A̱romawa 4

Ibrahim yet A̱tsatsak Kidee Nwuak Fwuo da̱ A̱gwaza

1Ibrahim ku yet a̱tyia̱ a̱khwop A̱yahudawa di̱ yet a̱tyubishyi. Yihwa nang Ibrahim ku myiam di̱ si̱sak nang A̱gwaza ku ntak kpa̱sai, nang gu ku nkyiak guu a̱ yet a̱tsotswat ma̱ng sang a̱bun a̱zaghyi nggu ka a̱ni? 2Ka̱ a̱tan nta̱m wa ku tyei A̱gwaza si̱ nkyiak Ibrahim a̱ si̱ yet a̱tsotswat ma̱ng sang a̱bun a̱zaghyi nggu, si̱ Ibrahim ku byia̱ nta̱m nang gu na ntam a̱ni. A̱wot si̱ a̱hwa neet da̱ a̱vwuo A̱gwaza bah!

3Ma̱nang á̱ ndyuut mami A̱lyiat A̱gwaza na a̱ni, nyia̱,

“Ibrahim nwuak fwuo da̱ A̱gwaza.

Huhwa A̱gwaza si̱ kyiak gu

a̱tsotswat ma̱ng sang a̱bun a̱zaghyi nggu,

mat nwuak fwuo nggu hu.”#4:3 A̱ts 15:6.

4Á̱niet ba̱ ni̱ nnyia̱ nta̱m a̱ni, ka̱ á̱ tan mba zang nta̱m mba ji, á̱ ni̱ nang mba wa bah, á̱ ni̱ tan mba zang nta̱m mba ji ja. 5A̱wot á̱ ni̱ kwok á̱niet ba ba̱ yet á̱tsotswat ma̱ng sang a̱bun a̱zaghyi A̱gwaza a̱ni, mat a̱tan nta̱m nang ba̱ nyia̱ wa a̱ni bah; da̱ a̱kwonu a̱kya, mat nang ba̱ nnwuak fwuo hwa da̱ A̱gwaza, a̱tyu a̱ chi a̱ka̱tuk nyia̱ á̱niet wu a̱ni.

6A̱gwam Da̱wuda meang wa̱i a̱lyiat, a̱ si̱ tak tangka̱i a̱gwai nang á̱niet ba A̱gwaza tak kpa̱sai nang gu nkyiak ba̱ yet á̱tsotswat bya ma̱ng sang a̱bun a̱zaghyi nggu di̱ mi̱n nyia̱ a̱tan nta̱m a̱ni. Da̱wuda hyia̱ nyia̱,

7“A̱gwaza ni̱ nang á̱niet nang

á̱ chi mba a̱ka̱tuk nyia̱ a̱ni a̱li̱ba̱rka.

A̱wot á̱niet ba nang á̱ bwung

a̱ka̱tuk nyia̱ mba wu a̱ni,

ba̱ yet á̱niet a̱gwai bya.

8A̱tsak a̱lyiat, á̱niet ba nang A̱gwaza

lyang a̱ka̱tuk nyia̱ mba wu

nang gu lyuut a̱ni,

ba̱ yet á̱niet a̱gwai bya!”#4:8 Za̱b 32:1-2.

9A̱gwai a̱nia nang Da̱wuda tak a̱ni, na̱ yet á̱si̱ a̱mgba̱m A̱yahudawa nang á̱ tyei mi̱ nchen hwa ma̱nyin mba a̱ni a? Kee na̱ mun a̱ yet á̱si̱ a̱mgba̱m Nnwap na̱ nwai yet A̱yahudawa bya meang nang á̱ nwai tyei mi̱ nchen hu a̱ni? Zi̱ shim nang A̱gwaza ntak kpa̱sai a̱ kyiak Ibrahim a̱tsotswat ma̱ng sang a̱bun a̱zaghyi nggu, di̱n vak nwuak fwuo hwa da̱ A̱gwaza.

10A̱wot ku nyia̱ ni ku si̱ ndi a̱nia? Zang jen ja nang A̱gwaza ku ntak kpa̱sai nang gu nkyiak Ibrahim a̱tsotswat ma̱ng sang a̱bun a̱zaghyi nggu? Di̱n jen a̱ja nang á̱ ka̱n tyia̱ nggu mi̱ chen hu a? Kee neet nang á̱ ka̱n tyia̱ nggu mi̱ nchen hu bah? A̱tsak a̱lyiat, neet nang á̱ ka̱n tyia̱ Ibrahim mi̱ chen hu hwa bah!

