Juan 1
1
Si Jesu-Cristo, nga pagpangaranan it Ampang, Ampuꞌang Diyus talaga kanya
1Parabir nagdataꞌ i banwa baw langit, may si Jesus na, nga pagpangaranat Ampang it Ampuꞌang Diyus. Paꞌaaten ngaytung Ampang, duꞌun kanyang lagi it adapan it Ampuꞌang Diyus. Ega lamang kat adapan it Ampuꞌang Diyus in daꞌga, Ampang ngaytung si Jesus, kanya naga i Ampuꞌang Diyus ngaytu. 2Talagang kaꞌiba-iba kanya nang lagi it Ampuꞌang Diyus garing paꞌ it tagnaꞌ. 3Kat keseg it guna ya, nagdataꞌ i muꞌsa nga mga bagay. Kamatuudan, egay maski unu nga giyuna nga ega kanya ngaytuy gimnuna. 4Kanya ngaytung pagpangaranan it Ampang, kanyang kaꞌgenan, ega basta-basta, nga yanay puꞌun it kaꞌgenan it muꞌsang taw. Baw kanya ngaytu i piyakatidaw isaꞌun maꞌyagan i mga taw. 5Magꞌeyag kanya nga bilang tidaw kat kadleman, temed sira nga kat kadleman, ega ireg nirang eyagan it tidaw ngaytu.#1:5 Mapisiꞌ gasiꞌ kat Ginirego i atkaytu. “Magꞌeyag kanya kat kadleman nga bilang tidaw, baw egaytu napareng it kadleman ngaytu.”
6May piyapagtaw it Ampuꞌang Diyus nga piyangaranan it ki Juan.#1:6 Si Juan nga uꞌna-uꞌnang namawtis i paꞌaaten ngaytu, ega si Juan ngayting simnurat it kasuratan ngaytu. 7Piyapagtaw kanya isaꞌun makapamatuud ya i pasar it tidaw ngaytu, isaꞌun maꞌyagan baw pamayaꞌnen it muꞌsang katataawan i tidaw ngaytu nga paꞌaaten. 8Egaytu maat kanya i tidaw. Piyapagtaw kanya ka ipagpamatuud yay tidaw ngaytu. 9Iyan tidaw ngaytu nga talaga, nga magꞌeyag kat muꞌsa nga mga taw, magꞌaꞌabut na situt sinirungat langit.
10Ta miyabut kanya nga matuud, baw timnaꞌid kanya situt denaꞌ. Temed ta, lamang kanya ngaytuy gimnuna it taw, temed ega kinilala nira kanya. 11Naꞌasitu kanyat bangsa nga piniliꞌ ya, temed maski sira, mga taw ngaytung piniliꞌ ya nga sadili ya, daꞌsira timnanggap it kanya. 12Temed may mga taw nagang namayaꞌ baw simnarig it kanya. Sira ngaytu, binggayan ya sirat pudir nga makapabetang sira nga mga anak it Ampuꞌang Diyus. 13Ega maat naꞌanak sirat Ampuꞌang Diyus sabap it ipiyanganak ya sira nga subung it panganak it taw u sabap it adat u kaꞌirgan it nagꞌasawa, in daꞌga naꞌanak sira kat kaꞌirgan it Ampuꞌang Diyus.
14Si Jesus ngaytung pagpangaranat Ampang, nagbalyung taw bawnga nanaꞌidan situt banwa nga kaꞌibaan tami. Nagpasar tu kat mata namen i kabantugan ya, nga kabantugan ya ngaytu, kabantugan it paeꞌesa-esang Anak it Diyus Amaꞌ. Natantuwan namen gasiꞌ i kadakulat ildaw ya baw kamatuudan talaga i muꞌsang ipiyaliꞌwan ya.
