Juan 2
2
Uꞌna-uꞌnang kalililuꞌang bagay nga binwat ni Jesus i duꞌun ngayti it Cana
1Pagꞌikatlung aldaw, may pagsadu duꞌun it Cana nga sakep it Galilea. Nagparagiꞌ i inaꞌ ni Jesus. 2Si Jesus baw mga alagad ya ngayti, inimbitar gasiꞌ. 3Iyan kimnurang nay pagꞌimnun it mga magsadu ngayti, inaat si Jesus it inaꞌ ya, “Kimnurang nay pagꞌimnun nira.”
4Katubag si Jesus, maat ya, “Tabiꞌ it imu, aku na bay baalaꞌ kayan. Magayen ega panguꞌnaan mu aku kat buwaten ku ka ega paꞌ naꞌbut i tamaꞌ nga timpu.”
5Inaat it inaꞌ ngayti ni Jesus i mga manigtarakan, “Iyan buwaten mi i kumpur iꞌaat yat imyu nga buwaten.”
6May duꞌun nga enem nga katapayanan nga tagduwa u tulung puluꞌ nga galun i danum nga magkabtang. Magbebtang nga danum, ipagꞌugas it alima kat kaꞌugaliꞌan nira nga mga Judio nga paglimpiyuꞌ. 7Singkat ni Jesus i mga katabang ngayti. Maat ya, “Pangipnuꞌun mit danum i mga tapayan ngaytu.” Egay beken, inalinan nirat seked it mamaglimiꞌ-limiꞌ.
8Iyan napnuꞌ na nga muꞌsa, maat siꞌ ni Jesus, “Sigi, sumaklut kamu asat mga tapayan ngayan ka tabanen mi duꞌun it magpamaalaꞌ it pagsadu ngaytu.” Siyunud niray inaat ngayti.
9Siyukdanan it magpamaalaꞌ ngayti, nasukdanan ya, atnang gayen it pagꞌimnun, ega na danum. Ega naꞌrutan ya in ari garing kayti, takaꞌ in mga katabang ngayti, urut nira ka siray simnaꞌgeb it danum nga ipiyamagꞌalin duꞌut mga tapayan ngayti. Tiyaꞌwagan it magpamaalaꞌ ngayti i lalaki nga nangasawa. 10Maat ya, “Subuk yay pirmi, iꞌuꞌnat paꞌinum i pirmira nga pagꞌimnun. In dakulaꞌ nay naꞌinum it katataawan, bawnga ipaliꞌwan i ega pirmira. Temed kayti, biyaliswaꞌ mu, ka ipiyasauryan mu manay pirmira ngaytung pagꞌimnun.”
11Itu ngaytu nga binwat ni Jesus duꞌun it Cana nga sakep it Galilea, uꞌnaytu nga tandaꞌanan nga kalililuꞌang bagay nga binwat ya. Baw binwat ya ngaytu, ipiyagpamatuud it kabantugan ya, baw liꞌwan ya, namayaꞌ nat kanya i mga alagad ya ngayti.
12Pagkatiwas it pagsadu ngayti, nagpaCapernaum na Jesus, sang siraan naga it mga alagad ya ngayti, inaꞌ ya baw mga ariꞌ ya. Daꞌsira naga naꞌlay it sang unu duꞌun.
Pagpanindegan ni Jesus i papagsambaan nga balay it Ampuꞌang Diyus
13Iyan masepek nay ipagpistaꞌ it mga Judio it pistaꞌ nira nga pagpangaranat Tiyaꞌliban, nagpaJerusalem si Jesus. 14Naꞌanuꞌan ya duꞌun it piyakakamaꞌyagan it Templo i mga manigdagang it tupa, bakaꞌ baw mga kalapatiꞌ, baw mga maniggantit pirak.#2:14 Mga ramu-ramu ngaytu, ipagsalisi nga ipagꞌangut it kapasinsiyaan duꞌun it Ampuꞌang Diyus. Paribasay nasakep it mga Romano i bangsa nga Judio, pirak nat Roma i pirak nira. Takaꞌ in bagay nga paggamiten duꞌun it Templo ngayti, pirak nagang dati it mga Judio i mapakay nga iꞌalang. Aypaꞌ kaꞌilangan nga gantiyan naga it dati nga pirak nira i pirak it Roma. Temed mapiyanrugi talagay mga manigdagang baw manigganti ngayti. 15Binwat ni Jesus, miyanu it lubid nga binwat yang riripdas. Piyangimugaw ya i mga manigdagang ngayti baw idiyedeg ya duꞌut liꞌwan i mga tupa baw mga bakaꞌ. Ipiyanangkup yay mga pirak baw ipiyamagpakleb yay mga lamisaan it mga manigganti ngayti. 16Bawnga inlep yay mga magpaꞌalang ngayti it kalapatiꞌ. Maat yat kanira, “Pangawaꞌen mi gasiꞌ situ i imyu ngaytung mga dagangan! Ega buwaten mi nga papagtindaan i balay ngaytut Amaꞌ ku!”
