Wiɛɛlaa 6
6
Nɛra baniidaanɛɛ lizaa wia
1A saŋa hiŋ Yeesu hiŋra ra wazi. Denii Jus hina la n ɔɔ ra mɔɔ Giris hina mɔɔri la nuumi di ra du banla n ɔɔ ra mɔɔ Hibru mɔɔri la ni, di ŋɔ dí baŋ ɔɔ ra bɔnni diwee hɔpizibii maa la, ba waa ɔɔ ra tɛɛ baawaa haŋkia la werge. 2Yeesu huŋhunna la yir Yeesu hiŋra la maa, ba wa chaali. Ba ŋɔ ba be, “Yaabalaa, a waa dɛkkɛ yaa n niŋ gil Kɔraawiizi wia ŋɔi ka ra hum diwee huma. 3Awia, ií lizi baala baniidaanɛɛ ii biini, bá ra hum huma naa. Ií nyiŋŋi banla n ɛɛ nɛnanaa nɛra be, di dɔɔ Kɔraawiizi Dumnanii ni nunzuma nɛnnɛ, ya kpa huma naa tɛɛ baa bá ra hum. 4Di ba ra hum a huma, yaa ge daŋ wer lau yaa huma nɛnnɛ di suŋŋi wiizi di ŋɔ u wia di ra tɛɛ nɛra nɛnnɛ.”
5Ba wiŋɔzi la par nɛkpila la maa. Ba lizi baal bɛl n yardi Kɔraawiizi di kaa dɔɔ u Dumnanii nɛnnɛ u bampirii. U sɔnnɛ faa Stiivin, di kaa lizi Filip#Wiɛɛ 8:5-16, 26-40 ni Prɔkɔrus, ni Nikanɔ, ni Timɔn, ni Pamɛnas ni Nikɔlas. A Nikɔlas faa ɛɛ Antiɔk hinuu bɛl n na jaami Jus hina jaamaarɛ. 6Banniibuu ba lizi bá ra hum a huma di gil ba lii chi Yeesu huŋhunna la see. Yeesu huŋhunna la kpa ba nonee sagzi ba ni di suŋŋi wiizi tɛɛ baa.
7Denii Kɔraawiizi wia la jaa wer na bɔr di ra yaari bɔr maa. Yeesu hiŋra ra wazi werge Jɛrusalɛm biini. Kɔraawiizi kizeehina kpilakpila maa ge gba sɛɛ Yeesu wia di ra hiŋ u ŋmɛnɛɛ.
Stiivin lawaa wia
8Kɔraawiizi hiini Stiivin werge ni winanaa ɛɛi di tɛu fɔŋŋa werge u wer ra ɛɛ wizenaa ni wisɛɛlaa nɛra be. 9Denii nɛra baŋhina n lii Sairini ni Alɛgzandria di ɔɔ ra la jaamaa dia la banna yir Libatinɛs, ba ni baŋhina n lii Silisia hɛri ni Eesia hɛri izi di ra di Stiivin mmɔri. 10Ka Kɔraawiizi Dumnanii tɛɛ Stiivin nunzuma werge ba waa wette ba kpa wiimaa chuguu.
11Awia, ba suahzi nyiŋŋi nɛra baŋhina bá kanni kara di chug Stiivin. Ba waa du a nɛra dɔm di ra ŋɔ, “Yaa nuuwɔɔ baal naa n gbɛlli Moosis ni Kɔraawiizii.”
12Nɛkpila ni bol nabɔnzi ni Kɔraawiizi Hɔnzunna ba di wa lau Stiivin di kpau la sitɔɔra la be, 13di ge kaa nyiŋŋi daansɛɛ hina di gil ba lii kanni kara di ŋɔ, “Baal naa ɔɔ ra gbɛlli Kɔraawiizi Dia ni Moosis Gbɔgrɛ. 14U ŋɔ lugɔ Yeesu Nazarɛf daŋ wa purgi dia naa ka birgi naana wia la maa Moosis n faa dauri yaa la.”
15Nɛra la n na ŋɔ guŋ, a sitɔɔra la maa ra binni Stiivin werge. U siwee bir lii mɛlika siwee.
Currently Selected:
Wiɛɛlaa 6: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
