A̱ga̱la̱tiyawa 2

A̱yaata̱m Yesu ba San Bulut Mbwak Nfeang

1Nang ndyia̱ swak ma̱ naai nswak a̱ni, n si̱ bu mbwuok nat Urusha̱lima. Da̱ a̱chyet a̱ka̱feang kani, Ba̱nabat ma̱ng Titut ku shya̱ ndung ma̱ng a̱nung. 2N ku nat Urusha̱lima hu, mat A̱gwaza wa ma̱ a̱pyia̱ nggu ku tyai nyia̱, n nat.

Jen nang n shya̱ a̱ja a̱ni, á̱ si̱ yorong a̱yaakwak a̱son sot á̱niet khwi Urusha̱lima ba, da̱ a̱gbang a̱nyiung, n si̱ nyia̱ a̱tung ma̱ng a̱mba. A̱wot n si̱ tat mba á̱ghyi tazwa A̱sham Nkhang nang n shei Nnwap na̱ nwai yet A̱yahudawa a̱ni. N ku nchat n di nang á̱ shim a̱lyiat nung na. Kalak ta̱m shei A̱sham Nkhang hu nang n ka̱n nyia̱ di̱n jen ji swak a̱ni, ma̱ng si̱ hu nang n nyia̱ ma̱nini a̱ni, ku yet a̱buk kyang. 3A̱wot a̱yaakwak a̱son ba si̱ li̱n nung a̱ma. Da̱ mba ba̱ yong mi̱ chet nyia̱ á̱ tyia̱ Titut, a̱kpa̱ndang a̱chyet nung wu, mi̱ nchen bah ku nang gu ngyet a̱tyu A̱helenawa a̱ni.

4Á̱ ku doot a̱lyiat tyia̱ mi̱ chen nani, mat á̱niet tyiet bwoi a̱ka̱laa ku nshya̱ dundung ma̱ng a̱nzi̱t. Ba̱ si̱ kyiak á̱pyia̱ mba nang á̱tsatsak á̱niet khwi a̱ni, ba̱ si̱ chat ba̱ ka tyia̱ Titut mi̱ chen. Á̱niet a̱bya ku bang á̱ nwuo ma̱ nzi̱t, da̱nian ba̱ ka chat ba̱ khap zi̱t ma̱ng swat sa̱t hu nang zi̱ byia̱ di̱ khwi Kristi Yesu hu a̱ni. Ba̱ si̱ chat ba̱ bwuak zi̱t, ba̱ nyia̱ nzi̱t khwo zi̱ khwi taada tyei mi̱ chen A̱yahudawa ji. 5A̱wot zi̱ si̱ lak mba ndyo, ku da̱ a̱banjen ma̱ chunchwiit zi̱ ku shim mba ndyo bah. Zi̱ ku nyia̱ a̱nia zi̱ ka chok a̱chuchuk A̱sham Nkhang Yesu wu, da̱nian nyi ka khwi nka shansham.

6A̱wot a̱yaakwak a̱son á̱niet khwi ku byia̱ kyang nang ba̱ na mbeang da̱ A̱sham Nkhang Yesu nang n shei a̱ni bah. (Mat a̱vwuo yong mba ka nang á̱ nkyiak mbaa ba̱ yet a̱cha̱chet a̱yaakwak a̱son a̱ni, ka̱ yet kyang da̱ a̱vwuo nung bah, mat A̱gwaza khai a̱yin bah). 7A̱wot da̱ a̱kwonu a̱kya, ba̱ ku li nang A̱gwaza nnwuak nung ta̱m shei A̱sham Nkhang hu da̱ a̱vwuo Nnwap na̱ nwai yet A̱yahudawa a̱ni#2:7a Lyuut cha̱chaat: “Á̱niet nang á̱ nwai tyia̱ mi̱ nchen a̱ni.”; ma̱nang gu nnwuak Bitut ta̱m shei A̱sham Nkhang hu da̱ a̱vwuo A̱yahudawa ba a̱ni#2:7b Lyuut cha̱chaat: “Á̱niet nang á̱ tyia̱ mi̱ nchen a̱ni.”. 8Mat A̱gwaza wu a̱ khai nung n gyet a̱ta̱m shei A̱sham Nkhang da̱ a̱vwuo Nnwap na̱ nwai yet A̱yahudawa a̱ni. Ma̱ nggu wa bu khai Bitut gu yet a̱ta̱m shei A̱sham Nkhang wu da̱ a̱vwuo A̱yahudawa ba.#2:8 Lyuut cha̱chaat: “Á̱niet nang á̱ tyia̱ mi̱ nchen a̱ni.”

