Мүсүрден чыкыш 17

17‑нҗи бап

Гаядан чыкан сув

1Әхли ысрайыл халкы Син чөлүнден гөчүп гайтды. Реббиң буйругы боюнча олар ондан-оңа гөчүп-гонуп, ахыры Репидимде дүшледилер, эмма ол ерде адамлар үчин ичмәге сув ёкды. 2Олар Муса билен давалашып, ондан ичер ялы сув талап этдилер. Муса олара: «Нәме үчин сиз мениң билен давалашярсыңыз? Нәме үчин сиз Ребби сынаярсыңыз?» дийди. 3Эмма халк гаты сувсапды. Олар Муса игенип, оңа шейле дийдилер: «Нәме үчин сен бизи Мүсүрден алып гайтдың? Бизи, чагаларымызы ве мал-гараларымызы сувсузлыкдан өлдүрмек үчин гетирдиңми?» 4Шейлеликде, Муса Реббе дады-перят эдип: «Мен бу халкы нәме эдейин? Олар мени дашлап өлдүрмәге тайяр ахырын» дийди. 5Реб Муса: «Ысрайыллардан бирнәче яшулыны яныңа алып, халкың өңүнден йөре. Нил дерясына уран хасаңы хем элиңе алып гит. 6Мен Хорепдәки#17:6 Хореп – бу Синай дагының бейлеки ады. гаяда сениң өңүңде дурарын. Гаяны ур, ондан сув чыкар. Шейдип, адамлар сув ичип билерлер» дийди. Муса ысрайыл яшулуларының арасында шейле этди. 7Ысрайыллар: «Реб бизиң арамыздамы я-да ёк?» дийип давалашып, Ребби сынадылар. Шол себәпли Муса ол ери Маса#17:7 Маса – бу сөз сынаг диймеги аңладяр. ве Мериба#17:7 Мериба – бу сөз дава диймеги аңладяр. дийип атландырды.

Ысрайыл халкы амалеклери еңйәр

8Соңра амалеклер гелип, Репидимде ысрайыллар билен сөвешди. 9Муса Ешува: «Бизиң үчин адамлар сайла ве гит-де амалеклер билен уруш. Эртир мен элиме Худайың хасасыны алып, депәниң үстүнде дурарын» дийди. 10Ешува Мусаның айдышы ялы, амалеклер билен сөвешди. Муса, Харун ве Хур болса депәниң үстүне чыкдылар. 11Муса элини гөтерип дуранда, ысрайыллар еңйәрди, элини ашак гойберенде болса, амалеклер еңйәрди. 12Мусаның эллериниң ысгыны гачды. Шонда олар оны отурдар ялы даш гетирип гоюп, Мусаны онуң үстүнде отуртдылар. Харун билен Хур онуң эллерини ёкары галдырып, херси бир яндан тутуп дурды. Олар тә Гүн яшянча, онуң эллерини гөтерип дурдулар. 13Ешува амалеклери ве оларың гошуныны гылычдан гечирип, гыран-җыран этди.

14Реб Муса: «Бу еңши ятдан чыкармазлары ялы китаба яз ве Ешува хем эшитдирип айт, Мен амалеклериң тохум-тиҗини ер йүзүнден сүпүрип ташлаҗакдырын» дийди. 15Муса гурбанлык сыпасыны ясады ве оңа: «Реб мениң тугумдыр!» дийип ат берди. 16Ол: «Элим Реббиң тугунда! Реб амалеклериң гаршысына несиллер бойы сөвешер» дийди.

Currently Selected:

Мүсүрден чыкыш 17: TukCyr16

Highlight

Copy

Compare