Мүсүрден чыкыш 38

38‑нҗи бап

Якма гурбанлык сыпасы

1Бесалел акация агаҗындан якма гурбанлык сыпасыны ясады. Онуң узынлыгы-да, ини-де бәш тирсек болуп, ол дөртбурчды ве онуң бейиклиги хем үч тирсек болды. 2Гурбанлык сыпасының дөрт бурчы-да ёкары чыкып дуранды. Бесалел олары гурбанлык сыпасы билен бир битеви эдип, оны тутушлыгына бүрүнҗе гаплады. 3Ол гурбанлык сыпасының әхли энҗамларыны: күл гаплары, күл атарлары, легенлери, чаршаклары ве маңңаллары ясады. Оларың хеммесини бүрүнчден ясады. 4Гурбанлык сыпасы үчин бүрүнчден торлы гөзенек ясады. Оны гурбанлык сыпасының ашакы гуршавында ерлешдирди. 5Торлы гөзенегиң дөрт бурчуның херсине сырыклары саклар ялы халка ясады. 6Ол сырыклары акация агаҗындан ясап, олары бүрүнҗе гаплады. 7Гурбанлык сыпасыны ики тарапындан гөтерип әкидер ялы, сырыклары халкалардан гечирди. Онуң дашыны тагталардан ясап, гутусының ичини бош гойды.

8Реббе йүз тутулян чадырың гирелгесинде хызмат эдйән аялларың йүз гөрүлйән айнасындан Бесалел бүрүнчден леген ясады ве онуң дурян аягыны хем бүрүнчден этди.

Мукаддес чадырың хаяды

9Бесалел мукаддес чадырың хаядыны гурды. Хаядың гүнорта тарапында йүз тирсек узынлыкда непис зыгыр матадан перделер асды. 10Перделер үчин йигрими саны сүтүн ве олары саклаян йигрими дабаны бүрүнчден ясады, сүтүнлериниң илдиргичлерини ве җәхеклерини күмүшден этди. 11Демиргазык тарапы үчин хем шейле этди. Онуң боюна йүз тирсек узынлыкда перделер тутды. Перделер үчин бүрүнчден йигрими саны сүтүн ве йигрими саны дабан ясады, эмма онуң илдиргичлерини ве җәхеклерини күмүшден ясады. 12Хаядың гүнбатар тарапы үчин элли тирсек узынлыкда перделер тутды ве перделер үчин он саны сүтүн ве он саны дабан ясады. Сүтүнлериң илдиргичлери ве җәхеклери күмүшден эдиленди. 13Хаядың өң тарапы болан гүндогар тарапының гиңлиги элли тирсек болды. 14Онуң бир тарапына узынлыгы он бәш тирсек болан перделер тутды. Оларың хем үч сүтүни ве үч дабаны барды. 15Бейлеки тарапына хем он бәш тирсек узынлыкда перделер тутды, онуң-да үч сүтүни ве үч дабаны барды. 16Хаядың даш-төверегиндәки әхли перделер непис зыгыр матадан эдиленди. 17Сүтүнлер үчин дабанлар бүрүнчден эдиленди, эмма онуң илдиргичлери ве җәхеклери күмүшденди, онуң ёкарсының өртүклери хем күмүшденди. Хаядың әхли сүтүнлери күмүш билен җәхеклененди. 18Хаядың гирелгеси үчин гөк, бадам, гырмызы йүплүкден ве непис зыгыр матадан кешде билен нагышланан япынҗа тикдилер. Онуң узынлыгы йигрими тирсек, бейиклиги бәш тирсек болуп, ини хем эдил хаядың тутулары ялыды. 19Япынҗаның бүрүнчден дөрт саны сүтүни билен дөрт саны дабаны барды. Онуң илдиргичлери, ёкарсының өртүклери ве халкалары күмүшденди. 20Мукаддес чадырың ве онуң хаядының әхли газыклары бүрүнчденди.

Мукаддес чадыр

21Ине, мукаддес чадырың, ягны мукаддес әхт чадырының гурлушының беяны: Бу Мусаның буйругы эсасында ишленип, руханы Харуның оглы Ытамарың гөркезмеси боюнча левилериң ерине етирен ишиди. 22Реббиң Муса буйран әхли затларыны яхуда тиресинден Хуруң оглы, Урының агтыгы Бесалел ясады. 23Онуң янында дан тиресинден Ахысамагың оглы Охолыяп хем барды. Ол зергәр ве уссады, гөк, бадам, гырмызы йүплүкден эдилен мата ве непис зыгыр мата кешде чекйәнчиди.

24Мукаддес өйүң әхли гурлушык ишине уланмак үчин, садака эдип гетирилен алтының җеми кырк докуз батман ве ярым пут#38:24 Кырк докуз батман ве ярым пут – еврейче йигрими докуз киккар ве еди йүз отуз шекел. Бу такм. 1 тонна деңдир. болды. Ол мукаддес өйүң ресми өлчеги билен өлчелди. 25Илат санавында хасаба алнан халкдан йыгналан күмшүң мөчбери йүз етмиш батман ве ярым чувал#38:25 Йүз етмиш батман ве ярым чувал – еврейче йүз киккар ве бир мүң еди йүз етмиш бәш шекел. Бу такм. 3420 кг деңдир. болды. Ол хем мукаддес өйүң ресми өлчеги билен өлчелди. 26Бу хасаба алнан, яшы йигрими ве ондан ёкары болан хер адам башына мукаддес өйүң ресми өлчеги билен бир мысгалдан#38:26 Бир мысгал – еврейче бир бека, ягны ярым шекел. Бир бека такм. 6 гр деңдир. дүшйәрди. Ол ерде җеми алты йүз үч мүң бәш йүз элли эркек адам барды. 27Мукаддес өйүң сүтүни үчин ве тутының сүтүни үчин йүз етмиш батман#38:27 Йүз етмиш батман – еврейче йүз киккар. Бу такм. 3400 кг деңдир. күмүш уланылды. Йүз сүтүн үчин йүз етмиш батман күмүш, бир сүтүн үчин бир битин ондан еди батман#38:27 Бир битин ондан еди батман – еврейче бир киккар. Бу такм. 34 кг деңдир. күмүш уланылды. 28Бесалел сүтүнлериң илдиргичлери үчин, онуң ёкаркы өртүклери ве җәхеклери үчин ярым чувал#38:28 Ярым чувал – еврейче бир мүң еди йүз етмиш бәш шекел. Бу такм. 20 кг деңдир. күмүш уланды. 29Садака үчин гетирилен бүрүнҗиң мөчбери җеми йүз йигрими батман#38:29 Йүз йигрими батман – еврейче етмиш киккар билен ики мүң дөрт йүз шекел. Бу такм. 2,4 тонна деңдир. болды. 30Мундан ол Реббе йүз тутулян чадырың гирелгеси үчин дабанлар ясады, бүрүнч гурбанлык сыпасыны ве онуң үчин бүрүнчден гөзенек, гурбанлык сыпасының әхли энҗамларыны, 31шейле хем, хаядың әхли сүтүнлерини, онуң дервезесиниң сүтүнлерини, мукаддес чадырың ве хаядың әхли газыкларыны ясады.

Currently Selected:

Мүсүрден чыкыш 38: TukCyr16

Highlight

Copy

Compare