A̱romawa 7

Doka bu ni̱ Nyia̱ Tyok da̱ Á̱niet Khwi Yesu bah

1Ma̱ninika, nyin á̱niet khwi Yesu ba nang n chat a̱ni, nyi yet á̱niet bya nyi lyen si̱sak nang doká mi̱ swanta nnyia̱ nta̱m a̱ni. Nyi lyen nang doká swanta ji nnyia̱ nta̱m da̱ a̱yin mi̱ di̱n jen nang gu nshya̱ ma̱ng swuan ja a̱ni baa? 2Kidee, ka̱ a̱byii̱k nyia̱ nyeang, doka nyeang ji ni̱ ba̱ng nggu di̱n jen nang a̱tyok wu nshya̱ a̱chet a̱ni. A̱wot ka̱ a̱tyok wu khwu, doka nyeang ji bu ni̱ ba̱ng nggu ma̱ng a̱tyok wu bah. 3Mat a̱nia, si̱ huni fa, ka̱ a̱tyok a̱byii̱k wu ni̱ shya̱ a̱chet, a̱wot a̱byii̱k wu si̱ nyeang a̱tyok a̱ghyang, á̱ na ngyei nggu a̱byii̱k katnaan. A̱wot ka̱ a̱tyok wu ma khwu wa, doka nyeang ji ni̱ nyia̱ tyok da̱ a̱byii̱k wu bah. Ka̱ a̱byii̱k a̱wa nyeang a̱tyok a̱ghyang, á̱ na kyiak gu nang a̱byii̱k katnaan wa a̱ni bah.

4Mat a̱nia, nyin á̱niet khwi Yesu ba nang n chat a̱ni, kidee jini shya̱ tazwa nyin kya. Ku li á ngyei zi̱ khwu ndung ma̱ng Kristi di̱n jen nang á̱ ku nkpang vam nggu hu da̱ a̱team a̱khwu wu a̱ni. Ku si̱ tyia̱ doka Musa ji bu si̱ mi̱n nyia̱ tyok da̱ nzi̱t bah. Zi̱ kwi ndung ma̱ng Kristi, da̱nian zi̱ ka mun á̱pyia̱ ma̱ng a̱nggu; nggu a̱tyu a̱ khwu á̱ si̱ ta̱ngam nggu ma̱ng swuan ma̱ á̱niet ba̱ ka̱n kwi a̱ni. Nang ku ndi a̱nia a̱ni, zi̱ byia̱ chet#7:4 Ku: “Nang ku ndi a̱nia a̱ni, da̱nian zi̱ ka byia̱ chet.” zi̱ nyia̱ a̱tan nta̱m gba̱mgbam da̱nian A̱gwaza.

5Mi̱ jen ji ji̱ swak a̱ni, a̱khwukhwop za̱kwa ku nyia̱ tyok da̱ nzi̱t, di̱dang nyia̱ a̱ka̱tuk nyia̱ si̱ nyia̱ tyok mi̱ nfwuo nzi̱t na. Doka ji si̱ fuut di̱dang a̱ka̱tuk nyia̱ ku tyei nzi̱t, zi̱ nyia̱ a̱ka̱tuk nyia̱ gba̱mgbam a̱ tyei a̱khwu a̱ni. 6A̱wot ma̱ninika, nang á̱ nti̱n nzi̱t mi̱ tyok doka hu zi̱ si̱ yet á̱sa̱t á̱niet a̱ni. Tyok doka hu bu ni̱ nyia̱ nzi̱t khwo bah, mat ku li á ngyei zi̱ yet nkwom nia da̱ a̱vwuo tyok doka hu. A̱wot doka ji si̱ mi̱n nyia̱ tyok da̱ nzi̱t bah. Ma̱ninika, nang ku ndi a̱nia a̱ni, zi̱ byia̱ chet zi̱ nyia̱ A̱gwaza ta̱m di̱n vak fai hwa di̱n swat shyat beang da̱ a̱vwuo A̱za̱za̱rak Ntswa, kang ma̱ng a̱khwukhwop nvak nang á̱ nyia̱ nzi̱t khwo zi̱ nkhwi doka ji a̱ni.

