Tyai Á̱zanson 3

Wusika nang á̱ Lyuut Sot Á̱niet Khwi ji̱ Shya̱ Sa̱disu a̱ni

1“Lyuut a̱ta̱m tswa A̱gwaza wusika jini, gu nwuak sot á̱niet khwi ji shya̱ Sa̱disu a̱ni:

Ta̱m jini neet da̱ a̱vwuo a̱tyu

a̱ byia̱ tswá A̱gwaza a̱natat

ma̱ng á̱ta̱ngwat a̱natat a̱ni:

N ndyen nta̱m nang nyi nyia̱ a̱ni; á̱ nwuan nyin ta̱usa nang á̱tsotswat á̱niet khwi a̱ni. A̱wot nyi yet nkwom nia mami! 2Nyi shyip! Nyi tyia̱ swat khwi A̱gwaza nyin hu ku bwat a̱ni chet, kalak ku du khwu! N shya̱ nang nta̱m nyin na ntat si̱sak nang A̱gwaza nung wu nchat a̱ni bah. 3Nyi jhyung tyiet nang nyi ku tsa fa̱k, nyi si̱ nwuak a̱chuchuk a̱ni. Nyi ba̱ng tyiet hu gi̱ngi̱ng. Nyi ghwon a̱ka̱tuk nyia̱ nyin wu, nyi bu bwuok bai da̱ a̱vwuo nung! Ka̱ nyi lak shyip hu, n na mbai da̱ a̱vwuo nyin gba̱ngba̱ng di̱n jen nang nyi ndyen a̱ni bah; ma̱nang a̱tang ni̱ mbai a̱ni.

4A̱mgba̱m ma̱ng a̱nia, á̱ mbyia̱ á̱niet khwi á̱ghyang ma̱ a̱da̱dei mi̱ Sa̱disu ba̱ ka̱n tyia̱ á̱pyia̱ mba a̱na̱ndyung ma̱ng a̱shi̱shi̱k nyia̱ bah. Bibya na khwi a̱sai a̱jhya̱jhyat a̱yaatoot, ba̱ chong dundung ma̱ng a̱nung, mat ba̱ maai a̱nia.

5A̱mgba̱m á̱niet ba̱ swuo chet swanta hu a̱ni,

á̱ na kup ba a̱sai a̱jhya̱jhyat a̱yaatoot!

N na mak lyang lyulyoot mba hu

mami Ta̱ka̱da Swuan hu bah.

A̱wot n na ngyei lyulyoot mba hu

a̱zaghyi A̱tyia̱ nung ka

ma̱ng a̱yaata̱m tswá nggu ba;

n tak nang ba̱ ngyet á̱si̱ nung bya!

6Konyan wa chat lyen a̱ni, ku yet ta hwa gu myiai a̱fufwuo gu fa̱a̱k, a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni!

Wusika nang á̱ Lyuut Sot Á̱niet Khwi ji̱ Shya̱ Fila̱defiya a̱ni

7“Lyuut a̱ta̱m tswa A̱gwaza wusika jini, gu nwuak sot á̱niet khwi ji shya̱ Fila̱defiya a̱ni:

Ta̱m jini neet da̱ a̱vwuo a̱tyu

a̱ yet a̱za̱za̱rak ma̱ng a̱chuchuk a̱ni.

Nggu wa ba̱ng yaya tyok#3:7 Wa̱i a̱lyiat: Yaya tyok. Yaya wuni yet kidee Tyok Da̱wuda ja nang A̱gwaza tyia̱ Yesu ndyo mbwak a̱ni.

a̱gwam Da̱wuda wu.

Ka̱ a̱ khwuk nyinyiit hu,

a̱yin si̱ mi̱n nyim bah.

A̱wot ka̱ a̱ ma nyim huu,

a̱yin si̱ mi̱n khwuk bah.#3:7 Ish 22:22.

8N dyen a̱mgba̱m nkyang nang nyi nyia̱ a̱ni; nyi li, n ka̱n khwuk nyinyiit da̱nian nyin nang a̱yin si̱ mi̱n nyim a̱ni bah. N ndyen nyi byia̱ chet ma̱ chunchwiit. A̱mgba̱m ma̱ng a̱nia, nyi khwi á̱lyiat nung na; da̱ nyin, nyi fwuo lyen nung bah. 9Nyi fa̱k! N na ntyia̱ á̱niet ba̱ yet á̱si̱ tutu a̱tung A̱ta̱nyeang#3:9 Lyuut cha̱chaat: Sha̱tan. a̱ni, ba̱ nyia̱ ba̱ yet á̱tsatsak A̱yahudawa a̱ni, a̱wot a̱nia wa ba̱ ndi bah. Ba̱ bwoi a̱ka̱laa nia. N na ntyia̱ mba ba̱ kpaat a̱khwukhwut a̱zaghyi nyin. A̱jawa ba̱ na ndyen nang nyin bya ngyet á̱niet nang n chat a̱ni.