11Tyia̱ mi̱ chen hu ku yet a̱lama wa a̱ tak nang Ibrahim wa ka̱n nwuak fwuo da̱ A̱gwaza. Ku si̱ bu fa nang A̱gwaza nsan ngguu. A̱wot ku tak kpa̱sai nang A̱gwaza nkyiak Ibrahim a̱tsotswat ma̱ng sang a̱bun a̱zaghyi nggu, neet nang á̱ ka̱n tyia̱ nggu mi̱ chen hu bah. Mat a̱nia, Ibrahim wa yet a̱tyia̱ á̱niet ba̱ nwuak fwuo da̱ A̱gwaza. A̱wot da̱ mba á̱ tyia̱ mba mi̱ chen a̱ni bah. Á̱ tak kpa̱sai nang á̱ nkyiak ba á̱tsotswat á̱niet ma̱ng sang a̱bun a̱zaghyi A̱gwaza mat nang ba̱ nnwuak fwuo hwa da̱ nggu a̱ni. 12A̱wot Ibrahim mun a̱ yet a̱tyia̱ A̱yahudawa, á̱niet ba nang á̱ tyia̱ mba mi̱ chen a̱ni; ka̱nang ba̱ nwuak fwuo da̱ A̱gwaza ma̱nang Ibrahim ku nwuak fwuo da̱ A̱gwaza, neet nang á̱ ka̱n tyia̱ nggu mi̱ chen hu a̱ni bah.

A̱gwaza Nyia̱ A̱li̱ka̱uli ma̱ng Kwai Ibrahim ji

13A̱gwaza ku nyia̱ a̱li̱ka̱uli, a̱ na nwuak Ibrahim ma̱ng kwai nggu ji a̱mgba̱m swanta hu, mat nang Ibrahim khwi doka A̱gwaza ja bah. Da̱ a̱kwonu a̱kya, Ibrahim ku nwuak fwuo hwa da̱ A̱gwaza. Huhwa si̱ mbyia̱ A̱gwaza si̱ tak kpa̱sai nang gu nkyiak Ibrahim a̱tsotswat ma̱ng sang a̱bun a̱zaghyi nggu. 14Ka̱ a̱li̱ka̱uli A̱gwaza wu yet ma̱ si̱ á̱niet ba̱ khwi doka bya ma̱nyin mba, ku fa nang nwuak fwuo a̱tyubishyi da̱ A̱gwaza yet a̱buk kyang wa, a̱wot a̱li̱ka̱uli A̱gwaza wu bu byia̱ kpangti̱n bah. 15Á̱niet ba̱ kwan ba̱ khwi doka ji, a̱wot ba̱ si̱ nwai khwi nji cha̱chaat a̱ni, A̱gwaza ni̱ mwai lyen ma̱ng a̱mba#4:15 Lyuut cha̱chaat: “Doka ji ni̱ bai ma̱ng mwai lyen.”, a̱wot á̱ nyep ntangka̱i á̱niet a̱nia. (Mi̱ vak hu nang a̱tyubishyi na nwai tyat doka a̱ni, huhwa yet a̱ byia̱ doka ji bah!)

16Mat a̱nia, á̱ san a̱li̱ka̱uli wu mat nwuak fwuo hwa da̱ A̱gwaza. A̱wot A̱gwaza nyia̱ a̱li̱ka̱uli a̱wa, mat nang gu nfa̱k shok nzi̱t a̱ni. A̱wot zi̱ nwuak a̱chuchuk zi̱ na san kyang nang A̱gwaza nyia̱ a̱li̱ka̱uli wu a̱ni, ki̱ zi̱ nwuak fwuo da̱ A̱gwaza ma̱nang Ibrahim ku nnwuak fwuo da̱ nggu a̱ni. Zi̱ na san kyang nang á̱ nyia̱ a̱li̱ka̱uli wu a̱ni, kang ma̱ng si̱sak ji zi̱ nkhwi ku nwai khwi doka A̱yahudawa ji a̱ni. Mat Ibrahim wa yet a̱tsatsak a̱tyia̱ a̱khwop a̱mgba̱m nzi̱t#4:16 Wa̱i a̱lyiat: A̱mgba̱m nzi̱t. Bulut lyiat tazwa a̱mgba̱m á̱niet khwi A̱yahudawa nang doka ji nyia̱ tyok da̱ a̱mba a̱ni, ma̱ng Nwap na̱ nwai yet A̱yahudawa na̱ nwuak a̱chuchuk nang doka ji nwai nyia̱ tyok da̱ mba a̱ni. zi̱ nwuak fwuo da̱ A̱gwaza a̱ni.#4:16 Ga̱l 3:7.