17Pagkalteg it mga alagad ya, nademdeman nira i duꞌun it kasuratan nga magꞌaat, “Talagang pagpanindegan ku nga banar i balay mu nga papagsambaan it imu maski ikagtas nat ginawa ku.”#2:17 Kasuratan ngaytung paꞌaaten, Awit 69:9. Adiꞌ nga si David i magꞌampang temed si Cristo i pagpapuntuꞌan ya, ka nasugid yay malabayan ni Cristo nga kakuriꞌan.
18Ta, it atkayti i binwat ni Jesus, iningkut kanya it mga pagbayaꞌen it mga Judio, “Unuy tandaꞌanan nga makapalteg mut amen nga kalililuꞌang bagay, nga kamatuudan it may pudir mu it muwat it atkaytu?”
19Katubag si Jesus, maat ya, “Ranggaꞌen mi i balay ngaytu, ka ipaꞌuliꞌnan ku it tulu lamang nga aldaw.”
20“Unu,” maat i mga Judio ngayti, “ipaꞌuliꞌnan mu it tulung aldaw lamang it beteꞌ epat nga puluꞌ baw enem baytung taꞌun i kaꞌlay it binwatan bawnga naꞌman i balay ngaytu nga papagsambaan?”
21Temed iyan inaat ngaytu ni Jesus nga balay, sadili yang bilug i pagpaꞌiguꞌan ya. 22Aypaꞌ ka pagꞌegen ni Jesus it paꞌuliꞌ, nademdeman it mga alagad ya ngayti i iti nga inampang ya. Duꞌun sira namayaꞌ nga banar it mga magbebtang duꞌun it mga kasuratang ampang it Ampuꞌang Diyus baw mga inampang gasiꞌ ni Jesus.
23Iyan duꞌun ngayti si Jesus it Jerusalem it Pistaꞌ ngaytit Tiyaꞌliban, dakel i mga namagpamayaꞌ it kanya, iyan naltegan nira i mga tandaꞌanan nga mga kalililuꞌang bagay nga pagbuwaten ya. 24Temed ega nagay pakimatuud ni Jesus it kamatuudan nay pamayaꞌ nira ngaytit kanya, ka urut yay mga adat nirang muꞌsa. 25Ega na kaꞌilangan paꞌ nga may sumugid duꞌut kanya, sabap magkaꞌrutan ya nga banar i kat nakem it taw.
Currently Selected:
Juan 2: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
Juan 2
2
Uꞌna-uꞌnang kalililuꞌang bagay nga binwat ni Jesus i duꞌun ngayti it Cana
1Pagꞌikatlung aldaw, may pagsadu duꞌun it Cana nga sakep it Galilea. Nagparagiꞌ i inaꞌ ni Jesus. 2Si Jesus baw mga alagad ya ngayti, inimbitar gasiꞌ. 3Iyan kimnurang nay pagꞌimnun it mga magsadu ngayti, inaat si Jesus it inaꞌ ya, “Kimnurang nay pagꞌimnun nira.”
4Katubag si Jesus, maat ya, “Tabiꞌ it imu, aku na bay baalaꞌ kayan. Magayen ega panguꞌnaan mu aku kat buwaten ku ka ega paꞌ naꞌbut i tamaꞌ nga timpu.”
5Inaat it inaꞌ ngayti ni Jesus i mga manigtarakan, “Iyan buwaten mi i kumpur iꞌaat yat imyu nga buwaten.”
6May duꞌun nga enem nga katapayanan nga tagduwa u tulung puluꞌ nga galun i danum nga magkabtang. Magbebtang nga danum, ipagꞌugas it alima kat kaꞌugaliꞌan nira nga mga Judio nga paglimpiyuꞌ. 7Singkat ni Jesus i mga katabang ngayti. Maat ya, “Pangipnuꞌun mit danum i mga tapayan ngaytu.” Egay beken, inalinan nirat seked it mamaglimiꞌ-limiꞌ.
8Iyan napnuꞌ na nga muꞌsa, maat siꞌ ni Jesus, “Sigi, sumaklut kamu asat mga tapayan ngayan ka tabanen mi duꞌun it magpamaalaꞌ it pagsadu ngaytu.” Siyunud niray inaat ngayti.
9Siyukdanan it magpamaalaꞌ ngayti, nasukdanan ya, atnang gayen it pagꞌimnun, ega na danum. Ega naꞌrutan ya in ari garing kayti, takaꞌ in mga katabang ngayti, urut nira ka siray simnaꞌgeb it danum nga ipiyamagꞌalin duꞌut mga tapayan ngayti. Tiyaꞌwagan it magpamaalaꞌ ngayti i lalaki nga nangasawa. 10Maat ya, “Subuk yay pirmi, iꞌuꞌnat paꞌinum i pirmira nga pagꞌimnun. In dakulaꞌ nay naꞌinum it katataawan, bawnga ipaliꞌwan i ega pirmira. Temed kayti, biyaliswaꞌ mu, ka ipiyasauryan mu manay pirmira ngaytung pagꞌimnun.”