9A̱tsak a̱lyiat, Yakubu, Bitut#2:9a Lyuut cha̱chaat: Kefat. ma̱ng Yoona, a̱yaata̱m Yesu ba, bibya nang á̱ ku kyiak nang a̱cha̱chet a̱yaakwak a̱son sot á̱niet khwi ji a̱ni; ba̱ si̱ fi̱k nang A̱gwaza wa, mat shok nggu ji, nnang nung za̱nang chet shei A̱sham Nkhang ji. Mat a̱nia, ba̱ si̱ swuo bwak ma̱ng a̱nung mbeang Ba̱nabat, ku tak nang ba̱ nsan nzi̱t, zi̱ yet á̱kpa̱ndang ta̱m mba. Ba̱ si̱ tyia̱ nzi̱t gba̱gbak, zi̱ ka ya a̱son mi̱ shei A̱sham Nkhang ka da̱ a̱vwuo Nnwap na̱ nwai yet A̱yahudawa a̱ni. Mba meang, ba̱ si̱ shim ba̱ nat da̱ a̱vwuo A̱yahudawa ba#2:9b Lyuut cha̱chaat: “Á̱niet nang á̱ tyia̱ mi̱ nchen a̱ni.” ba̱ ya a̱son mi̱ shei mba A̱sham Nkhang ka.

10Mi̱ kyang nyiung hwa, nang ba̱ ku nyia̱ zi̱ yok bwung bah, huhwa yet; zi̱ ya a̱son ma̱ng beang á̱kunak na. Nung meang, n si̱ mbyia̱ fwuo za̱m n nyia̱ ta̱m a̱hwa.

Bulut Tak Bitut Kpa̱sai nang gu Nghyuap

11Á̱ghyang á̱tuk, Bitut si̱ bai a̱keang Antakiya#2:11 Wa̱i a̱lyiat: Antikiya. Bulut ma̱ng Ba̱nabat ku shya̱ Antakiya ba̱ si̱ tyiet á̱niet khwi di̱n jen a̱ja. Nta̱m 11:25-30., ku si̱ yet nung ta hwa n tak ma̱ng a̱nggu ghyuap nggu hu kpa̱sai a̱zaghyi á̱niet. Mat kyang hu gu ku nyia̱ a̱ni, ku tyia̱ bah.

12Jen nang Bitut ntsa bai Antakiya a̱ni, a̱ si̱ ya kyayak ma̱ng á̱niet khwi á̱ghyang ba̱ yet Nnwap na̱ nwai yet A̱yahudawa nang á̱ ka̱n nwai tyia̱ mba mi̱ chen a̱ni. A̱wot á̱ si̱ labeang bah, nang á̱kpa̱ndang Yakubu á̱ghyang ba̱ yet A̱yahudawa mbai a̱ni, Bitut si̱ kin dak ya a̱son ma̱ng ya nkyayak na ndung ma̱ng á̱niet khwi ba̱ yet Nnwap na̱ nwai yet A̱yahudawa a̱nia a̱ni. Mat Bitut ku fa̱k a̱wun sot A̱yahudawa ba̱ yong nyia̱ ku yet ta hwa á̱ tyei á̱niet khwi ba̱ yet Nnwap na̱ nwai yet A̱yahudawa a̱ni mi̱ chen. 13Nang ku ndi a̱nia a̱ni, A̱yahudawa á̱ghyang ba̱ ku yet á̱niet khwi ba a̱ni, si̱ khwi kidee a̱bubuk nyia̱ nang Bitut nyia̱ a̱ni. Ma a̱nia wa Ba̱nabat meang, ba̱ si̱ tyia̱ a̱ si̱ teap a̱ khwi mbaa di̱ kidee a̱bubuk nyia̱ mba wu.

14Jen nang n di ba̱ nwai khwi a̱chuchuk a̱ shya̱ ma̱ A̱sham Nkhang ka shansham a̱ni, n si̱ ntak ma̱ng Bitut kpa̱sai ghyuap nggu hu a̱zaghyi a̱mgba̱m á̱niet khwi ba nyia̱, “Nang a ngyet a̱tyu A̱yahudawa a̱ni, a̱mgba̱m ma̱ng a̱nia, a khwi doká A̱yahudawa ji bah. A̱wot a swan ya tangka̱i kyayak nang Nnwap na̱ nwai yet A̱yahudawa ya a̱ni. Ka̱ a nyia̱ a̱nia, yihwa mbyia̱ nang a ntyei Nnwap na̱ nwai yet A̱yahudawa a̱ni na̱ khwi doká A̱yahudawa ji?