15Ipagpamatuud kanya ni Juan ngaytu nga ipagpanggagaꞌuy ya na, nga magꞌaat, “Kanya na ngaytu i pagsugiden ku ngayan, nga maat ku ngayan basaꞌan, iyan mabut nga magsusunud it aken, landaw paꞌ it aken, sabap parabir ipiyanganak aku, may kanya nang lagi.”
16Kat kadakulaꞌ it raras yat aten, magꞌaꞌabut-aꞌabut situt aten i ildaw ya. 17Sabap ibinggay it Ampuꞌang Diyus i mga urdin ya duꞌut ki Moises nga ipiyagꞌurdin yat aten, temed iyan ildaw ya baw kamatuudan pasar it sadili ya, ipiyatantu yat aten duꞌun it ki Jesu-Cristo. 18Talagang garing paꞌ it tagnaꞌ, egay maski siyu nga nakalteg it Diyus Amaꞌ. Temed kayti subuk naltegan ta na kanya, ka ipiyaꞌyag nat aten it paeꞌesa-esa ngaytu nga pagmaꞌa-maꞌalen yang Anak i pasar it Diyus Amaꞌ ngaytu.
Ipagpamatuud ni Juan nga uꞌna-uꞌnang namawtis i pasar it ki Jesu-Cristo
[Mateo 3:1-12; Marcos 1:1-8; Lucas 3:1-18]
19Kaꞌsa may piyapanaw it mga pagbayaꞌen it mga Judio nga taga Jerusalem. Piyapanaw nira, mga sasirduti baw mga Levita nga katabang nira nga manigbuwat duꞌun it Templo, ka ipagpaꞌingkut nira si Juan in unu kanya.
Ituy pamatuud ni Juan nga tubag yat kanira. 20Talagang ega maat nangambuꞌ kanya in daꞌga isiyugid ya i kamatuudan, nga magꞌaat, “Ega aku i Cristo ngayting Manriribring Adiꞌ nga isiyanggup.”
21“Ta in atkayan,” maat nira, “siyu ka ga? Unu, ega Prupitaꞌ ka nga si Elias?”#1:21 May piyaprupitaꞌ it tagnaꞌ paꞌ nga miyaat, tigauꞌna it isiyanggup ngayting Cristo nga magꞌadiꞌ, keseg baw mga adat ya, subung it ki Elias, nga esat mga prupitaꞌ it tagnaꞌ. Temed tanud it mga Judio, tigauꞌna ngayti, si Elias na nga egnen it paꞌuliꞌ.
“Bilaꞌ ega,” maat ni Juan ngayti.
“Tay unu, ega Prupitaꞌ ka ngayan nga paꞌaaten?”#1:21 Deuteronomio 18:15-18. Prupitaꞌ ngaytu, egay beken in daꞌga si Jesu-Cristo i pagpapuntuꞌan.
“Bilaꞌ ega. Daꞌkuy aken mangambuꞌ.”
22“Ega itaguꞌ mu. Kaꞌilangan nga isugid mut amen in unu ka nga matuud, isaꞌun may masugid namen duꞌut namagtaꞌeg ngaytit amen.”
23Pagtubag siꞌ ni Juan ngayti, may siyangpit ya nga isiyugid it esang prupitaꞌ it tagnaꞌ nga si Isaias, nga magꞌaat,
“Aku ngaytu, kaꞌalimbawaan ku, esang gaꞌmaran nga magkagnegan duꞌun it rugar nga kapupuyangtan, nga magꞌaat i pagꞌaaten, ‘Gayen-gayenen mi i dalan nga panawan it Ampuꞌan.’”#1:23 Isaias 40:3.
24Iyan mga mamagꞌingkut ngayti, nga mga Pariseo nga tiyaꞌeg it mga kaꞌibaan nira, 25iningkut nira siꞌ si Juan ngayti, “Ta unuka magpamawtis ka it ega naga palan Cristo ka, nga Manriribring Adiꞌ ngayang isiyanggup it Ampuꞌang Diyus, daꞌka naga gasiꞌ si Elias baw daꞌka naga Prupitaꞌ ngayan nga paꞌaaten?”