11Itu ngaytu nga binwat ni Jesus duꞌun it Cana nga sakep it Galilea, uꞌnaytu nga tandaꞌanan nga kalililuꞌang bagay nga binwat ya. Baw binwat ya ngaytu, ipiyagpamatuud it kabantugan ya, baw liꞌwan ya, namayaꞌ nat kanya i mga alagad ya ngayti.
12Pagkatiwas it pagsadu ngayti, nagpaCapernaum na Jesus, sang siraan naga it mga alagad ya ngayti, inaꞌ ya baw mga ariꞌ ya. Daꞌsira naga naꞌlay it sang unu duꞌun.
Pagpanindegan ni Jesus i papagsambaan nga balay it Ampuꞌang Diyus
13Iyan masepek nay ipagpistaꞌ it mga Judio it pistaꞌ nira nga pagpangaranat Tiyaꞌliban, nagpaJerusalem si Jesus. 14Naꞌanuꞌan ya duꞌun it piyakakamaꞌyagan it Templo i mga manigdagang it tupa, bakaꞌ baw mga kalapatiꞌ, baw mga maniggantit pirak.#2:14 Mga ramu-ramu ngaytu, ipagsalisi nga ipagꞌangut it kapasinsiyaan duꞌun it Ampuꞌang Diyus. Paribasay nasakep it mga Romano i bangsa nga Judio, pirak nat Roma i pirak nira. Takaꞌ in bagay nga paggamiten duꞌun it Templo ngayti, pirak nagang dati it mga Judio i mapakay nga iꞌalang. Aypaꞌ kaꞌilangan nga gantiyan naga it dati nga pirak nira i pirak it Roma. Temed mapiyanrugi talagay mga manigdagang baw manigganti ngayti. 15Binwat ni Jesus, miyanu it lubid nga binwat yang riripdas. Piyangimugaw ya i mga manigdagang ngayti baw idiyedeg ya duꞌut liꞌwan i mga tupa baw mga bakaꞌ. Ipiyanangkup yay mga pirak baw ipiyamagpakleb yay mga lamisaan it mga manigganti ngayti. 16Bawnga inlep yay mga magpaꞌalang ngayti it kalapatiꞌ. Maat yat kanira, “Pangawaꞌen mi gasiꞌ situ i imyu ngaytung mga dagangan! Ega buwaten mi nga papagtindaan i balay ngaytut Amaꞌ ku!”
17Pagkalteg it mga alagad ya, nademdeman nira i duꞌun it kasuratan nga magꞌaat, “Talagang pagpanindegan ku nga banar i balay mu nga papagsambaan it imu maski ikagtas nat ginawa ku.”#2:17 Kasuratan ngaytung paꞌaaten, Awit 69:9. Adiꞌ nga si David i magꞌampang temed si Cristo i pagpapuntuꞌan ya, ka nasugid yay malabayan ni Cristo nga kakuriꞌan.
18Ta, it atkayti i binwat ni Jesus, iningkut kanya it mga pagbayaꞌen it mga Judio, “Unuy tandaꞌanan nga makapalteg mut amen nga kalililuꞌang bagay, nga kamatuudan it may pudir mu it muwat it atkaytu?”
19Katubag si Jesus, maat ya, “Ranggaꞌen mi i balay ngaytu, ka ipaꞌuliꞌnan ku it tulu lamang nga aldaw.”
20“Unu,” maat i mga Judio ngayti, “ipaꞌuliꞌnan mu it tulung aldaw lamang it beteꞌ epat nga puluꞌ baw enem baytung taꞌun i kaꞌlay it binwatan bawnga naꞌman i balay ngaytu nga papagsambaan?”
21Temed iyan inaat ngaytu ni Jesus nga balay, sadili yang bilug i pagpaꞌiguꞌan ya. 22Aypaꞌ ka pagꞌegen ni Jesus it paꞌuliꞌ, nademdeman it mga alagad ya ngayti i iti nga inampang ya. Duꞌun sira namayaꞌ nga banar it mga magbebtang duꞌun it mga kasuratang ampang it Ampuꞌang Diyus baw mga inampang gasiꞌ ni Jesus.
23Iyan duꞌun ngayti si Jesus it Jerusalem it Pistaꞌ ngaytit Tiyaꞌliban, dakel i mga namagpamayaꞌ it kanya, iyan naltegan nira i mga tandaꞌanan nga mga kalililuꞌang bagay nga pagbuwaten ya. 24Temed ega nagay pakimatuud ni Jesus it kamatuudan nay pamayaꞌ nira ngaytit kanya, ka urut yay mga adat nirang muꞌsa. 25Ega na kaꞌilangan paꞌ nga may sumugid duꞌut kanya, sabap magkaꞌrutan ya nga banar i kat nakem it taw.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.