Tyai Á̱zanson 13

A̱ka̱tuk Nyam A̱yit Ghwut mi̱ Kyai A̱sa̱khwot

1N si̱ kin di̱ a̱ka̱tuk nyam a̱yit nang ji̱ ghwut mi̱ kyai a̱sa̱khwot hu! Ji̱ byia̱ pyipyia̱ a̱natat ma̱ng a̱ti̱tam swak a̱ni. Kuzang a̱ta̱m si̱ byia̱ bung tyok. A̱wot di̱ kuzang a̱pyia̱, á̱ si̱ ndyuut a̱lyoot ka̱ nyia̱ A̱gwaza lihyat a̱ni. 2A̱ka̱tuk nyam a̱yit wu nang n di a̱ni tai chyuo, a̱ si̱ byia̱ kpai nang sok a̱ni, a̱wot a̱ si̱ byia̱ a̱nu nang zaki a̱ni! A̱wot a̱gba̱ndang a̱ka̱tuk nzwuo wu a̱ byia̱ nfeap na a̱ni, si̱ ka̱u a̱ka̱tuk nyam a̱yit wu chet nggu hu ma̱ng a̱gba̱ndang chuk tyok ma̱ng a̱gba̱ndang tyok.

3N si̱ ndi a̱pyia̱ a̱nyiung mi̱ pyipyia̱ a̱ka̱tuk nyam a̱yit hu á ngyei á̱ bwuo nka kun ku na hyat ka a̱ni; a̱wot kun hu si̱ choot! A̱mgba̱m swanta hu si̱ fa̱k a̱ga̱de mat a̱ri̱bi̱di a̱wa! A̱wot ba̱ si̱ kwok a̱ka̱tuk nyam a̱yit wu ntong. 4Á̱niet swanta ba si̱ kwok ntong a̱zaghyi a̱gba̱ndang a̱ka̱tuk nzwuo a̱ byia̱ nfeap na a̱ni. Mat, nggu wa nwuak a̱ka̱tuk nyam a̱yit wu tangka̱i tyok a̱hwa. Ba̱ si̱ bu kwok ntong a̱zaghyi a̱ka̱tuk nyam a̱yit wu nyia̱, “A̱nyan wa byia̱ shi nang nyam a̱yit ji a̱ni? A̱nyan wa maai a̱ kwan ma̱ng a̱nji?”

5A̱jawa á̱ si̱ nwuak a̱ka̱tuk nyam a̱yit wu jen ji̱ lyiat A̱gwaza a̱gba̱ndang lihyat. A̱wot á̱ si̱ bu nwuak a̱ka̱tuk nyam a̱yit wu tyok gu nyia̱ kuzang kyang gu chat a̱ni, ba̱ng si̱ nat zwát swak naai ma̱ a̱feang (42)#13:5 Wa̱i a̱lyiat: Zwát swak naai ma̱ a̱feang. Si̱ huni nat cha̱chaat ma̱ng mmam chyikwop jhyung ma̱ng chyi sweang mi̱ nswak a̱taa (1260), ku a̱lyia̱ a̱tat ma̱ng á̱kum (3 1/2).. 6A̱ si̱ lyiat A̱gwaza a̱ka̱tuk lihyat; a̱ tsa mbyian a̱lyoot A̱gwaza ka ma̱ng a̱vwuo nswat#13:6 Lyuut cha̱chaat: “Suswak gu hu.” nggu ka, bi̱ri̱ng ma̱ng á̱niet ba̱ swuat Ma A̱gwaza tswazwa ka a̱ni.

7Á̱ si̱ shim a̱ka̱tuk nyam a̱yit wu ndyo gu nyia̱ zwang ma̱ng á̱za̱za̱rak á̱niet A̱gwaza ba, a̱wot gu bu swuo chet mba. A̱wot á̱ si̱ bu nwuak gu tyok tazwa kuzang kwai, nwap, a̱lyem, ma̱ng a̱byin. 8A̱wot a̱mgba̱m á̱niet ba̱ shya̱ mi̱ swanta hu a̱ni, si̱ kwok ntong a̱zaghyi a̱ka̱tuk nyam a̱yit wu. Bibya yet á̱niet ba nang á̱ nwai lyuut lyulyoot mba hu mi̱ Ta̱ka̱da Nswuan hu neet nang á̱ ka̱n mmat swanta hu bah. Ta̱ka̱da hu ku yet si̱ Fi̱ng A̱nfwuk hu nang á̱ ku faat#13:8 Ku: “Bibya yet á̱niet ba nang á̱ nwai lyuut lyulyoot mba hu mi̱ Ta̱ka̱da Swuan Fi̱ng A̱nfwuk hu nang á̱ ku faat neet nang á̱ ka̱n mmat swanta hu a̱ni bah.” a̱ni.

9Konyan wa chat lyen a̱ni,

yok gu myiai a̱fufwuo,

gu fa̱a̱k, a̱ bu fi̱k!

10Konyan wa nang ku yet gu a̱daat gu nat khwo mi̱ jaru;

á̱ na nat ma̱ng a̱nggu mi̱ jaru ji.