26Tumubag siꞌ si Juan, maat ya, “Aken, ipagbawtis ku, danum, temed kat piyagtenga-tengaꞌan mi may esa nga ega mi kilala. 27Kanya i magsusunud it aken. Yay matuud, maski muꞌbad it seget it talumpaꞌ ya, ega mapakay nga mabwat ku ka subraꞌ kanya nga mabantug.”
28Piyangingkutan it mga taw ngayti it ki Juan, duꞌun it Betania nga duꞌut sang dipag it Jordan nga pagpamawtisan ya na ngayting danum.
Si Jesus, kaꞌalimbawaan ya, uꞌuybun it tupa nga ipagsalisi
29Pagꞌeyag it aldaw, nalawag ni Juan si Jesus nga magꞌelep duꞌun it kanya. Pagkalteg ya, maat ya, “Wayan na, kanya nga ibinggay it Ampuꞌang Diyus, nga subuk uꞌuybun it tupa nga ipagsalisi, sabap kanya na ngayan i mangawaꞌ it kasalaꞌan it mga katataawan. 30Kanya na i paꞌaaten ku ngayan nga maat ku basaꞌan, magsusunud it aken, esang taw nga landaw it aken sabap parabir ipiyanganak aku may kanya nang lagi. 31Tagnaꞌ maski aku ngaytu, ega naꞌrutan ku in siyuy mabut ngayan, temed pagbuwaten ku ngaytu kayti, nga magpamawtis situt danum, ipagpakilala kuytu kanya it bangsa nga Israel.”
32Bawnga nagpamatuud si Juan ngayting magꞌaat, “Naltegan kuy Espiritu Santo. Magpapasalu kanya garing duꞌut langit, nga subung it kalapatiꞌ i pamabilug, baw nagpasarum na duꞌun it ki Jesus ngayti. 33Ega naꞌrutan ku nga kanya na. Temed Ampuꞌang Diyus nga timnaꞌeg it aken nga magbawtis it danum, kanya nagay nagꞌaat it aken, ‘Maltegan muy Espiritu Santo nga magpapasalu asan it esang taw baw pasarum nayan asat kanya. Ta, yanayan, yang taw i mamawtis nga Espiritu Santo i ipamawtis ya.’ 34Naltegan ku nga talaga, aypaꞌ ipagpamatuud ku nga kanyay Anak it Ampuꞌang Diyus.”
Uꞌnang mga alagad ni Jesus
35Pagꞌeyag siꞌ, duꞌun siꞌ na Juan baw duwa nga mga alagad ya. 36Naltegan ya siꞌ si Jesus nga magpanaw. Pagkalteg ya, maat ya, “Wayan siꞌ kanya nga ibinggay it Ampuꞌang Diyus, nga subuk uꞌuybun it tupa nga ipagsalisi.”
37Pagkagneg it duwa ngayting mga alagad ni Juan it inaat ya ngayti, namagdasun na sirang duwa it ki Jesus. 38Limningaw si Jesus baw lintegan yay duwa ngayting magdadasun it kanya. Iningkut ya sira, “Paꞌunu kamuytu? Subuk may pagtulusun mi.”
Timnubag sira, “Tabiꞌ it imu, Manigtulduꞌ, ari pagꞌiꞌistaran mu?”
39Maat ni Jesus it kanira, “In mayaꞌ kamut aken, maꞌanuꞌan mi yan.” Aypaꞌ miyayaꞌ sira duꞌun it pagꞌiꞌistaran ya. Ikiyaꞌbut nira duꞌun, magꞌinlalakay nay aldaw. Duꞌun nay piyaꞌapunan nira it kanya ngayti.#1:39 Magꞌaat i kat Ginirego, “kat ikasang pulung uras”. In beteꞌ kat Romano nga takes-takesan it uras, paꞌaaten ngaytu, magꞌinlalakay nay aldaw. Temed in kat Judio nga takes-takesan, apun na. Maat gasiꞌ i Ginirego, duꞌun nay piyaꞌapunan nira. Aypaꞌ subuk ega mapakay nga apun na i ipiyagꞌabut nira. Basaen i paꞌyag pasar it takes-takesan it uras duꞌun it Pauꞌnang Sugi-sugid.
