di ra ba u be. Ba wiilazi kpillɔɔ werge. Baŋhina ge ɛɛ tinnanchɔgaa hina ni gbuŋgbunzi hina ni chugla hina ni banla nonee ni ba naazi n siuzɛɛ. U chaa ba maa. 25Nɛkpila maa lii Galilii hɛri, Dɛkapɔlis, Jɛrusalɛm, Juda hɛri ani hɛri la n du Jɔɔdan muu harbɔɔ la di ba u be di waa hiŋuu.
Currently Selected:
Matiu 4: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.