1 Kɔrint 4
4
Yeesu Kristo huŋhunna wia
1A dɛkkɔ iinna kpa yaa lugɔ Kristo balaa. Kɔraawiizi bagli yaabuu u wisuahlaa, di ŋɔ ya kpaa ra bagli nɛra. Awia, u balaarɛ yaa. 2Too. A dɛkkɔɔ balii n na hum u dɔɔri nɛnnɛ, ú dɔɔri ŋɔ lugɔ u wia dɔɔ wibiire. 3Miŋwaa be, di ii ra ŋɔ n huma naa wia, ka a wan titte. Newea lɛi niŋ di n huma naa seriya. N gba himmaa lɛi niŋ di n seriya. 4N biini wanna tɛɛ wiimaa. Ka a gba ɛɛ pɛɛrɛ. Aa lɛi niŋ gil ń wer lii. Kristoo niŋ di n seriya. 5Awia, ii gilɛɛ feli ra di wiimaa seriya. Ií gil Kristo ba mɔɔ. Di u wa ballɔ, u daŋ lii bɔbiri wia la maa baŋ suahwɛ ɛɛ la ni baŋgia, di bagli newea biini wikpoglaa maa. Denii Kɔ́raawiizi jaa chɔli nɛr la maa un niŋ chɔli.
6Yaabalaa, n kpa gunla iinna ŋɔ n ni Apɔlɔs wiarɛ, di ŋɔ ń chi de di bagli ia wii naa, ií wer zum u zɛɛ nɛnnɛ. “A wii ɛɛwɔɔ lugɔ a waa dɛkkɛ iinna tɔgzi nɛr maa di kaali gunla Kɔraawiizi Hɔŋ n baglɛɛ la.” Awia, ii gilɛɛ ra lizi nabɔnzi di kpa baa ra mɛgzi dɔŋa, di ra nyiŋŋi zenni dɔŋa ni. 7Anɛɛ n gillɛ i kur i dɔŋhiŋ ninɛi? Kɔraawiizi be lɛi i na kunla maa hiŋ dɔɔwɛɛ? Waabuu tɛɛ ia wii la maa iin dɔɔwɛ. Too. Di Kɔraawiizi benii i naa, amɔ, bɛɛ wiarɛ i kaa ra chɔli i hiŋ alugɔ i himmaa fɔŋŋa biinii i naawɛi?
8Ii teŋ nawɔɔrɛ di hel ii kipar, di ɛɛ dɔɔna di feli ra di kossi ka ka yaa. Di ii vii ra di a kossi, u guŋ vii bɔ. Yaa ni ia maanii niŋ vii nuu suma ii kora dii hiŋ biini. U guŋ daŋ vii du wer, 9dikuubɛɛwiai, miŋwaa be, a ɛɛwɔɔ lugɔ Kɔraawiizi gillɔɔ yaa banla n ɛɛ u huŋhunna la tɔ har, di ɛɛ lugɔ banla baŋ di ba kpui seriya, di kpa baa la bá ga kpu la. Durnya ni mɛlikazi maa ra binni yaabuu. 10Yaa ɛɛ gɛnaarɛ nɛra be dikuu Kristo wia, ka iabuu ɛɛ nunzunna u hiŋaa biini. Yaa ɛɛ gɛrgaa nɛra be, ka ii ɛɛ u kpeglega. Ba ra gbɛlli yaabuu ka ra chɔli ia, di ra maŋkuri ia. 11Yaawaa ɔɔ ra chɔɔ lɔzii. Niinyɔgzi ge ɔɔ ra kpu yaabuu haali ni zinaa. Yaa ɔɔ laali kuŋkɔssii. Nɛra ɔɔ ra lɔɔzi yaa. Yaa waa ɔɔ kaa dɔɔ diiduulii. 12Yaa ɔɔ ra di yaa himmaa kuuhni biinii. Nɛra ɔɔ ra chagzi yaa, ka yaa suŋŋi wiizi ra tɛɛ baa. Ba ra tɔɔri yaa, ka yaa ɔɔ gil la tɛɛ baa.#1Pit 3:9 13Ba ra gbɛlli yaa sɔŋ, ka yaa ŋɔ winanaa ra tɛɛ baa. Yaa ɛɛwɔɔ lugɔ kpaga ani doŋa durnya be, haali ni zinaa.
14N biinɔŋŋaa, maa wia naa sɛbɛɛ tɛɛ ia ń du ia hiihzi. Ka n ŋɔ ń karfi iabuu nɛnnɛ. 15Di ii dɔɔ nɛkpila maa ban niŋ bagli ia Kristo wia, ka nɛkpaŋ bɛnnɛ ii mɛɛ. Minuu felee lizi amaniyesuma la tɛɛ ia, ii sɛɛ, di lul ia Yeesu Kristo fɔŋŋa biini. 16Awia, n na suŋŋi iabuu, ií ra hiŋ kennaa minna hiŋ naa.#1Kɔr 11:1 17Awiarɛ n hum Timoti ii be, ú wa bagli ia guŋ hiŋaa. U ɛɛ n biinɔŋŋiirɛ. U wia dɔɔ wibiire Kɔraawiizi hiŋaa naa biini. Waabuu niŋ ɔɔ liizi ia gunla miŋ ɔɔ ra hiŋ di ra hum Yeesu Kristo la. A hiŋaarɛ n ɔɔ ra bagli Yeesu hiŋra yemmaa, bá ra hiŋ la.
18Ii baŋhina dɔɔ barabaraa werge, di ra ŋɔ dí màá ba ii be. 19Ka n daŋ ba. Di Kɔraawiizi sɛɛwɔ, n daŋ ba filaŋkeŋ di wa zum barabara hina la. Bɛɛ wiŋɔzɛi? Di ba dɔɔ fɔŋŋa gɛɛ ba waa fɔŋŋa dɔɔwɛ, gunnɛ n na nyiŋŋi ń zum. 20Kɔraawiizi Kora wia waa wiŋɔzi ɛɛwɛ. Fɔŋŋa wiarɛ. 21Too. Ií bagliŋ gunla min niŋ ba ii be. Virmaa ii ŋɔ ń kpa ba di wa viiri ia gɛɛ nɔŋŋaa ni sisɔna mannii ii ra nyiŋŋi ń kpa ba ii benei?
Currently Selected:
1 Kɔrint 4: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