40Esa it mga miyayaꞌ ngaytit ki Jesus, si Andres nga sulsug ni Simon Pedro. 41Liyalangbus ni Andres it maduꞌun i sulsug ya ngayting si Simon. Pagꞌabut ya, maat ya, “Nakitaan namen nay Adiꞌ ngayan nga isiyanggup it Ampuꞌang Diyus” (nga ireg sugiden, Cristo). 42Piyabayaꞌ ya si Simon duꞌun it ki Jesus.
Pagkaꞌbut nira, liniling ni Jesus si Simon baw miyampang. Maat ya, “Ngaran mu kayti si Simon, nga anak ni Juan. Temed pangaranan kat ki Cefas.” (Cefas ngaytu, Pedro in kat Ginirego.)#1:42 Si Cefas u si Pedro, nagsubung i ireg sugiden it duwa ngaytung mga ngaran, nga ireg sugiden, batu.
43-44Pagꞌaldaw siꞌ, napikir ni Jesus nga paGalilea. Parabir napanaw tiyulus ya daꞌan i esang taw nga pagpangaranat ki Felipe, nga taga Betsaida, nga kabanwa na Andres duwa ni Simon ngayti. Pagkaparag ya inaat ya, “Felipe, mayaꞌ kat aken ka alagad ku na ikaw.”
45Si Felipe ngayti, tiyulus yay esang taw nga pagpangaranat ki Natanael ka siyugidan ya, nga maat ya, “Naparagan namen i pagpapuntuꞌan it siyangpit ni Moises duꞌut mga isiyurat ya baw siyangpit gasiꞌ it mga prupitaꞌ kat mga isiyurat nira. Si Jesus tu nga taga Nazaret nga anak na Jose.”
46“Bilaꞌ, unu nga sugi-sugid yan?” maat ni Natanael. “Subuk egay nasugid it mga prupitaꞌ nga may limiꞌwan duꞌun it Nazaret nga matataꞌas u mababantug.”
Timnubag si Felipe, “Mayaꞌ ka bat aken ka paꞌaduꞌun tat kanya.”
47Naltegan ni Jesus nga magꞌelep duꞌut kanya si Natanael. Pagkalteg ya, maat ya, “Waytu nay esang matuud nga Israelita nga egay maski unu nga aꞌakal.”
48Iningkut ni Natanael si Jesus, “Tabiꞌ it imu, magꞌuꞌunu naꞌrutan muy adat ku?”
Timnubag si Jesus, “Parabir nasugidan ka ni Felipe, naltegan ku na ikaw duꞌut siꞌrung it kayu nga igos.”
49“Aa bilaꞌ,” maat siꞌ ni Natanael, “Manigtulduꞌ, in atkayan palan, matuud nga ikaw i Anak it Ampuꞌang Diyus! Ikaw talagay Adiꞌ it bangsa nga Israel!”
50Maat siꞌ i tubag ni Jesus, “Namayaꞌ ka sabap it inaat ku ngayat imu, nga naltegan ta ikaw duꞌut siꞌrung it igos. Temed yay matuud, may maltegan mung bantug paꞌ nga mga bagay nga subraꞌ paꞌ it ituꞌun ngaytu. 51Kamatuudan talagay ipagsugid ku ngaytut imu. Maltegan mu nga abri i langit baw mga anghil it Ampuꞌang Diyus, mapyat, lumampud, magpaꞌasitut aken nga Taga Langit nga Ipiyanganak it Taw.”
Currently Selected:
Juan 1: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.