Doka A̱gwaza ji Tyai A̱ka̱tuk Nyia̱ nzi̱t wu

7Ka̱ a̱nia wa, yihwa n bu byia̱ na hyia̱, doka A̱gwaza ji yet a̱ka̱tuk nyia̱ waa? Kaai, ku ma̱ chunchwiit! A̱tsak a̱lyiat, doka jija ku tyai nung#7:7 Wa̱i a̱lyiat: Nung ma̱ a̱da̱dei zwunzwuo wuni (7) si̱ nat swak nfeang ma̱ fwuon (7-25), na li á ngyei: 1. Nung fa, neet nang Bulut ka̱n nwuak fwuo di̱ Yesu bah, nang kidee a̱tyu A̱yahudawa nang doká Musa ji nyia̱ tyok da̱ nggu a̱ni. 2. Nung fa, neet nang Bulut ka̱n nwuak fwuo di̱ Yesu bah, nang gu yet kidee A̱da̱mu ma̱ng á̱nietbishyi nang doká Musa ji nyia̱ tyok da̱ mba a̱ni. 3. Nung fa, Bulut a̱ yet a̱tyu khwi ma̱ninika a̱ni. Rom 7:14. a̱ka̱tuk nyia̱ nung wu. Ki̱ doka ji wa yok tak nyia̱, “Yok kwi swam di̱ kyang a̱yin bah.”#7:7 Ghw 20:17; KDok 5:21. Si̱ n fi̱k nang kwi swam hu ngyet a̱ka̱tuk nyia̱ da̱ a̱vwuo A̱gwaza bah.

8A̱wot a̱ka̱tuk nyia̱, nyia̱ ta̱m ma̱ng doka jini, a̱ si̱ nfuut kuzang tangka̱i di̱dang kwi swam mi̱ fwuo nung hu. Mat ki̱ doka jini wa nshya̱ bah, si̱ a̱ka̱tuk nyia̱ wu shya̱ a̱wat byia̱ chet ji̱ tyia̱ nung n tyat ji bah. 9Di̱ jen jhyang, n ku nswan n si̱ nfi̱k doka ji bah. A̱wot nang n fi̱k doka ji ji̱ tak nyia̱ n gyok kwi swam a̱ni, a̱ka̱tuk nyia̱ wu si̱ kin mbeang chet, ku si̱ ghwut kpa̱sai, 10n si̱ nfi̱k shi̱ri̱ya a̱khwu nung ji#7:10 Lyuut cha̱chaat: “A̱wot n si̱ khwu.”.

Mat a̱nia, n si̱ shya̱ kyang nang doka ji tyiet, nang á̱ nyia̱ ku myim ku nwuak swuan di̱ khwi nji a̱ni. Da̱ a̱kwonu a̱kya, ku si̱ tyia̱ nung a̱khwu sang sangba̱p kya. 11Jen nang n byia̱ di̱dang nyia̱ a̱ka̱tuk nyia̱ a̱ni, a̱ka̱tuk nyia̱ si̱ shya̱ a̱wat laai nung. N si̱ ngyei khwi doka hu yet vak shya̱ swuan hwa. N si̱ nfi̱k nang khwi doka hu ngyet vak a̱khwu hwa.#7:11 Lyuut cha̱chaat: “A̱ka̱tuk nyia̱ wu si̱ shya̱ a̱wat doka a̱ja, a̱wot a̱ si̱ laai nung, a̱ si̱ bu nyia̱ ta̱m ma̱ng doka a̱ja, a̱ si̱ nhyat nung.” 12A̱mgba̱m ma̱ng a̱nia, doka ji ma̱ a̱pyia̱ nji, ji̱ yet a̱za̱za̱rak wa. A̱wot nkyang na ji̱ shei a̱ni, na̱ yet á̱za̱za̱rak, á̱tsatsak, ma̱ng a̱tan.

13A̱wot shimba, á̱ na lyip tyiet a̱hwa li nini wa? Ka̱ doot á̱ nyia̱ doka ji ji̱ yet a̱tan wu a̱ni, jija tyia̱ nung a̱khwu kaa? Kaai, ku ma̱ chunchwiit! Di̱dang nung hu tyia̱ n si̱ nyia̱ a̱ka̱tuk nyia̱. A̱wot a̱tan doka wu si̱ fuut nung n si̱ mban di̱dang nyia̱ a̱ka̱tuk nyia̱ nung wu a̱ tyei a̱khwu a̱ni.#7:13 Rom 7:9-11. Da̱nian a̱ ka tyai kpa̱sai a̱tsatsak za̱kwa a̱ka̱tuk nyia̱ di̱n vak doka hu.#7:13 Lyuut cha̱chaat: “A̱tan doka wa tyia̱ nung a̱khwu kaa? Kaai, ku ma̱ chunchwiit! A̱tan doka tyia̱ nung a̱khwu da̱nian á̱ ka tak nang a̱ka̱tuk nyia̱ wu ngyet a̱tsatsak a̱ka̱tuk nyia̱ wa. Doka jini ja ntyia̱ a̱ka̱tuk nyia̱ wu si̱ ngyet a̱tsatsak a̱ka̱tuk nyia̱.”