10Nang nyi ngbang a̱lyia̱ nyi si̱ nnyap nfwuo, nyi si̱ nkhwi doka nung ji a̱ni; mat a̱nia, n na nchok nyin di̱ a̱gba̱ndang jen mak ji̱ chobai tazwa a̱mgba̱m á̱niet mi̱ swanta ba, nang á̱ bye mak á̱niet ba̱ yet á̱si̱ mi̱ swanta ba a̱ni. 11N chobai ma̱ninika! Nyi ba̱ng a̱chuchuk tyiet nyin wu gi̱ngi̱ng, kalak a̱ghyang a̱niet wa si̱ ba̱ ta̱wap bung tyok ji, ji̱ yet zang nyin ji a̱ni.

12A̱mgba̱m á̱niet ba̱ swuo chet swanta hu a̱ni,

A̱gwaza nung wu na tyia̱

ba̱ yet tsutsuung A̱mali Nwuat Za̱nang nggu ka!

Da̱ mba, ba̱ na ghwut ba̱ ghwon A̱li Nwuat Za̱nang ka bah.

N na ndyuut zwunzwuo a̱lyoot A̱gwaza nung ji da̱ mba;

a̱wot ba̱ yet mman ma̱ a̱keang A̱gwaza nung ka!

A̱keang kani kya yet Urusha̱lima fai

nang A̱gwaza nung wu na ta̱m dyo neet tswazwa a̱ni.

A̱wot n bu na ndyuut a̱lyoot a̱fai nung ka da̱ mba!

13Konyan wa chat lyen a̱ni, yok gu myiai a̱fufwuo gu fa̱a̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni!

Wusika nang á̱ Lyuut Sot Á̱niet Khwi ji̱ Shya̱ La̱wudikiya a̱ni

14“Lyuut a̱ta̱m tswa A̱gwaza wusika jini, gu nwuak sot á̱niet khwi ji shya̱ La̱wudikiya a̱ni:

Ta̱m jini ja neet da̱ a̱vwuo a̱tyu

a̱ yet ‘Samba̱rka A̱gwaza’ a̱ni,

a̱ bu yet a̱tsotswat ma̱ng a̱tsatsak

a̱tyu a̱ nwuat sheda a̱lyiat A̱gwaza a̱ni!

Nggu wa yet a̱tyin

nang A̱gwaza mmat kuzang kyang mi̱ swanta hu a̱ni!

15N dyen a̱mgba̱m nta̱m nang nyi nyia̱ a̱ni, nyi shi̱ri̱m bah. Da̱ nyin, nyi shwai bah. Ku á̱ wa nyia̱ nyi shi̱ri̱m ku nyi shwai wa gba̱m! 16A̱wot mat nang nyi ngyet a̱kache nang a̱duduu a̱sa̱khwot a̱ni; nyi shi̱ri̱m bah, da̱ nyin nyi shwai bah; n bwat da̱dei n kwoi nyin a̱bwonu nung ka n gweam a̱ta̱usa! 17Nyi nyia̱, ‘Zi̱ byia̱ zwá! Zi̱ byia̱ kuzang kyang nang zi̱ chat a̱ni! Zi̱ bu chat kyang bah!’ A̱wot nyi fi̱k nang nyi ngyet á̱buk á̱niet bah; kyang kunak, á̱niet a̱fi̱fan, ma̱ng á̱niet chong ka̱gbang!

18Mat a̱nia, n tyia̱ nyin a̱lyiat; nyi san zi̱nariya nang á̱ fwu ma̱ng long a̱ni da̱ a̱vwuo nung, a̱wot nyi ka shya̱ a̱tsatsak nzwá. Nyi bu san a̱sai a̱yaatoot da̱ a̱vwuo nung, nyi nkup ka̱gbang nyin ji. A̱wot nyi bu san kan á̱ghyi, nyi ntyia̱ mi̱ tswá á̱ghyi nyin ji, mat nyi ka nwuan shansham! 19N ni̱ ntyiet, n bu gba á̱niet ba nang n chat wa a̱ni. Mat a̱nia, nyi kwan ba̱t nyi ghwon a̱ka̱tuk nyia̱ nyin wu, nyi khwi A̱gwaza! 20Nyi fa̱k! Di, nung gwa wu! N gyong a̱zanunyuo ka tsot nyinyiit hu. Ka̱ nyi fa̱k a̱nwuat nung ka, nyi si̱ khwuk nyinyiit hu; n na nnwuo, a̱wot zi̱ na ya kyayak dundung nang á̱kpa̱ndang á̱ghyang a̱ni.

21A̱mgba̱m á̱niet ba̱ swuo chet swanta hu a̱ni,

ba̱ na shya̱ a̱vwuo nswat tyok ma̱ng a̱nung;

ma̱nang n ku nswuo chet swanta hu,

n si̱ nswan ma̱ng A̱tyia̱ nung wu ma̱ a̱gba̱ndang chuk tyok nggu wu a̱ni!

22Konyan wa chat lyen a̱ni, ku yet ta hwa gu myiai a̱fufwuo gu fa̱a̱k, a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni!”

Currently Selected:

Tyai Á̱zanson 3: TyapNT

Highlight

Compare

Copy