Чөлде Гириш
Гириш
Чөлде китабында ысрайыл халкының мүсүр гулчулыгындан соңкы тарыхы беян эдилйәр. Ысрайыл халкы Синай дагындан вада берлен Кенган юрдуна етйәнчә, кырк йыллап чөлде гезмели боляр. Шонуң үчин-де, бу китап Чөлде дийип атландырылып, шол кырк йылың довамында болуп гечен вакалары беян эдйәр.
Китап үч бөлүмден ыбаратдыр. Биринҗи бөлүмде (1:1–9:23) Худай Муса пыгамбере ысрайыл халкыны санамагы буюряр. Соңра Ол Муса ысрайыл халкына дүшелге гуруп, левилери хызмата беллемек үчин гөркезмелер берйәр. Бу бөлүм хеммелериң Песах байрамчылыгыны белләп, Реббе гурбанлыклар хөдүрлемеги билен тамамланяр.
Икинҗи бөлүмде (10:1–21:35) ысрайылларың Иордан дерясының гүндогарында яшаян миллете тарап, ягны Моваба баряркалар, ёлда болуп гечен вакалар беян эдилйәр. Чөлүң ичинден гечилен бу ёл гаты агырды. Халк йыгы-йыгыдан арз-шикаят эдип, Мусаның ве Худайың гаршысына баш гөтерйәр. Ысрайыллар Кенганда яшаян миллетлер барада эшидип, юрда гирмекден боюн товлаярлар. Шонуң үчин-де, Реб олары җезаландырып, кырк йыллап чөлде яшадяр. Бу бөлүм халкың Мовапдакы Писга дагының голайында дүшлемеги билен тамамланяр.
Үчүнҗи бөлүм (22:1–36:13) ысрайылларың юрдуң диңе Иордан дерясының гүндогар тарапыны – гүнортада Мовап арачәгинден демиргазыкда Җелиле көлүне ченли аралыгы басып алмагы билен башланяр. Мовап патышасы ысрайыл халкына нәлет окатмак үчин, кесеки Билгам пыгамбери хакына тутяр. Эмма ол пыгамбер халка нәлет окаман, Реббиң буйругына гөрә оны ялкаяр.
Ысрайыллар Иордан дерясындан гечип, Кенган юрдуны басып алмага тайярлык гөрйәрлер. Йөне халкың бир бөлеги Иордан дерясының гүндогарында галмагы макул билйәр. Шейдип, Ысрайыллар икинҗи гезек хасаба алыняр. Реб Ешуваны Ысрайыла баштутан беллейәр ве оңа тирелериң арасында юрды пайламага көмек эдер ялы, башга баштутанлары-да сайлаяр. Китап Реббиң ысрайыллара гошмача канунлары бермеги билен тамамланяр.
Чөлде китабы гозгалаңчы, рухдан дүшен ве Реббиң өз аладасыны этҗегине ынанмакдан боюн гачыран халк хакындадыр. Китапда Реббиң урушда халкы горап, ёвуз чөлде олары азык, сув билен үпҗүн эдиши гөркезилйәр. Реб Өзүниң ысрайыллары ёк этмек ислемейәндигини энчеме гезек айдяр. Реб, эдил Харуның дилег эдиши ялы, олары ялкамак ислейәр:
«Гой, Реб сизи ялкап, Өз пенасында сакласын! Реб гүлер йүзи билен баксын, сизе мерхемет этсин! Реб сизе назарыны салып, саламатлык берсин!»
6:24-26.
Мазмуны
Синай дагында: ёла дүшмәге тайярлык 1:1–9:23
Чөлде: башбозарлар, өлүм ве еңиш 10:1–21:35
Мовап дүзлүгинде: юрда гирмәге тайярлык 22:1–36:13
Currently Selected:
Чөлде Гириш: TukCyr16
Highlight
Copy
Compare
Share
Want to have your highlights saved across all your devices? Sign up or sign in
© Мукаддес Китап Терҗиме Институты, 2016