Luglaa 35

Jekɔb n na kissaa Bɛtɛl wia

1Denii Kɔraawiizi faa ŋɔ Jekɔb be, “Izi la Bɛtɛl di ga so de. Di i wa la de, kuari mbusu lizibɔr tɛɛ mìŋ́ Kɔraawiizi la n faa ba i be, saŋa la hiŋ chɔwɛɛ lii i kpɛɛma Ɛsau be la.”#Lug 28:11-17

2Jekɔb ŋɔ u haana ni biizi ni nɛra la maa n du u be la be, “Ií kpa vuga la maa n du ii be la ha, ka sɔ iihinaa di lizi ii doŋa ha ka ɛɛ nɛnanaa Kɔraawiizi be, di kpa ii kunnanaa di laali. 3Yaa daŋ lii ɛŋ di la Bɛtɛl, ń ga ma mbusu lizibɔr tɛɛ Kɔraawiizi la n faa ɔɔ nuu n wiisuŋŋaa, saŋa la miŋ faa ɔɔ du tɔɔrɔɔ biini, u du n be bɔr la maa miŋ ɔɔ ra la la.” 4Denii ba faa kpa ba vuga ni dignikuna maa baŋ dɔɔwɛ la tɛɛ Jekɔb. U faa kpaa hug daazeŋ bɛl zɛɛ n dugli Sɛkɛm.

5Baŋ faa wa lii de la, Kɔraawiizi gil ɔnsii werge lau nɛra la n du bola la maa n bar baa la, ba faa waa sɛɛwɛ bá duŋŋi ba luge. 6Denii Jekɔb ni u nɛra maa vol guŋŋ di ga hel Bɛtɛl, bɔr la baŋ faa ra yir Luuz u du Keenan hɛri la. 7Jekɔb faa jaa ma mbusu lizibɔr de, di dau de sɔŋ Ɛl Bɛtɛl,#35:7 Ɛl Bɛtɛl zɛɛrɛ Bɛtɛl Kɔraawiizi. dikuubɛɛwiai, denii Kɔraawiizi faa ba u be, saŋa la uŋ chɔwɛɛ di ra lii u kpɛɛma Ɛsau be la.

8Too, baŋ du de la, Dɛbɔra la n dɛɛzi Ribɛka la siu. Denii ba kpau hug daazeŋ bɛl zɛɛ n du Bɛtɛl wiifurii nodig wiikakag. Awia, ba faa dau a daa sɔŋ Alɔn Bakuf.#35:8 Alɔn Bakuf zɛɛrɛ Wiraa daazeŋ.

9Jekɔb n faa lii Mɛsɔpɔtemia di la Bɛtɛl la, Kɔraawiizi faa kaa ba u be di wa kissuu, di ŋɔ, 10“Filaŋkeŋ, i sɔŋ lɛi kaa Jekɔb. Ba daŋ jaa ra yirii Izrɛl.” Awia, Kɔraawiizi jaa dau u sɔŋ Izrɛl.#Lug 32:28 11Denii Kɔraawiizi kaa ŋɔ u be, “Minuu Kɔraawiizi Fɔŋŋa Maa Hiŋ la. Lul biikpila. Hɛrkpila hina daŋ lii i be, í ɛɛ koora naabaal. 12N daŋ kpa hɛri la miŋ faa kpawɛɛ tɛɛ Abraham ni Aizik la di tɛi. N daŋ kpau di tɛɛ i naanna gba.” 13Kɔraawiizi n wa ŋɔ guŋ tuŋ, u lii u be kaali. 14Jekɔb faa kpa bii baŋ, ú ra liizi bɔr la Kɔraawiizi n ŋɔ wia tɛu la. Di yiili siŋ ni nuu di waari u ni, 15di ra yir de Bɛtɛl.

Rachɛl ni Aizik siu wia

16Denii ba faa kaa izi Bɛtɛl di ra la Ɛfraf. Ka baŋ ga hel galga, Rachɛl lulaa hiwiila lɔu, u ra nyiŋŋi u lul, a nuuu werge. 17Unna di a dɔgnya gunla, u hahpaari ŋɔ u be, “Gilɛɛ ra ɔm, biibaallɛ i kaa ra lul.” 18Denii u ra siu, ka dau u bie hiŋ sɔŋ Bɛn Oni,#35:18 Bɛn Oni zɛɛrɛ Dɔgnya hiŋ bie. ka u heeza jaa tuŋ. A bie mɛɛ ge faa dau u sɔŋ Bɛnjamin.#35:18 Bɛnjamin zɛɛrɛ Bie la nyuu n summɛ.

19Ɛfraf ŋmɛnɛɛrɛ Rachɛl faa siu, ba huguu de. Denii ba jaa ra yir Bɛtlihɛm filaŋkeŋ la. 20Jekɔb faa kpa bii di baŋ u ŋmam hiŋ. U haa baŋ de haali ni zinaa.

21Jekɔb faa kaa lii de di vol guŋŋ di ga so Ɛda diijaŋ la har.

22Saŋa la un du de la, Rubin lau u hahjiga Bilha di chɔɔ. U nuu guŋ.

Jekɔb faa dɔɔ biibaala fidibanɛɛrɛ.

23Lia biibaalaa faa Rubin, n ɛɛ Jekɔb biibambilugli,

Simɛɔn, Levi, Juda, Isaka ani Zɛbulɔn.

24Rachɛl ge biibaalaa faa,

Joosɛf ani Bɛnjamin.

25Bilha la n faa ɛɛ Rachɛl balii la ge biibaalaa

faa Dan ani Naftali.

26Lia ge balii Zilpa ge biibaala faa

Gad ani Asɛ.

A biibaala naabuu Jekɔb faa lul Mɛsɔpɔtemia hɛri.

Aizik siu wia

27Jekɔb la u mɛɛ Aizik be u bol Mamrɛ. Denii dugli Kiriaf Aaba la banna yir bolzeŋ Hɛbrɔn la. Abraham gba faa sogo denii. 28Aizik faa di binni kalfa ni tokkoanaazuu, 29di faa jaa zɛŋ werge maa ka haa siu, di ga chɔɔ u naabaala be. U biibaala Ɛsau ni Jekɔb faa huguu.

Currently Selected:

Luglaa 35: vag

Highlight

Copy

Compare