A̱tyubishyi Kwan A̱yaat ma̱ng A̱ka̱tuk nyia̱

14Mat a̱nia, zi̱ lyen nang doka ji ngyet a̱tan wa nang A̱za̱za̱rak Ntswa#7:14a Lyuut cha̱chaat: “Doka ji yet a̱si̱ ntswa ja.” wu nwuak a̱ni, a̱wot nung ma̱ a̱pyia̱ nung#7:14b Wa̱i a̱lyiat: Nung mi̱ a̱bada̱dei zwunzwuo kani (14) si̱ nat 25 (14-25), na li á ngyei: 1. Nung fa, neet nang Bulut ka̱n nwuak fwuo di̱ Yesu bah, nang kidee a̱tyu A̱yahudawa nang doká Musa ji nyia̱ tyok da̱ nggu a̱ni. 2. Nung fa, neet nang Bulut ka̱n nwuak fwuo di̱ Yesu bah, nang gu yet kidee A̱da̱mu ma̱ng á̱nietbishyi nang doká Musa ji nyia̱ tyok da̱ mba a̱ni. 3. Nung fa, Bulut a̱ yet a̱tyu khwi ma̱ninika a̱ni. Rom 7:7. ngyet a̱tyubishyi wa, tsa bu ngyet a̱khwo a̱ka̱tuk nyia̱. 15A̱tsak a̱lyiat, n ni̱ nfi̱k kyang hu nang n nyia̱ a̱ni bah. Mat, n ni̱ chat n nyia̱ a̱tan kyang, a̱wot n si̱ mi̱n nyia̱ bah. Da̱ a̱kwonu a̱kya, kyang hu nang n ni̱ ndak nyia̱ hu a̱ni, huhwa nang n ni̱ nyia̱. 16A̱wot ka̱nang n fi̱k kyang nang n dak nyia̱ a̱ni ku yet a̱bun wa, ku tak nang n shim nyia̱ doka ji yet a̱tan wa. 17Mat a̱nia, nung gwa ma̱ a̱pyia̱ nung nyia̱ a̱ka̱tuk a̱wa bah. Za̱kwa a̱ka̱tuk nyia̱ ji ji̱ shya̱ ma̱ nung a̱ni, jija ntyia̱ nung.

18A̱wot n dyen, a̱tan kyang shya̱ mi̱ za̱kwa a̱ka̱tuk nyia̱ nung ji bah. N ni̱ chat nyia̱ kyang ku yet a̱tan a̱ni, a̱wot nyia̱ hu ni̱ kaat nung. 19N ni̱ nchat n nyia̱ a̱tan kyang. A̱wot n si̱ mi̱n nyia̱ bah. Da̱ a̱kwonu a̱kya, a̱ka̱tuk nyia̱ nang n ni̱ ndak a̱ni, a̱wot nggu wa nang n ni̱ nyia̱. 20A̱wot ka̱nang n ni̱ nyia̱ kyang nang n ni̱ ndak a̱ni, ku fa nung gwa ni̱ nyia̱ a̱ka̱tuk kyang a̱wa bah. A̱ka̱tuk za̱kwa wu a̱ shya̱ ma̱ nung a̱ni, nggu wa ni̱ nyia̱ nhu.

21N fi̱k doka swanta ji, jija yet: Jen nang n chat n nyia̱ kyang ku yet a̱tan a̱ni, da̱ a̱kwonu a̱kya, n ni̱ nyia̱ kyang ku yet a̱ka̱tuk a̱ni. 22N chat doka A̱gwaza ji ma̱ng a̱mgba̱m fwuo nung hu. 23A̱wot chet#7:23 Lyuut cha̱chaat: “Doka.” ghyang shya̱ ma̱ nung ku ni̱ nyia̱ zwang mi̱ fwuo nung hu. Ku ni̱ tyia̱ nung n gyet a̱khwo za̱kwa a̱ka̱tuk nyia̱, ji̱ shya̱ ma̱ nung a̱ni. 24Ku swan nung! N gyet kyang kunak hwa! A̱nyan wa na ti̱n nung mi̱ vam huni nang za̱kwa a̱ka̱tuk nyia̱ ma̱ng a̱khwu nyia̱ tyok da̱ nhu a̱ni? 25N gwai ma̱ A̱gwaza! Yesu Kristi A̱tyoli nzi̱t wu, nggu wa na ti̱n nzi̱t mi̱ vam za̱kwa a̱ka̱tuk nyia̱ ma̱ng a̱khwu. Mat a̱nia, mi̱ fwuo nung hu, n ni̱ khwi doka A̱gwaza ji. A̱wot mat za̱kwa a̱ka̱tuk nyia̱ nung ji, n gyet a̱khwo a̱ka̱tuk nyia̱ wa.

Currently Selected:

A̱romawa 7: TyapNT

Highlight

Copy