Konyan wa nang ku yet gu a̱daat gu khwu a̱khwu ntswat;

a̱ na khwu a̱khwu ntswat kya.#13:10 Ku: “Ka̱ a hyat a̱yin ma̱ng tswat, nwan meang á̱ na hyat ang ma̱ng tswat ja.”

Si̱ huni fa nang ku ngyet ta hwa á̱za̱za̱rak á̱niet khwi A̱gwaza ba̱ gbang a̱lyia̱ ma̱ng nyap fwuo di̱ yong tsotswat di̱n jen ya̱shuk.

A̱ka̱tuk Nyam A̱yit A̱ghyang a̱ Ghwut A̱byin a̱ni

11A̱jawa n si̱ bu kin di a̱ka̱tuk nyam a̱yit a̱ghyang gu ghwut a̱byin! A̱ byia̱ a̱ti̱tam a̱feang nang a̱si̱ fi̱ng a̱nfwuk a̱ni. A̱wot a̱ si̱ lyiat ma̱ng a̱nwuat nang a̱ka̱tuk nzwuo a̱ byia̱ nfeap na a̱ni. 12A̱ si̱ nyia̱ ta̱m ma̱ng a̱mgba̱m tyok a̱ka̱tuk nyam a̱yit hu a̱ yet a̱son ka a̱ni. A̱ si̱ bu tyia̱ a̱mgba̱m swanta hu ma̱ng á̱niet ba̱ nshya̱ ma̱ nhu a̱ni, ba̱ kwok ntong a̱zaghyi a̱ka̱tuk nyam a̱yit a̱ yet a̱son ka nang á̱ choot gu fa̱t a̱khwu hu a̱ni.

13A̱ka̱tuk nyam a̱yit wuni si̱ nyia̱ a̱cha̱chet nkyang a̱ga̱de! A̱ si̱ tyia̱ a̱lya̱ra̱p ndong si̱ ghwut neet kyai tswazwa a̱ bai a̱byin nang konyan nwuan! 14A̱wot a̱mgba̱m nkyang a̱ga̱de nang á̱ shim a̱ka̱tuk nyam a̱yit wuni gu nyia̱ a̱kwonu a̱ka̱tuk nyam a̱yit a̱ yet a̱son ka a̱ni; a̱ si̱ laai a̱mgba̱m á̱niet ba̱ shya̱ mi̱ swanta hu a̱ni.#13:14 TyÁ̱ 16:13; 19:20. A̱ si̱ tyia̱ á̱niet swanta ba ba̱ nyia̱ ghwughwu a̱ka̱tuk nyam a̱yit a̱ yet a̱son ka, nang á̱ ku bwuo nggu kun hu a̱ si̱ shim a̱khwu, a̱wot a̱ si̱ bu shyip ma̱ng swuan a̱ni.

15Á̱ si̱ shim gu ndyo gu tyia̱ swuan mi̱ ghwughwu a̱ka̱tuk nyam a̱yit a̱ yet a̱son ka a̱ni, da̱nian ghwughwu hu ku ka lyiat. A̱wot ghwughwu a̱ka̱tuk nyam a̱yit hu si̱ nwuak doka nyia̱ a̱tyu a̱ lak kyuak gu ntong a̱ni, ku yet ta hwa á̱ hyat a̱tyu a̱wa.

16A̱ka̱tuk nyam a̱yit wu a̱ yet a̱feang wu a̱ni, si̱ tyia̱ á̱ si̱ chyat konyan zwunzwuo di̱ mbwak yak ku a̱zakpeang; a̱gba̱ndang a̱yin ma̱ng a̱da̱dei a̱yin, a̱tyu nzwá ma̱ng a̱kunak, a̱khwo ma̱ng a̱tyu a̱ nwai yet a̱khwo a̱ni. 17Á̱ mbyia̱ a̱tyu a̱ na san ku a̱ lyap kyang di̱ mi̱n zwunzwuo a̱ja a̱ni bah; si̱ mi̱ a̱tyu a̱ byia̱ zwunzwuo ji yet a̱lyoot a̱ka̱tuk nyam a̱yit a̱ yet a̱son ka, ku zwunzwuo ji fa la̱mba a̱lyoot a̱ka̱tuk nyam a̱yit a̱ja a̱ni. 18Ku yet a̱sham á̱ ntyia̱ mumwang a̱ji. A̱tyu a̱ byia̱ a̱tsatsak a̱di̱dam a̱ni, a̱ na lyen kyang á̱ fa ma̱ng zwunzwuo a̱ka̱tuk nyam a̱yit a̱ yet a̱son ka a̱ni. Mat zwunzwuo ji yet la̱mba a̱tyubishyi hwa. La̱mba a̱ka̱tuk nyam a̱yit a̱hwa, yet chyi a̱taa ma̱ng swak a̱taa ma̱ a̱taa (666)#13:18 Lyuut ghyang mbyia̱: “Chyi a̱taa ma̱ng swak ma̱ a̱taa (616).”.

Currently Selected:

Tyai Á̱zanson 13: TyapNT

Highlight

Compare

Copy