17Si̱ huni nat cha̱chaat ma̱nang A̱gwaza nhyia̱ ma̱ng Ibrahim mami A̱lyiat A̱gwaza na a̱ni, nyia̱,#4:17 Lyuut cha̱chaat: “Ma̱nang á̱ ndyuut a̱ni.” “N wa ka̱n tyia̱ ang a yet a̱tsatsak a̱tyia̱ a̱khwop a̱mgba̱m nnwap ma̱ a̱di̱di̱t.”#4:17 A̱ts 17:5. A̱lyiat nani bai da̱ a̱nu ka, mat Ibrahim nwuak fwuo da̱ A̱gwaza, a̱tyu a̱ tyia̱ á̱niet ba̱ ka̱n kwi si̱ doot ma̱ng swuan a̱ni. A̱wot nggu wa bu mat nkyang nfai, na̱ si̱ ghwut mi̱ kyang na̱ nwai nshya̱ a̱ni.

18Ku nang jat tyia̱ fwuo nshya̱ bah, Ibrahim si̱ ya a̱son ma̱ng tyia̱ fwuo, a̱ si̱ nwuak a̱chuchuk nang gu na ngyet a̱tsatsak a̱tyia̱ nnwap ma̱ a̱di̱di̱t.#4:18 Ku: “A̱ ku nwuak a̱chuchuk, nang ku ndi a̱nia a̱ni, a̱ si̱ yet a̱tyia̱ nnwap ma̱ a̱di̱di̱t.” Ma̱nang A̱gwaza nnyia̱ a̱li̱ka̱uli a̱ si̱ tak ma̱ng a̱nggu a̱ni, nyia̱, “A na saat, a byia̱ kwaí ma̱ a̱di̱di̱t!”#4:18 A̱ts 15:5.

19Di̱n jen a̱ja, Ibrahim ku yet a̱lyia̱ nchyi kya. A̱wot da̱ nggu a̱ but mi̱ fwuo da̱ nwuak fwuo nggu hu da̱ A̱gwaza bah; ku nang gu ku nfi̱k nang gu kwop, a̱wot vam nggu hu si̱ tyak chet, a̱ si̱ bwat chunchwiit a̱ khwu a̱ni. Ma̱ng si̱sak nang gu bu ku nfi̱k nang Sa̱ratu a̱byii̱k nggu wu nswak jen nang gu na mbyin nggwon a̱ni.#4:19 A̱ts 17:17.

20A̱mgba̱m ma̱ng a̱nia, Ibrahim ku but mi̱ nfwuo da̱ a̱li̱ka̱uli A̱gwaza wu bah, ku ma̱ chunchwiit. A̱tsak a̱lyiat, a̱ si̱ mban nwuak fwuo da̱ A̱gwaza mi̱ chet#4:20 Ku: “A̱gwaza ku tyia̱ gu si̱ mbeang chet nwuak fwuo da̱ nggu.”. A̱wot a̱ni wa gu si̱ nnwuak A̱gwaza shi. 21Ibrahim ku nwuak a̱chuchuk ba̱t nang A̱gwaza mbyia̱ chet a̱ nyia̱ kyang nang gu nyia̱ a̱li̱ka̱uli wu a̱ni. 22A̱wot mat nang Ibrahim nnwuak fwuo da̱ A̱gwaza a̱ni, huhwa si̱ mbyia̱ A̱gwaza si̱ tak kpa̱sai nang gu nkyiak gu a̱tsotswat ma̱ng sang a̱bun a̱zaghyi nggu.

23A̱wot jen nang A̱gwaza ntak kpa̱sai nang gu nkyiak Ibrahim a̱tsotswat ma̱ng sang a̱bun a̱ni, hu ku yet kpangti̱n Ibrahim ja ma̱nyin nggu bah. Á̱ ku lyuut a̱nia 24da̱nian kpangti̱n nzi̱t meang, ku tak nang A̱gwaza na ntak kpa̱sai nang gu kyiak zi̱t á̱tsotswat ma̱ng sang a̱bun a̱zaghyi nggu, ka̱nang zi̱ nwuak fwuo da̱ A̱gwaza, a̱tyu a̱ ta̱ngam A̱tyoli nzi̱t wu Yesu ma̱ng swuan ma̱ á̱niet ba̱ ka̱n kwi a̱ni.

25Á̱ ku tyia̱ Yesu mbwak á̱ka̱tuk á̱niet ba̱ hyat gu da̱nian a̱ka̱tuk nyia̱ nzi̱t wu. A̱wot á̱ si̱ bu ta̱ngam nggu ma̱ng swuan ma̱ á̱niet ba̱ ka̱n kwi a̱ni, da̱nian zi̱ ka yet á̱tsotswat ma̱ng sang a̱bun a̱zaghyi A̱gwaza.

Currently Selected:

A̱romawa 4: TyapNT

Highlight

Copy