Tyai Á̱zanson 15
15
A̱bwom Musa ma̱ng si̱ Fi̱ng A̱nfwuk
1N si̱ bu ndi a̱gba̱ndang kyang a̱ghyang Ma A̱gwaza tswazwa ku yet si̱ a̱ga̱de ma̱ng a̱ri̱bi̱di a̱ni! A̱yaata̱m tswá A̱gwaza a̱natat ba̱ ba̱ng khám mbyep a̱natat. Jija yet mbyep na̱ nngaan a̱ni, na̱ na tyak a̱mgba̱m a̱tsotswat mwai lyen A̱gwaza wu.
2N si̱ bu kin di kyang ghyang a̱zaghyi nung, ku li nang kyai a̱sa̱khwot ma̱dubi á̱ kyiai ma̱ng long a̱ni! N si̱ bu ndi á̱niet ba ba̱ swuo chet a̱ka̱tuk nyam a̱yit a̱wa ma̱ng ghwughwu nggu hu ma̱ng la̱mba a̱lyoot nggu hu a̱ni! N si̱ ndi nang ba̱ yong da̱ kyai a̱sa̱khwot ma̱dubi, ba̱ ba̱ng zunzom nang A̱gwaza nwuak ba a̱ni. 3A̱wot nang ba̱ bwom a̱bwom Musa ka, a̱khwo A̱gwaza wu, ma̱ng a̱bwom Fi̱ng A̱nfwuk ka nyia̱:
“Nwan A̱gwaza, a yet A̱tyoli
a̱ byia̱ a̱mgba̱m tyok a̱ni!
Nta̱m ang na yet a̱tsotswat wa ma̱ng nkyang a̱ga̱de!
A̱gwam a̱mgba̱m nnwap swanta na,
nvak ang na yet a̱tsotswat wa!
4Ka̱a̱t A̱gwaza!
A̱nyan wa na nwai fa̱k a̱wun ang,
a̱wot a̱ bu nwuak a̱lyoot ang ka shi?!
Mat nwan wa ma̱nyin ang yet A̱za̱za̱rak wu!
A̱mgba̱m nnwap mi̱ bibyin swanta na na bai na̱ kwok ang ntong,
mat á̱ tyai a̱tsotswat nta̱m ang wu kpa̱sai!”
Á̱ Koot Mbyep A̱natat na̱ Shya̱ mi̱ Khám A̱natat ji a̱ni
5A̱jawa n si̱ bu kin di A̱li Nwuat Za̱nang A̱gwaza ka ka̱ shya̱ tswazwa ka a̱ni; ka̱ yet A̱za̱za̱rak Suswak#15:5 Lyuut cha̱chaat: “Suswak ku byia̱ a̱kpa̱kpai nfang/Suswak ku Tak Kpa̱sai.” A̱gwaza nang á̱ khwuk á̱ ghwon gang a̱ni. 6A̱yaata̱m tswá A̱gwaza a̱natat ba̱ ba̱ng khám mbyep a̱natat ji a̱ni, si̱ ghwut Mali Nwuat Za̱nang A̱gwaza ka nang ba̱ khwi a̱mya̱myat a̱yaatoot wulyin ba̱ kwi á̱ghyi a̱ni, nang ba̱ vwuoi a̱zwuan zi̱nariya di̱ nfi̱ri̱ng mba na! 7A̱jawa kyang swuan nyiung mami nkyang nswuan naai a̱nia, si̱ nwuat a̱yaata̱m tswá a̱natat khám zi̱nariya a̱natat tyentyang ma̱ng a̱tsotswat mwai lyen A̱gwaza wu, nggu wa swuan si̱ nat sang sangba̱p.
8A̱li Nwuat Za̱nang A̱gwaza ka si̱ nhyat ma̱ng a̱chunchung na ghwut á̱ neet mi̱ a̱kyenkyai shi ma̱ng chet A̱gwaza hu a̱ni! Á̱ si̱ mbyia̱ a̱tyu a̱ maai a̱ nwuo Mali Nwuat Za̱nang A̱gwaza ka a̱ni bah; si̱ nang a̱yaata̱m tswá A̱gwaza a̱natat a̱bya ntyak khwot khám mbyep a̱natat ji.
Currently Selected:
Tyai Á̱zanson 15: TyapNT
Highlight
Share
Compare
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