15“Nzi̱t a̱feang, zi̱ neet mi̱ kwai A̱yahudawa ji a̱ni, zi̱ sang doka ji nang Nnwap na̱ nwai yet A̱yahudawa a̱ni bah, á̱si̱ nang A̱yahudawa ba kyiak nang á̱niet a̱ka̱tuk nyia̱ a̱ni. 16A̱mgba̱m ma̱ng a̱nia, zi̱ fi̱k nang A̱gwaza ntak kpa̱sai nang gu nkyiak a̱tyubishyi a̱tsotswat ma̱ng sang a̱bun a̱zaghyi nggu a̱ni, mat nwuak fwuo di̱ mun á̱pyia̱ ma̱ng Kristi Yesu wa, kang ma̱ng khwi doka. A̱wot zi̱ ka̱n nwuak fwuo di̱ Kristi Yesu, da̱nian A̱gwaza a̱ ka tak kpa̱sai nang gu nkyiak zi̱t zi̱ yet á̱tsotswat á̱niet ma̱ng sang a̱bun a̱zaghyi nggu, mat nwuak fwuo nzi̱t hu di̱ Kristi Yesu, kang ma̱ng khwi doka ji. Mat, á̱ mbyia̱ a̱tyu nang A̱gwaza na kyiak gu yet a̱tsotswat a̱zaghyi nggu di̱ khwi doka Musa ja a̱ni bah.”

17A̱wot ki̱ zi̱ chat vak nang A̱gwaza na nkyiak zi̱t nang á̱tsotswat á̱niet, mat nwuak fwuo di̱ mun á̱pyia̱ ma̱ng Kristi a̱ni, A̱yahudawa á̱ghyang na kyiak zi̱t nang zi̱ ni̱ yet á̱niet a̱ka̱tuk nyia̱ ba̱ nwai khwi doka ji ma̱nang Nnwap na̱ nwai yet A̱yahudawa a̱ni. Si̱ huni fa, Kristi tyia̱ zi̱ yet á̱niet a̱ka̱tuk nyia̱ byaa? Kaai, ku ma̱ chunchwiit! 18Ka̱ nung a̱tyu A̱yahudawa n bu na mbwuok khwi doka nang n ka̱n dak a̱ni, a̱tsak a̱lyiat, n na ngyet a̱tyu a̱ka̱tuk nyia̱ wa za̱m.

19Mat jen nang n kwan khwi doka ji, a̱wot n si̱ ndat a̱ni, ji̱ ni̱ tak nang n gyet a̱tyu a̱ka̱tuk nyia̱ wa. Mat a̱nia, n kyiak a̱pyia̱ nung nang kwom a̱ni da̱ a̱vwuo doka ji. N ghwon kwan khwi kyang hu nang doka ji chat a̱ni, da̱nian n ka swan swat ku myim A̱gwaza a̱ni.

20Á̱ ka̱n kpang za̱kwa a̱ka̱tuk nyia̱ nung ji da̱ a̱team a̱khwu ndung ma̱ng Kristi. Ma̱ninika, n swan swat a̱pyia̱ nung hwa bah. A̱wot n swan swat Kristi hwa. A̱wot n swan mi̱ vam mi̱ swanta huni di̱ nwuak fwuo di̱ khwi Nggwon A̱gwaza. Kikya chat nung, ka̱ si̱ nwuak a̱pyia̱ nka da̱nian nung.

21A̱wot n si̱ mi̱n fwuo nang A̱gwaza nsan zi̱t mat shok nang gu nyia̱ nzi̱t ndyo a̱ni bah. Mat, ka̱ á̱ wa nyia̱ khwi doka hu si̱ mi̱n tyia̱ A̱gwaza a̱ kyiak a̱tyubishyi nang a̱tsotswat a̱tyu sang a̱bun a̱zaghyi nggu a̱ni, si̱ a̱khwu Kristi ka yet a̱buk kyang wa!

Currently Selected:

A̱ga̱la̱tiyawa 2: TyapNT

Highlight

Copy